29‏/5‏/2012

الاختيار المر

اعزائي 
نتيجه الانتخابات خلاص اتحسمت وحيكون عريس مصر القادم 
واحد من اتنين  دكتور محمد مرسي ممثل جماعه الاخوان
او الفريق شفيق رئيس وزراء المخلوع 
او النظام البائد 
لم نتوقع خروج الثوره من الانتخابات بخفي حنين 
بعد استشهاد المئات من اجل حريه الشعب المصري 
الحقيقه خيار مر 
الشعب المصري حيستجير من الرمضاء بالنار 
 ---


 
الحقيقه بقي كل من هب ودب يدلي بتصريحات 
في تصريح من التصريحات البلهاء بيقول 
الاقباط يعتذروا لانهم صوتوا لشفيق 
فين بقي الديمقراطيه ؟
كل فرد في الشعب المصري ايا كان دينه  له حريه التصويت وده حقه الدستوري 
واكيد مش كلهم صوتوا لشفيق تنوعوا في التصويت 
اللي صوتوا لشفيق  اعتقد ان عندهم حق 
لانه ماقدمش الرعب زي الاسلاميين اللي منهم طالبوا بفرض الجزيه 
ومنهم من حذر من التعامل معهم 
وتصريحات تانيه كتير
وطبعا هما مش حيرضوا يتعاملوا كالاغراب في بلدهم  
وكان ده السبب في ان جزء منهم ادوا شفيق اصوتهم  
---
نكته علي الفيس بوك اطلقتها الصديقه سالي سمرات قالت 
لو انتخبنا شفيق حانضيع حق الاموات 
ولو انتخبنا مرسي حنضيع حق  الاحياء والاموات 
بصراحه معاها كل الحق 
---
نشوف بقي ليه 
لو انتخبنا مرسي 
حنسلم البلد بالكامل بسلطاتها التنفيذيه والتشريعيه ورئاسه الجمهوريه 
للتيار السياسي الاسلامي  




الاداء كان في الشهور اللي عدت لا يبشر بالخير 
نقضوا عهدهم وشاركوا في الحياه السياسيه 
واستحوذوا علي مجلسي الشعب والشوري 
وكمان لجنه اعداد الدستور 
يقولون مالا يفعلون 
قالوا ان اعضاء تاسيسيه الدستور من كل التيارات 
وبعد كده رفضوا 
قالوا مش حنشترك في انتخابات الرئاسه 
تراجعوا 
اهانوا الثوار واتهموهم بالخيانه 
بالله عليكم ازاي نطمن لهم بعد كده 
وشوفوا اللي كانوا بينقاشوه في المجلس الموقر 


بيقدملنا ايدهم وبيخفوا في الايد التانيه  وسيله يطعنونا بيها 
 ---
تصريحات مرسي يوم السبت الماضي 
حيدوس الفلول بالاقدام 
اعلن كده قدام الشاشات والميكرفونات 
وعد بالاهانه والعنف والانتقاام 
طيب اللي حيخالفوه حيتصرف معاهم ازاي وخصوصا  في الانتماء الديني ؟
او بالاحري لما الاقباط حيخلفوه حيعمل فيهم ايه ؟
دي بقي ديمقراطيه الاخوان 
والا ديمقراطيه الديكتاتور 
---
تعالوابقي نشوف شفيق 
بانتخابنه ليه بنعيد النظام السابق 
بعد ما ثورنا ضده  من اجل مصر والشهداء
وبعد حلم الثوره الجميل 
استيقظنا علي كابوس 
ده بقي اللي قاله شفيق ياراجل بعد النتيجه 
 

شفيق هو مبارك الجديد 
شوفوا كده 
يعني احمد زي الحاج احمد 
وجهين لعمله وحده 
----
الماذق الحقيقي هو التصويت  لمرسي والا شفيق 
بس اكيد الشعب مش حيستحمل 4 سنين  حيغير كل حاجه قريب
ومش حيسلم مصر للماضي لانه عايز المستقبل 
---
الشيخ صفوت حجازي قبل الانتخابات كان بيعلن ان مرسي مدعوم من الله 
وعقاب ربنا سيحل بمن لا يصوت له 
تخلف علي حق 
والله بريء من كل الافتراءات 
---
بعض الفقراء كانت اصواتهم لمن اعطي مش لمن اصلح 
---
طوق النجاه بيقدم للاخوان  مع ان اولي بهذا الطوق هي مصر 
---
الشعب مش محتاج جلابيه وسبحه وزبيبه 
ولا محتاج قمع ورجوع لعهد مبارك
محتاج عيشه كريمه وامنه  
محتاج يبقي مطمن علي عياله وبيته 
وحاسس ان بكره حيكون احسن من النهارده
عايز يتعلم يمارس الديمقراطيه 
ده مش كتير علي اي مواطن مصري 
---
الاختيار حاليا هو حتختار ايه 
الحقنه والا اللبوس 
ربنا يلهم الجميع الصواب 
ويحرس مصرنا الحبيبه 
واوعوا اوعوا تقلبوا الصفحه 
ابقوا معي 
 

