15‏/5‏/2013

اقليم قناه السويس

أعزائي 
كل عام وانتم بخير  النهارده 5 رجب
رمضان قرب ربنا  يقدرنا جميعا علي صيامه وقيامه 
ويجعلنا من عتقاء هذا الشهر الكريم 
الموضوع اللي حنحكي عليه النهارده  مهم جدا 
الا وهو 
القانون الجديد اللي اسمه 
قانون تنميه اقليم قناه السويس تعالوا نناقشه زي ماناقشنا ال17 بند في الدستور 
بس الاول اقولك حاجه مهمه ؟
 القانون يمنح رئيس الجمهورية صلاحيات لا حدود لها
  لا يخضع لحكومة او رقابة برلمانية   
بس بيقسم الضفه الشرقيه لمصر شرق القناه وسيناء
شرق القانون من نصيب قطر 
سيناء من نصيب حماس 
وحياتك يا آم ترتر سمعينا اطول زغروته للقانون الجديد 
---
١- رئيس الجمهورية ينشئ حكومة للإقليم مكونه من ١٥ فرد تحت مسمى هيئة ادارة الاقليم 
و رئيس الهيئة على درجة نائب رئيس وزراء (مادة ٢ ، مادة ٥) .
ممكن 10  حيكونوا من حبايبنا الحلوين ان ماكانش اكتر 
ورئيس الهيئه ياتري حيتعين ازاي وايه هي مؤهلاته وخبراته ؟
والهيئه حيكونوا من الحزب والا من المعارضه والا من الشعب ؟
وحيكون فيهم غير مصريين ؟
يعني ممكن 2 من حماس علي 3 قطريين 
لزم الوحده الوطنيه 
---


٢- تستقطع منطقة شرق بورسعيد ، شمال و غرب خليج السويس و منطقة وادي التكنولوچيا بالاسماعيلية من المحافظات التابعه لها و تدخل في نطاق الاقليم مع المناطق الاخرى التي يحددها رئيس الجمهورية بنفسه كمرحلة اولى ولم يحدد القانون المراحل الاخرى التي تتبعها وهو ما يتضح انه استقطاع للضفة الشرقية للقناة و سيناء و رئيس الجمهورية الوحيد الذي له الحق في ادخال مناطق اخرى (مادة ١ "ب" ، مادة ٣)
كمان حيستقطعوا مناطق من مصر قال يعني احنا ناقصين اننا نتقسم 
 حنبقي دويلات والا انا مش بفهم 
عمكم الحاج حدد المرحله الاولي  ولسه ماحددش المراحل الاخري 
اه فهمت زي مشروع النهضه اللي طلع مالوش وجود فنكوش يعني 
وعمكم الحاج هو الامر الناهي في كل الليله السوده دي 
سؤال خطر علي بالي 
هما عايزين يعملوا ايه في بورسعيد اكتر من اللي عملوةه؟
--- 
 
٣- القانون سيطبق على المشروعات القائمة بالفعل و التي ستدخل ضمن نطاق الاقليم اي ان القانون سيطبق بأثر رجعي على مشروعات قائمة (المادة الثانية) . 
حيطبقوا القانون بأثر رجعي 
يعني علي كده كل المشروعات اللي حتتعمل او بيتم الانتهاء منها 
حتبقي تبع الاقليم عالبركه  حد فيهم حيغرم حاجه
---


٤- للإقليم لائحة تنفيذية يقوم مجلس ادارة الاقليم بوضعها اي انها يقر بعيد عن يد المشرع و بها كافة التفاصيل عن الاقليم من هيكل تنظيمي ولائحة عمل و تحديد الادارات و التأمينات الاجتماعية (مادة ٥ ، مادة ٩ بند ٣)
مين اصلا اللي وضع اللائحه التنفيذيه ؟
حقيقي ازاي مش قانون مفصل كل حاجه لوحدها 
يعني ليه مش تخصصات ؟
يمكن حيخترعوا الجديد بمساعده طائر النهضه 
---
 

