أيوه آه

أعزائي

كل عام وانتم جميعا بخير 

سنه جديده جايه وسنه قديمه في العد التنازلي 

سنه فاتت بكل افراحها واحزنها  بخيرها وشرها

وسنه جديده ومعاها امنيات حلوه 

وأمل اننا نحقق لمصر الاستقرار والطمانينه 

ويرحل عنا المجلس العسكري

يارب تقدروا تحققوا جزء من امنياتكم في سنه 2012

ان لم تكن جميعها 

 ------ 

500 ضابط ومجند 

3 دبابات

4 مدرعات 

لتامين النقل من بورتو طره الي اكاديميه الشرطه في التجمع الخامس

واغلاق طريق الاوتوسترات لمده 45 دقيقه 

وكمين مروري في زهراء المعادي

وآخر في في منطقه الجولف 

كل ده عشان عيون اهل طره 

خايفين عليهم ولازم الزفه زي زمان 

نقول ايه كانك يا ابو زيد ماغازيت

------

جمال وعلاء والعادلي ومساعديه

ظهروا في الجلسه بدون كلابشات 

وذلك اثناء الانتظار للمحاكمه 

وياعيني المصابين في احداث مجلس الوزراء 

متكلبشين في اسرتهم رغم وجودحراسه امنيه عليهم 

هي دي الانسانيه 

اين جمعيات حقوق الانسان اللي دوشونا ؟

ده اذا كانوا بيعتبروا ان اهل مصر من فصيله البني ادمين

------

شايفه ان مبارك مش بيتحاكم علي انه متهم يستحق الشنق

لكن بيحاكم علي انه بريء 

وبيبحثوا عن ادله البراءه 

وشكله مش واحد عدي 80 سنه 

وصحته تمام التمام يعني صحه وعافيه 

صحه تهد شعب 85 مليون تاني وتالت 

نقول ايه مش في جاكوزي  ومساج وحقن اوزون 

ورعايه كامله  والحرس بيطبطب 

والمجلس العسكري بيهدهد وعارف ومتاكد ان مافيش اي حد 

حيقرب منه وعايش عيشه الملوك ومطمن ومريح باله علي الاخر

والشعب هو اللي بيهري وينكت 

وسوزي بتغني وتقول كايده العزال انا من يومي 

وهو بيرد عليها ويقولها ايوه آه 

علي اعتبار اهل المحروسه هما العزال 

ولسه ياما حنشوف 

------

ضجت قاعه المحكمه امس بالضحك 

بعد ان تحدث محامي من المدعين بالحق المدني وقال 

يجب محاسبه الرئيس السابق 

محمد انور السادات 

بتهمه قتل المتظاهرين 

هو اكيد كان نايم وصحي علي المرافعه 

هم يبكي وهم يضحك 

------

بعد استشهاد طالب الطب علاء عبدالهادي 

منذ مايقرب من 10 ايام 

ظهرت نتيجه امتحانه بالفرقه الخامسه 

في ( راوند الصدر )

وكانت درجته 9.5 من 10

بدرجه امتياز 

وسيتم اطلاق اسمه علي مسجد الكليه

وانتهت الكليه من اقامه نصب تذكاري له 

رحم الله الشهيد علاء عبدالهادي 

حاجه توجع القلب 

------

انخفضت اعداد السائحين الوافدين الي مصر 

بنسبه 30% عن العام السابق 

عدد السائحين خلال ديسمبر 2010 

29 الف سائح 

وصلوا علي متن 2135 رحله طيران 

انخفض العدد حتي يوم 24 ديسمبر 2011الي 

19 الف سائح 

وصلوا علي متن 1419 رحله طيران

بصراحه دي حتبقي كارثه لو استمرت 

لان السياحه بتدخل للبلد عمله صعبه 

والسياحه بتشغل الفنادق اللي بدورهم بيشغلوا 

موردين اللحوم والخضار والفاكهه  والبقاله والالبان والاجبان 

حتي موردين الورد الفنادق بتشغلهم 

وبالتالي الموردين حيغلوا الاسعار لتجار التجزئه 

وده حينعكس علي المواطن الغلبان الكادح 

لان الاسعار حتغلي عليه اكتر ما هي غاليه 

وكمان السنه دي مافيش احتفالات في معظم الاوتيلات كالعاده 

في نهايه كل عام 

حتي محلات لعب الاطفال كانت بتبعت واحد لابس سانتا كلوز 

يدي الاطفال هدايا العام الجديد 

بطلوا لان التكلفه بقت غاليه 

حتي الاطفال اتحرموا من فرحتهم  بالعام الجديد 

عارفه طبعا ان كتير حيضحكوا عليه ومش حيعجبهم اني حزينه زي الاطفال 

اكيد اللي عنده اطفال طول شهر ديسمبر بيمنيهم بزياره سانتا كلوز 

وده بيخليهم يزاكروا كويس وياكلوا كويس ويسمعوا الكلام 

خوفا من زعل سانتا كلوز منهم وبالتالي حرمانهم من هدايا العام الجديد 

بجد والله دي حاجه بتفرح الكبار قبل الاطفال 

مقدره ان في منكم كتير حيعتبروا ان كلامي عته او هبل 

بس برضه زعلانه لاني بدور علي سانتا كلوز 

ويارب القيه 

------

ياتري المجلس العسكري للقوات المسلحه 

وجهاز الشرطه 

حيحموا الكنائس في قداس عيد الميلاد المجيد

زي ماحموا اللجان الانتخابيه 

اقول زي ورده 

واتمني اتمني 

------

آه قبل ما امشي بشكر اللي حيعتبروني مجنونه او عبيطه 

لغياب سانتا كلوز 

كل عام وانتم بالف خير

وسنه جديده علينا سعيده وعلي مصر 

بسرعه قولوا امين 

اشوفكم السنه الجايه 

واوعوا اوعوا تقلبوا الصفحه 

ابقوا معي