29‏/12‏/2009

كل سنه واحنا مع بعض

أعزائي
باقي يومين علي السنه الجديده
كل عام وانتم جميعا بخير
ويارب تكون سنه سعيده علينا جميعا
بتمني لكم جميعا
12 شهر أقل تعاسه
51 اسبوع أقل توترا
365 يوم أقل حزنا
8760 ساعة أقل غضبا وأكثر فهما وأجرا رأيا
525600 ثانيه أقل انانية وأكثر انتماء للوطن
ويارب تفضلوا معايا علي طول
وياريت تقلولي رأيكم في شكل المدونه الجديد
كل الحب لقرائي الاعزاء
واوعوا تقلبوا الصفحة
ابقوا معي

20‏/12‏/2009

ابقوا معي دائما

أعزائي
الورده دي ببعتها لصاحب او صاحبة اي تعليق في المدونة
ولاي حد دخل قرا سطر او كلمه من مقالاتي
الحقيقه بشكركم كلكم علي رعايتكم ليه ومساندتكم
دكتور احمد الجمال ربنا يخليك ليه انت فعلا بتساندي
وبيعجبني جدا لما بتمضي وتقول مدمن مدونتك
دكتور محمد عمر بشكرك جدا ونزلت تعليق حضرتك علي المقال الاخير
اللي ماكنتش عارف تنزله بس الظاهر ان النت بيمزح ويانا
انا من امبارح مش عارفه ادخل مدونتي
شكرا وربنا يديم الود
عمي ابو ادهم بشكرك حقيقي لمساندتك ليه وسمعت كلامك وبشكركم كلكم
يارب ترضي عليه وتعلق علي المقال الاخير
دكتور صلاح خليل فعلا بحس وانا بقرا تعليقاتك اني صحفيه بحق وحقيقي
وياريت مقال الضرايب اللي حستني اني اكتب فيه يكون عجبك
شكرا يادكتور ربنا يخليك ليه
هشام والا اقولك عنتر
تعليقاتك كلها بتلاقي فيها سخريه وبصراحه لما مش بلاقي تعليق منك بزعل
بحس ان المقال مش عاجبك
الف شكر ليك وربنا يديم الود اللي بينا وسلملي علي القطه بتاعتك
محسن شكرا لتعيقك وياريت تعلق اكتر من كده
حكيم عقول شكرا لتعليقاتك وملاحظاتك علي لغتي العربيه اللي مافيهاش همزات
بس برضه حضرتك مساعد رئيس الحزب اللي عملناه
حزب وداد قلبي
اما بقي شاعرنا محمود الخطيب فده له شكر خاص جدا
لانه بيوجهني دايما تسلمي يارب
انا بشكر اي حد يعلق او حتي مايعلقش كفايه انه بيدخل ويقرا اللي بكتبه
لو سمحتم كل واحد يعتبر ان الشكر ده ليه لوحده
وكل عام وانتم بخير بمناسبه السنه الهجريه اللي ابتدت
والسنه الميلاديه اللي لسه حتبتدي
كل الحب والود والشكر لقرائي الاعزاء
دمتم جميعا
وبرضه اوعوا تقلبوا الصفحة
ابقوا معي

18‏/12‏/2009

ياساتر ياساتر... ياعبدالقوي

أعزائي
حكومتنا الرشيدة الزمت كل مالكي العقارات
ولو كان العقار مهلهل ومش بيجيب تمنه حتي لو في العشوئيات
اي ارض متصوره ولها باب
بان يدفع الضريبه العقارية ووزارة الماليه ادتهم مهله
لاخر ديسمبر 2009
يعني فاضل 18 يوم وتنتهي المهلة
وبعدها غرامه تتراوح بين
200 جنيه و2000 جنيه
ولكن السيد طارق فراج رئيس مصلحة الضرائب
صعبت عليه المصلحه
وقال ان الناس عندهم كتير فاعلن ان الغرامة ستتراوح بين
2000 جنيه و10000 جنيه
ومين يذود ماهو كله للحكومه مش لحد غريب
هو ارهاب للناس وخلاص
تعالوا نشوف عينه من الناس المالكين العقارات
لو واحد اشتري شقه من 20 سنه
شقي وتعب وممكن يكون اتغرب او ورث
والشقه كل اللي حيلته في الدنيا وسكن فيها
واصبح سعرها النهارده مليون او اقل او اكتر
الحكومه تدفعه عليها ضرايب ليه ؟
وهو اصلا كان بيدفع ضريبه الدخل
ياحكومه الضريبه بتكون علي عائد العقار مش علي قيمته
كل ذنبه ان العقارات ارتفع سعرها
افهم ان الحكومه تحصل منه ضريبه لو باعها او اجرها
والمصيبه الاكبر لو كان علي المعاش
يادوب معاشه علي قده ومش حيزيد
حيزيد منين واموال المعاشات ضاربوا بيها في البورصة
بس برضه حيضطر يدفع الضريبه العقاريه
وتيسيرا من وزارة الماليه علي الملاك
يسروا لهم الدفع علي قسطين
يونيه وديسمبر
ومن حق المالك التظلم من التقيم
امام لجأن الطعن بمأمورية الضرائب
واذا لم يعجبه امامه المحاكم
قال يعني المحاكم فاضيه مافيهاش قضايا
ياريت اصحاب القصور في المريوطيه ومارينا وبرتو مارينا وبرتو السخنه
يدفعوا الضرائب العقاريه زي الغلابه
والمواطن البسيط بيسال عن طريقة ملء الاقرار
ومش لاقي حد يساعدة
وكمان الاقرار شبه اختبارات مدارس اللغات الامريكيه والبريطانيه
وعمار ياماليه
ارحموا من في الارض يرحمكم من في السماء
والمره دي بقولكم الاكتئاب قادم لا محاله
بس اوعوا تقلبوا الصفحة
ابقوا معي


