25‏/8‏/2011

يوم في الشارع المصري

أعزائي 
رمضان بيجري وخلاص كلها كام يوم ويخلص 
اسرع شهر بيعدي  وبننتظره بفارغ صبر يهل علينا 
العام القادم ويملا الدنيا خير وبركه 
كل عام وانتم جميعا بخير وعيد سعيد عليكم وعلي عائلاتكم 
وحبايبكم واصحابكم 
وتقبل الله صيامكم وقيامكم 
وجعلنا الله واياكم من عتقاء الشهر الفضيل 
ححكيلكم علي يوم مر عليه في الشارع المصري 
كان امس وزي ما انتوا عارفين اننا في رمضان 
يعني زحمه زياده وعصبيه زياده ونرفزه زياده من الناس 
مع ان الشهر ده المفروض اننا نهذب اخلاقنا واعصابنا 
المهم ما اطولش عليكم قولوا طولي 
كان لازم اروح المعادي لامر عائلي هام 
اختي سبقتني بتاكسي ده عشان الزحمه 
انا بما اني من سكان مصر الجديده  بروح المعادي عن طريق الاوتوستراد 
لاني مش بعرف اروح من طريق الكورنيش 
علي فكره انا خايبه جدا في الطرق والكباري والشوارع 
بس لهلوبه في كل مصرالجديده بعرف كل شبر فيها 
لما بكون عايزه اروح مكان ما اعرفوش بسال واتقصه
واذا كان زحمه مش بعرف اركن فيه يبقي التاكسي موجود 
المقدمه دي كلها عشان انا رصدت الشارع المصري في يوم من ايام رمضان 
نزلت من البيت وقلت ياهادي استرها معايا في الزحمه والجو الحر 
سلكت طريق صلاح سالم  وبعدها النفق اللي بيودي
يا جامعه عين شمس يا المنصه 
اللي بتطلعنا علي الاوتوستراد او اذا ركبنا كوبري اكتوبر تودينا علي الدقي والعجوزه والتحرير 
اخدتوا بالكم من سلكت  دي لغه مروريه باحته 
بدل ما انزل من تحت الكوبري ركبت الكوبري 
انتبهت بعد فتره يمكن لاني اتوماتك بركب الكوبري 
كان لازم لازم ولا مفر ولابد اوصل للتحرير 
وارجع تاني عشان مش بعرف اروح عن طريق الكورنيش 
وصلت التحرير لفيت ورجعت بس قلت بدل ما اطلع علي الكوبري 
امشي في شارع رمسيس وكان وياريت ماكان 
الطريق زحمه والعربيات ماشيه كانها واقفه 
اول شارع رمسيس لقيت ولدين مش اكتر من 12 سنه 
منظرهم عادي يعتبروا اطفال بس كل واحد بيدخن سيجاره 
تخيلوا اطفال بيدخنوا وايه في نهار رمضان جهارا ولا هاممهم 
بعد كام متر لقيت اتنين شباب واقفين بيشاوروا للعربيات وبيقولوا باور 
وكانوا عاملين انهم ماسكين دركسيون 
طبعا قصدهم باور الدركسيون 
بعد كام متر العربيات وقفت من الزحمه  لقيت شاب جه يخبطلي علي الشباك 
وبيشاورلي اني افتح . فتحت الشباك لقيته بيقولي الباور عايز يتصلح ؟
طبعا انا افتكرته بيسالني رديت قلتله لا 
اتاريه كان بيديني أمر مش سؤال 
لانه قالي لا عايز تصليح 
قلتله هو انت اللي سايق والا انا اللي سايقه 
وبعدين عرفت ازاي هو الباور اي حد يبص للعربيه يعرف ان الباور بايظ 
قالي ايوه بايظ قلتله امشي بعدين اخلي كل الشباب اللي في الشارع يضربوك 
وقفلت الشباك وكانت العربيات ابتدت تتحرك 