٥- القانون يمنح هيئة الاقليم صلاحيات و اختصاصات الوزراء كافة مثل التعليم و الصحة و الثقافة و التأمينات الاجتماعية و التموين و غيرها و الهيئات العامة و المحافظين فيما عدا الدفاع و الداخلية و العدل و الخارجية ، لكن القانون لم يضع مقابل هذه الصلاحيات اي مسئولية امام الجهات الرقابية مثل مجلس النواب (مادة ٤) .
 الصلاحيات للوزراء الجدد يعملوا اللي عايزينه لا ظابط ولا رايط 
وزير التعليم ممكن يغير ماده التاريخ ويحطوا بدلها تاريخ قطر 
والسيره الذاتيه لحماس 
ووزير الصحه يبعت رعايا الاقليم للعلاج  في الخارج علي نفقه الاقليم 
ووزير الثقافه حيعملهم برامج تدريب علي المشي علي الحبل 
دي ثقافه جديده لزوم التطور الطبيعي للحاجه الساقعه 
اما التامينات الاجتماعيه حتديهم معاشات ومزايا وصناديق ادخار 
وحاجات ياما ماشفنهاش في مصر المحروسه ولا حنشوفها 
تعالوا بقي نشوف التموين ومزاياه 
حيبقي في دعم في كل السلع 
وحيوزعوا علي رعايا الاقليم الشاي والسكر والزيت بلا مقابل 
بلوشي يعني  
والا البنزين ياهناهم ياسعدهم حيبقي رخيص 
والسولار حيبقي علي قفا مين يشيل 
واصحاب محطات البنزين يتحايلوا علي رعايا الاقليم انهم ياخدوه 
يقولولهم اللي حياخد 10 لتر حنديله ال10 التانين هديه 
بس  وزراء الداخليه  والعدل والخارجيه 
مش حيكون ليهم بديل  
هما هما ويابختهم حيبقوا وزراء بوشين 
وش مصري ووش اقليمي 
 ومش حيكون في اي رقابه من اي حد 
يعني ممكن يعملوا اللي يطلع في دماغهم ماهو لا حسيب ولا رقيب
والنبي ياولاد الحلال ماتلقوليش شغله حتي في محطه بنزين اعبي سولار 
في الاقليم الماسي الجديد
---
٦- مجلس النواب كل دوره الرقابي يتلخص في انه يتلقي تقرير سنوي من هيئة الاقليم عن نشاط الاقليم و الميزانية النهائية و الحساب الختامي (مادة ٩بند ٦) و غير ذلك ليس له اي دور رقابي لان مجلس الاقليم هو الحاكم بأمره . لكن الغريب ان رئيس الجمهورية هو من يقر مشروع الموازنه السنوية لان موازنة الاقليم منفصله و مستقله عن موازنة الدولة (مادة ٩ بند ٥ ، مادة ٢١) .
 البرلمان مالوش دعوه الا انه يبص علي التقرير السنوي وخلاص 
وعم الحاج هو اللي بيقر بكل شيء 
قال ايه موزنه الاقليم منفصله عن موازنه الدوله 
هههههههه طيب حتوزنوا هنا والا  حتوزنوا بره احسن
---


٧-  الاختصاصات الاخرى لمجلس ادارة الاقليم ؟
أ) رسم السياسة العامة للتنمية
ب) اقرار الخطط و البرامج و تحديد المشروعات
ج) تحديد الاراضي و تخصيصها
د) إقرار العقود مع الشركات و المستثمرين
هـ) إصدار قرارات تقسيم الاراضي
و) إصدار تراخيص البناء
ي) وضع نظام السجل التجاري و مراقبي الحسابات و تأسيس الشركات
(مادة ٩)
ياصلاه النبي علي الاختصاصات 
كله شأن داخلي خاص بالاقليم 
يعني بصوا واستعجبوا واسكتوا 
هوس هوس 
--- 
 
