31‏/1‏/2012

هنا شيكاغو ( القاهره سابقا )

أعزائي
لقيت ان ده العنوان المناسب لما يحدث في مصر الان
بجد بقينا ولا شيكاغو في السطو المسلح والقتل
---
اليوم الثلاثاء وفي وضح النهار
اقتحمت مجموعه من 5 ملثمين مكتب بريد حلوان
واستولوا علي 150 الف جنيه
بعد ان اشهروا الاسلحه الناريه في وجوه الماره والعاملين بالمكتب
واستقلوا سيارتهم ولاذوا بالفرار
ياصلاة النبي
---
تعرض بنك HSBC
المعروف ببنك الهس بس
بالتجمع الخامس
صباح امس الاثنين لسطو من مجهولين اثناء تواجد عملاء البنك
وقد فوجئوا بهجوم ملثمين ومعهم اسلحه اليه
وطلبوا من العملاء والموظفين النوم علي الارض
كويس ان ماطلبوش منهم النوم في العسل
حتي يستطيعوا الاستيلاء علي الاموال الموجوده بالبنك
مش كتير 6 مليون
كانوا 4 يستقلون سياره شيروكي بلوحات مضروبه
واعلنت حاله الطواريء في البنوك الموجوده بالتجمع الخامس
وتم صرف العملاء والاغلاق
حتي لا يتم السطو علي اي بنك  موجود بنفس المنطقه
طيب بعدها مش حيفتحوا والا حيفضلوا خايفين وقافلين
الاغلاق مش حل
---
تعرضت يوم الاحد الماضي شركه صرافه بشرم الشيخ في السوق التجاري
لسطو مسلح بواسطه 4 ملثمين واسلحه اليه
وقد اقتحم اثنان منهم الشركه والاتنان الاخرين وقفوا ناضورجيه
وبعد السرقه واثناء خروجهم اعترض طريقهم العاملين بالسوق
فاطلقوا الاعيره الناريه بطريقه عشوائيه وتمكنوا من الهرب
وقد اسفر عن ذلك مصرع سائح فرنسي
واصابه الماني
واثنين من العاملين بالصرافه
وخدوا بس 2 مليون
ودي تاني سرقه لنفس الصرافه
باين ان شركه الصرافه مستهدفه
انا كنت مسافره اقضي كام يوم في شرم يوم الاثنين
بس خفت ياروح مابعدك روح
قلت بلاها استجمام  يجيب اجلي  بعدين اسيبكم لمين
مين يقرف فيكم  غيري صعبتوا عليه فبطلت سفر
---
سياره تابعه لشركه امانكو لنقل الاموال
قام 3 مسلحين بايقافها باطلاق النار عليها امس الاثنين
واستولوا علي 3 مليون و250 الف جنيه
وفروا هاربين
امانكو صحيح اسم علي مسمي
---
خلصنا من السطو المسلح تعالوا للقتل
اتنين مسجلين خطر وقفوا توك توك 
في قريه ( هريه رزنه ) مركز الزقازيق
طلبوا من السائق توصلهم لمكان متطرف
السائق رفض خاف ليسرقوا التوك توك
اتشاكلوا معاه فاستغاث بشاب
ولما اتدخل لفض الخلاف واحد من المسجلين ضربه بالنار
اتوفي في الحال
