31‏/7‏/2011

سمك لبن تمر هندي

أعزائي 
رمضان بكره وكل عام وانتم جميعا بخير 
وربنا يتقبل صيامكم وقيامكم 
ويجعلنا واياكم من عتقاء الشهر الكريم 
عنوان المقاله مش عشان رمضان وكلنا بنحب نشرب التمر هندي فيه 
انما ده انعكاس لحالة البلد واللي بيحصل فيها
مليونيه الجمعة كانت  مليونيه التفرقه 
كان حقهم يطلقوا عليها  مليونيه بعثرة شمل مصر 
او مليونيه تفريق الشعب والثورة
الاخوان والسلفيون كان هتافهم وبحماس شديد جدا
اسلاميه اسلاميه 
حاسينا ان هما بس المسلمين واحنا مسلمين بالاسم فقط
زي مايكون الدين الاسلامي حكر ليهم 
انا مش بهاجم لا الاخوان ولا السلفيون 
لاني لا من دول ولا دول معتدله بفكر واعقلها
مش تبع اي تيار ولا اي حزب 
الا حزب وداد قلبي
يعني انا رئيسه جمهوريه نفسي
طبعا انسحب كتير من القوي السياسية 
والقوي  المدنيه قدرت بعد المغرب ترفع المصحف والصليب 
وتعلن تمسكها بالوحده الوطنيه 
تعالوا بقي نتكلم عن حاله البلد 
المجلس العسكري بيتسم اداءه بالغموض
يعني مابقناش عارفين هو معانا والا علينا 
بيتفرج علي حاله العنف وساكت 
لا بيوقف العنف ضد المتظاهرين ودي ممكن يكون نتيجتها 
حرب اهليه لانقسام الشارع  المصري 
عندي اسئله كتيره للمجلس العسكري 
ومش لاقيه لها اجابات تعالوا نسال مع بعض يمكن نلاقي اجابه
المجلس العسكري بطيء جدا في كل شيء 
وده بيخليني اسال 
اهو بطيء ؟ ام تواطؤ ؟ او حسن نيه؟
وعايزه جواب نهائي  وممكن نريح مصر 
مش عايزين نربح المليون 
والا يمكن الادوات مش بتساعده
زي القضاء 
فهل عدد القضايا كبير ؟
وعدد القضاه اقل مما يجب ؟
ولماذا لم يقوموا وكلاء النيابه بتحويل القضايا 
الي المحاكم ؟
اهو لعدم كفايه الادلة ؟
ام هو تاخير من النائب العام ؟ولماذا ؟
فهل يجب ان يضغط الشعب لكي يظهر اتهام 
والاتهام يلزمه 15 يوم في 15 يوم في 15 يوم 
وبدون ثبوت تهم 
ممكن نقول ده مسكن للشعب عشان يسكت!
وكيف تحولت بيانات المجلس العسكري المقبولة
الي وصف تيارات مصرية بالخيانة دون اي دليل 
انا بعرف ان الاتهامات بالخيانه تصدر من النيابه والمحاكم 
وليس من العسكر ولا وسائل الاعلام 
الحل هو 
جدول زمني معلن لتسليم السلطة للشعب صاحب الثورة 
لان كل تاخير في انتقال السلطةيعتبر جريمةفي حق مصر
ويعود الجيش لسكناته والمحافظه علي حدود الوطن وامنه القومي
لاننا نرفض تماما اداء كااداء مبارك الطاغيه 
والفرق بين الطاغية والمجلس العسكري 
ان الثاني قائد مؤسسه منضبطه من مؤسسات مصر
ونحن لا نقبل باي حال من الاحوال خلخله تماسك الجيش 
الثورة فعلا في خطراو بالاحري 
الثورة في عرض البحر تحتاج لربان ماهر 
ومطالب الشعب هي الامن والامان للوطن والمواطن 
واوعوا اوعوا تقلبوا الصفحه 
ابقوا معي