مافاتنيش اني ابص في المرايه اشوف في ايه ورايا 
لقيت ياحرام ست واقفه وفاتحه العربيه والاتنين اللي شاورولي الاول 
بيشوفوا فيها ايه 
عرفت ان دول فلول الميكانيكيه 
وبيوقفوا الستات بس لانهم اكيد بيقولوا اننا هبل ممكن نصدق اي حاجه 
والمعروف ان اي وحده بتسوق عربيه اعصابها بتبوظ لما بتعطل في الطريق 
قالوا يقلبوا الستات بشغلانه الباور 
هي الشرطه فين ؟ والجيش ؟ يعني حتي في عز الضهر النصب شغال 
علي خلق الله لا زابط ولا رابط
انا اهلي مديني تنبيه اني لا اقف لحد ولا افتح الشباك طول ما انا سايقه 
يعني لما يقروا المقال حيكون في سين وجيم 
وليه وعشان ايه بس معليش المهم انكم تعرفوا ايه اللي بيحصل 
طريق الاوتوستراد كان زحمه بطريقه بشعه 
في كل وسائل النقل ملاكي ونقل كبير ونقل صغير 
وميكروباصات وتوك توك حتي الكارو 
والنقل شايل كل حاجه ممكن تخطر في بالكم 
من الزحمه وبطء الطريق ابتديت اشوف عربيات النقل كاتبه ايه 
اللي كاتب اوعي وشك 
او ماتبصليش يا عبيط  العربيه بالتقسيط
سبع الليل صديق الليل 
ماتبصليش بعين رضيه  بص للمدفوع فيه 
والتاكسيات السوده ممكن صاحبها عنده ست اطفال 
كاتب اساميهم 
اما التاكسيات البيضه الجديده 
دي بقي عليها اعلانات مسلسلات رمضان 
او البرامج الجديده ومين بيذعها 
اللي سايقين بيسابقوا بعض وبيكسروا علي بعض
بالظبط زي العربيات المتصادمه في الملاهي حسيت اني في سيرك مش شارع 
الكل متعصب علي بعضه 
الكل بيتلكك عشان يتشاكل 
الكل اعصابه فالته 
اخيرا وصلت بعد عناء خلصت الامر العائلي 
وفي رحله العوده اللي كانت مع اختي 
كنا رايحين العجوزه نفطر هناك 
سالتها عارفه الطريق 
قالتلي ايوه وشاورتلي اطلع منين 
اطمنت لان لهجتها كانت لهجه ثقه 
بعد ربع ساعه لقيت اننا متسوحين وتايهين 
قلت اسال اطلع علي الكورنيش ازاي وهناك ربنا يحلها 
اسال يوصفولي حاجه غير اللي قبلها 
واحد يقولي شمال والتاني يمين وواحد يقولي بالطول وغيره يقولي بالعرض
لقيت واحد بيركن قريب من ميدان قلت اكيد يعرف يوصفلي 
سالته قبل ما اكمل لقيت واحد جاي يجري وبيسالني عايزه ايه 
الاول رد عليه وقاله انا حوصفلها مش حدخلها في الحيط 
حسيت انهم ممكن يضربوا بعض 
المهم وصفلي وبرضه كانت وصفه غلط 
لقيت شاب بعربيه جنبي سالته اروح الكورنيش ازاي 
قالي تعالي ورايا مشيت وراه بس الزحمه خلتنا نتوه من بعض 
ورجعت اسال تاني لقيت عسكري مرور وبعيد عنه شويه امين شرطه 
سالت العسكري ماردش نده الامين 
يمكن ممنوع يرد الا بعد الرجوع للامين 
الامين قالي حاجه جديده خالص 
ولما اعترضت وقلتله الكل قالي انه من هنا قالي اه ماخدتش بالي 
برضه كانت وصفه غلط   
اظرف حاجه اني سالت واحد ماشي قلتله اروح الكورنيش منين 
رده كان كوميدي ضحكني 