25‏/5‏/2012

وطن يسع الجميع

أعزائي 
خلاص مولد الانتخابات خلص 
وحاليا منتظرين النتيجه وكلنا حاسين اننا في امتحان وعايزين نعرف نجحنا والا لا
ربنا يعدي الكام ساعه اللي باقيه علي خير 
فمن هو عريس المحروسه المنتظر ؟


شهدت الدوائر الانتخابيه الرئيسيه والفرعيه اقبال من المواطنين 
ولاسيما كبار السن 
عددهم فاق المتوقع وفاق الشباب 
والسيدات كانوا ايجابين جدا 
لان نسبتهم اكبر من نسبه الرجال  
سمعت الاعلامي احمد المسلماني في برنامجه اليومي الطبعه الاولي 
بيقول حاجه غريبه جدا  ودي موجهه لطبقه معينه من الشعب 
بيقول لو حد ادالك فلوس وقالك انتخب فلان خد الفلوس 
بس قدام صندوق الانتخاب راعي ضميرك 
مش فاهمه اي ضمير ماهو اخد الفلوس ووعد يبقي لازم يوفي 
واخد اجر عشان يقوم بعمل 
مش عارفه ده تفكيره والا بيقول للشعب النصب بقي عادي 
والا ذله لسان 
بس حفكر كتير قبل ما اسمعه تاني 
---
نرجع تاني للانتخابات
نبتدي بالمشير وبعده المرشحين للرئاسه 
----
المشير تفقد سير الدوائر قبل الانتخابات 
في مدرسه خليل اغا الثانويه العسكريه  قاله بواب المدرسه 
انت احسن من حسني مبارك بتسلم علينا هو ماكانش بيرضي 
ولما ساله المشير حتنتخب مين قاله خليها في سرك 
ردعليه المشير وقاله قولي في ودني 
قاله ماينفعش اقولك اللي حختاره 
الستات اللي واقفين هتفوا وقالوا يسقط يسقط حكم العسكر 
وقابل هتافهم بابتسامه 
اما يوم الانتخابات راح  لجنه مدرسه الخلفاء بمصر الدجديده 
في حده من اصحابنا كانت بتنتخب اثناء وجوده سلم عليها وسالها 
انتخبتي مين ردت وقالت احمد شفيق رد عليها وقالها جدعه 
بس ياتري هو شخصيا انتخب مين ؟
---
13 الف لجنه اجراءات مشدده 
شاركت فيها الشرطه العسكريه والداخليه 
وشاركت القوات الجويه بدوريات طائره 
وزارة الصحه اعلنت عن وفاه مسن في اللجنه 
و28 اصابه في اللجان 
الجو كان حر جدا
كانت صور الشهداء علي ابواب اللجان 
والتجاوزات كتير منها 
مشاحنات بين انصار المرشحين في القليوبيه والاسماعيليه 
وجنوب سيناء وكذلك بورسعيد والدقهليه 
انصار مرسي وابو الفتوح في السويس كسروا الصمت الانتخابي امام اللجان 
وكذلك احمد شفيق قام بعمل مؤتمر صحفي واحالته اللجنه العليا للانتخابات للتحقيق
في لجان المقطم والخليفه ميكروباصات  دعايه لعمرو موسي 
حمله ابو الفتوح استعانت بالميكرفونات 
حمله مرسي مزقت صور المرشحين 
اما حمله محمد مرسي استعانت بالموبايلات لارسال الرسائل لانتخاب دكتور مرسي 
حمله شفيق تقدمت ببلاغات من حمله عمرو موسي ومحمد مرسي 
بسبب اطلاقهم شائعه وفاته  
بيقال ان محمد مرسي وزع اشوله بطاطس علي الفقراء ليله الانتخابات 
للحصول علي اصواتهم 
واسعار صوره كالاتي 
400 جنيه للسياره 
100 جنيه للدراجه البخاريه 
50 جنيه للتوكتوك 
هذا الكلام تردد في مدرسه جابر الصباح 
والمقطم التعليمي والشيماء بنين 
وطاردت الشرطه العسكريه في السيده زينب انصار مرسي 
لمنعهم من الدعايه امام اللجان
وكانت الانتخابات الراعي الرسمي لها شهداء الثورة 
كان فيه خرق للصمت الانتخابي 
سؤال وياريت تفكروا قبل الاجابه
من لا يحترم القانون وهو خارج السلطه فهل سيحترمه وهو مسئول ؟
---
دكتور الكتاتني رئيس مجلس الشعب 
وصل لمقر لجنته بمدرسه جيل 2000 بمدينه 6 اكتوبر
ودخل الي اللجنه مسرعا للادلاء بصوته متخطيا طابور الناخبين 
الناخبين طلبوا منه الوقوف في اخر الطابور لانتظار دوره 
وانصاع لامر الناخبين
برضه مافيش فايده في ناس فاكره انها فوق البشر 
---
عمرو موسي التزم بالطابور ولو انه ممكن كان يدخل في طابور كبار السن 
وعرض عليه احد الناخبين التقدم للامام 
الا انه رفض لان الجمهوريه الجديدة فيها احترام لحقوق الاخريين 
---