24‏/7‏/2011

ملوخيه بالتقليه

أعزائي 
كل عام وانتم جميعا بالف خير رمضان علي الابواب 
ويارب ينعاد عليكم جميعا بخير
وصحه وسعاده 
مش عارفه اكتب عن ايه لان البلد بقت متلخبطه خالص 
مش عارفين رايحين فين ولا جايين منين 
اللي بيحصل ده في مصلحه مين ؟
كل الاحاديث بقت سياسيه واللي عمره ما اتكلم في السياسه 
ماشاءالله بقي محلل سياسي وخبير استراتيجي 
والاحاديث كلها بتنصب علي المليونيات والمظاهرات 
والمجلس العسكري 
وخلاص نسينا الشغل ووقفنا عجله الانتاج  وفرشنا التحرير 
ودخلنا علي شارع رمسيس والعباسيه وميدان روكسي 
ماهو ده التوسع او البحبحه زي ماكانوا بيقولوا اهل زمان 
وفين فرحه قدوم شهر رمضان برضه  نسيناها  
ولا همنا انقطاع الكهرباء 
ولا غلاء الاسعار مع قدوم الشهر الكريم 
حتي سائقي القطارات اضربوا 
يعني مالهمش نفس يريحوا ويعتصموا
ولا عدم استقرار الامن  في الشوارع وفي البيوت
نتيجه الرعب من البلطجيه 
وعمنا الحاج العيسوي لا عارف لا يحور ولا يدور 
ولا اصلا في ايده حاجه باين وزير ظهورات 
اللي مش عارف يعني ايه ظهورات  دول الموظفين اللي مش مثبتين 
موظفين علي ماتفرج 
حتي الشعب نسي مسلسلات رمضان 
كل اللي يهمه انه يهتف بسقوط العسكر 
ومابقاش حد يسال عن صحه المخلوع اللي المتر الديب قال انه في غيبوبه 
ومدير المستشفي قال ان حالته مستقره 
ونسيوا انه بيتعالج علي نفقه الدوله 
وفي الوقت نفسه الدوله مش عارفه تعالج مصابي الثوره 
ولا تصرف معاشات لاسر الشهداء 
ونسيوا التعتيم علي سوزان زوجه المخلوع 
يعني هي رمت كام مليون زي ماتكون بترمي عضمه للكلب 
وبعدها ولا حس ولا خبر 
يعني لا كانت حتعمل قسطرة ولا قلب مفتوح ولا مقفول 
كله كلام ابن عم حديت 
بينيمونا بيه 
واهل بورتو طره عايشين ومستقرين ولا هاممهم اي حاجه 
طالما الخدمه في بورتو طره 7 نجوم مش 5 نجوم 
والمشير كان له خطاب امس بمناسبه ثورة 23 يوليه 
واكد فيها العزم علي بناء دوله مدنيه حديثه بشعبها وجيشها 
(مافيش فيها شرطه ولا امن )
مش عارفه جهاز الشرطه حيسرحوه مافيش عنهم اي اخبار
وعايز يرسخ الديمقراطيه للانتخابات النزيهه 
مش الاول تستقر الجبهه الداخليه  والا هو كلام وطق حنك 
وكل يوم والتاني بيشكلوا وزاره جديده 
بحس انهم بيعاملوا الوزراء باليوميه 
يعني اللي يشتغل ياخد يوميته واللي مايشتغلش مالوش يوميه 
وبرضه الوزاره الجديده كلها من كبار السن 
بمكن بيختروهم عواجيز عشان يبقوا بركه للوزراه 
واحلي م الشرف مافيش بياخد تعليماته من العسكر 
واتهامات ل6 ابريل بانها بتسعي  للوقيعه بين العسكر والشعب 
وده نتيجته اكيد اشباكات وعنف  
واتفرغنا للمهاترات وتسميه المليونيات باسماء كتير 
انا بقي بقترح اسماء جديده للمليونيات اللي بتكون يوم الجمعه 
ممكن ابتهاجا بقدوم رمضان نسميها 
جمعه  الملوخيه بالارانب 
ودي اول رمضان 
وجمعه كحك العيد 
بتكون في التلت الاخير من رمضان 
اما جمعه لبس العيد 
بتكون اخر اسبوع في رمضان 
واللي عنده اسماء تانيه يسبها في التعليقات 
وكل واحد يطلع في دماغه حاجه يعملها
زي ما انا طلع في دماغي اكتب المقال اللي مش مترابط  مع بعضه 
اشمعني انا  يعني ما انا وحده من الشعب 
بس بوعدكم بمقال مترابط  المره الجايه 
وعلي رأي الفنان العملاق شعبولا 
وايييييييه . بس خلاص 
اوعوا اوعوا تقلبوا الصفحه 
ابقوا معي


7‏/7‏/2011

ماحستش بالتغير حنزل التحرير

أعزائي 
اليوم 8 يوليه 2011
بدا الاعتصام المفتوح في ميدان التحرير لحين تنفيذ المطالب 
وقد تم نصب الخيام في الميدان 
 والمطالب كالاتي 
1- تطهير جهاز الشرطة وجميع الاجهزة الرسمية 
والمؤسسات الاعلامية 
2- محاكمة المتورطين في قتل الشهداء ورموز الفساد 
3- استقلال القضاء والازهر 
4- حرمان رموز الحزب الوطني المنحل من ممارسة 
العمل السياسي لمده لا تقل عن 5 سنوات 
كذلك مطالبه عصام شرف رئيس الوزراء الحالي بالتنحي هو ووزرائه
بعد فشلهم في تحقيق مطالب الشعب 
ياريت تدعوا ربنا يوفق مصر 
واوعوا اوعوا تقلبوا الصفحة 
ابقوا معي