25‏/7‏/2012

مفاجأه الحاج للشعب

أعزائي 
ياتري عاملين ايه في الصيام 
يارب تكونوا كويسين بالرغم من طول اليوم 
بس كله بثوابه 
---
اكبر مفاجأة كانت للشعب المصري هي اختيار رئيس الوزاره 
الحاج مرسي ماكانش لاقي مؤلف محترف يالف الوزاره 
وكان بيتخبط في المؤلفين النص لبه
بس اخيرا  بعد مرور 24 يوم 
وبعد ولاده متعسره  لقوا رئيس وزاره عموله  
المفروض يعني انه حيعدل المايله 
---
اخيرا اختار الحاج مرسي المهندس هشام قنديل لتولي رئاسه الوزاره 
المهندس هشام تولي وزاره الري والموارد المائيه في يوليو 2011
ايام حكومه احلي م الشرف مافيش  واستمر مع جدو الجنزوري 
ومنتظرين نشوفه حيالف الوزاره في كام شهر 
اذا هو نفسه كلفوه بالوزاره بعد 24 يوم من حكم عم الحاج 
قال رئيس الوزاره الجديد انه حيشكل وزاره تكنوقراط 
مش مشكله اذا كانت تكنوقراط والا تكنوجاز
حتتالف وتتلحن وتتغني في كام شهر 
دي بقي سياسه النفس الطويل 
المهم انه ينجز ويخلصنا 
 ---
رئيس الوزاره الجديد مالوش تاريخ سياسي ولا مشاركات سياسيه 
لا قبل ثورة 25 يناير ولا بعدها 
يعني بعيد عن السياسه 
وكان رئيس قطاع النيل في نظام مبارك 
معلومه ممكن تفوت علينا وهي 
المنصب ده لا يعين فيه الا من كان له ولاء للنظام السابق 
ومش حعلق حقول بس اللهم اني صايمه  
---


المفروض انه زي ماقال ان اولويات حكومته تحقيق اهداف 25 يناير 
وتلبيه تطلعات الشعب المصري وتنفيذ خطه ال 100 يوم 
لحل مشكلات الامن والمرور والخبز والطاقه والنظافه 
---
رئيس الوزراء يبلغ من العمر 50 عام  وملتحي 
مش دي المشكله انه ملتحي  زي ماقال انها سنه 
هو حر سنه او فرض ده بيرجعله وهي في الاول والاخر حريه شخصيه 
بس ياخوفي يابدران ان الجماعه  محتاجه رئيس وزراء شكلي مش فعلي 
ياتري حيبقي له صلاحيات  كامله للعمل ؟
ومش حيدخل اي حد من مكتب الارشاد ولا المرشد نفسه في عمله ؟
هلي سيعيد الاعمال المتوقفه زي المصانع  المعطله ؟
حيكون ايه اخبار التصدير والاستيراد ؟
حيعمل ايه في الاستثمار ؟ 
كنا نامل في رئيس حكومه خبيرا ماليا مش خبيرا مائيا 
تفتكروا ممكن يكون منفذ والا صاحب قرار ؟
الايام الجايه حتبين كل حاجه 
وعلي رأي عبدالعال جوز سكينه 
كل شيء انكشفن وبان 
--- 
بس اللي واضح ان التورته متقسمه قسمين 
قسم للحيه والتاني للكاب 
واكيد حتفهموا ايه المعني اللي بقصده 
مش بشك في زكاء قرائي 
---
انا شايفه ان الاخوان كوشوا علي كل حاجه 
بيديروا كل حاجه 
ناقص يتولوا رئاسه مجلس اداره  العمارات التمليك والمولات 
---
طبعا اكيد اغلبكم اصابهم الاستغراب لان الحاج ما انصفش ثورة يوليو 
في خطابه 
بس حنقول من امتي الاخوان كانوا بيحبوا عبدالناصر 
كنتوا منتظرين انه يتكلم عن امجاد ثورة يوليو 
ويزعل الاخوان . ده كلام برضه 
اصل ياجماعه الخير الحاج مرسي مش بيفصل 
بين انه رئيس لمصر وبين انتمائه للاخوان 
وياحرام هما فاكرين انهم الوحيدين اللي اعتقلوا واتسجنوا 
هو اليساريين مش اعتقلوا واتسجنوا 
وكمان الوفديين 
وحنروح بعيد ليه  مش الرئيس الاول لمصر بعد الثوره 
محمد نجيب اعتقلوه 30 سنه في المرج
يعني مش هما بس الضحايا 
---
بصراحه جدو الجنزوري تعب جدا في الشهور اللي فاتت 
وكان اداء وزارته معقول بالنسبه للفتره الحرجه 
انا بحي جدو علي تعبه في الشهور اللي فاتت
والمجلس الموقر ماكانش عاجبه الاداء 
طيب خلينا نشوف  اداء رئيس الوزراء المختار من الاخوان 
وزي ما خالتي أم ترتر بتقول 
بكره نقعد علي الحيطه ونسمع الزيطه 
وبرضه كلي أمل في نجاح الوزاره الجديده 
واوعوا اوعوا تقلبوا الصفحه 
ابقوا معي