10‏/12‏/2009

من أي بند في ميزانية الدوله ؟

أعزائي
السيد وجيه سياج حصل علي 650 الف متر مربع
اكثر من 160 فدان في منطقة طابا علي البحر مباشرتا
علي الحدود مع اسرائيل
وقد قدرت الحكومه الرشيدة حين ذاك سعر المتر
بمبلغ 150 قرشا يعني اكتر من ربع دولار بشوي
يابلاش رخيصه يا ارض مصر
والسيد سياج دخل في مشروع استثماري مع
شركة اسرائيلية
ولكن الحكومة الرشيدة بمقتضي القرار الجمهوري
رقم 205 لسنه 2002
سحبت منه الارض
واصدر دكتور عاطف عبيد رئيس الوزراء
القرار رقم 315 لسنه 2003
بتخصيص هذه المساحة لشركة غاز الشرق
وبعدها تم التخصيص لمستثمر أخر
وحصل السيد سياج علي 3 احكام نهائية
امام القضاء المصري من مجلس الدولة
بتعويضات تتراوح بين
نص مليون وخمسة ملايين جنيه مصري
ولكن الحكومه لم تنفذ هذه الاحكام
وبم ان السيد سياج يحمل الجنسيه الايطاليه
لان والدته ايطاليه الجنسية
فانه قدم شكوي للمركز الدولي للنزاعات
لتسوية منازعات الاستثمارفي البنك الدولي
وحصل علي حكم نهائي بتعويض
لو سمحتوا ماتتخضوش
قدرته المحكمة الدولية ب
134مليون دولار
حاجه بسيطه جدا
وبعد المفاوضات بين الحكومة الرشيدة والسيد سياج
وافق ان يحصل علي 74 مليون دولار وينهي النزاع
وقام بالحجز علي بنكي مصر والاهلي
بباريس ولندن
التساؤل هنا
لماذا غفلت الحكومه عن تنفيذ حكم القضاء المصري
هي برضه عندها عقدة الخواجه
وسيتحمل المواطن المصري الغلبان
تعويض السيد سياج ب400 مليون جنيه
كان من الاجدر ان تنفق الحكومه الرشيده هذا المبلغ
في انشاء مدارس ومستشفيات صغيره في الاقاليم
او تزيل العشوئيات وتبني مكانها منازل اقتصاديه
او تعين العاطلين من شباب الخريجيين
ولماذا تبيع الحكومة الاراضي لرجال الاعمال والسماسرة
في الغردقه وشرم والقاهرة والاسكندريه والساحل الشمالي
ومرسي علم
باسعار تتراوح بين دولار وخمسة دولارات
للمتر الواحد
ويوجد الان حوالي 15 قضية دوليه ضد مصر
وسيحصل اصحابها علي احكام
وستدفع الحكومه هذه التعويضات فمن اين ستدفعها ؟
من اي بند من ميزانية الدولة
من المؤكد دافعها هو المواطن
يجوز انها ستدفع من اموال التامينات الاجتماعيه
التي استولي عليها وزير الماليه بدون وجه حق
يجب علي حكومه نظيف ان تحاسب دكتور عاطف عبيد
رئيس الحكومه السابق وجميع الوزراء المشاركين له
الذين خصصوا هذه المساحات من الاراضي وبيعها
الي من لا يستحقها
ويجب ان يحاسب كل من شارك في هذه الصفقة
كلمه أخيرة
السيد سياج مدين للبنوك المصرية بالكثير
وكانت هذه المديونيه بضمان ارض طابا
فهل ستسقط هذه الديون ؟
ام ان البنوك ستنتبه وتحصل علي حقها
ياعيني عليكي يامصر
حتلاقيها منين والا منين
اوعوا تكتئبوا وتغيروا الصفحة
ابقوا معي