اما حمدين صباحي كان بينتخب في لجنته 
بصحبه المخرج خالد يوسف والمنتج محمد العدل 
---
محمد سليم العوا انتظر في الطابور ساعه
وكان ممكن يدخل طابور المسنين 
---
اما ابو الفتوح التزم بطابور كبار السن 
وده كان انتظاره 45 دقيقه 
الست اثار الحكيم كانت لابسه شعار حمله ابوالفتوح 
وكانت بتوزع بونبوني علي الناخبين 
اشمعني شفيق يارجل يوزع علي التحرير 
يبقي اسمها الجديد اثار البونبوني 
---
ابو العز الحريري وقف 40 دقيقه في  الطابور 
ولجنته كانت في محرم بك بالاسكندريه 
---
اما دكتور محمد مرسي وقف 15 دقيقه في لجنته بالزقازيق 
---
شفيق ياراجل او شفيق بلوفر 
او في قول اخر شفيق بونبوني 
تعرض بالرشق بالاحذيه من عدد من الناخبين 
اما عند مروره علي لجنه عبدالمنعم واصل بالقاهره الجديده 
لقي ترحيب شديد 
---
خالد علي اصغر المرشحين 
سال عن نهايه الطابور ووقف
القاضي ساله حتنتخب مين يا استاذ خالد 
رد وقال حنتخب الثورة 
---
هشام البسطويسي كان عيدميلاده ال 61
وقف في طابور المسنين وكان الطابور فيه 300 ناخب 
---
دي كانت اخبار المرشحين للرئاسه 
او العرسان المتقدمين للمحروسه 
---
تعالوا بقي احكيلكم عن لجنتي 
لجنتي هي مدرسه الانجليش سكول بمصرالدجديده 
طبعا زي كل الانتخابات رحت مع اختي الكبيره
عندنا العيله انقسمت كل حد فيهم انتخب غير التاني 
اللجنه كانت منظمه جدا وكمان الجيش احقاقا للحق فوق الممتاز 
بيساعدوا الناخبين وخصوصا كبار السن 
وكمان اول مره ا القيهم ودودين مع الناس 
سالت عن لجنتي وهي برضه لجنه اختي  دلونا عليها 
فيها 3 طوابير  2 لكبار السن وواحد للشباب
بياخدوا من كل طابور اتنين  بس بتلاقي اللجنه فيها 20 
في ناس بتنتخب ببطيء جدا وناس بتنتخب بسرعه 
 دخلت اختي الاول ادت البطاقه ورقمها في الكشف للمسئول 
بعدها مضت قدام اسمها 
وبعدها دوري وقفت اديته البطاقه لقيته بيقول لوحده بره الطابور 
معليش حستثنيها عشان مع اختها 
قلتله مين اللي حتستثنيها قالي انتي 
قلتله انا واقفه في دوري هي اللي بره الطابور 
رد وقالي يوووه ورمي الرقم القومي بتاعي قدامه 
قلتله حضرتك رميته ليه ده دوري ثم انك ماتقوليش يوووه 
لما انت مش عايز تشتغل او عايز تجامل في وقتنا اللي مافيهوش مجامله 
تبقي تقعد في بيتك وتعتذر عن الشغل 
لقيت بسرعه المستشاره المشرفه علي اللجنه جت وادت الكشف لموظف تاني 
وقالتلي اسفين ماتزعليش وهو اديته كشف تاني وقعدته بعيد 
مضيت  وبعدها اخدت البطاقه الانتخابيه ورحت انتخب 
امممممم 
طبعا عايزين تعرفوا انا انتخبت مين 
اقولكم والا اسيبكم تفكروا 
ههههههههه
لا خلاص حقولكم 
كتبت علي البطاقه فوق في الحته الفاضيه وكملت في الجنب 
قلت 
نظرا لعدم اقتناعي باي من المرشحين وبرامجهم مع احترامي لهم جميعا
فانني امتنع عن الادلاء بصوتي 
تمشيا مع مبدا 
انا رئيسه جمهوريه نفسي 
وطبقت البطاقه وحطتها 
وانا خارجه اختي سالتني انتخبتي مين قلتلها اللي كتبته 
كان في مستشار معدي سمع اللي قلته لقيته بيضحك وبصوت عالي 
سالته هو حضرتك بتضحك علي ايه 
قالي بضحك علي اللي كتبتيه 
بس الحقيقه انتي حره 
وعشان انا حره مش عايزه انتخب اي حد والسلام 
ويفضل ضميري يأنبني 4 سنين 
زي ما بيانبني علي انتخابي الاخوان في مجلس الشعب 
قريت ان في ست اسمها ام محمود 
لم تنتخب وهي مسنه في اواخر العمر 
قالت لو الريس جه عملي حاجه في اللي فاضل من عمري 
وخفف عني وجع السنين وعيشني عيشه كريمه في الكام سنه اللي فاضلنلي 
يبقي كتر خيره 
ولو ماعملش حاجه يبقي ذنب اللي ذينا  في رقبه اللي اختاروه 
انا بصراحه مش حمل دعوه عليه 
ومش عايزه ضميري يتعبني 
اصحابي في البالتوك زعلوا مني قالوا انتخبي افضل الوحشين 
بس انا صوتي امانه  ومش ممكن افرط في الامانه 
 
