26‏/2‏/2009

المفتش كرومبو ومساعده سحس بمب





أعزائي
بصراحه الشعب المصري طيب جدا
وعشان كده بيضحك عليه كتير وبتلاقوا معظم اللي بيضحكوا علينا مننا
اكيد بتشوفوا كميه المسابقات في التليفزيون
وكلها مسابقات عبيطه يعني اي حد ممكن يحلها
مش مطلوب منك الا انك تطلب رقم علي التليفون الارضي
وده الدقيقه بجنيه ونص . واول ما تطلب تلاقي بيحكولك عن مسابقات تانيه
ويدولك ارقامها يعني علي ماتجاوب علي اسئله المسابقه
اللي بتكون دايما اكتر من سؤال تلاقي نفسك اتكلمت مش اقل من ربع ساعه
ماتنساش ان الدقيقه بجنيه ونص . وفي اخر المكالمه يطلبوا منك انك تتصل اكتر
عشان تكون فرصتك في الفوز اكبر
والسيناريو ده هو هو لو طلبت علي الموبايل
وممكن تبعت رساله دي بتكون بخمسه جنيه من الموبايل
ويردوا عليك برساله تانيه ويقولولك كل ماتبعت رسايل اكتر فرصتك في الفوز حتكون اكبر
يعني كله ضحك علي الشعب الغلبان
غير رقم الموبايل اللي بيدهولك في اخر المسابقه عشان تتصل عليه
و برضه مش اقل من ربع ساعه
مسابقات كتييرودي كلها متبنيها احدي شركات الاتصال في مصر
وبتترواح جوايزها بين
5000 جنيه و1000 دولار وشقه تمليك
بس ماعرفتش ان فيه حد اخد حاجه الله اعلم
المسابقات منها تلي دراما .. اجمل طفل .. شقه العمر
المفتش كرمبو
ودي اللي عايزه اتكلم عنها النهارده لاني بلاقي انها الاخطر علي الاطفال
بعتقد انها بتعلم الاطفال اسماء مش ظريفه
مع العلم ان ليها متفرجين كتير وانا وحده منهم وكان ممكن توجه الاطفال توجيه جيد
يعني مثلا الشخصيات اسمائها غريبه حقولكم اللي فاكره منها
رمزي هؤهو ..سكسوكه الحلاق .. بفته المنجد
زكي غباوه .. لقمه الفران ..عطيه شبطه
سيد كبداكي .. نصبه السمسار .. بستم الميكانيكي
حامد مافيش فكه .. حمبوله الجزار .. دكتور كنص
ممبوزو لاوي بوزو..سنيور نجرسكو.. عزيزه اللذيذه
طبعا لما نلاقي طفل عنده اربع سنين بيتعلم يكون جمله ويعيد الاسماء دي
بنلاقي الاهل بيضحكوا وفرحانين ومش عارفين ان دي خيبه
زي ما بنشوف الشباب وكلامه الغريب
روش طحن .. كبر الجمجمه وغيرها
وده الكلام اللي بنسمعه من الشباب وبصراحه انا شخصيا بكون مستاءه منه
شخصيه المفتش كرمبو مخترعها هيثم حمدي اللي في الصوره ومعاه
ماجد صبري مؤدي الاصوات بمعالجه مهندس الصوت طبعا
في اخر المسابقه كرمبو بيقولك وجايزتها 1000 دولار
ابقي قابلني في الحلقه الجايه
بيقصد طبعا ابقي قابلني لو كسبت
المسابقه دي بالذات بتبثها 8 قنوات فضائيه
يعني حصار علي اطفالنا وكيفيه تعليمهم اسماء مالهاش لزمه
انا كتبتلكم لاني كنت في النادي وسالت طفل شكله جميل اسمك ايه
رد عليه وقالي بفته المنجد وقالي كمان ده اخويا دكتور كنص زعيم العصابه
شفتوا قد ايه التليفزيون بيأثر في اطفالنا
ياحكومه ياوزير الثقافه يا مسئولي التليفزيون
ارحموا الاطفال وعلموهم حاجه تفيدهم يعني برضه ممكن كرمبو يدي معلومه مفيده
مش بس بيفسدوا ذوء اطفالنا انما كمان بيتحايلوا علي الشعب الغلبان
كل ماتتكلم اكتر كل مافرصتك في الفوز حتكون اكبر
رحمتك يارب حنلاقيها منين والا منين
قرائي الاعزاء
ياتري الشكل الجديد للمدونه عاجبكم
اذا في اي ملاحظه او تحبوا اغير شيء ابعتولي في التعليقات
واقولكم كل ماحتدخلوا المدونه اكتر حتلاقوا مواضيع جديده اكتر
بس انتوا ابقوا معي واوعوا تغيروا الصفحه