رجال ونساء وشباب واطفال القريه
اتلموا ومسكوا المسجلين وربطوهم في عمودين نور
وقطعوهم بالاسلحه البيضاء
كل ده كان في قريه الزعيم احمد عرابي
ياتري لو هو عايش كان حيعمل ايه ؟
حيرضي ان قانون الغابه يحكمنا ؟
---
خلاف عادي علي اولويه المرور في شارع جامعه الدول العربيه
بيحصل كتير جدا في كل الشوارع
الخلاف بين سياره ملاكي وميكروباص
سواق الميكروباص نزل وضرب سواق الملاكي بعصايه حديد
رد عليه سواق الملاكي بطلق ناري جاب اجله
ماهو كل واحد حسب علامه
فقام اهالي بولاق الدكرور بقطع شارع جامعه الدول
احتجاجا علي مقتل سواق الميكروباص
وقاموا بتكسير الكراسي الموجوده بالشارع
لايقاف السيارات وشل حركه المرور
وده خلي اصحاب المحلات التجاريه بالمنطقه تقفل محلتها
وفي مداخله تلفزيونيه اليوم مع شقيق القتيل
قال ان الشرطه جت بعد فتره وان الرجاله والشباب مامسكوش القاتل
كانوا بيتفرجوا علي اللي بيحصل
وان اللي مسكه هما الستات اللي قاعدين بيعملوا شاي في الشارع
بيقصد اللي عاملين اشغال طريق
بجد ستات جدعان  مش بيقولوا مايجيبها الا ستاتها
وقال شقيقه كمان ان الشرطه لما وصلت
ما اخدتش القاتل في البوكس اخدته في تاكسي
بيقصد ان الشرطه هربته
بس القاتل اتعرض علي النيابه النهارده الصبح
شفتوا بقي بقينا عايشين في شيكاغو
بكده حنبطل نشوف افلام الاكشن
الحقيقه بقت موجوده نشوفها وبلاش الافلام
---
فين بقي الامن والامان ؟
قانون الغابه هو اللي بيحكم
تصدقوا اني خايفه اروح اقبض بالكارت زي كل شهر
اخدلي رصاصه او مطوه
لامتي حنفضل كده ؟
ليه الاسبوع ده بالذات كترت السرقه والقتل ؟
بصراحه كل يوم بيمر بحس بالخوف اكتر من اليوم اللي قبله
مش انا  بس ده اغلب الناس بيحسوا نفس الاحساس
ربنا يسترها
---
اخر حاجه حقولها يوم انتخاب رئيس مجلس الشعب
كان يوم كوميدي حقيقي مشاكل كتير
لما طلبوا ان كل مرشح لمنصب الرئيس يتكلم 3 دقايق يعرف نفسه
والاغلبيه رفضت قالوا ان ده مش دستوري
وفي الاخر وافقوا رغم عدم دستوريته
وكان من منطلق الديمقراطيه
حسيت ان الاقليه في المجلس بتدبح القطه للاخوان
وبتقولهم نحن هنا حنعمل اللي عايزينه
----
ادعوا معايا ان ربنا يرفع مقته وغضبه عنا
ويرجعلنا مصر بلد الامن والامان
بسرعه قولوا امين
واوعوا اوعوا تقلبوا الصفحه
ابقوا معي