بس نقول ايه ربنا يولي علينا الاصلح 
وان شاءالله حنتقابل قريب بعد الاعلان عن العريس المرتقب 
واوعوا اوعوا تقلبوا الصفحه 
ابقوا معي 




 
 

 


 

14‏/5‏/2012

حرارة الانتخابات قاربت الغليان

أعزائي 
احنا حاليا في فتره العد التنازلي لانتخابات الرئاسه 
والسؤال اللي اي حد بيساله هو 
ناوي تنتخب مين ؟
ده لما تقابل حد ممكن يكون السؤال قبل مايسلم عليك  
لان الدعايات المكثقفه باين جابت نتيجه عكسيه  
وده اللي مخليني لحد دلوقتي مش قادره ولا عارفه ممكن انتخب مين 
بصراحه خايفه اني اغلط غلطتي الاولي لما انتخب حزب الحريه والعداله 
اللي هو الاخوان في انتخابات المجلس الموقر 
كنت بصراحه عجبني ادائهم وتنظمهم في فتره الثورة 
كان شباب الاخوان بينظم المرور لان الشرطه كانت هربانه ولبده في الدره 
وبيامنونا بالليل واحنا نايمين  يعني من الاخر اتخدعت زي ماغيري اتخدع 
خايفه انتخب واحد والقيه بعد كده مش قد المسئوليه 
وكرسي الرياسه بتاعه مش كرسي تيفال يعني حيلزق فيه 