سالني وقالي قالولك فين ؟
ضحكت وقلتله انه صور وقدامه شويه ميه 
ثم ان لو قالولي فين تفتكر حسالك ليه ؟
لقيت راجل كبير وشكله طيب سالته هو ده اللي وصفلي صح 
وخلاني اغني زي الليله الكبيره  واقول دي وصفه سهله  دي وصفه هايله
ووصلت للكورنيش بعد ساعه ونص من التوهان في شوارع المعادي 
سالت اختي تاني تعرفي حنروح للعجوزه ازاي قالت ايوه 
طبعا ماكنتش مطمنه  لانها عملت زي كل الشعب المصري اللي ماينفعش يقول ما اعرفش 
الظاهر ان ما اعرفش دي كلمه حرام والا وحشه 
فكرتها بان بابا دايما بيقولنا ماتفتوش في اللي ماتعرفهوش وكمان دايما يقول 
من قال لا اعلم فقد افتي 
ردت وقالتلي امشي بس وبلاش لماضه 
قالتلي من تحت الكوبري امشي علي طول 
وقلت حاضر ماهي اكبر مني ماينفعش اقولها لا 
لقيت اننا داخلين علي المنيل قالتلي اطلعي برضه علي طول 
بعد شويه لقيت اننا وصلنا ميدان الجيزه 
وهناك بقي زحمه رهيبه 
واشغالات الطريق والزحمه وسوءالمروروالميكرفونات 
بيقولوا اربعه جنيه كل حاجه باربعه جنيه 
زي الاعلان اللي في التليفزيون 
وكمان زي فيلم عادل امام 
اتنين ونص وتعالي بص 
من شده الزحمه والعربيات اللي ماشيه عكس الاتجاه 
ميكروباص خبطني بس جت سليمه الحمدلله 
ولما وقفت وهو وقف وده مش عشان هو عايز يقف لا عشان الطريق زحمه 
قلتله انت مش شايف  لقيته فتح الباب وبصلي وبطريقه الصيع وولاد الشوارع 
لقيته بيقولي جري ايه يا ابله مالك وايه النظاره السوده اللي لبساها  
فاكره نفسك ناديه لطفي ووقفل الباب ومشي 
قلت الحمدلله انها جت علي ناديه لطفي ماطلعش شومه والا سنجه 
وفتح دماغي انا واختي بيها 
ووصلت العجوزه بعد المعاناه وقبل المدفع بنص ساعه 
طيب انا بسال ليه مافيش لوحات ارشاديه تقول الطريق ده رايح لكذا 
حتي لو في بتكون مبهمه  المفروض تكون في اماكن تتيح للي بيسوق 
ياخد يمينه او شماله 
تعرفوا اني بتحرك لما بسافر بره مصر كويس جدا 
لان في خريطه بمشي بيها 
هنا مافيش خريطه ولا في اي مطار من مطارات الجمهوريه تلاقي خريطه وحده 
الظاهر مبدلين الخريطه بالراجل اللي بيسال قالولك فين 
اما طريق العوده فكان سهل مافيش توهان لاني بعرفه 
بس الزحمه بتخنق تحس ان كل مصر في الشوارع 
زي مايكون العيد جه فجأة ولقوا حالهم اذ فجأتن في رمضان 
يعني اللي عايز يشتري حاجه ماينزل يشتريها لازم قبل العيد 
هي الفلوس لو فضلت معاه حتبيض والا حتولد ماهو حيصرفها حيصرفها 
المقال بقي طويل وممل 
بس حتقروه حتقروه لا مفر 
كل عام وانتم جميعا بالف خير
واوعوا اوعوا تقلبوا الصفحه 
ابقوا معي







15‏/8‏/2011

سكوت كلاكيت تاني مره المحاكمه اكشن

أعزائي
بدات الجلسه الثانيه لمحاكمة الرئيس المخلوع  وسط اجراءات امن مشدده
20 مصفحه و30 مدرعه وكوماندز وفرق من الشرطه والجيش