23‏/2‏/2009

عوده الحياه الطبيعيه لحي الحسين وخان الخليلي














































أعزائي
وقع امس في الساعه السادسه وخمسون دقيقه مساء
انفجار عبوه ناسفه علي بعد حوالي عشره امتار من مسجد الحسين
ولم يحدث تدمير في المكان
كما ابطل مفعول عبوه آخري قبل الانفجار بمعرفه خبراء الامن
وقد افاد شهود العيان بالاتي
في حوالي الساعه السابعه مساء امس سمعوا صوت انفجار
عند مشاهدتهم ماتش كوره بالتليفزيون
فظنوا انه صوت للالعاب الناريه ابتهاج باحراز الجون
لتزامن الانفجار مع الجون
فخرجوا لمشاهده الالعاب الناريه ففوجئوا بالانفجار
وقال شاهد عيان ان العبوه كانت تحت مقعد حجري يقع
بالقرب من كشك شرطه السياحه
وقال آخر ان العبوه القيت من لوكانده الحسين
وفي الساعه الثامنه وعشر دقائق بعد اخلاء ميدان الحسين وخان الخليلي
واغلاق المحال والمقاهي والمطاعم
سمعوا دوي انفجار آخر ولكن ليس بشده الانفجار الاول
وكان الانفجار الثاني نتيجه ابطال مفعول عبوه ناسفه آخري
لم يحدث تدمير في المكان
وقد ابطلت العبوه الناسفه الثانيه بمعرفه خبراء الامن
وتوقفت حركه المرور المؤديه الي الازهر والحسين
وطوقت الشرطه المكان ومنعت الدخول حتي لاجهزه الاعلام والفضائيات
توجه الي مكان الحادث وزير الداخليه وظل هناك قرابه الربع ساعه
كما توجه ايضا الي مكان الحادث النائب العام
المستشار عبدالمجيد محمود وبرفقته عدد من محققي نيابه آمن الدوله العليا
ونيابه غرب القاهرة
وقرر ندب خبير مفرقعات وخبير ادله جنائيه لفحص موقع الحادث وتصويره
واعداد تقرير عن العبوتين الناسفتين
اسفر الحادث عن وفاه سائحه فرنسيه تبلغ 17 عاما
واصابه 16 اخرين
وقد استقبل مستشفي الحسين الجامعي 13 مصابا
9 فرنسيين و3 مصريين والماني
وصرح الاستاذ الدكتور اسامه فريد مدير المستشفي صباح اليوم
ان جميع الاصابات ليست خطيره وان اغلبهم سيغادر المستشفي اليوم
كما استقبلت مستشفي مصر الدولي السعوديين الثلاث
تحفظت سلطات الامن امس علي نزلاء فندق الحسين واطلق صراحهم بعد سؤالهم
لمعرفه ملابسات الحادث
تضاربت اقوال اصحاب المحال عن الحادث
منهم من قال انه شاهد منقبتين ورجل بجوار مكان الحادث
وقول اخر انهم سيدتين منقبتين
وثالث قال ان دراجه بخاريه قامت بالقاء العبوه ولاذت بالفرار
ورابع يقول
( مافيش غير حماس هي اللي عايزه تفجر الحسين )
ومنهم من يقول ان العبوه القيت من فندق الحسين
والحكومه لم تعلن بيان رسمي الي الان
وقد شاهدت اليوم الحياه الطبيعيه تعود لحي الحسين
فتحت جميع المحال والمقاهي والمطاعم
وكان بالحي تواجد للسياح باعداد كبيره
وحركه البيع بالمحال كالمعتاد حسب قو ل اصحاب المحال
وكذلك المقاهي والمطاعم تعمل كالعاده
ولاحظت ايضا تواجد امني مكثف
ويارب يحمي مصر من كل شر
ابقوا معي واوعوا اوعوا تغيروا الصفحه