29‏/1‏/2012

شباب ورق قطعهم يارب


أعزائي

النهارده انا حزينه جدا لاني مريت علي كورنيش النيل


شفتوا منظر الكونيش اللي هو واجهه لمصر
وبيجوا من آخر الدنيا عشان يشوفوا النيل
منظر بصراحه خلاني حزينه جدا  ولما حكيت مع اختي
علي المنظر . لقيتها بطيبه قالت الناس بتسترزق
مش بدل مايسرقوا قلتلها بس المنظر وحش عامل زي السوق
ردت وقالت خلاص خلي الحكومه تشوفلهم شغل
بصراحه ماعرفتش ارد عليها
بس فعلا حزينه علي المنظر
------
النهارده كان في مظاهره امام هيئه الاستثمار في صلاح سالم
المرور كان بشع واحنا رايحين واحنا راجعين
الوقفه كانت لحمله الماجستير والدكتوراه طالبين وظائف
والله مابقاش في مكان في مصر مافيهوش اعتصام
مش عارفه اخرتها ايه ؟
-----
النهارده وانا معديه في التحرير شفته بعين تانيه خالص
زباله وبياعين من كل لون وصنف وشكل
وبيبيعوا كل حاجه  واي حاجه
بقي سوق التحرير
عامل زي سوق الحراج في الكويت
ولسه ياما في الجراب ياحاوي
-----
يوم 25 يناير  عمرو اديب كان برنامجه القاهره اليوم
مستمر من 10.30 صباحا الي ماشاءالله
كانوا بيتناوبوا في تقديمه
الكاتب الصحفي محمد عنايه كان مستضيف
شباب قالوا انهم من شباب الثورة
واحد من الشباب كان بيتكلم وقال احنا معتصمين 3 ايام
الاربعاء والخميس والجمعه
عنايه قاله بس بلاش تعطلوا مصالح الشعب
رد وقاله لا مش حنعطل ولو ان في بلاد ماعندهاش فكره عن المظاهرات
زي مصرالجديده  والزمالك مش حاسين بالثوره
فضلت اتصلت بالبرنامج حوالي ساعه ونص
بس للاسف ماكانش فيه فقره للاتصالات
كان نفسي اقوله ان اللي دعاك للبرنامج ظلمك
لان ابسط معلومه هي ان مصر الجديده والزمالك دول مناطق في القاهره
يعني لا مصر الجديده بلد ولا الزمالك بلد
وكمان شباب وكبار واطفال من مصرالجديده كانوا مشاركين في الثوره
يعني مش كانوا في النوادي وبيقولوا هاي شله
جبتوا اللبان بينا نفرقع
وكانوا عاملين لجان شعبيه طول اليوم لحمايه المنازل
وبينظموا المرور . وبيساعدوا اي حد
وللان كل خميس في مظاهرات من عين شمس لميدان روكسي
وكمان من الالف مسكن لميدان روكسي
يعني اهل مصرالجديده جدعان برضه
والا الجدعنه بقت حكر علي المناطق الشعبيه
والله شباب مصر الجديده مش شباب فافي
ولا شباب ورق قطعهم يارب
بس اسم المنطقه ظالمهم
-----
قبل هيئه الاستثمار في طريق صلاح سالم
توجد حديقه العروبه
هي جزء من مستشفي الامراض العقليه بالعباسيه
الحديقه نظيفه جدا وكمان فاضيه جدا
مادخلهاش ولا واحد يوحد ربنا
الكل خايف منها لانها جزء من المستشفي
وعندهم حق
ماهي دي اللي من كام سنه سرحوا المجانين عشان يعملوها
وطبعا اللي عملتها كانت الست ام علاء
فلوس بتتصرف والسلام   .وآه ياقلبي
------
القصور الرئاسيه
--
تعرفوا ان مصر فيها اكتر من 25 قصر رئاسي
دول تبع الرئيس
والنبي حيعمل بيهم ايه ده لو راح كل سنه يوم يقضيه في كل قصر
يبقي خير وبركه
لو الحكومه بتفكر في مصلحه الشعب الصدمان العدمان
كانوا سابوا للرئيس 5 قصور يبرتع فيهم براحته
الحكومه تعمل اعلان ببيع القصور تقدر القصر
نقول بنص مليار وده بالنسبه لرجال الاعمال
والمستثمرين العرب حاجه ببلاش كده
ويقول انا ساكن في قصر رئاسي
علي سبيل القنعره او زي مابيقولوا   اهل الخليج كشخه
لو باعوا ال20 قصر حتكون حصيله البيع 10 مليار
نقوم ايه نبني بيها عمارات لاسكان الشباب
85 متر  الشقه
حنبني 500 الف شقه في عموم الجمهوريه
كده ممكن 500 الف شاب يتجوز 500 الف بنت
كده حلينا ازمه الشقق بالنسبه للشباب
وحلينا جزء من ازمه العنوسه للبنات
نرجع علي القصور
ممكن واحد ياخد قصر ويعمله مطعم كبير علي مساحته ومساحه الحديقه
شوفوا بقي حيستوعب شباب قد ايه يشتغلوا فيه
واحد ممكن يعمل القصر مول تجاري برضه المحلات حتستوعب شباب للعمل فيها 
وممكن اللي حيشتروا القصور يفكروا في مشاريع تانيه
والله في حلول كتير بس الحكومه عامله ودن من طين وودن من عجين
------
مسلسل الريان
----
المقال اللي فات كتبت حته رومانسيه
لقيت هجوم من واحد من قرائي  وقالي
ده مش وقته تكتبي في الرومانسيه
وزعل مني جدا كما لو كنت عملت عمله سوده ومهببه
يمكن شايفني لا اصلح للرومانسيه
او ممكن يكون شايفني راجل ومتايف
مع ان الرجاله بتكتب في الرومانسيه
بس برضه حكتب اللي بحس بيه
نرجع لمسلسل الريان