12 سيارة اسعاف ووحدتين من العيادات المتنقلة
وصل جمال وعلاء للجلسه باكاديمية الشرطه في الساعه التاسعه و35 دقيقه صباحا
ووصل المخلوع بالطائره في الساعه العاشرة و5 دقائق صباحا
دخل مبارك ونجليه القفص في الساعه العاشرة والربع صباحا
علي السرير وطلب رفع السرير عند الرأس بعد ان تم انزاله
في بدايه الجلسه كان القلق بادي علي وجه جمال والمخلوع مغمض العينين طوال الجلسه
وكان نجليه يحاولون مداراته عن كاميرات التليفزيون والحضور
دخل  المستشار احمد رفعت ومستشاريه ووكلاء النيابه  وافتتحت الجلسه
الساعه العاشره و45 دقيقه صباحا
ونودي علي المخلوع وبعدها علي علاء الذي رد   ورفع يده عاليا
حسيت انه قهوجي بيرد علي الزباين في القهوه
وبيقول واحد شاي في الخمسينه وصلحه
اما جمال فرد بصوت مبحوح
طلب سامح عاشور من رئيس المحكمة
جلسه ثانيه للمرافعة وتنظيم طلبات
 المدعين بالحق المدني
الكشوف المعروضه علي المستشار احمد رفعت اكثر من 100 كشف
ولهذا لن يتمكن من عمل جلسات يوميه
وبعدها قام رئيس المحكمه بفض الاحراز وكانوا ثلاثه
الاول  .. اسطوانه سي دي الخاصة بقسم شرطه شبرا الخيمة
الثاني .. علبه بلاستيك بها عدد 4 دي في دي بسعة 8 جيجا
الثالث ..فلاشه بسعة 8 جيجا
وعرض الاحراز علي المحامين المدعين بالحق المدني
وعلي هيئه دفاع المتهمين
كما قال المستشار احمد رفعت
المدعين بالحق المدني لهم حق في رقيتنا
وكذلك المذنبين لهم حق في رقيتنا
وطلب فريد الديب محامي المخلوع
الحصول علي اذن من المحكمه للرقابه الاداريه لموافاته بكشف
عن الشاليهات المملوكه للبنك العقاري
وصورة من تقرير الخبير
وتكليف الاسعاف باعداد كشوف باسماء المتوفين والمصابين
بال الاماكن  والتواريخ من 25 يناير 2011 حتي 31 يناير 2011
وتاجيل القضيه لاجل مناسب
ورفعت الجلسه في الساعه الثانيه عشرة و10دقائق للمداولة
وبعد المداوله كان القرار كالاتي
ضم قضيه مبارك للعادلي في قضيه واحدة
وصفق جميع الحاضرين لهذا القرار
وتصريح للدفاع والمدعين بالحق المدني بمعاينه الاحراز
وتاجيل القضيه لجلسة 5 سبتمبر 2011
ووقف البث التليفزيوني
حفاظا علي سلامه القضيه وسير اجرائتها
وانتهت الجلسه في الساعه الواحده و5 دقائق ظهرا
-----------
علي هامش لجلسة
---
السماح بدخول المحامين بكارنيه النقابه والتوكيل الخاص بالقضية
مشاجرات بين المحامين المدعين بالحق المدني
وكان منظر في منتهي السوء
وكذلك اشتباكات خارج الجلسه بين مؤيدي مبارك ومعارضيه
حضور مكثف لمحامي الضحايا
حضور شيخ المحامين المستشار الخضيري
عدد الحضور اكثر من الجلسه السابقه
المخلوع كان يرتدي تريننج ازرق في لبني
هما المساجين اللي ما اتحكمش عليهم مش بيلبسوا ابيض والا انا غلطانه ؟