كنت شايفه ان ابو الفتوح احسن الوحشين 
بس بعد المناظره اللي كانت بينه وبين عمرو موسي 
بجد اتصدمت فيه لا عجبني اجاباته ولا هجومه  
الايام اللي فاتت كنت بركب تاكسيات 
عايزه اعرف الناس حتنتخب ازاي وايه افكارهم 
ولما تبقي عايز تلم معلومات عليك بسواقين التاكسي 
وصفه مضمونه دي اجمد من سندوتشات الجبنه الرومي 
اللي في كافتيريا كليه اداب عين شمس
طبعا انا عامله اني هبله وعبيطه ومش بفهم في اي حاجه 
واول ما اركب اقوله انت حتنتخب مين يا اسطي  واسيبه يسمعني  
وقبل ما انزل  السواق  بيوصوني اني انتخب مرشحه السوبرمان 
واللي حيعدل المايله
اغلبهم منقسمين بين  شفيق  ياراجل او الاسم الحركي له شفيق بلوفر 
 وعمرو موسي  
---
بيقولوا عن شفيق ياراجل 
انه طيار وراجل عسكري 
حارب في 73 وانه هو اللي حيقدر يقود البلد لانه محنك
وحيقدر يظبط البلد ويقضي علي البلطجيه ويعيد الامن 
وكمان بيستشهدوا بمطار القاهره 
واحد قالي ده المطار بقي ابهه بعد ماكان خرابه 
---
اما عمرو موسي 
فده دبلوماسي ويعرف يتعامل مع امريكا كويس ويوقفهم عند حدهم 
وراجل مخابرات من الدرجه الاولي 
مش عارفه الكلام ده جابوه منين  
وله اصدقاء في كل العالم ولو حصلت مشكله لا قدرالله لمصر
حيحلوها معاه 
سواق منهم قالي اصل عمرو موسي صاحب كاريزما
طبعا استعبطت وسالته يعني ايه كاريزما دي اللي بتقول عليها
قالي يعني راجل ملو هدومه واللي يقف قدامه يخاف منه 
رديت عليه وقلتله اه يعني قيمه وسيما 
قالي الله ينور 
وده حيخلي العالم كله يخاف ويعمله الف حساب 
----
غيرهم قالوا الدكتور ابو الفتوح 
راجل دكتور وبيفهم وحيعملنا  العلاج المجاني 
قال يعني كل مشاكلنا بقت طبيه 
---
اما اللي قالوا محمد مرسي 
رايهم ان الشعب نسي دينه وهو اللي حيفكرنا بالدين اللي نسيناه 
---
اما اللي قال حمدين صباحي 
شايفين انه يقدر يحكم لان سنه صغيره وعشان بينزل للشعب 
في الشوارع  يبقي بعد كده حيمشي في الشارع 
ونقدر نقوله اللي مزعلنا ويحل مشاكلنا 
فاكرين انه ممكن بعد مايبقي رئيس ينزل من غير حراسه ويقعد معاهم غلي القهوه 
---
خالد علي  
واحد او اتنين اللي اتكلم عليه 
وقالوا اصله دم جديد في مصر 
ولما سالت يعني ايه دم جديد 
قالوا يعني لسه طازه بشوكه 
---
وانا في الاشارة وطولت كالعاده 
وحده ست بتبيع علب مناديل للعربيات 
كانت بتتشاكل مع حد في عربيه قدامي
لما وقفت جنبي قالتلي من غير ما اسالها 
بيسالني حنتخب مين قلتله عمرو موسي 
قالي ده فلول حتنتخبيه تبقي فلول زيه 
قلتله فلول فلول حنتخبه 
سالتها طيب حتنتخبيه ليه 
قالتلي لانه حيعرف يمسك البلد وينضفها 
عاجبك اللي احنا فيه ده ؟
بتقصد عن الانفلات الامني 
وعشان يعدل البلد 
 قلتلها خلاص مدام شايفه كده يبقي عالبركه 
---- 
دي عينه من اللي قابلتهم لمده 10 ايام وسالتهم 
ليه قريبه عايشه بقا لها 20 سنه في امريكا وهي منتقبه 
كانت بتكلم مامتها قبل الانتخابات اللي كانت من كام يوم في امريكا 
وكانت بتقول انها حتنتخب ابوالفتوح او مرسي 
عشان دول اسلاميين واحنا عايزين حد اسلامي يمسك البلد 
مامتها قعدت تقنعها انها تشوف الاصلح مش شرط انه يكون اسلامي 
وبرضه مافيش فايده 
فوجئت بان مامتها بتكلمني وبتقولي ان بنتها وحفيدتها انتخبوا 
وكلموها بعد ماخلصوا 
قلتلها ها وانتخبوا مين ؟ 
مرسي والا ابو الفتوح 
ردت عليه وقالتلي مش حتصدقي  الاتنين انتخبوا عمرو موسي 
طبعا كانت مفأجاه  سالتها ازاي 
قالتلي مش قلتيلي انتخب الاصلح لمصر انتخبت 
وعلي فكره كل اللي اعرفهم ومقيمين في امريكا 
انتخبوا عمرو موسي !
ده يخليني اطرح سؤال مهم 
هل له شعبيه جامده هناك ؟
والا الدعايه هي اللي عملت كده ؟
والا في تدخل من امريكا  ؟
----
شايفه ان راجل الشارع البسيط حيران مش عارف ينتخب مين 
الدعايه الانتخابيه جامده بالاضافه للاعلام والمناظرات 
واغلب الشعب المصري ان لم يكن اكثرهم 
عاطفيين بيحكموا بقلبهم 
يعني ممكن يختاروا غلط 
ناهيكم عن الاميين دول حيقوللهم انتخب رمز كذا حينفذ 
ممكن التنفيذ ده يبقي تنفيذ عاطفي بمعني انه صدق اي كلام وخلاص 
او يكون بعد ازازتين الزيت وكيلو السكر وباكو الشاي 
او علي الاكثر بطانييه 
ربنا يستر 
---
 بفكر انتخب الراقصه والممثله هياتم اللي اشاعوا انها حتترشح 
او انتخب المطرب الشعبي سعد الصغير 
خلينا نفرفش شويتين  هي ترقص وهو يغني ونعيش بقي معاهم 
وبكده ابقي ابطلت صوتي وضمنت انه مش حيتزور 
ربنا يوفقنا جميعا في الاختيار السليم 
وللحديث بقيه بعد ما اروح الانتخابات واكتبلكم  علي اللي شفته 
واوعوا اوعوا تقلبوا الصفحه 
ابقوا معي



