24‏/6‏/2012

يوم للتاريخ

أعزائي 
النهارده كان يوم طويل ودمه تقله وممل وماشي بطيء 
انتظرنا كتير اسبوع لاعلان نتيجه مين حيبقي الرئيس 
تحس انها كانت ولاده متعسره  والدكتور مش عارف يولد 
اده طلق صناعي مافيش فايده 
قال نعملها قيصريه ونخلص 
قالوا الاعلان الساعه 3 عصرا 
الشوارع فضيت من الماره قبل الموعد المحدد 
وطبعا التحرير  كان بيعج بمؤيدي مرسي 
والمنصه كان لمؤيدي شفيق 
وباقي البلد فاضيه 
الكل قاعد مشدود امام الفضائيات وبيستعجل النتيجه 
ابتدا الخطاب من المستشار فاروق سلطان  حوالي الساعه اربعه الا ربع 
طبعا كانت روحنا طلعت 
ابتدا بمقدمه طويله عريضه  كان لازم يقول قبلها 
الساده المشاهدين برجاء اخذ حبوب الضغط 
لاني حرفع ضغطكم واحرق دمكم 
الورق اللي ماسكه كتير عامل زي كتاب التاريخ لسنه 
تالته ثانوي ادبي 
بقينا نقول ياهادي ربنا يصبرنا 
يعني ممكن اثناء البيان اي وحده لسه ماطبختش الرز ممكن تروح تطبخه 
وترجع حتلاقيه محلك سر 
او اللي عايز ياخد شاور من الحر مافيش مانع ويرجع يلاقيه لسه زي ماهو 
وممكن اللي عايزه ترضع البيبي مايضرش 
 والله كنت خايفه وسط البيان ينزلوا الاعلانات 
والمستشار فاروق سلطان يقول زي معتز الدمرداش 
حنرجع بعد الفاصل بس اوعوا تروحوا في اي حته 
برضه حسيت وانا بسمع البيان انهم حيقبضوا بالساعه 
عشان كده بيطولوا المده زي مسلسلات رمضان
كان ناقص  فاروق سلطان يقولنا 
عبدالحميد وعادل ونسمه وشريفه 
انتخبوا شفيق 
اما بدريه وسعديه وعبدالله واحمد ومحمد حسنين 
انتخبوا مرسي 
ودول كانوا في لجنه ابو تشت  
اما عمنا حاتم بيجاتوا المشهور بالاسم الحركي وهو 
كاتم حاجاته بيسال احنا علي الهوا  ردوا قالوله ايوه 
كان ردي ساعتها عليه  خد بالك بعدين تاخد برد من الهوا 
بجد شلونا لغايه ما اتكرموا علينا واعلنوا النتيجه  
نتيجه فوز مرسي ماكانتش مرضيه لكتير من الشعب المصري 
بس برضه في اتقبلوا النتيجه بروح رياضيه 
الفريق شفيق  اتقبلها وارسل برقيه تهنئه لدكتور مرسي 
ماهو لازم يكون في غالب ومغلوب 
سمعت خطاب الرئيس الجديد دكتور مرسي 
ممكن نقول انه مرضي الي حدا ما 
بس افلح ان صدق 
نستنه نحكم عليه بعد مرور 100 يوم من توليه الرئاسه 
الصوره دي بتعبر عن فرح طفل بقدوم رئيس جديد 
الطفل كله امل في بكره عايز يتعلم وياكل ويلبس
ويكبر ويلاقي شغل  ويتجوز ويخلف ويعيش حياه كريمه 
الرئيس الجديد عامل مشروع نهضه  خير وبركه 
وكلنا حنساعده ولازم نرضي بحكم الصناديق 
مش دي الديمقراطيه اللي عايزنها 
كفايه سنه ونص عدت علينا  كانت كبيسه 
نرضيي باللي ربنا قسمهولنا
وربنا  ان شاءالله مش حيخيب رجائنا 
ان مصر تفضل هي الرائده 
ربنا دايما بيعملنا الاحسن وبنحس بده بعد فتره 
ياريت كلنا نحب مصر اكتر 
لانها تستحق حبنا
واوعوا اوعوا تقلبوا الصفحه 
ابقوا معي
 