21‏/2‏/2009

تعامد الشمس علي وجه رمسيس الثاني























أعزائي
في ظاهره تحدث مرتين سنويا بشهري
فبراير واكتوبر
تتعامد الشمس علي وجه رمسيس الثاني
وهوما سيحدث فجر اليوم 22 فبراير 2009
يحضر الاحتفال الاف السياح والمصريين ايضا
والقنوات الفضائيه
توضع شاشات عرض كبيره لمن لم يحالفه الحظ بالدخول الي المعبد
ليستطيع ان يري تعامد الشمس علي وجه رمسيس الثاني الحاكم الفرعوني
الذي حكم مصر مده 66 عام
من 1212 قبل الميلاد الي 1279 قبل الميلاد
وحكم وهو في اوائل العشرينات من عمره
رمسيس الثاني ابن سيتي الاول والملكه تويا
اشهر زوجاته نفرتاري
ومن زوجاته ايضا ايزيس نوفرت
وماعت حور نفرو رع
والاميره حاتي
بلغ ابنائه 90 ابن وابنه
منهم بنتاناث / مريت أمن / ستناخت وكذلك الفرعون نبتاح
والامير خائموست
بني العديد من الاثار في الكرنك والاقصر وطيبه ومنف والنوبه
وكان اشهرهم مجمع ابو سنبل بني عام 1250
المعبد منحوت في الجبل وبمدخله اربعه من اضخم تماثيل رمسيس الثاني
ومنحوت في الصخر
واجهه المعبد تتكون من اربعه تماثيل كبيره للملك بارتفاع 20 متر
وباب يفضي الي حجرات طولها 180 قدما
في مدخل المعبد سته تماثيل وفي المعبد الاخر اربعه
اثنين لرمسيس الثاني واثنتين لنفرتاري
بني المعبد بناء علي حركه الفلك لتسقط الشمس علي وجه رمسيس الثاني
وبعده الاله رع حور اخت اله الشمس كما تغطي الشمس اجزاء كبيره
من تمثال امون اله طيبه اما تمثال بتاح رب منف وراعي الفن
واله العالم السفلي لاتصله اشعه الشمس
وتصل الي 60 مترا داخل المعبد
تخترق صاله الاعمده وقدس الاقداس
هذا الحدث يؤكد تقدم الفراعنه في علوم الفلك والجغرافيا والهندسه وفنون العماره
عند تسلل الشمس داخل المعبد يضي وجه الملك رمسيس الثاني
في ظاهره فلكيه نادره . تؤكد عظمه الفرعون المصري
تحدث مرتين سنويا
22 فبراير عيد ميلاد رمسيس الثاني
22 اكتوبر زكري جلوسه علي عرش مصر
وزي ما بنقول دايما
المصريين اهمه حيويه وعزم وقوه
واوعوا تغيروا المحطه ابقوا معي






16‏/2‏/2009

أصل عيد الحب


أعزائي
دكتور صلاح خليل الكاتب بعتلي وبيقول ان موضوع عيد الحب عجبه
وطلب مني اني اكتب عن اصل عيد الحب
وانا بسمع كلامه و بكتب عن اصل العيد
ممكن كتير مننا بيحتفل ومايعرفش اصل الاحتفال جه ازاي ومنين
يالله تعالوا احكيلكم
عيد الحب من اعياد الرومان الوثنيين من 17 قرن او اكتر
وكان تعبير في مفهوم الوثني الروماني عن الحب الالهي
كانوا بيعتقدوا ان ( رومليوس ) مؤسس مدينه روما
ارضعته ذئبه فامدته بالقوة ورجاحه العقل
وكانوا يحتفلون به في منتصف فبراير
احتفالا كبيرا وكانوا يقومون بذبح كلب ومعزه
ويدهن شابان من ذوي العضلات جسميهما بدم المعزه والكلب
حاجه مقرفه جدا . حب ايه ده
ويسيرا بموكب في الطرقات ومعهم قطعتان من الجلد
يلطخان بهما كل من يصادفهما
وكانت النساء تتسابق لاعتقادهم ان هذه اللطمه تمنع عنهم العقم وتشفيهم منه
نروح بقي لعلاقه القديس فالنتين بعيد الحب
هو اسم التصق بواحد من ضحايا الكنيسه النصرانيه
وتوفي في روما أثر تعذيب القائد القوطي
( كلوديوس )
له عام 296 م وبنيت الكنيسه بروما في مكان وفاته عام 350م
تخليدا لزكراه
ولما اعتنق الرومان الديانه المسيحيه احتفلوا بعيد الحب
في نفس يوم وفاه القديس فالنتين
ولكن الاحتفال اخذ شكل جديد
نقل من المفهوم الوثني ( الحب الالهي )
لمفهوم يعبر عن شهداء الحب وكان ممثلا طبعا في
القديس فالنتين الداعي للحب والسلام حتي الموت
ومن اهم مراسم الاحتفال بعيد الحب
تبادل الورود الحمراء تعبيرا عن الحب
وتبادل البطاقات التي تحمل صوره
كيوبيد وهو اله الحب عند الرومان
عرفتوا بقي قصه عيد الحب
توته توته خلصت الحدوته
حلوه والا ملتوته ان كانت حلوه عليكم غنوه وان كانت ملتوته عليكم حدوته
جدتي كانت بتنهي الحكايه اللي بتحكيهالي بالجمله دي
بس كانت بتحكي شامي
يارب يجعل كل ايامكم حب في حب
ويارب تحبوا المدونه وما تقلبوش الصفحه
ويارب يديم الود بينا