 
 

18‏/7‏/2012

تجربه مريره مع السجل المدني

أعزائي 
طبعا انتم مستغربين لاني بكتب مقالتين في اسبوع واحد 
بس الحقيقه النهارده كان ليه تجربه مريره 
مع السجل المدني 
كنت بجدد الرقم القومي مع انه لسه ماخلصش
بس انا بحب تكون كل اوراقي سليمه 
قالولي روحي السجل المدني بدري عشان الزحمه
السجل المدني جزء من قسم الشرطه 
طبعا رحت بدري عملت بالنصيحه  بس لقيت طوابير علي كل حاجه 
شباك تقديم الرقم القومي طابور 
شباك شراء الاستماره طابور 
شباك  لاصدار شهادات الميلاد والوفاه والزواج والطلاق 
برضه طابور 
الطابور الاخير هو اللي بتدخل تتصور عشان الرقم القومي 
مش مشكله احنا ناس متحضرين ونقف في الطابور 
بس الجو الحر اللي احنا فيه وكمان اللي ذاد وغطي  ان التكيفات عطلانه 
تقف في سونه بالامر 
وقفت في اول شباك وسالت الموظفه عايزه اجدد الرقم القومي 
قالتلي معاكي القسيمه سالتها قسيمه ايه ؟
قالت قسيمه الطلاق 
قلتلها اعوذ بالله انا مش مطلقه  انا جايه للتجديد
سبحان الله الشعب المصري دايما يظن السوء 
ايه دخل قسيمه طلاق او زواج في تجديد الرقم القومي 
المهم قالتلي روحي الشباك اللي جنبي 
دور تاني وقفت فيه 
وصلت  للشباك ادتني طلب التجديد  كنت بدور عن مكان املا الطلب 
مافيش مكان من الزحمه  سندت علي طرف الشباك 
رحت اسلمه قالتلي صورلي الرقم اللي معاكي 
قلتلها فين اصور قالتلي انزلي تحت 
نسيت اقولكم ان مكتب السجل في الدورالتاني 
نزلت سالت اصور فين  الامناء قالولي عدي الشارع 
 حتلاقي التصوير في المحل اللي تحت العماره 
قلتلهم قسم وسجل مدني مافيش فيه ماكينه تصوير 
رد واحد منهم وقال يجيبولنا  كولدير ميه الاول 
رقنا نشف
قلتله طيب كبار السن والمرضي يعملوا ايه 
قالولي ربنا يتولاهم
عديت الشارع ورحت لقيت محل صغير تحت العماره 
وعليه طابورين  لغايه الشارع بره 
وقفت لغايه الدور ماوصلني وصورت ورجعت 
رحت تاني للموظفه ادتها الطلب وصوره الرقم القومي 
قالتلي اكتبي تعهد ترجعي الرقم القومي اللي معاكي لما تستلمي الجديد 
كتبت التعهد  لان الرقم القومي تبعي لسه 
صالح للاستخدام الادمي
شفتوا بقي الثوره ماغيرتش اي حاجه في الروتين
 وسالتها ليه التكيف مش شغال قالتلي بايظ 
سالتها وانتوا حتشتغلوا في الجو ده في رمضان 
قالتلي ايوه حنعمل ايه  قلتلها احنا بنجي نخلص طلباتنا ونمشي 
ممكن نستحمل الكام ساعه انما انتوا كل يوم 
هزت راسها  بأسه  
قلتلها انتوا ربنا مش حيحاسبكم لان الداخليه قامت بتعذبكم 
خلصت الطلب وادتهوني اوديه للي بتصورنا 
رحت لقيت ناس واقفه وناس قاعده  كتير 
منتظرين دورهم لانها بتنده عليهم كل واحد باسمه 
لقيت الستات اللي واقفين بيسالوني ليه ادتك الطلب 
قلتلهم عشان اجيبه هنا 
قالولي طيب احنا ما اخدنهوش ليه 