خالد صالح
خالد صالح وباسم سمره واحمد صفوت
الفرسان الثلاثه لمسلسل الريان
احمد الريان الحقيقي
--
انا مش  من هواه المسلسلات الا لو مسلسل ناس كتير شكروا فيه
اصحابي واهلي شكرولي في مسلسل الريان اللي تمت اذاعته في رمضان الماضي
وبما ان شهر رمضان عندي عباده مش بتفرج علي تليفزيون
لقيت المسلسل بيتعاد علي
A R T
مسلسلات  وكل حلقه بتتعاد كل 6 ساعات
مطارده والا جذب اكبر قدر من المشاهدين
مش عارفه بالظبط
لقيت فعلا انه مسلسل يستحق اننا نشوفه
خالد صالح قام بدور احمد توفيق الشقيق الاوسط
باسم سمره قام بدور فتحي توفيق الشقيق الاكبر
احمد صفوت قام بدور محمد الريان الشقيق الاصغر
اداء خالد صالح معروف يعني لا غبار عليه
اما المفاجأه كانت باسم سمره
واللي مايعرفوش هو اللي قام بدور العسكري
مع خالد الصاوي في عمارة يعقوبيان
بصراحه ادي الدور ببراعه وخصوصا لما ادمن الحبوب
اما احمد صفوت كل دور بشوفه بلاقي انه بيتقدم بسرعه
اما الصاروخ ارض جو ريهام عبد الغفور
ده يعتبر دور عمرها بصراحه بهرتني بادائها المميز جدا
والجميله دره ظلموها لان انفعالتها اقل من الدور بمراحل
نجي بقي للفرسان
بيخططوا وينفذوا بسرعه الصاروخ
يعني لو فتحي فكر احمد يخطط وينفذ في الحال
والعكس صحيح
فتحي حب زوجته  بدريه جدا وممكن يعمل اي حاجه عشانها
في حلقه النهارده كان بيبكي ويقول لاخوه
انه ممكن يرمي كل امواله وشقي عمره عشان  يشوف ضحكه منها
يااااااه في كده حب
اما احمد الريان ده حكايته حكايه نقدر نقول عليه نسونجي
كل مايشوف وحده يتجوزها  وتبقي عارفه انه متجوز غيرها اكتر من وحده
مش فاهمه ازاي تاثيره جامد عليهم كده
صياد بيعرف يصطاد الفريسه في الوقت المناسب
ممكن بكلمه يشعلقها في حبه
او بيتعامل معاهم من منطلق ان في ستات نقطه ضعفهم ودانهم
يعني سمعها لكلمات الحب بتأثر فيها
وبتلغي عقلها نهائي وتسلم  الرادار لقلبها عشان يحركها
طبعا في نوعيات كده
بتلغي العقل تلاقيه مالوش لازمه عندها
بس مسلسل في مجمله جميل
كفايه بقي عليكم كده النهارده
واوعوا اوعوا تقلبوا الصفحه
ابقوا معي