13‏/2‏/2009

Happy Valentine's Day






























أعزائي
بكره السبت 14 فبراير
العالم كله بيحتفل بعيد الحب
انا حبيت اخليكم تحتفلوا مع اطفال القرن ال21
شفتوا براءة الاطفال
واضحه جدا في بسيوني ومرفت
كل عام وانتم بتحبوا ومحبوبين
وينعاد عليكم بكل حب
اوعوا تغيروا المحطه والله بحبكم






11‏/2‏/2009

شرم برؤيه جديده


أعزائي
كل مره اروح شرم الشيخ كانت بتبقي زياره خاطفه
بيكون شغل اروح وارجع بسرعه او احضر فرح وبرضه ارجع بسرعه
اول مره اروح شرم واستمتع فعلا
قررنا اهلي وانا اننا نبعد عن كل مشاكل الحياه ونقضي اجازه اربع ايام
في اي مكان بعيد عن القاهره وزحمتها ودوشتها ومشاكلها
وكان الاختيار اننا نروح شرم
وصلنا قفلنا الموبيلات بطلنا نقرا جرايد او نشوف حتي تليفزيون
ماكانش عندنا وقت لاي شيء غير الاستمتاع بجمال شرم الشيخ
الوقت اللي بنكون فاضين فيه بننام عشان نقدر نكمل استمتاع
جربوا تعملوا كده انا اول مره بس اكيد حكررها كتير
شرم الشيخ تقع في محافظه جنوب سيناء مساحتها 424 كم مربع
منها بيتفرع خليجي العقبه والسويس
وحولها اهم محميات طبيعيه
رأس محمد ونبق
وقدمها جزيرتا تيران وصنافير عند مدخل خليج العقبه
اهم المناطق :- رأس محمد نصراني ورأس أم السيد
بتلاقوا هناك فنادق كتير جدا ومطاعم اكتر وديسكوهات كتير وكازينو للعب ده موجود كتير جدا
كل فندق فيه مكتب للرياضات البحريه والغوص
طبعا اهم مكان في شرم الشيخ هو خليج نعمه
بتلاقي فيه اكبر تجمع للكافتيريات والمطاعم والديسكوهات والمحلات التجاريه
وهناك بتشوف كل الاجناس والاشكال
يعني بتشوف الطويله والقصيره والتخينه والرفيعه والسمره والسوده والبيضه والحنطيه
وكل الملابس حجاب خمار نقاب
ميكرو جيب ميني جيب
بنطلون شورت هوت شورت
فستان سواريه او اسبور
بلوزه تي شيرت بدي هاف استومك
يعني اكبر كوكتيل ممكن تشوفه في مصر تلاقيه موجود في شرم
الوقت ده في السنه بيكون وقت اهل ايطاليا
تحس وانت هناك انك لو رحت روما مش حتلاقي حد فيها لان كلهم نزلوا علي شرم
الديسكو ده كل يوم بيكون قدامه قائمه انتظار للدخول
والصوره دي كانت يوم الاتنين 9 فبراير 2009
هنا بقي السوق التجاري القديم تلاقي فيه الخضار والفاكهه
والملابس واي شيء تعوزه حتلاقيه في السوق القديم
وكمان اسعاره حنينه وطبيعي بتكون ارخص كتير من الشانزليزيه الملقب بخليج نعمه
دي الف ليله وليله تلاقي فيه برضه تجمع كبير للمصريين والاجانب
هو فيه عرض خيول وبيعرضوا فيه شو فرعوني
مش غالي الشو لانهم بيعتمدوا علي المطاعم والكافيهات ومحلات بيع الملابس
مكان ظريف تقضوا فيه سهرتكم