قلتلهم اسالوها 
رجعوا قالولي هي حتبعته  بس ليه انتي خدتيه عشان تجبيه 
اسئله خنيقه بجد ,,,, قلتلهم اسالوها
 بصيت علي الباشا رئيس الوحده  مش موجود ومكتبه مقفول 
وبما ان المكتب بابه  زجاج بصيت لقيت النتيجه اللي معلقه علي الحيط 
17 يونيه  والمكتب كله تراب  يعني الباشا مش بيروح شغله 
الناس بتتسلي وبتتكلم 
لقيت واحد هاري حاله وبيشكر في الحاج مرسي 
وكل شوي يقول ده اصله واحد مننا 
بصراحه استفذني قلتله عمل ايه الواحد اللي مننا لغايه دلوقتي 
ده حتي الوزاره ماعملش فيها حاجه 
قالي حيعملها  قلتله امتي قال اول رمضان 
قلتله رمضان  سنه كام ؟
بس وحياتك ابقي قوله  يصلح التكيف هنا قبل ما يالف الوزاره 
طبعا الناس كلهم سخسخوا من الضحك 
وقفه علي الباب عشان اتصور  واحده داخله مع بنتها اول مره تعمل رقم قومي 
بنوته صغنونه  واموره ماشاءالله عليها  ومحجبه 
اللي بعده وحده مع بنتها  والام عماله توضب للبنت شعرها 
زي ماتكون حتتصور للفرح  تجيب شعرها ورا وتبص مايعجبهاش تجيبه لقدام 
لغايه ما اللي بتصور قالتلها  ياستي خلصينا الدور طويل 
وحده دخلت دي بقي اللي استغربت منها جدا 
لابسه زي ماتكون رايحه سهره او فرح 
لبس ماينفعش يتلبس الصبح 
واول ماقعدت قدام الكاميرا قالت للي بتصور 
اوعي تطلعيني وحشه  اصل كل اللي بيصورني بيطلعني وحشه 
والله كانت علي طرف لساني اقولها 
يعني حيجيبولك حلاوه ازاي  ؟ اللي بيصوروه هو اللي بيطلع 
قلت اسكتي يابت  بلاش تتشاكلي وبطلي طوله اللسان اللي مودياكي في داهيه 
المهم دوري اخيرا 
دخلت قعدت  وسالتها حتشتغلوا في الحر ده في رمضان 
قالتلي انا مش حشتغل واللي يحصل يحصل 
قلتلها مش كنتوا تقولولنا ان الجو عندكم كده عشان كنا جينا بالمايوهات 
ضحكت وقالتلي عندك حق 
وسالتها هو رئيس الوحده فين ؟
قالت هو حران مش بيجي لان التكيفات بايظه 
قالتلي كان بيخرجنا نشتغل بره الاوضه عشان هو يقعد في التكيف 
ولما نقوله حر يقول عشان تاخدوا ثواب 
قلتلها بناقص  الثواب  اللي جاي من الحر
قالتلي قلنا كده ومافيش فايده 
ولما التكيف عطل جابلنا واحد يصلحه ولمنا من بعض 500 جنيه ويومين وعطل 
قلتلها وعليها هو بطل يجي يشتغل 
قالتلي بالظبط كده 
مش فاهمه هو مافيش حد بيحاسب الظباط علي اجازاتهم ؟
قالتلي خلاص احنا حنحط الصوره الموجوده عندنا 
شكرتها ومشيت 
الموظفين دول لما يتعصبوا علي الجمهور معاهم حق 
لانهم بيشتغلوا في ظروف مهببه
هي الداخليه فقيره تصليح تكيف او حتي تغيره  مش كتير 
وكانت دي رحله السجل المدني 
التعامل مع الجهات الحكوميه يخليك تكره نفسك 
المهم رمضان بعد يومين 
كل عام وانتم جميعا بخير 
وتقبل الله صيامنا وقيامنا وجعلنا من عتقاء الشهر الكريم 
واوعوا اوعوا تقلبوا الصفحه 
ابقوا معي 