 

 

4‏/5‏/2012

جمعه البطيخ

أعزائي 
حزينه جدا علي مصر واللي بيحصلها 
كل يوم جمعه مليونيه جديده 
بيوقفوا حال البلد وبيمزقوا مصر 
كنت في حديث مع قريبتي اللي عايشه في دبي 
اللي شاركتني في مقالين بعد الثوره 
ومسميه نفسها اللهو الخفي 
اكيد قرائي القدام حيفتكروها 
هي مهمومه جدا وحزينه علي مصر 
الحديث كان بينا واحنا بنشوف اللي بيحصل في العباسيه 
 وبنشوف جمعه الزحف 
او مليونيه الزحف 
اللهو الخفي صححت الاسم وقالت دي
جمعه الويل والعذاب والتكسير والحريق 
مش فاهمين اي زحف بيقصدوه  اعتقد كفايه بقي مليونيات
النهارده كل بيت في مصر او بالاحري كل مصري حزين علي 
اللي حصل في العباسيه 
كان ليه  هما فاكرين ان العسكر دول فرد واحد 
حيقتحموا وزاره الدفاع ويخلعوه ويسلم السلطه 
والشعب بكده اخدالسلطه 
احنا لا كنا ولا حنكون مع الحكم العسكري
لو الجيش سلم السلطه  حيسلمها ل مين ؟
سلطه من الشعب برضه الشعب حيعمل مليونيه ويعارض 
ويقول فلان مش عايزينه لا عايزين علان وبلاش ترتان 
الشعب المصري باين ادمن المليونيات 
نرجع تاني لو الجيش سلم السلطه 
ومافيش شرطه في البلد 
النتيجه ان البلطجيه حيطلعوا بيوتنا يسرقونا ويقتلونا 
ويستبيحوا حرماتنا في الشوارع 
ده يرضي مين ؟
خلاص كلها شهرين والرئيس الجديد يمسك البلد 
نستحمل العسكر وعلي رأي جدتي لما بتقول
نص العمي ولا العمي كله 
المليونيات الاولي ايام الثوره كانت  ماشيه في خط سير سليم 
انما حاليا مش عارفين نسميها ايه 
تعرفوا ياساده ياكرام اسعار البلطجيه اللي في المليونيات كام ؟
ماهو البلطجيه لهم سعر خدوا عندكم 
راشق الحجاره 200 جنيه في اليوم 
حامل المولوتوف 2000 جنيه في اليوم 
حامل الالي 3000 جنيه في اليوم 
بفكر بما اني بعرف انشن كويس  اني اخدلي مليونيتين تلاته 
كل جمعه 3000 جنيه  يابلاش 
بس حموت مين  المصري اخويا 
وبرضه العسكر مصريين زينا بالظبط 
اللي حصل النهارده في العباسيه كان مسخره بجد 
والجيش مالقاش طريقه الا العين الحمرا 
ونزل الصاعقه والطيارات والدبابات  
البلطجيه جريوا واستخبوا زي الفيران في الجحور 
وبعدها قفلوا ميدان العباسيه وكان في حظر تجوال من 11 مساء ل7 صباحا 
في الميدان 
قريبتي فكرتني  بجورج كولوني 
اللي اعتقل في امريكا هو ووالده 
لانه نزل عن الخط الاحمر وقرب من خط الخطر  
ناس فاهمه ايه معني التظاهر وايه معني سلميه 
ياريت احنا كمان نفهم معني سلميه 
---
ليه مافكروش يعملوا مليونيات بس تفيد البلد وممكن نسميها جمعه كذا 
زي ايه يا ساده ياكرام 
--
جمعه العلاج 
------
ينزل الاطباء للتحرير  ويقدموا العلاج للفقرا بلا مقابل  
والساده الصيادله اللي يقدر منهم  يصرف ادويه حيبقي خير وبركه
وحيعرفوا ينظموها مش بينظموا المليونيات 
--
جمعه التعليم 
-----
ينزل المدرسين ويشرحوا الدروس الصعبه لتلاميذ المدارس بالمجان
وكمان غير المدرسين يشاركوا فيها 
ممكن يتقسموا مجموعات قبل الجمعه ويزوروا مدارس اللغات 
يسالوا الاداره اذا في دسكات  قديمه  او مكسره مستغنين عنها 
ياخدوها ويصلحوها ويوزعوها علي مدارس الحكومه 
وممكن يشارك القادرين بانهم يشتروا ترابيزات وكراسي للمدارس الفقيره 