هو فاكر حاله انه لسه رئيس  مش يلتزم والا هو فوق القانون ؟
دخوله القفص علي سرير لماذا ؟
يمكن النوم صحي والقاعده علي كرسي متحرك مش صحيه
ماهو دقات قلبه هي هي وضغطه هو هو سواء نايم او قاعد مش بتتغير
لا دقات قلبه ولا ضغطه  بس عشان قال ايه يصعب علينا
فاكرنا لسه شعب اهبل وبنصدق التمثيل
مبارك في الجلسه الاولي دخل الجلسه علي سرير ومتغطي بملايه
الجلسه دي برضه علي سرير ومتغطي بملايه بس جزمته بره
او بالاحري في وش الجميع وكانه بيتحدي الجميع وبيقول
انا الريس غصب عنكم واللي مش عاجبه الجزمه في وشه
كان المفروض يغطي الجزمه من باب احترام القضاء
والا يمكن لابس جزمه جديده
بعد رفع الجلسه للمداوله
خرج المخلوع من القفص وعند خروج جمال اشار بعلامه النصر
اما علاء فشاور لاصدقائه وهيئه الدفاع
وكانهم في نزهه وليس محاكمه
وبعد انتهاء الجلسه شاور علاء لهيئه الدفاع واصدقائه
علاء نفس المصحف الاخضر ونفس الشريط علي الجزء الثالث تقريبا
يبقي ماسكه نوع من انواع الوجاهه
وجمال غير الصحف الاحمر بمصحف ازرق
الكانيولا الموجوده علي ايد مبارك كانت وحده روز ووحده بيضه
الصوت كان سيء للغايه في القاعه
في سؤالين ياريت القي اجابه عليهم محيرني جدا
فين سوزان مبارك من كل اللي بيحصل ؟
ولماذا كل هذا التعتيم الاعلامي عليها ؟
ولماذا لم يحاكم مبارك في محكمه عسكريه ؟
ولماذا وجوده في المركز الطبي العالمي وليس في مستشفي السجن
وحالته الصحيه مستقرة ومطمئنه
موكب وهو رئيس وموكب وهو مخلوع  ايه اللي فرق
لماذا هذه المعامله اهو مازال رئيس
والا كسوف من المجلس العسكري علي اعتبار ان ولائهم كان له ؟
ده بيفكرني بمثل بيقول
الخشب قال للمسمار انت فلقتني رد المسمار وقال لو حسيت بالدق علي دماغي كنت عذرتني
اعتقد انكم فهمتوا معني المثل
بصراحه جالي احباط بعد المحاكمه وحسيت بغصه
وان اللي بيدور مش اكتر من مسرحيه ممله
ولله الامر من قبل ومن بعد
والله المستعان
واوعوا اوعوا تقلبوا الصفحه
ابقوا معي






















3‏/8‏/2011

محاكمه الفرعون

أعزائي 
اليوم كانت اولي جلسات محاكمه الرئيس المخلوع حسني مبارك
فاعتبرناه جميعا يوم تاريخي  لخضوع الطاغيه للحساب
في بدايه اليوم حدث تراشق بالالفاظ بين مؤيدي مبارك ومعارضيه 
ثم تراشق بالحجارة وقد تمت السيطرة عليها من فرقه مكافحه الشغب 
وهذا الاسم الدارج ولكن الاسم الحقيقي( هو التدخل في المواقف الحرجه )
اقلعت الطائرة من شرم الشيخ في حوالي الساعه السابعة وخمسه وعشرون دقيقه صباحا 
واستغرقت المسافه بين 45 ل 50 دقيقه 
كانت اكاديميه الشرطه مؤمنه ب 20 مدرعة 
3000 ظابط وجندي 
وقوات من الكوماندز والصاعقه التابعين للقوات المسلحة 
قاعه المحاضرات  رقم 1 باكاديميه الشرطه تستوعب اكثر من 1000 شخص 
ولم يسمح بدخول القاعه الا لعدد قليل من آسر الشهداء 