17‏/6‏/2012

كلاكيت انتخابات آخر مره

أعزائي 
بجد وحشتوني  اول مره احس اني ممكن ما اكتبش تاني 
السياسه بصراحه وجعت قلبي الضعيف 
والدكتور منعني من اي انفعالات 
وفعلا رضخت مضطره لامر الدكتور 
وبعدت عن البرامج التليفزيونيه والاخبار وكمان النت 
بس الحمدلله رجعت مع جوله الاعاده 
ده المصري الحقيقي  عارفين ليه مازال حي 
لانه ضد الصدمات 
---
امس حدثت  اشباكات  بمدخل السيده عائشه بمدخل الكوبري بين 
 اهالي الزرايب بمنطقه الخليفه وعرب اليسار واستخدموا الطلقات الناريه 
وزجاجات المولوتوف واسفر الحادث  8 قتلي واصابه اخرون 
وسيطرت الشرطه العسكريه علي الموقف 

وتسبب الحادث في تعطيل المرور لمده ساعتين 
هذا الحادث عارض ويحدث كل عام 
وهذا الايضاح من اهل المنطقه  وكان ظهر اليوم 
---
نرجع للانتخابات 
ياتري مصر رايحه فين 
مفيش اجابه عن السؤال 

وممكن نقول انها هربانه من العريس اللي حنعرف هو مين  في اقل من 24 ساعه 
مصر رافضه العرسان اللي بيطلبوا ودها 
لانها متاكده ان اي منهم مش طالب القرب حبا فيها 
انما حبا في السلطه وكرسي الرئاسه  لان له بريق اكيد 
----
انتخابات الاعاده بدات امس بعد حراره موقف المرشحان 
جت الانتخابات اكتر من بارده  
وعدم اقبال واضح من الشعب 
مع ان امس واليوم اجازه وممكن الشعب ينزل ينتخب  انما برضه مافيش اقبال 
توقعت ان امس الناس امتنعت قالوا ان الشكل العام بيقول ان في زحمه 
نخليها بكره وجه بكره والحال كما هو اقبال اقل من ضعيف 
اللجان منها الفاضي خالص واكتر لجنه ممكن نلاقي فيها 5 او 6 


 هي دي الطوابير  قدام اللجان 
---

امس في لجنه مدرسه النصر (الانجليش سكول )
حدثت مشاده بين المستشاره المسئوله عن لجنه 18 واحدي الناخبات 
الناخبه معاها قلم ومصره انها تستعمله بدل قلم اللجنه 
المستشاره رفضت بادب 
الناخبه تطاولت وقالت ان الاقلام بتزيل الكتابه بعد ربع ساعه 
المستشاره فالتلها خلاص اكتبي بالقلم علي ورقه فاضيه 
وخديها معاكي وبكره شوفي الكتابه راحت والا موجوده 
وتعالي بكره انتخبي  . الناخبه مش عاجبها الكلام تطاولت اكتر
المستشاره قالتلها خلاص انا حعمل مزكره لحضرتك 
الناخبه طلبت المسئول عن اللجنه من الجيش 
جابلوها الرائد المسئول اقنعها بانها لازم تصالح المستشاره لانها ماغلطتش فيها 
وتلم الموضوع . وكان واتلم الموضوع 
....
امس ذهب المرشحان مرسي وشفيق للادلاء باصواتهم 
مش حعلق بس حوريكم الصور 
---
ده مرسي 
----