19‏/1‏/2012

سياسه ورومانسيه اتنين في واحد

أعزائي
وحشتوني وكل عام وانتم بخير ويارب سنه 2012 تكون احسن من 2011
ونعيش في وطن آمن يساع الكل
الحقيقه الاحداث كتييره وسريعه
تعالوا نعمل جوله لبعض الاحداث
---
اصحاب المعاشات  كانت ليهم وقفه يوم الاحد الماضي
بيطالبوا بعلاوتهم المتاخره لسنوات
2005 - 2006 - 2007
كانوا من كام شهر ادوهم علاوة 2008 المتاخره
ووعدوهم بصرف العلاوات الباقيه في شهر يناير
وطبعا وعود خايبه بيسكتوهم بيها
وعدوهم انهم حيبقوا يصرفولهم انما المره دي اصحاب المعاشات
مش مصدقين الحكومه  وهو يعني من امتي الحكومه بتوفي بوعودها
في وقفه يوم الاحد 22 يناير واذا ماسالوش فيهم في اعتصام يوم 27 يناير
وفضيحه مصر حتبقي بجلاجل لان كل العالم بيحترم اصحاب المعاشات
الا مصر بتعتبرهم عاله علي الحكومه او بالاحري
زي خيل الحكومه لما بيقدم بيعدموه
مش فاهمه بصراحه هي الحكومه بتديهم من جيب ابوها والا من اللي دفعوه
بس نقول ايه ماهو عبدالقووووي المعروف بيوسف بطرس غالي
 سرق اموال التامينات وشرخ بالناقه
ربنا لا يكسبه ولا يربحه اخد شقا الناس
ياحكومه اعملي حاجه وبطلي طناش
----
الانهيار الاقتصادي دي الفزاعه اللي بيستعملها المجلس العسكري
للشعب المصري عشان يقول ان الثورة هي السبب
دكتور محمود عيسي وزير الصناعه والتجاره الخارجيه
في حكومه جدو السادس عشر   دكتور الجنزوري
كشف عن مفأجاة وهي حقائق موثقه بارقام تفصيليه
ان عام 2011 شهد تحسن كبير في مجال الصادرات
%18.5 بنسبه ارتفاع 130 مليار و760 مليون جنيه
مقارنه بعام 2010 كانت الصادرات
110مليار و259 مليون جنيه
بتشمل الاتي
مواد البناء 22%
الصناعات الغذائيه16%
الغزل والمنسوجات 16%
الصادرات الهندسية 15.8%
الحاصلات الزراعيه 3%
الصناعات الطبيه 2.3%ات
كما حققت 10 مجالس تصديريه ارتفاعا كبيرا في الصادرات
مقابل تراجع صادررات مجلسين فقط هما الاحذيه والمنتجات الجلديه
بنسبه 7%
والكتب والمصنفات الفنيه 115مليون بنسبه تقل عن 1%
دي بيانات وزير الصناعه والتجاره الخارجيه
بعتقد ان الاحذيه والمنتجات الجلديه تراجعت لغزو المنتج الصيني
الناس بتلاقيه سعره اقل
ايه رأي مجلس العسس في البيان ده
ياريت نلاقي رد وبلاش الفزاعه اللي مخوفه الشعب
وعمااااار ياعسس
----
هشام طلعت مصطفي ومحسن السكري
كلاكيت اكشن صوووووور
اول كلاكيت الغاء حكم الاعدام
تاني كلاكيت الغاء الحبس 15 سنه
تالت كلاكيت حيطلع براءه وابقوا شوفوا
لانها تحولت من محكمه قانون لمحكمه موضوع
وطبعا حيخلوا سبيلهم لانقضاء مده الحبس الاحتياطي
ومولد يادنيا
والحياه بقي لونها بمبي والكلاكيت جنبك و انت جنبي
----
في مهنتين انتشروا بكثره بعد 25 يناير
تساله او تسالها بيشتغلوا ايه الاجابه ثورجي
والتاني  لافح اللاب توب علي كتفه
تساله  او تسالها بتشتغل ايه 
الاجابه ناشط سياسي  او برضه ناشطه سياسيه
اكيد الوظفتين تيواني مش ياباني
انا بشوف انها وظايف  بتدنجاني
----
خطه الامن ل25 يناير 2012
مجلس العسس ووزاره الداخليه وضعوا خطه اكيد متهيالهم ماتخرش الميه
الخطه متدرجه لمواجهه اي احداث شغب
حيستخدموا الهراوات  في يد الجنود البواسل
عشان يضربوا بيهم اهل بلدهم ماشاءالله
ومكبرات الصوت  يمكن المرور داخل في اللعبه وبيقول الجمرك  والنقل يرجعوا لورا
وبعدها يجي دور المياه الملونه اللي تظل علي البشرة لمده 6 شهور
( زي التاتو يعني )
بس برضه الميه الملونه لها حل وهو دهان الوجه والاجزاء الباينه من الجسم
بفازلين  واكيد اصحاب الصيدليات حيكسبوا  كويس  من بيع الفازلين يوم 25 يناير
واخر حاجه اطلاق النار علي الاقدام
وعلي رأي مرجانه جاريه علي بابا
يارب سلم القلل بتتكلم
----