دي كانت رحله السفاري وكانت اجمل رحله طلعتها في شرم
كانت ب bech buggy
بيطلعوا مجموعات بيكون فيه اتنين جايد واحد اول الطابور والتاني أخره
عشان يدلولنا علي الطريق وياخدوا بالهم مننا لو اي حد عطل منه البيتش باجي يصلحوه بسرعه
وكمان فيه عربيه نقل صغيره عليها مصور فيديو للي يحب ياخد فيديو للرحله
ممكن واحد يركب لوحده او اتنين مع بعض مش بيفرق
انا طلعت لوحدي خفت حد يطلع معايا يقع قلت خليني في السليم
اقولكم علي حاجه انا كنت خايفه جدا اني اقع علي ضهري وده خلاني اول عشر دقايق
مش مركزه وكمان قلقانه واهلي فضلوا يضحكوا عليه لانهم اول مره يشوفوني خايفه
وكمان عشان زي مابيقولوا اني اسطي سواق درجه اولي
البيتش باجي بطل مني كتير في الاول لكن عم سعيد عبد الحميد
ده كان اول الطابور اللي بيرشدنا علي الطريق غيرلي البيتش باجي
وقالي حتاخدي بعد شوي وعلي مهلك وانا جنبك المهم انك ماتقعيش ولا تتعوري
قال يعني انا كنت مطمنه عشان يقلقني ويقولي ماتقعيش ولا تتعوري
فضل عم سعيد قريب مني طول الرحله
طلعنا الجبل في حوالي ساعه وتلت . مناظر يا الله عليها سبحان الله
ماينفعش تسمعوا عنها لازم تشوفوها
نحت في الجبال واشكال الجبال وتلاقي شجره طالعه في وسط الجبال
وصلنا للكافتيريا البدويه وشربنا قهوه عربي وشاي علي الفحم وكتير شربوا شيشه وكركديه بارد
وكان ضمن الجروب بتاعنا اتنين خطيب وخطيبته من اسكوتلاندا
هو كان طويل وعريض علي راي عادل امام مشرئب الفلنكاتي
وهي كانت صغنونه ورقيقه جدا واموره علي رأي الصعايده
( جنزوره )
يعني ممكن يطبقها ويحطها في جيبه
لما وصلنا الكافتيريا في الجبل صاحبها من البدو
وهو بيجبلنا الطلبات لقيته معجب بيها خالص
فضحكت وغمزتله وهو ياحرام زي ماصدق قالي بزمتك مش خساره
العصفوره دي تجي مع الفيل ده وسالني شفتي فيلم تيتانيك
قلتله ايوه قالي دي شبه روز . لما دققت فيها لقيها فعلا شبه
Kate Winslet
الراجل ساب كل شغله وقعد جنبي عشان هي قاعده قدامي
وقالي نسائهم سبايا لنا .. قعدت اضحك عليه
كان فيه خيمه بدويه للغدا اكل بدوي ورقص وموسيقي الرحله دي ممكن تكون الفجر او الضهر او بالليل
في جمال للي يحب يركب ويتفسح في الجبل
وكمان فيه خيول لنفس الغرض . بس لازم وجود جايد عشان يعرفوا يرجعوا
في طريق العوده سبقت الكل اهلي ماكانوش عارفين يحصلوني
لاني عرفت اتفادي اي هضبه او طريق معرج
العوده كانت تقريبا نص ساعه لاننا رجعنا من طريق سهل
وكنا لفينا حوالين الجبال في طريق الذهاب
رجعنا مهدودين بس برضه نزلنا خليج نعمه بالليل