ده شفيق 
---
انا لا مع ده ولا ده 
بس الصورتين بيقولوا كلام بين السطور
واللي بيعرف يكشف الحبر السحري اللي بين السطور حيفهم 
بس انا واثقه جدا في ذكاء قرائي 
وبيقولوا كل لبيب بالاشاره يفهمي
---
طبعا رحت الانتخابات النهارده عشان انتخب مش اتفرج
اختي العزيره اللي ملازماني  في كل الانتخابات خلت بيه وراحت امبارح  
اللجان كلها فاضيه 
والحراسه اللي قدامها كلهم قاعدين ومريحين 
للحر ولعدم وجود ناخبين 
وانا داخله سالت علي الباب في ايه ؟ ليه فاضيه كده ؟
الامناء ضحكوا وقالولي الناس باين حرانه  وقاعده في التكيف 
دخلت لجنتي كان في وحده قدامي وانا  
اديت للموظف المسئول رقمي القومي ورقمي في الكشف 
وسالته هو في ايه  الناس فين ؟
رد وقالي خليهم بكره يحطوا اللي عايزينه  والشعب يسكت 
مش فرط في حقه خليه يشرب 
قلتله والله عندك حق بس خليني اسالك لو ليك صوت حتديه لمين 
قالي بصي بصراحه مش حديه لحد قلتله حتمتنع قالي لا حبطله 
 طبعا انبسطت لقيت حد ممكن يبطل  صوته زي ما انا عملت 
رحت للمستشاره اخدت البطاقه الانتخابيه  وكتبت 
لا والف لا لحكم مبارك في صوره شفيق
ولا ومليون لا لحكم الاستبن والاخوان 
وشطبت علي الصور
وطبقت البطاقه وحطتها في الصندوق اللي ماكانش فيه 
غير 30 او 40 بطاقه علي الاكثر 
لما كانوا 12 ابطلت صوتي لعدم اقتناعي بيهم وببرامجهم 
يبقي لما ابقي لازم اختار بين اتنين 
برضه حرفض الاتنين 
حتي لو هددوني بانهم يحطوا السيخ المحمي في صرصور ودني 
حقولهم  مش حنتخب واهلا بالسيخ المحمي وصرصور ودني جاهز 
 ----
وحده من قريبي كلمتني وقالتلي لازم تنتخبي لان حرام اننا ماننتخبش
  سالتها هو في نص صريح في القرأن بيقول كده؟
او في حديث صحيح بالنص ده 
قالت لا سمعت الشيخ المنجي  بيقول كده 
قلتلها طيب خليكي اسمعي كلام الشيوخ الصح والغلط 
انا بسمع كلام عقلي  
الشيوخ فعلا بياثروا علي الشعب بفتاوي  غير صحيحه 
يجري ايه لو قالولهم انزلوا الانتخابات عشان ده حقكم 
ولازم تتمسكوا بحقكم 
كلام كده مش يرهبوا الناس  بكلام مالوش اي اساس من الصحه 
---
وانا راجعه  لقيت ملتحي سالته انتخبت مين 
قالي انتخبت مرسي اعمل ايه بس 
ماهو قدامي طبقين واحد مكشوف وعارفينه والتاني متغطي 
قلتله واخترت المتغطي تفتكر ممكن يكون جواه ايه 
قالي بعيد عنك جواه سم  برضه 
قلتله اه يعني اخترت السم اللي مش عارفه 
قالي ماهو الاتنين سم والاتنين ماينفعوش بس اعمل ايه 
---
واحد تاني لقيته قاعد بيتفرج 
سالته انتخبت مين ؟
قالي لا انتخبت ولا حنتخب 
قلتله ممتنع يعني 
قالي ايوه سالته في الجوله الاولي انتخبت مين ؟
وقولتله اقولك انا  قالي قولي 
قلتله اكيد صباحي  رد وقال فعلا 
قلتله اكتر اللي انتخبوا صباحي ممتنعين 
قالي ماهو خلاص مافيش فايده انا متفرج وحشوف حيحصل ايه 
لو مرسي جه حيخرب البلد ولو شفيق جه مرسي برضه حيخرب البلد 
يعني في الحالتين مخروبه مخروبه 
---
لقيت ست كبيره لابسه جلابيه سوده وطرحه  مش عارفه تعمل ايه 
رحت سالتها مالك ياحاجه ممكن اساعدك  بتدوري علي لجنتك 
قالتلي مش عارفه  قلتلها مش جايه تنتخبي ردت برضه بمش عارفه 
لقيت واحد قالي سبيها مش عارفه حاجه 
قلتله يبقي نساعدها قال لا ابنها معاها وهو اللي حيساعدها وكمان حيقولها تنتخب مين 
وتاخد كام  طبعا هي لما سمعت كده مشيت وكانت بتبرطم  مش عارفه بتقول ايه 
----
وانا خارجه من اللجنه لقيت سيده منتقبه واقفه تتكلم مع صبايا حوالي 15 و16 سنه 
وبتقولهم ماينفعش يخرجوا كده  بتقصد سافرات لازم يتحجبوا 
البنات قعدوا يضحكوا لان منهم لابسين صليب يعني مسيحيات 
لما لقتني واقفه سابتهم وقالتلي انتي كمان ليه لابسه بنطلون ده حرام 
وانتي بقي لازم تنتقبي . اول ماسمعت كده
ما استنتش قلتلها هو حضرتك مبعوثه العنايه الالهيه في الارض 
انتي منتقبه وربنا مافرضتش النقاب  حد قالك  عمله كده ليه ؟
قالتلي ده فضل لربنا
قلتلها انتي مين اصلا عشان تتفضلي علي ربنا 
ربنا هو اللي له الفضل  علينا انما احنا مالناش فضل عليه 
اعرفي بتقولي ايه عشان تقنعي الناس وسبتها ومشيت 
--- 
دي كانت جولتي الانتخابيه في اليومين 
من الاخر عريس مصر عرفناه حتي من قبل الاعاده 
بس نقول غير قول شيخنا الجليل الشعراوي رحمه الله عليه