٨- كيف يتم فصل الاقليم ؟

أ) بأن يكون له مكاتب في الداخل و الخارج و كأنها سفارات خاصه به (مادة ٢)
ب) بأن يكون له مطارات و موانئ خاصه به يديرها مجلس الاقليم بعيدا عن وزارة الطيران المدني (مادة ٩ بند ٧ - ج) .
ج) ان تكون منظومة التعليم منفصله بتراخيص من ادارة الاقليم (مادة ٩ بند ١٢)
د) ان تصبح انتقال البضائع من الاقليم الى باقي الدولة و اليها عملية (استيراد و تصدير) ينظمها اجراءات و نظم يعتمدها هيئة الاقليم بما يدل على انها دولة اخرى داخل الدولة وليس مجرد منطقة اقتصادية (مادة ٩ بند ٩) .
شفتوا !!!!! مكاتب زي السفارات 
ومطارات ومواني خاصه مش تابعه لوزاره الطيران المدني 
مش قلتلكم تعليم غير اللي بنتعلمه عشان تصدقوني 
عشنا وشفنا حنستورد ونصدر لنفس البلد 
وياتري العمله حتكون ايه ؟
اكيد حتبقي عمله تانيه غير الجنيه الخيبان الصدمان العدمان بتاعنا 
 حتبقي منطقه قطريه حماسيه حره
---
 

٩- في الوقت الذي لم يوضح القانون اي معايير لاختيار اعضاء هيئة الاقليم بإستثناء تمثيل وزارة الدفاع و المخابرات و المحافظين على بعض المقاعد حسب ما تنظمه اللائحة التي يقرها المجلس نفسه ، الا ان ذلك غير كافي حيث تتخذ القرارات بموافقة اغلبية الحاضرين وهي ثلثي الاعضاء بما قد يفتح المجال بتمرير قرارات و تكون صحيحه في غياب الااعضاء الموثوق فيهم (مادة ٥) .قانون ماوضحش مش بقولكم زي طائر النهضه 
حيختاروا الاعضاء بس ياتري مين سعداء الحظ 
ياتري عم عبده بتاع البيبسي اللي في اول شارعنا 
رايح هناك والا قاعد هنا 
يمكن يكون من اللي حيقولوا موافقون 
لازم احسن علاقني معاه اكتر  عشان ممكن اهاجر في الاقليم  الجديد 
واهه يبقي اعرف حد هناك برضه بنحتاج حد نعرفه في الغربه 
--- 


١٠- بحكم هذا القانون فإن إدارة الهيئة هو "السلطة المهيمنة" على الاقليم (مادة ٩) وله الحق في "استغلال ثروات الاقليم" دون التقيد بأحكام قانون المناقصات و المزايدات و المشاركة مع القطاع الخاص و قانون تأجير العقارات المعمول بهم في الدولة (مادة ١٠) 
و تخصيص الاراضي للغير لمدة "٦٠ سنه" حق انتفاع و ايضاً تمنح التراخيص و الموافقة على تنازل المرخص له للغير (مادة ١٧) يعني كل شئ بيد الهيئة و ايضاً تحديد العمله التي يتم دفع المستثمر مقابل حق الانتفاع (مادة ٢٤ بند ه).

استغلال ثروات الاقليم  من غير قيد ولا شرط 
وتخصيص اراضي  حق انتفاع لمده 60 سنه ياتري مين يعيش 
يعني فساد ومحسوبيه ورشاوي اكتر من ايام مبارك 
--- 


١١- المادة ١١ من القانون لم تنص على حظر رئيس الجمهورية و اعضاء الحكومة و اقاربهم من الاستثمار في الاقليم سواء المشاريع المتعاقده او من الباطن .
بابختك ياعم الحاج انت وحبايبنا الحلوين 
ده قانون متفصل عالمقاس بالظبط 
يعني مايخرش الميه 
وكمان من الباطن ده منعا للحسد والا ايه ؟
--- 


١٢- اعطى القانون للهيئة الحق في الحصول على قروض و منح و اعانات و هبات و ترك الامر سواء كان داخليا او خارجيا ولم يوضح شروط لتلقي اي منها الا انها بموافقة رئيس الجمهورية فقط (مادة ٢٠ بند ٤) .
لا والله
القانون ضحكني وماكانش ليه نفس اضحك 
ياتري القروض بفوايد والا قروض حسنه النيه 
وكمان منح واعانات وهبات 
احمدك يارب 
وجرب حظك يا عم الحاج وقول 
افتح ياقطر 
--- 