مبارك طااااهر اليد وعادل
ده اللي قاله محاميه فريد الديب
واعلن عن مفاجأه تنسف القضيه يعني من الاخر
المخلوع راجع وحياخد براءه
ويمكن بعدها يطلب العوده لموقعه الاول من الاعراب
ياساتر ياساتر
معقول ده يحصل ده كابوس
بس المحكمه بتحكم بالاوراق
وممكن كونه ابن المؤسسه العسكريه يقدموا اوراق تبرا عم الحاج
ويدينوا غيره ويقولوا هو ده السبب وبعد كام يوم
ممكن يقولوا لا ده ماس كهربائي او مختل عقليا
سبحان ربك العليم
استرها من عندك ياكريم
----
طبعا كلنا عايشين ازمه البنزين وشايفين التكدس الرهيب في محطات البنزين
يوم الاحد شفت الشوارع واقفه ومحطات البنزين يا فاضيه من البنزين
او العربيات بطول كيلو او اكتر قدامها
يوم الاتنين قلت لازم لازم ولابد وحتما احط بنزين
كنت في مدينه نصر عشان ارجع مصرالجديده قعدت ساعه ونص في الطريق
قلت اروح محطه من المحطتين اللي بتعامل معاهم
قال يعني عشان عارفيني 
رحت اول وحده لقتها فاضيه مافيش فيها بنزين
العمال قالولي الساعه 5 صباحا حيكون عندنا بنزين
او 7 الصبح بس ممكن ماتلحقيش
قلت خلاص اروح البنزينه التانيه . رحت بس لقيت الطابور طويل جدا
قدامي اكتر من 90 عربيه قلت خلاص حقف وامري لله
كل شوي اقدم خطوتين تلاته الساعه عدت 12  وانا واقفه
مش حتنازل عن دوري ابدا
اقعد في العربيه شوي وانزل منها شويات لكسر ملل الانتظار
بعد ساعتين لاح الامل وشفت البنزينه طبعا فرحت جدا لاني قربت
لقيت عربيه جايه بسرعه وقفت عند مدخل البنزينه والكل وسعلها الطريق
نزلت وسالت اشمعني دي دخلت من غير دور
قالولي اصله حيمون 95  انما احنا حنمون 80
قلتلهم انا مش بمون 80 انا بمون 92 قالولي لا مافيش
المتوفر 80 او 95
قلتلهم خلاص حمون 95 لقيت الكل بيوسعلي الطريق عشان ادخل المحطه
كان احساسي اني صلاح الدين الايوبي  وبفتح حصن عكا
دخلت ومونت وخرجت في حوالي 10 دقايق
سالتهم مافيش بنزين 92 ليه قالولي لا حيجي الصبح
بس تعالي الساعه 7 لانه الساعه 12 بنكون شطبنا 
 قالي واحد من العمال تعالي الصبح وربنا يسهل
قلتله اي صبح قالي بكره قلتله قصدك النهارده
طيب البنزين اللي حطته اشربه والا ايه رايك
قالي اه طيب تعالي بعد بكره
--
بصوا وصلوا علي اللي حيشفع فيكم يوم القيامه
بنزين 90 سعر اللتر 170 قرش
ينزين 92 سعر اللتر 180 قرش
اما بنزين 95 ده سعر اللتر 275 قرش
والله لقيت عربيات 128 مكحكحه وعربيات حالتها يرسي لها بتمون 95
بالذمه ده مش حرام  الغلبان اللي عنده عربيه مكحكحه بيقضي بيها مشاويره
شوفوا حيدفع فرق قد ايه ومضطراكيد
وبيقولوا المضطر يركب الصعب
ومايركبش الميكروباص لانه اكيد حيغلي
ولتر في التنك ولا مليون في البنك
ووزاره البترول بتقول مافيش ازمه لو حقيقي مافيش ده يبقي اسمه ايه
ترشيد استهلاك والا بروفه لما قد يحدث
وسلامات ياوزير البترول
---
تعالوا بقي نتكلم كلمتين في الرومانسيه ولو اني مش باجيدها
بس حقولكم علي حاجه بحس بيها
كنا قبل الانترنيت
بنقرا كتاب من الورق بنلمس صفحاته  باصابعنا وبنطلب صداقته
حاليا مابقناش نقرا الا علي النت
وكمان الرسائل الالكترونيه مالهاش في رسائل الحب الملونه
حتي التواصل بينا في كتير بيرتدوا اقنعه عند التعامل معهم
كتير بحن اقرا كتاب ورقي واعيش معاه
بسيب النت وارجع للورق وما احلي الرجوع اليه
----
تعريف بسيط للرجل المغرور
بيتصور انه قرا كتاب المرأه وبيعرف اصلها وفصلها
وبيفهم في اسرارها وطقوسها ومناخها
والحقيقه انه مر علي فهرست الكتاب
وانه لم يقرا الصفحات المحزوفه  ولا المكتوبه بالحبر السري
-----
معليش بقي دخلت السياسه في الرومانسيه
 اخر مره اكتب حاجه رومانسيه من نفسي
بس مش حتتكرر تاني
واوعوا اوعوا تقلبوا الصفحة
ابقوا معي