 --


جمعه السياحه 
-----

دي ممكن تكون علي النت  البهوات اللي بيعرفوا لغات وبيقعدوا طول اليوم 
يعملوا شات مع الصبايا الحسان والعواجيز المتصابين 
يقرولهم كام مقال  عن كنوز مصر السياحيه 
ويعملوا برضه شات ويشرحوا للاجانب عندنا ايه في مصر 
--
جمعه العمل والانتاج
-----
يروحوا شغلهم يوم الجمعه ويشتغلوا بلا مقابل ويزودا الانتاج يوم 
ويبقي يوم في حب مصر 
--
جمعه اطعام الفقير 
-----
لو كل واحد عمل حله كشري او خدله كام سندوتش فول وطعميه 
وراح التحرير  اكل الفقراء مش حيكون احسن من المليونيات 
اللي مالهاش فايده اقلها يبقي اطعم فقير
والساده مرشحي الرئاسه مش برضه كانوا بيدفعوا تمن التوكيلات 
كانوا اتبرعوا بيها مدام ماتعبوش فيها وكلها تمويلات لمعالي الرؤساء
--
جمعه النظافه 
-----
الشباب ينزل ينضف الشوارع  بدل ما بيطلطع في التحرير والعباسيه 
علي الاقل البلد حتنضف من اكوام الزباله المتلتله 
-- 
وفي حاجات تانيه كتير ممكن يعملوها كل جمعه
والله انا وقريبتي مش بنحلم 
حتي لو بنحلم  املنا ان حلمنا يبقي حقيقه 
وبنهدي الصوره دي لكل مصري 

 

اخر حاجه حقولها النهارده

ان في برنامج في القناه الاولي  اسمه 
من هو الرئيس ؟
بيقدمه  الاعلامي القدير طارق حبيب
سؤال بيساله لكل المرشحين كلا علي حده 
ويجاوبوا 
النهارده كان السؤال عن تطوير التعليم والبحث العلمي 
بيذاع يوميا الساعه 8 مساء بتوقيت القاهره 
ويعاد الساعه الواحده ظهرا بتوقيت القاهره ايضا 
في اليوم التالي 
عارفه ان في كتير النهارده مش حيعجبهم المقال 
حيقولوا ايه الكلام العبيط ده 
بس برضه حقولكم 
واوعوا اوعوا تقلبوا الصفحه 
ابقوا معي 




 
 
 

1‏/5‏/2012

دستور ياسيادي

أعزائي
بجد حيرانه وبقيت مش فاهمه حاجه في اي حاجه 
حال مصر بقي محير 
قلقانه  زهقانه والملل بيطاردني من كل الجهات 
ايه اللي بيحصل لمصر ؟
لامتي حنفضل كده ؟
 حا سه اني زي الاطرش في الزفه 
او واقفه في مفرق سكه حديد مش عارفه اعدي والا افضل في مكاني
والا اوقف القطار اللي جاي بالظبط زي الصوره كده

 
تعالو نستعرض الاحداث بس ياريت تستحملوني 
بصراحه انا مش مستحمله حالي ابدا
قارئي السيد مجدي من البالتوك 
اسمه علي البالتوك          
Magdy_15_9
سالني سؤال وماعرفتش ارد عليه
بس فكرت كتير في السؤال ولقيت انه سؤال مالوش اجابه الا من القانونيين 
القسم البرلماني وبرضه الجمهوريه 
او القسم بوجه عام بيكون كده
اقسم بالله العظيم ان احافظ علي النظام الجمهوري 
وان احترم الدستور والقانون  
وان ارعي مصالح الشعب رعايه كاملة 
وان احافظ علي استقلال الوطن  وسلامه اراضيه 

ده القسم لاحظوا انه بيقسم بانه يحترم الدستور
فين بقي الدستور اللي الرئيس القادم حيقسم عليه ؟
وفين الدستور اللي المجلس الموقر اقسم عليه ؟
والحكومه مش برضه بتقسم عليه والا انا مش واخده بالي ؟
والا حيبقي القسم للرئيس من غير دستور لحين ميسرة 
دستور ياسيادي 