15‏/7‏/2012

تخمه علي المائدة الرمضانية

أعزائي 
كل عام وانتم جميعا بخير 
كلها ايام ويبدا شهر رمضان المعظم 
يارب ينعاد عليكم جميعا بالخير 
أوله رحمه وأوسطه مغفره وآخرعتق من النار
النهارده مش طالبه معايا سياسه 
نتكلم عن رمضان والمشتريات والحاجات والمحتاجات  
---
الاسواق في مصر بشعه والاسعار اكتر بشاعه 
وعلي كده الكل بيجري عشان يشتري اي سوبر ماركت تلاقيه علي بعضه
الناس بقوا فاهمين ان شهر رمضان شهر الاكل والفرجه علي المسلسلات وبس 
ياريت يفهموا المكتوب 
كنت في المعادي قلت اعدي علي كارفور ممكن القيه فاضي 
واقدر اشتري منه اللي عايزاه 
رحت مع قريبتي اللي تعبها حب مصر لانها عايشه في دبي  
وكان يوم ماطلعلوش شمس 
الباركنج كان مليان فضلنا نلف لغايه مالقينا عربيه طالعه وعنك وجرينا ركنا 
دخلنا بالعافيه من الزحمه  , وانا اكره حاجه عندي في الدنيا هي الزحمه 
بصراحه ماعرفناش نشتري من اللي بيزقك واللي بيخبطك وخدت في اليوم ده كام كتف قانوني 
علي كام زقه  علي كام دوسه علي رجلي 
اما قريبتي وقفت في زحمه وسالت ليه الزحمه الجامده دي 
قالولها اصلهم حينزلوا مكرونه ب 95 قرش  
وكان نصيبها بونيتين  عشان يزقوها ويقفوا مكانها 
انا بقي لقيت زحمه بس ماكانتش زي زحمه المكرونه سالت من بعيد 
وعرفت انها زحمه علي الزيت لانه حينزل ب 6.5 للزجاجه 
لقيت واحد بيهلل عشان المكسرات خلصت مع ان سعرها مش رخيص 
تخيلوا الشعب المصري مفجوع قد ايه 
اشترينا حاجات بسيطه  اللي عرفنا ناخده وماكانش عليه زحمه لان اسعاره مش رخيصه 
ورحنا وقفنا عند الكاشير وكانت واقفه قدامي وحده واخده كارفور كله 
من ضمن اللي لفت نظري انها واخده 6 كراتين صلصه 
سالته هي واخده صلصه كتير ليه حيبقي فيها ازمه والا واخده ليها وللزمن 
قالي لا ليها وللبيع  
قلتله لا مش فاهمه تقصد انها بتبيعها بره 
قالي ايوه اصحاب السوبر ماركت  بياخده من هنا  بسعر اقل 
ويبيعوا في محلاتهم بسعر اغلي 
المهم اننا خرجنا من كارفور من غير عاهات مستديمه
رحت علي سبنس في سيتي ستار مصرالجديده
قلت ممكن يكون فاضي نوعا ما , بس كنت واهمه 
طبعا هو في عروض كتير بس ممكن لو دخلت وسطهم اطلع بكسر في رجلي او عيني تروح 
او بونيه في وشي تنزل صف سناني 
اه نسيت اقولكم ماكانش فيه ترولي احط عليه مشترواتي 
لان كلهم خلصوا , قلت ممكن القي جوه   طبعا استحاله 
لان ممكن تكون الام معاها ترولي والاب معاه التاني والبنت او الابن واخد التالت 
وكلهم ماشين في حته واحده  قيسوا علي كده باقي العائلات 
اختي وانا جبنا حاجات بسيطه  مسكناها في ايدينا 
طبعا جالي هلع ورعب لما وصلت للكاشير 
قدامك اكتر من 10 كاشير  بس لو خدت دور في اي واحد منهم 
ممكن تخلص مع اذان الفجر  وكنا حوالي الساعه 8 مساء 
اختي قالتلي  حطي الحاجه في اول مكان فاضي يقابلك 
واخدنا  ديلنا في سننا وقلنا يافكيك 
وكانت دي تجربتي المريره مع اكبر 2 سوبر ماركت في مصر 
قلت ماله السوبر ماركت الصغير  اللي جنب البيت 
 حقيقي هو اغلي بس اطلع منه علي رجليه 
----
تعالوا بقي للمسلسلات الرمضانيه 
الفضائيات بتسعي حاليا لاسعاد الشعب 
وعامله مسلسل لكل مواطن ومن غير زحمه 
جميع الممثلين والممثلات عندهم مسلسلات رمضانيه 
زي عادل امام , نور الشريف , يحيي الفخراني , محمودعبدالعزيز ,احمد السقا  , جمال سليمان
يسرا , الهام شاهين , غاده عبدالرازق  ,دره,  نيكول سابا 
دول اللي فاكرهم وغيرهم كتير 
واهم هذه المسلسلات هو ده 
ده لزوم فرعنه الحاج مرسي ما احنا شعب بيحب يفرعن الرؤساء 