وكذلك لم يسمح بتواجد المحامين الا لمن حصل علي تصريح 
وعدد من الاعلامين  ومندوبي وكلات الانباء الذي بلغ عددهم 100 تقريبا
ولم يسمح البث التليفزيوني الا للقناه الاولي الرسمية 
وقد رأس الجلسة المستشار احمد فهمي رفعت
وهو ابن المهندس فهمي رفعت من اوائل العاملين بالسد العالي 
وهو قاضي التنظيم القطبي 
ونطر العديد من قضايا المشاهير
ومتخصص في قضايا الاموال العامة 
ومن اقواله  احنا علي منصة مش علي خشبة مسرح 
بصراحه بهرني باداءه الحازم 
كما بهرني من قبل المستشار المحمدي قنصوة 
في قضية هشام طلعت مصطفي 
كنت اظن ان مبارك حالته سيئه ولكن حالته مستقره 
ممكن يقعد علي كرسي متحرك 
حامد صديق المحامي طلب تحليل الحمض النووي 
DNA
 لمبارك وتشككه من ان الموجود بالقفص هو مبارك
طلب فريد الديب محامي المخلوع
سماع شهادة محاقظين جنوب سيناء السابقين 
وكذلك سماع شهود الاثبات البالغ عددهم 1631
دول بقي حيسمعوهم علي كام شهر ؟
كما طالب محامي احد الشهداء استدعاء 
عبداللطيف المناوي رئيس قطاع الاخبار في التليفزيون المصري سابقا 
المفأجاة جاءت من هيئة قضايا الدولة 
طلبت الزام المتهمين بمليار جنيه علي سبيل التعويض المؤقت 
وتقرر استمرار نظر الدعوه الاولي رقم1227 باكر 
وفض الاحراز وعلي النيابه احضار المتهمين من محبسهم 
اما القضيه الثانيه رقم 3624 
تأجيل ليوم 15 اغسطس الجاري 
وايداع مبارك مستشفي المركز الطبي العالمي 
بطريق مصر الاسماعلية الصحراوي 
والسماح للفريق الطبي بمتابعه حالته 
وكذلك لاستاذ الاورام متابعته اذا استلزم الامر 
ملاحظات علي الجلسه 
---
جمال برضه زي مابيقولوا متفرعن يعني  داخل القفص فاتح صدر
حتي لما مبارك اخد المايك   خطفه جمال منه بسرعه 
كعادته في كل قرارات المخلوع السابقه 
لازم لازم جمال يضيف لها ويشيل منها
صحه مبارك كويسه  حتي في رده علي القاضي بانه غير مذتب 
صوته مش صوت واحد بيحتضر 
حبيب العادلي تحسوا انه متحفز جدا لمبارك 
بدليل انه طلب علانيه الجلسات
علاء تحس انه مش مستوعب اللي بيحصل  زي مايكون بيتفرج علي فيلم رعب
جمال وعلاء عملوا ساتر علي مبارك في اغلب اوقات الجلسه 
مبارك لابس دبله ذهب وساعه 
اما جمال لابس ساعه شيك جدا 
كانت بتدي ضوء لما بيقف جنب مبارك
علاء معاه مصحف لونه اخضر وغالبا قرا منه 3 اجزاء 
وده بيبان من الشريط الموجود بالمصحف لما بنقف علي صفحه
بنحطه فيها  لعدم السهو 
اما جمال فده لكونه غاوي شهره مصحفه احمر ولم اتمكن من رؤيه الشريط 
بقول هو ماسكه يمكن عشان احنا في رمضان 
وده لزوم رمضان بديل للسبحه يعني 
المحكمه في مجملها ارضت الشعب المصري
وانتظروني في الجلسه القادمه يوم الاثنين 15 اغسطس الجاري 
اوعوا اوعوا تقلبوا الصفحة 
ابقوا معي