---
 



دي صوره المحامي والناشط الحقوقي احمد الجيزاوي 
صاحب المشكله الكبيره بين مصر والسعوديه 
كان قد اعتقل في عهد المخلوع مبارك
القصه لقرائي اللي عايشين بره مصر ومش عارفين اصل المشكلة 
هو محامي وناشط حقوقي معروف بدفاعه عن المعتقلين المصريين في السعودية 
ويتردد انه يقاضي الملك عبدالله علي ذلك 
تم اعتقاله بعد وصوله مطار جده لاداء مناسك العمرة 
وكانت بصحبته زوجته الدكتوره شاهنده فتحي 
ويقال انه قد صدر حكم غيابي بالحبس عام وجلده 20 جلده
والتهمه كانت ( العيب في الذات الملكية )
وكان ذلك بعد حلقه تليفزيونيه انتقد فيها الملك والسلطات السعودية 
بعدذلك كان سبب الاعتقال انهم وجدوا بحوزته 120 الف قرص زناكس 
وهو دواء مدرج بقائمه الممنوعات
طبعا انا مش عارفه اذا فعلا مدرج او لا ياريت الساده الصيادله يقولوا رائيهم 
وتضابت الاقوال  قالوا انه مخبيها في علب لبن 
غيرهم قال لا في علب عصير 
كمان ضافوا انهم كانوا في حافظتي المصحف 
طبعا كل واحد بييفتي براحته 
الشنط بتعدي في مطار القاهره علي الجهاز 
ازاي الظابط والامين اللي علي الجهاز ماشافوش حاجه 
ولا لفت نظرهم ان معاه علب لبن او عصير حسب مابيقولوا
الدكتوره شاهنده قالت انه اول ماوصل قبل ما يستلموا الشنط 
في الجوازات قبضوا عليه قبل مايفتحوا الشنط
مش عارفه تجي ازاي ؟
وبتقول ان فيه ضغوط كتيره عليه لاجباره بالاعتراف 
وفي انباء قالت انه فعلا اعترف بحيازته للحبوب 
وقد اقتحم الشباب سفاره السعوديه بالقاهرة
فما كان من السعوديه الا انها استدعت السفير وقفلت السفاره 
وقنصليتها في الاسكندرية والسويس 
والمساعي شغاله حاليا 
سؤال علي السريع 
هل حضر معه مندوب من القاهرة في التحقيق ؟
ياتري مذنب والا بريء ؟
السفير المصري في السعودية محمود عوف 
آدان الجيزاوي 
بس العرف بيقول الدبلوماسي لا يجوز له الادلاء بتصريحات صحفيه 
لانه هو ممثل الحكومه المصريه 
مش في قانون اسمه المعامله بالمثل 
راح فين ؟
فين بقي وزير الخارجيه ؟
 حنقول ايه ماهو قرارته مستمدة من المجلس العسكري 
والمجلس مش بيعرف ايه هي ثقافه التعامل الخارجي
ناس كتير بتهاجمه وبيستشهدوا بانه سافر بملابس عاديه مش احرام 
ده عمره ماكان مقياس لان رحلات عمره كتير بتطلع الاول علي المدينه 
وبعدها بيحرموا ويرحوا علي مكه 
وممكن يحرموا في الميقاط  
ده مش سبب نتهمه بيه 
انا لا معاه ولا ضده  مش قادره احدد هو مظلوم والا تاجر مخدرات 
بس سمعنا ان فيه فيديو بيثبت انه صاحب الحبوب المخدره 
طب فين ؟ لو اذاعوه يبقي ريحونا وارتاحوا 
----
مذيعه في القناه التانيه المصريه 
بث ارضي 
علقت تعليق يثبت الجهل المتفشي
قالت احنا والسعوديه اصلا نسايب 
فيه نسب بين السيده هاجر المصرية 
وسيدنا أبراهيم السعودي 
منتهي الجهل  لان اكيد ماعندهاش فكره ان ايام 
سيدنا ابراهيم عليه الصلاة والسلام 
ماكانش فيه دول متقسمه 
ياست المذيعه والاعلاميه التقسيم ده كان بعدين 
في اتفاقيه سايكس بيكو 
بس حنقول ايه غير انه اعلام مصاطب 
الحاجه الاخيره  اللي متغاظه منها ومفلوقه بجد 
هي ابتلاء الشعب المصري بلقب
ناشط سياسي 
او ناشط حقوقي  
بحس انهم مع الاعتذار للي حيزعل مني 
انه تاجر شنطه
شفتوا بقي انا حيرانه ازاي 
واوعوا اوعوا تقلبوا الصفحه 
ابقوا معي