واوعوا اوعوا تقلبوا الصفحة
ابقوا معي
 

2‏/6‏/2012

الحكم علي الشعب المصري وبراءة الفساد

أعزائي 
اليوم كانت محاكمه النطق بالحكم علي مبارك والعادلي ومساعديه 
بالاضافه لحسين سالم وعلاء وجمال مبارك 
تحت اجراءات امن لم يسبق لها مثيل 
20 الف مجند و160 دبابه  
4 مصفحات امن مركزي 
مدرعات الجيش والشرطه العسكريه 
والخياله تحيط باكاديميه الشرطه  
والحواجز 
10 عربات اسعاف 
واكثر من بوابه الكترونيه 
ومنع الموبيلات 
كل هذا لتامين المحاكمه 
القاعه بها  جانب للصحافه والاعلام 
و جانب لاهالي الشهداء والمصابين
وجانب لمؤيدي مبارك الذين اطلقوا علي انفسهم انهم ابناء مبارك 




وخارج الاكاديميه 
مكان لاهالي المصابين والشهداء 
والناحيه الاخري لمؤيدي مبارك 
ويفصل بيهم كردون كبير بالاضافه لاعداد الامن المركزي 
انصار مبارك موجودين من الخامسه صباحا 
ومعهم الات موسيقيه لعزف النشيد الوطني 
ويحملون صور المخلوع  
بدء خروج المتهمين من سجن مزرعه طره في الخامسه والنصف صباحا 
علي الطريق الدائري بعربات مصفحه 
ومؤمنه بعده اكمنه علي طول الطريق حتي اكاديميه الشرطه 
مؤمنه من الشرطه العسكريه والداخليه 
وصل جمال وعلاء  في السابعه و40 دقيقه 
وتوالي وصول العادلي ومساعديه 
وصول مبارك جوا في الساعه التاسعه و33  دقيقه 
وصلت هيئه المحكمه في التاسعه والنصف تحت حراسه مشدده 