 
برضه الفضائيات مانسيتش برامج المسابقات  للنجوم 
والبرامج الدينيه بس حظها قليل من الكم الهائل 
برامج الطبخ علي كل الفضائيات 
وفي طبعا برامج حواريه وسياسيه 
الفضائيات مش حرمنا من اي حاجه 
ربنا يهدهم  بيلهوا الناس عن رمضان
علي سبيل المثال وليس الحصر 
احمد خليل الممثل القديم 
مشارك في 9 مسلسلات 
وبيقول انه مش قلقان يعني بيقدر يمثل جميع الادوار 
وقال كمان ان الاعمال اللي بيرفضها 4 اضعاف اللي بيقبلها 
يبقي بحسبه بسيطه اتعرض عليه 36 مسلسل اختار منهم 9
اللهم لا حسد
----
نروح بقي لفوانيس رمضان 
السنه دي في فوانيس مش حتصدقوا الا لو شفتوها 
فانوس الاخوان 


فانوس بدقن وجلابيه 
مش احنا بقينا دوله اخوانيه 
خلاص يبقي فوانيسنا برضه علي شكل الاخوان 
سؤال خبيث 
مش هما بيقولوا ان التماثيل حرام ؟
والا دي بتدرج تحت بند فوانيس يمين تنور شمال تضلم 
والا هو غفور رحيم ليهم 
وعذاب شديد لينا  
---
الفانوس التاني علي شكل سنافر ودي شخصيه كرتونيه 
دي صورتها 

 
في كمان فانوس علاء الدين 
وفانوس سنووايت 
وفانوس الميرميد 
انما فانوس كورمبو بقي موضه قديمه اكل عليها الدهر وشرب 
---
لكن الفانوس اللي مش بيروح عليه الزمن واللي احنا الكبار بنحبه 
واللي مش بيشتريه واحد منه بيفتكر انه لعب بيه في رمضان وهو صغير 
وولع الشمعه وانطفت وايده اتحرقت  وبابا شخط فيه عشان خايف عليه من الكبريت 
او وقع الازاز اتكسر وقعد يعيط لغايه لما بابا حطله تاني يوم ازاز تاني 
ويبقي دائما الفانوس ابو شمعه سيد الفوانيس 


شوفوا قد ايه جميل  
---
المشروع الاسلامي لرصد الاهله 
قال ان غرة رمضان المبارك يوم السبت 21 يوليو 
في جميع البلاد العربيه 
اما المعهد القومي للبحوث الفلكيه والجيوفيزيقيه اكد ان غره رمضان المبارك 
20 يوليو 
المشروع الاسلامي  بيقول استحاله رؤيه الهلال عقب غروب الشمس 
في جميع الدول العربيه  والاسلاميه 
اما الدكتور مسلم شلتوت  قال ان الافكار الاسلاميه المتشدده 
تجعلهم يصرون علي رؤية اهلة الشهور الهجرية بالعين المجردة 
دون استخدام التليسكوبات والاجهزه الحديثه 
واكد ان هلال شهر رمضان المبارك سيولد في الساعه الرابعه و24 دقيقه 
بالتوقيت العالمي يوم الرؤيه 
اللي هو الخميس 29 شعبان الموافق 19 يوليو 
وسيبقي الهلال الجديد بعد غروب الشمس لمده 6 دقائق في سماء مكه المكرمه 
ودقيقتين في سماء القاهره 
لامتي حيفضل في جدل وبلد تصوم النهارده والبلد التانيه تصوم بكره 
ونفس المشكله في عيد الفطر بلاد تفطر وبلاد تفضل صايمه 
مش برضه التكنولوجيا  تقدر تحدد الكلام ده
والا هي تكنولوبيا اسم بلا فعل 
كل عام وانتم جميعا بخير وصوما مقبولا وافطارا شهيا 
واوعوا اوعوا تقلبوا الصفحه 
ابقوا معي 