١٣- رغم ان الموازنه العامة للدولة تخصص جزء منها ليدخل في رأسمال الهيئة (مادة ٢٠ بند ١) الا ان اموال الهيئة تعتبر مال خاص بها الا في احوال قانون العقوبات (مادة ١٩) كما ان موازنتها مستقله عن موازنة الدولة والتي تخضع لرقابة و اقرار مجلس النواب (مادة ٢١) .
اقرار ايه بقي 
ما كل شيء انكشفن وبان 
---


١٤- اعطى القانون مجموعة من الامتيازات للشركات و المستثمرين اهمها " عدم جواز الحجز الاداري عليها ، اعفاء ضريبي ١٠ سنوات ، اعفاء ضريبي ٥ سنوات للتوسعات ، و الاعفاء من الدمغات و رسوم التوثيق و الشهر العقاري و عقود الرهن و القرض لمدة ٣ سنوات ، كذلك الاعفاء من الجمارك للالات و المعدات " (مادة ٢٣)
و وضع شروط لتمتع الشركات بهذه الامتيازات لكن القانون لم يوضح ابدا كيف تتعامل الهيئة مع المستثمرين الذين يريدون العمل في الاقليم دون رغبه في التمتع بالامتيازات وعدم التقيد بالشروط (مادة ٢٤) .
مافيش حجز اداري واعفاء من الدمغات واعفاء ضريبي 
ورسوم شهر عقاري واعفاء جمارك 
دي ليله بيضه بيضه والنبي بيضه بيضه 
---

1٥- اقرت المادة ٢٦ من القانون مجموعة من العقوبات على الشركات المخالفة لهذا القانون تبدأ بحل الشركة و تنتهي بالغرامة المالية لكن القانون لم يوضح بأي حال الجهه التي توقع العقوبة و تحددها بحسب نوع المخالفة كما لم يشير القانون لاي اليه لتطبيق تلك العقوبات على الشركات .
حيعقبوهم بانهم حيمنعوا عنهم الشيكولاته 
اذا مافيش جهه لتوقيع العقوبه يبقي مين حيعاقب ؟
ياعم صلي علي اللي حيشفع فيك يوم القيامه 
---
١٦- لم يشير القانون لاي نوع من التأمين الصحي او وجود مستشفيات حكومية او خضوع سكان الاقليم لاي نظام تموين او حتى نظم التعليم المطبقة في الاقليم و ترك امور كثيره للآئحة التنفيذية الغير معلوم اي من بنودها لتقر بعيداً عن ايدي المشرع و الذي انتزعت منه الرقابه و التشريع على هذا الاقليم .
 يوووه ما احنا قلنا حيبعتوا المرضي للعلاج في الخارج
---
دول ال16 بند السؤال بقي 
مين اللي حيعيش في الاقليم ده ؟
وياتري الدخول له حيكون بفيزا والا بدعوه من سكان الاقليم 
متهيالي ان اللي حيعيش هناك عليا القوم والصفوه 
من قطر وحماس والذي منه 
ابتديت اقتنع بمقوله سعد زغلول 
لما قال مافيش فايده غطيني ياصفيه وشدي عليه الغطا 
شفتوا بقي يا ساده ياكرام اللي بيحصل واحنا قاعدين 
عاملين زي الاطرش في الزفه 
كفايه عليكم كده 
انا حروح اخد دواء الضغط 
وقلبي واجعني عليكي يامصر 
بس برضه بقول 
اسلمي في كل حين 
واوعوا اوعوا تقلبوا الصفحه 
ابقوا معي