6‏/12‏/2009

دستور تفصيل

أعزائي
موضوع الاستبيان كتير بعتولي علي الخاص وكانوا زعلانين
لاني كتبت عن الحب
مش عارفه ليه الزعل ده الحب اسمي علاقه
والا انتوا اخدتم علي اني اكتب في شئون مصر وخلاص
علي اي حال انا بكون سعيده لما بكتب عن مصر
تعالوا نرجع تاني
أشرت في مقال سابق عن التوريث
ان حزب الوفد سينتخب الدكتور محمد البرادعي
عضوا في الهيئة العليا ليتثني له الترشيح للرئاسة
وقد فوجيء البعض وانا منهم باستقالته من
الوكالة الدولية للطاقة الذرية
وقد صرح دكتور البرادعي وطالب بدستور جديد
كما وصف الوضع القائم بغياب الفرص المتكافئة
ونسي سيادته ان علي كل مرشح جديد احترام الدستور الحالي وشروطه
سؤال الي الدكتور البرادعي
هل هو ملما بقضايا مصر في الداخل والخارج
كنا ننتظر منه غير ذلك
ننتظر ان يدلي بأرائه في مشكلة البطالة
او القمامة الموجود بصورة بشعه في شوارع القاهرة
او مشكله محو الاميه او السحابة السوداء التي
اصاحب الاطفال والشيوخ بحساسية الصدر
او زيادة تعويض الوفأة لضحايا القطارات والعبارات
بدلا من مطالبته بدستور تفصيل
وهل يتذكر جيدا انه يجب ان يكون المرشح مصريا
وليس مزدوج الجنسية
واخرما اقوله ان التاريخ المصري لا يري النوبيين والمسيحيين اقلية
ولكنهم اولا واخيرا مصريين
ولان المجتمع لا يبنيه غير ابنائه فهم ابناء مصر
هدانا الله جميعا الي الصواب
اوعوا تقلبوا الصفحة
ابقوا معي