6‏/7‏/2012

من ضحايا المخلوع

أعزائي 
ياتري ايه اخباراتكم بعد مضي 12 يوم من حكم الحاج مرسي 
مبسوطين ,قلقانين ,مرتاحين ,تعبانين !
المهم النهارده الجمعه قلت انزل اتفقد حال قصر العروبه 
اشوف اللي بيتقال ان قدامه اعتصامات فئويه 
فكرت اركن لما القي الزحمه وانزل امشي وسط المعتصمين 
اشوف في ايه 
لفيت حوالين القصرمالقتش اي زحمه الشارع فاضي 
وابواب القصر مقفوله وقدمها  الحواجز الحديديه 
بس مافيش حرس واقف 
القصر لفته من 3 نواحي والناحيه الرابعه قدام الباب 
مافيش اي حواجز ولا حرس 
الباب ده اللي قدام جروبي 
بينه وبين جروبي مترو النزهه 
لقيت يا قرائي الاعزاء الاتي
واحد واقف جنب كرسي متحرك والكرسي قاعده فيه ست غلبانه 
مريضه عندها شلل نصفي , بصراحه منظرها يصعب علي الكافر
وقدامهم يافطه كبيره  حبقي اقولكم مكتوب عليها ايه 
قريت اليافطه وشاورت للراجل انه يجي ما الشارع فاضي ووقفت بالعربيه بالظبط 
قدام باب القصر . 
 وربكم والحق ولا حد سالني واقفه ليه  ولا كان في حد اصلا قدام الباب
سالته ايه الحكايه 
اول حاجه ورهاني الرقم القومي 
قالي انه كان بيشتغل في عمارات  السلاب اللي في الكيلو 4,5
شغال نجار باب وشباك 
ولما حي مدينه نصر  جاب أمر ازاله للعمارات 
في يناير 2010
طردوه من الشغل  ومعاه الاوراق اللي تثبت صحه كلامه 
راح عمل محضر في قسم مدينه نصر  
قالوله  ده مصطفي السلاب  نعمل فيه محضر 
المهم ضربوه وعلقوه 
وبعدين سابوه 
ادوله كارت ارهاب وخلاص 
قابل صحفي 
اتعاطف معاه ونشر مشكلته 
بعدها الجريده استغنت عنه 
ده حسب كلا مه معايا والعهده علي الراوي 
اسم الصحفي والجريده عندي
بيقول الجريده طلعت الساعه 12 
12.30 قبضوه عليه 
طلبوا منه العقد والمستخلص رفض يديهولهم
جابوا مراته وعلقوها وكهربوها 
قدام عينيه واعتقلوه 
طلع من المعتقل  في فبراير 2011
بعد الثوره 
لقي مراته عندها شلل نصفي وصاحب البيت خد الحاجه اللي في الشقه 
ومنعهم من دخولها 
راح للجنزوري  وقابله اداله 20 جنيه 
وقاله مافيش في ايدي صلاحيات اعملك حاجه 
هو بيبات قدام القصر هو ومراته 
عنده محمد وفاطمه 9 سنوات و11 سنه 
كل يوم يباتوا في مكان مره خالتهم مره عمتهم 
اكيد لفت نظري  مراته مده اعتقاله كانت فين  ؟
بس مارضتش اساله لان بديهي تكون عند اهلها  
بس برجوعه شال هو الهم لان دي مسئوليته 
اللي حصل للراجل ومراته  كان من بركات المخلوع 
نرجع بقي  للي كان كاتبه في اليافطه اللي خلتني اقف عندها 
-----
مرسي والحكومه معاهمش فلوس يعالجونا 
سعدونا يا اهل الخير , القتله اخدوا براءه 
الديب المحامي عايز ينقل مبارك من اوضه متكلفه 7 مليون 
طيب عايز اعالج الست دي 
والا حنولع في نفسنا احسن 
---
وحاطط رقم موبايل للي عايز يساعده 
هو اسمه عبدالعزيز احمد محمد ابراهيم 
الاسم خدته من الرقم القومي 
ومراته اسمها رضا عبدالمنعم 
01124162536
اللي عايز يتاكد من اللي حكيته 
او للي عايز يساعدهم ورمضان علي الابواب 
بصراحه ماقدرتش اصورهم وانشر الصوره لان الحقيقه صعبوا عليه جدا 
وخصوصا الست المشلوله 
سالته طيب اللي في القصر ماحدش قالك ليه واقف ولا سالوك عن حاجه 
قالي ولا اي حد كلمني 
يالله يا اهل الخير اللي عايز يبتدي رمضان بعمل خير يتصل بيه 
للموجودين في القاهره  هو قدام باب قصر العروبه  المواجه لجروبي 
طبعا وقفتي جابت ناس كتير  ماصدقوا لقوني بتكلم مع عم عبدالعزيز 
وكلهم ليهم مطالب , طبعا انا مش مبعوثه العنايه اللالهيه في الارض 
بس حاله عم عبدالعزيز والست رضا وجعت قلبي اللي اصلا موجوع
ان نسيت اقولكم بعد ما اتحركت بالعربيه لقيته بيشاورلي اقف 
وقفت قالي  علي فكره الست دي قريبه مبارك وعشان كده  بهدلوها 
هو مبارك كان عدو قرايبه ؟ 
يمكن عشان هما مش كلاس بيستعر منهم
اول ماقال كده لقيتني برد واقوله الله يحرقه مطرح ماهو قاعد 
لقيت الناس اللي اتلمت علينا تشتكي او تشوف  ليه واقفه بتكلم مع الراجل 
كلهم سخسخوه من الضحك 
يا افاضل احنا اكتر شعب سميع وكمان حشريين جدا 
في اللي لينا واللي مالناش
----
اغرب مافي الامر ان مافيش اي حد سال انتوا واقفين بتعملوا ايه 
او ليه واقفين قدام القصر 
تفتكروا  هي دي الديمقراطيه والا  ده عدم مبالاه
النهارده ماكنتش كوميديه في  اي حاجه 
اللون الغالب عليه هو الفحلقي 
بس اعوضهلكم في المقال الجاي 
واعوا اوعوا تقلبوا الصفحه 
ابقوا معي
 