8‏/5‏/2013

بدايه جديده

أعزائي
اخباراتكم ايه بعد اكل الفسيخ والرنجه 
صحتين وعافيه علي قلوبكم 
المقال اللي فات اللي كان علي اسرار الشحاتين 
له كماله صغيره بقصد طبعا كماله المقال 
مش كماله لطبق الكشري 
كنت نشرتها في الفيس بوك وحنشرهالكم تاني هنا 
حصلت بعد كتابه المقال بيومين 
 النهارده وانا في شارع هارون الرشيد مصرالجديده , قابلت صديقي الشحات اللي حكالي عن السر في انه لافح عده سن السكاكين , لقيته جاي برضه بيشحت وحاطط ايده علي بقه اول ماشافني ابتسم وقالي هو انتي قلتله ايه غيرت مكانك ليه قالي يوم هنا ويوم هناك , قالي غريبه اني شفتك تاني ضحكت وقلتله اه ما انا مكتوبالك , لقيته شايل عده سن السكاكين مش هي اللي شفته بيها اول امبارح , سالته ايه الزعيم غيرلك العده بوحده تخم واللي يشوفها يفتكر انها شغاله عكس التانيه , قالي ايوه انا قلتله ان الفوله اتهرشت قالي مين ابن اللئبمه اللي هرش انها بايظه قلتله اللي هرش الفوله وحده مش واحد , طبعا كنت عايزه اعرف الزعيم قال ايه عليه سالته قالي انه قال بت صاحيه ومفتحه ماعدتش عليها , ونصحني اخد بالي من الستات اكتر من الرجاله , الاشاره فتحت وقلتله ان شاءالله حشوفك تاني ياصديقي ضحك وقالي وانا مستنيكي . 
اصحاب كتير ليه بعد مانزلت الكماله حذروني وقالولي بلاش تكلمي شحاتين 
وكمان اوعي تتجنني وتروحي عذبه النخل تقابلي الزعيم 
انا بطمنهم وبقولهم ماتخافوش عليه ربنا يسترها معايا 
---
نرجع بقي  للي عايزه اتكلم معاكم عليه 
اول امبارح وانا في البالتوك  شفت صديق كان بقالي 
حوالي 4 سنين ماشفتوش 
اسمه علي البالتوك النهر الخالد 
هو استاذ في كليه الحقوق 
طبعا بعد السلامات كان حتمن نحكي سياسه 
سالني  اخبار السياسه ايه معاكي 
قلتله اني محبطه وشايفه ان مافيش لا امل ولا فايده 
الحقيقه لقيت كلامه صحي فيه الامل تاني بعد ماكان تقريبا 
في العنايه المركزه 




 والنقط الجايه هي كانت خلاصه حديثنا 
---
ان التجربه الناصريه كويسه بس المشكله 
ان الناصريين اللي في زمنا هما اللي مش كويسين 
---
نشتغل سياسه بشكل منظم من خلال اي تكوين موجود 
يتناسب مع افكارنا
---
ماينفعش نسيب الساحه لحبايبنا الحلوين 
لان التيار المدني في البلد اكتر بكتير من 
تيار الاسلام السياسي 
بس المشكله ان المدنيين مش بيشاركوا 
 ---
في ظاهره منتشره وهي احجام اغلب الناس 
عن العمل السياسي  لان الاحزاب الموجوده علي الساحه
ضعيفه وكمان كلها مشاكل 
---
الاستسلام اكبر خطا وممكن يكون هدف لحبايبنا الحلوين 
انهم يبرتعوا وينتشروا اكتر من برتعتهم وانتشارهم الحالي
---
استسلام ناس كتير بعد ضياع املهم 
وفي كتير منهم من صفوه المجتمع 




وعشان كلنا مصريين وبنحب مصر 
لازم نلحقها ونشارك 
ويكون الهدف الاساسي 
غد مشرق لمصرنا الغاليه 
المطلوب مننا جميعا 
نبطل سلبيه 
لازم نوسع دائره المشاركه للجميع 
نختار حزب نعمل من خلاله 
واختيار الحزب بيكون معبرا  عن شخصياتنا 
نشارك في اي كيان  بغض النظر عن اعتراضنا عن بعض الاشخاص
الموجوده فيه 
لما المشاركه حتكون كبيره بمعني اشخاص كتير 
ساعتها ممكن نغير اي شخصيات نلاقي انها مش قد العمل والمسئوليه 
ياريت نفكر تاني ونحي الامل اللي في العنايه المركزه 
ممكن نحطله جهاز تنفس صناعي 
قلب صناعي  او صدمات تحيي القلب اللي وقف 
ياريت كلنا نشارك 
مش انتوا برضه بتحبوا مصر زي حالاتي 
يالله نبتدي 
واوعوا اوعوا تقلبوا الصفحه 
ابقوا معي