الرحله اللي بعدها كانت بحريه
بعتولنا الباص ياخدنا الساعه الساعه 8,30صباحا وصلنا للمارينا الساعه 9 صباحا
طلعنا البوت مع ناس كتير مصريين واجانب
اول ما طلعنا طلبوا مننا نقلع الشوز او الصابو
كان فيه اتنين زي جايد واحد شرح للمصريين بالعربي
والتاني شرح بالانجليش للاجانب
اللي شرح عربي كلفتهم
الشرح قال فيه اننا حنروح لرأس محمد
ولينا 3 وقفات في الطريق الاولي مدتها 45 دقيقه
والتانيه برضه 45 دقيقه عشان نعمل
Snorkeling
وسال مين بيعرف يعوم كويس ومين بيعرف نص نص ومين مش بيعرف
اللي نص نص واللي مش بيعرف لبسوا Life jacket
اما الوقفه التالته Ferr
وورانا انواع الاسماك اللي لو جت جنبنا مانلمسهاش
لان في منها مسمم وكمان طلب نقلع اي خاتم او سلسله
لان في اسماك ممكن تجي تشد السلسله او الخاتم وتكون مسممه
سلمونا النظارات والزعانف قبل ماننزل
الاطفال كلهم نزلوا ب Life jacket
طول الرحله مشاريب بارده وسخنه فري
والغدا اسماك بعد الوقفه التانيه
وكان open buffet
الوقفتين نزلنا ورا بعض اول وحده وصلنا للشط وارتحنا علي الرمل ورجعنا
الوقفه التانيه كان لها خط سير مافيهاش راحه
وطبعا واحد مسئول من الشركه اللي عملنا معاها الرحله في الاول والتاني في الاخر
وكل ما يوقف البوت لازم يرموا حبل عشان لو حد تعب يمسكه
بعد كل نزول لما نطلع المسئولين اللي معانا يتحفونا بفاصل رقص شرقي
انا ملاحظه ان الشباب حاليا بيرقصوا احسن كتير من الصبايا
الاسماك الونها واشكالها سبحان الخلاق الاعظم علي جماله
حاجه تخليك تسبح لربنا طول ما انت شايفها
جمال بصراحه مايتوصفش انما يتشاف
الوقفه التالته بسطت الاطفال جدا لانها كانت طويله
رحله العوده برضه ممتعه ولوانها مرهقه بس جميله
رجعنا علي المارينا الساعه خامسه
الجو كان جميل وحمدنا ربنا
انما قلب تراب امبارح واحنا راجعين بعد ماخلصنا رحلتنا
رجعنا القاهره وفتحنا الموبيلات والتليفزيون وقرينا الجرايد
والدوامه العاديه ابتدت تاني والحياه بقت عاديه
اوعوا تفكروا تغيروا المدونه ابقوا معي
اوعوا تروحوا بعيد























































5‏/2‏/2009

لكل لون معني


أعزائي

الزهور انواع والوان

كل زهره لها معني في دنيا الحب

الفرنسيون يعتبرون ان لكل مناسبه زهورها الخاصه

ندخل لعالم الزهور ونفك الشفره

وده حينفعنا في الايام الجايه لان عيد الحب علي الابواب

ورد متعدد الالوان معناه الاعجاب

ورد ابيض حب عفيف

ورد اصفر حب وغيره

ورد وردي حب مرغوب

قرنفل ابيض حب شريف

قرنفل وردي اعجاب شديد

قرنفل احمر حب متبادل

تعالوا نشوف الزهور بتخاطبنا ازاي

التيوليب الاحمر يرمزللحب ويخاطب المرأة الجميله

الورده الحمراء تخاطب الصبيه

الصفراء تخاطب النرجسيه
الزرقاء لذات المكانه العاليه

اللاوند تخاطب الانثي مرهفه الحس

البنفسج حب صامت متاجج

الجوري الروز المرأة الوفيه ذات العاطفه الثابته

ياسمين ابيض للرقيقه المتمرده

قرنفل ابيض المرأة المتشككه

الكامليا البيضاء لمن تحتقر الحب .. ربنا يبعدها عنا جميعا

الحمراء لاجمل النساء

وكل زهره لها رساله يعني البرتقالي رمز لرهافه المشاعر

ورسالتها رقتك تفوق رقه الورد

الزرقاء رمز الوفاء

ورسالتها انا لك الي الابد


الحمراء رمز الجمال

ورسالتها احبك من كل قلبي



الروز ترمز للرقه

ورسالتها انا معجب

البيضاء ترمز للخصوصيه

ورسالتها انتي هديه من السماء





البنفسجيه ترمز لحب الاخرين

ورسالتها مهما حدث سأظل احبك






الصفراء ترمز للغيره

ورسالتها لن تكوني لغيري








الخضراء ترمز للامل والرجاء

ورسالتها اتمني ان تكوني لي


ودي بوكيهات ممكن تبعتوها بمناسبه عيد الحب




















































اوعوا تفكروا تغيروا المحطه ابقوا معي