 
 

1‏/7‏/2012

تساؤلات رئاسيه

أعزائي 
مبروك لكل المصريين الحكم المدني 
بعد الحكم العسكراللي خنقنا مده 60 سنه 
طبعا شعور جديد اول مره نحسه 
بعد هوجه الانتخابات والدوشه وانتظار النتيجه اللي عذبونا لغايه ماعرفنا مين حيكون 
عريس المحروسه 
اسفرت علي الدكتور محمد مرسي 
طبعا  مش كل المصريين مرتاحين او قابلين نتيجه الصناديق 
بس لازم كلنا نرضي بالامر الواقع   , ماهي دي الديمقراطيه 
تعالوا بقي نتكلم في المهم 
معليش خدوني علي قد عقلي  انا اصل فهمي بطيء حبتين 
محتاره من اللي بشوفه وبسمعه 
القسم الاول كان في التحرير 
وكان قسم جماهيري 
ممكن نعتبره قسم كاجوال 
الرئيس الجديد فتح الجاكت وقال انه مش لابس قميص واقي للرصاص 
ومنع الحرس اللي حواليه من انهم يحموه ويشبكوا ايديهم في ايدين بعض 
كان احساسي ساعتها ان الحرس رايح في حمايه الحاج مرسي 
مش العكس وطبعا ده الجديد اللي مش واخدين عليه 



القسم الكاجوااال  
----

اما القسم التاني الرسمي او القسم الفورمال 
كان امام المحكمه الدستوريه 
اتحسم الجدل وهو اللي راح يقسم بنفسه امام القضاه 
لان المحكمه  ماعندهاش دليفري تبعته للحاج مرسي 