وصل مبارك علي السرير الطبي كالعاده 
وقال ايه لابس بنطلون بني وشميز مقلم ابيض في بني
وفوقه سويتر بيج وشوز بني 
بس ماشفتش الشراب
ونضارة شمس ماركه ريبان موديل 2012
جمال كان مكفهر الوجه منكوش الشعر 
اما علاء فكان مهزوز ومش حالق دقنه  ولا ماسك المصحف زي الجلسات اللي فات
جمال  اول مادخل القفص اده اوامره لعلاء يقف يداري المخلوع
عن كاميرات الفضائيات 
اما العادلي فكان هادي هدوء غريب لفت الانظار 
 اول من دخلوا الجلسه المحامين والمدعين بالحق المدني واصحاب التصاريح 
ومعهم الاعلاميين  
وكان دخول المحامين من بوابه 9 
اما الاعلاميين فكان من البوابه 8
تكثيف الامن امام المنصه بطريقه لم يسبق لها مثيل 
صف كامل موازي للمنصه 
والصف الثاني ضباط شرطه 
بجانب المنصه 
اوراق القضيه اكوام اكوام
صفحات المحاضر اكثر من 700 صفحه 
اما المزكرات والمستندات  كانت حوالي 60 الف صفحه 
علي مدار 49 جلسه تمثل 250 ساعه 
من 3 يناير 2012 
حتي 22 فبراير 2012 
جلسات يوميه
وقبل بدء الجلسه اخليت القاعه من اسر الشهداء بعد ان سمحوا لهم بالدخول 
وطبعا ده سبب حاله من الغضب 
بدات الجلسه بلهجه حاسمه من المستشار احمد رفعت 
هدد بانهاء الجلسه في حاله صدور اي صوت 
فصمت كل من فيها زي مابيقولوا ترمي الابره تسمع صوتها
وناده علي المتهمين الذين ردوا جميعا بافندم 
الا عمر الفرماوي اجاب افندم سياده الريس 
بدات الجلسه بكلمه هيئه المحكمه لحيثيات الحكم 
الكلمه انبائتنا بالحكم 
واقلقت المتهمين وممكن كانوا بيقولوا في سرهم هواعدام والامؤبد 
وبعد الخطبه العصماء  جاء الحكم المخيب لامالنا 
وهو المؤبد لمبارك والعادلي
وبراءة باقي المتهمين 
لان اوراق القضيه خلت من ادله قطعيه يثبت وفاه المجني عليهم 
باسلحه الشرطه 
وكمان براءه مبارك ونجليه وحسين سالم للتقادم 
ورفعت الجلسه بعد تهليل وصياح من المدعين بالحق المدني 
وهتاف يقول 
باطل باطل باطل 
والشعب يريد تطهير القضاء
اما خارج الجلسه كانت الاشباكات بين مؤيدي مبارك والشرطه 
وقاموا برشق الشرطه بالحجاره 
كانت هذه وقائع الجلسه المخزيه 
-----
انا بقي عايزه افهم مبارك والعادلي نزلوا موتوا المتظاهرين بنفسهم 
والا مبارك ادي التعليمات للعادلي 
والعادلي بدوره ادي التعليمات لمساعديه 
كده يبقي المساعدين متورطين  لازم يكون في حكم ليهم 
وبحكم البراءه كده ممكن يرجعوا مساعدين العادلي لمناصبهم 
وكمان ياخدوا كل مستحقاتهم من يوم قيام الثوره لغايه النهارده 
ناقص المحكمه تديلهم شهادات تقدير 
بصراحه مش مستوعبه خالص اللي حصل ماهو عشان كده 
شفيق ياراجل بيقول حيرجع الامن في 24 ساعه 
طالما ان البهوات ممكن يرجعوا لمناصبهم تاني 
والله حاجه تكسف بجد لما القضاء الاسباني  يدين حسين سالم 
ويوافق علي ارساله لمصر 
ومصر تطلعه براءه   عيب والله 
ومبارك بيتسلبط ومش عايز كمان ينزل من الطياره في سجن طره 
يمكن كان عنده معاد مع سوزي عازمها علي الغداء 
وعشان كده ماكانش لابس زي المتهمين ابيض  
وماكانش راضي ينزل من الطياره في بورتو طره 
ماهو النائب العام امر بايداعه مستشفي السجن
ولما لقي مافيش فايده قال زي الافلام العربي 
اه قلبي الحقوني حموت 
جابوله  طقم طبي لانقاذه في الطيارة
هايدي راسخ زوجه علاء 
وخديجه الجمال زوجه جمال 
كانوا حاضرين الجلسه ولابسين نظارات سوده عشان ماحدش يعرفهم 
تفتكروا مبارك برضه كان لابس نظاره عشان ماحدش يعرفه ؟
المهم ان خديجه اغمي عليها بعد سماع الحكم 
انا بقول في سبب من اتنين فكروا كده معايا 
تفتكروا زعلت علي مبارك لانه اخد مؤبد وكانت فاكره انه حياخد اعدام 
والا عشان جمال جوزها اخد براءه  فزعلت واغمي عليها 
والله بضحك من غلبي 
بكده السيناريو ممكن يكمل 
شفيق ياراجل يمسك الحكم  وبعدها يطلع مبارك عفو صحي 
ومافيش مانع يطلع العادلي كمان وكل الطقم المسجون 
ويحكمنا 4 سنين 
وبعدها انتخابات  جديده وجمال مبارك يترشح ويكسب 
ونلاقيهم بيطلعولنا لسانهم ويقولوا للشعب المصري كله 
موتوا بغيظكم 
وبكده قرائي الكرام يخلص الفيلم الهندي اللي كان اسمه الثوره 
يارب خيب ظني 
مش قلتلكم قبل كده استمتعوا بالسيء لان الاسواء  قادم 
اهه وصل  وربنا يتولانا برحمته 
اللي ضحكني كان في واحد بيبيع عرقسوس قدام الاكاديميه 
والله شعب طيب وعلي سجيته 
واوعوا اوعوا تقلبوا الصفحه 
ابقوا معي