3‏/12‏/2009

استبيان في الحب

أعزائي
معليش حننسي السياسه والمواضيع الصعبه ونتجه للحب
نوع من انواع التغير يعني نغير المود شوي
جالي استبيان عن الحب قلت تشاركوني فيه
واقرا ارائكم في الاسئله
انا حكتبلكم الاسئله وبعدين اجاباتي عليها
مستعدين يالله نبتدي
1_ يعتبر الحب من اهم العواطف الانسانية التي
يحس بها الانسان كيف تتفق مع هذه العبارة
1-نعم
2-لا
3-ليس بالضرورة اذ آن هناك مشاعر اخري تاتي قبل الحب في الاولوية
--
2-يقول بعض الفلاسفة الغربيون
أن اكثر عواطف الادمي مثالية هي عاطفة الحب وهي ايضا
اكثرها استبدادا واكثرها حيوانية واقصرها عمرا
هل توافق علي كل هذه الصفات للحب؟
1-هل الحب دائما حيوان ؟
2- هل الحب دائما استبدادي
3- هل الحب قصير العمر؟
---
3-هل يختلف الرجل عن المرآة في الحب؟
1-المرآة عادة أكثر وفاء
2- الرجل أكثر وفاء
3-لا توجد قاعدة
---
4- هل الوقوع في الحب له سن معين؟
1-هل يمكن للرجل ان يقع في الحب بعد سن الستين ؟
2- هل يمكن للمرآة أن تقع في الحب بعد سن اليآس؟
3-هل يمكن لامرآة في الاربعينات ان تقع في حب رجل في الستينات ؟
---
5- هل يمكن لحب ابتدا في سن الشباب ولم يكتب
لطرفية الارتباط ( لاي سبب )
أن يبدأ ويتاجج من جديد اذا التقي الطرفان بعد 20 سنه مثلا ؟
1-نعم
2- لا
3- هناك شروط ولا يمكن التعميم
4-غالبا ممكن
---
6- ماذا يحب الرجل في المرآة
1- جسدها
2- عقلها
3-روحها
4-جمالها
5- غير ذلك
---
7- ماذا تحب المرآة في الرجل
1-جسده
2-عقله
3-روحه
4-ماله من جاه ومال ونفوذ ووضع اجتماعي
5-غير ذلك
---
هل من الضروري الاعتراف بالحب من الطرفين
لضمان نمو التجربة ونجاحها؟
1-نعم كما يفعل الغربيون في المجتمعات المفتوحة والصريحة
2-لا فالتقل صنعة ( كما يفعل بعض الشرقيون الذين يقتلوا الحب
بالخجل واخفاء العواطف )
---
9- كيف يمكن التميز بين الحب والنزوة؟
---
10- ماهي علامات الحب عند الكبار ؟
---
أختر الاجابات الانسب من وجهه نظرك
---
دي كانت الاسئله اللي وضعها دكتور وكاتب ايضا
اجاوب من وجهه نظري
1-نعم الحب من اهم العواطف الانسانية التي يحس بها الانسان
...
2-الحب ليس قصير العمر لان في حب بيفضل سنين ومش ممكن يتنسي
وفي حب مراهقه عند بعض الناس بيدوم وبيكلل بالزواج
...
الحب مش استبدادي بس لما بتحب بتحافظ علي شعور حبيبك
ومش بتفكر تجرحه .
...
3-الحب هو الحب يعني مافيش خلاف
مسالة الوفاء دي مالهاش قاعدة
بس ليه تفسير صغير هو
الراجل لما بيحب مش بيكون الحب ده اول شيء في حياته
شغله ومستقبله لهم الاولويه وبعدها بيجي الحب
انما المرآة لما بتحب بيكون الحب هو اول شيء عندها
يعني قبل شغلها ومستقبلها وبتبرمج حياتها علي ان
حبيبها هو الاول في كل شيء
وعشان كده بيقال ان المرآة أكثر وفاء من الرجل
...
4-الحب ممكن يطب علي الواحد بدون سبب زي القضا المستعجل
انا بشبه الحب بان واحد بيعدي الشارع بص يمين
وبص شمال ومالقاش ولا عربيه جايه ولا رايحه
قال اعدي وهو بيعدي لقي عربيه طلعت خبطته
منين طلعت ؟ ازاي طلعت ؟
مايعرفش ده بقي الحب
يعني نقدر نقول ان الرجل ممكن يقع في الحب بعد سن 90
وبرضه المرآة ممكن تقع في الحب وهي في الشيخوخه مش سن اليأس
وبرضه ممكن وحده عندها اربعين سنه تقع في حب واحد عنده 60 او اكتر كمان
ماهي الصبوحه او بمعني أخر الشحرورة
كل شوي تحب وتتجوز
...
5- الحب اللي ابتدا في سن الشباب ممكن يفضل موجود
في حاله ان الانسان مالقاش حب اقوي منه
قدر ينسيه حب الشباب
...
6-اكيد اذا كان راجل سوي حيحب عقل المرآة
لان الجمال مش بيدوم
وده بتلاقيه لما تلاقي راجل شكله مش بطال متجوز وحده وحشه
وبرضه بيحبها لانه شاف الجمال الداخلي
ولما الواحد بيتجوز وحده حلوه بينبهر بيها شوي
وبعد كده بقي عادي عنده جمالها
وقيس علي كده الوحشه
المحصله النهائيه انه بقي تعود وبقي فيه حاجات تانيه اهم
عشره صحبه بيت اولاد زكريات مشتركه
...
7-المرآة اللي بتفهم حقيقي تحب راجل تتسند عليه
تحس وهي معاه بالامان وتحس انه بيحميها
...
8- غالبا الاعتراف بالحب بيجي من الراجل علي اعتبار اننا شرقيين
بس برضه المرآة تقدر تترجم عوطفها بكلمه او لمسه او همسه
يعني ممكن ترجمه العواطف بالتصرفات
وبلاها كلام كلام
اصل اللي بيكلم كتير ده يبقي بيطق حنك
وفي الاخر الحب تصرفات مش كلام
...
ممكن نميز بين الحب والنزوة بحاجه بسيطه
الحب بيدوم انما النزوة في الاول والآخر نزوة
يعني بتاخد وقتها وتنتهي
يعني الاول تفتكر انه حب بس شوي
وتكتشف انه سراب
...
علامات الحب عند الكبار سؤال صعب حقيقي
لا حقيقي مش عارفه اجاوب
لو حبيت علي كبر حبقي اعرف اقول
...
اتمني اني ماكونش طولت عليكم
المفروض ان اجاباتي تكون مختصره بس ده اكتر اختصار عندي
منتظره اجاباتكم في صفحة التعليقات
ياللي بسرعه بلاش كسل
ونقول اوعوا تقلبوا الصفحة
ابقوا معي