قسم فورماااااال
---
 
 تعالوابقي اسالكم وزي ما اتفقنا ان انا  فهمي علي قدي 
ازاي رفض الاعلان الدستوري المكمل 
وحلف انه حيحترمه ؟
---
حلف اليمين امام المحكمه الدستوريه 
ورفض حل مجلس الشعب 
بس قال انه بيحترم احكام القضاء؟
---
هتف في التحرير  كانه زعيم مش رئيس جمهوريه
ثوار احرار حنكمل المشوار 
قال انه حيرجع الجيش لسكناته 
وبيشكر المجلس العسكري وعارف تعبوا قد ايه ؟
وقالهم انه عايزهم وحيكرمهم 
وكان بيهتف في الميدان مع الاخوان 
يسقط يسقط حكم العسكر ؟
---
مش حسالكم المستقبل حيكون ازاي ؟
لان المستقبل بيدالله وحده 
هل الرئيس له رئيس ؟ والرئيس ده هو المرشد ؟
وهل كلام المرشد ماينزلش الارض والا حيكون كلامه زي حنفي 
وكل مره يقول خلاص ينزل المره دي ؟
هل الشعب حيكون له حريه في اللبس 
بمعني ان مايتفرضش عليه لبس معين ؟
هل وجود المرجعيه الدينيه حتفضل برضه 
للازهر والكنيسه  والا حتبقي للمرشد ؟
المسيحيين حيقدروا يبنوا الكنائس  بدون اعتراض ولا عقبات ؟
---
عندي فضول لمعرفه المطبخ السياسي للرئيس 
او بالاحري مطبخ الحاج مرسي 
ازاي بيفكر ؟ ازاي حيشكل الحكومه ؟
مين نوابه ؟ مين رئيس الوزراء ؟
هل سيوقع الرئيس علي القرارت او سيتولي ذلك غيره؟
هلي سيتصرف بارادته ام ستصادر هذه الاراده ؟
هلي سيستمع لاحد او بالعربي حيدي ودنه لحد ؟
 اللي صوتوا لشفيق ياراجل اصبحوا من الجماعه المحظورة ؟
هل استقال الحاج مرسي من حزب الحريه والعداله ؟
هو قال بس انه رئيس كل المصريين !
 ---
بتمني ان الدين يصل لاهل السياسه يصحي ضمايرهم 
ومش بتمني ان اهل الدين يوصلوا للسياسه 
---
الشيخ اللي من سينا اهدي الحاج مرسي عباءته 
كنت اتمني انه مايقبلهاش 
لان ده ممكن يكون مفتاح لهدايه اكبر 
---
الحاج مرسي فاز ب52% من الاصوات في الانتخابات 
والنسبه ارتفعت بعد قسم التحرير ل 57%
وبعد قسم الدستوريه اصبح 60%
ودي نسبه بعتقد كويسه جدا 
لان مش في يوم وليله ال48% اللي انتخبوا شفيق 
حيغيروا رأيهم
---
اللي عايزينه من شعب مصر 
اننا مانعملش فرعون جديد زي ماعملنا مع مبارك 
المعارضه بحضاره وليس استسلام وجبن 
 --- 
اما دموع الرئيس في صلاة الجمعه 
كتير زعلانين لانهم مش عايزين الرئيس يبكي 
بس في الاول والآخر هو بني ادم 
له احساس وشعور وبيزعل وبيفرح 
الدموع عمرها ماكانت ضعف 
مرات بتكون الدموع منتهي القوة 
--- 
الصوره دي بتورينا تواضع الحاج مرسي 
يارب يفضل كده علي طول 
وياريت بلاش نفرعنه ويبقي عندنا فرعون جديد 
 

  
---
ننتقل بقي للحاجه نجلاء 
حرم الحاج مرسي
 
 
زوجه الرئيس مصره علي انها الخادمه الاولي 
براحتها خالص بس الي متي سيظل هذا الكلام ؟
هي طبيعي بتنتمي لجماعه الاخوان المسلمين 
وبتقول انه مسئول عن شوؤن البلاد 
لان الاسلام يأمره بذلك 
السؤال هل الرؤساء الاجانب ليسوا مسئولون عن شئون بلادهم 
علي اعتبار انهم مش مسلمين 
أن الاوان لنبعد الدين عن السياسه 
--- 
أخر حاجه بسال عنها 
  البرادعي  وعبدالجليل مصطفي  ودكتور غنيم 
وشباب الثوره  وياتري حيكون لهم دور في مصرالجديده 
وياريت ماننساش ان الثوره ماكانتش ثوره الاخوان 
---
اللي بتمني تحقيقه وكتير غيري بيتمنوه 
سهوله المعيشه واخضرار الارض 
بلاش مليونيات  بتضيع وقتنا وطاقتنا 
وتخرب الاقتصاد والسياحه 
وبتاخد في وشها الاستقرار  والطمانينه  والامان 
---
ومنتظرين نشوف ال100 يوم الاولي في حكم الحاج مرسي  
حتوصلنا لايه 
ربنا يحمي مصر 
ويوفق الحاج لاداره الهم المتلتل اللي منتظره
واوعوا اوعوا تقلبوا الصفحه 
ابقوا معي