29‏/4‏/2013

اسرار شحاتين

أعزائي 
اول حاجه بهنئكم بشم النسيم 
وطبعا بهنيءكل اخوتنا الاقباط بالعيد 
كل عام وانتم جميعا بخير 


النهارده بلاش نتكلم في السياسه 
تعالوا احكيلكم عن ظاهره بقت بشعه في الشارع المصري 
وهي اعداد الشحاتين اللي كل يوم بتزيد عن اليوم اللي قبله 
ومدينه نصر اخدت المركز الاول في عدد الشحاتين 
كل الانواع من اول اللي بيجي بفوطه مزفته ويمسحلك العربيه 
ولما تقوله لا مش عايزك تمسحها 
 الفوطه اللي في ايده بقالها 17 سنه مش بتتغسل 
وعلي طول يطلب منك حاجه عشان جعان 
المنظر ده بقي مالوف من مده 
وانا واقفه في اشاره لقيت واحد جه جنبي وقالي عايز 50 جنيه 
ضحكت   وقلتله هو انتوا بقي ليكم تسعيره 
غير اللي جايبلك روشته طبيه وبيقولك بنتي  عايزه دم او ابني محتاج عمليه 
او يقولك انا بغسل كليتي 3 مرات في الاسبوع 
انما الظاهره الغريبه اللي لاحظتها بقالي حوالي شهرين 
هي واحد ماشي في الاشاره بين العربيات 
ولافح علي كتفه العده الكبيره اللي بيسنوا بيها السكاكين 
وبرضه بيشحت !!!! اتاري دي لزوم الديكور 
النهارده وانا ماشيه جنب محكمه مصر الجديده 
لقيت 4 مش واحد 
قلت يابت اتسلي عليهم وانتي في الاشاره 
اول واحد جه بيشورلي علي بقه انه عايز ياكل 
قالي جعان يا ابله 
الابله دي انا  هههههه ضحكت وقلتله ابله طيب انت عايز ايه 
قالي عايز حاجه لله قلتله  طيب ماتجي معايا البيت هنا قريب 
تسنلي السكاكين وتاخد اللي فيه النصيب 
طبعا البيت لا قريب ولا حاجه  
بصلي شزرا  جزرا وقالي بتقولي ايه عدت عليه الكلام تاني 
قلتله انا حمشي علي مهلي وتعال ورايا 
والا اقولك تعال اركب ونحط اللي علي كتفك في شنطه العربيه 
لقيته زي ماتكون حيه قرصته 
قالي  امشي شوفي حالك  ولقيته بيجري بسرعه رهيبه 
مشيت شوي ولقيت التاني 
برضه قالي عايز حاجه لله 
قلتله الله يسهلك انما هو عشان رزل فضل واقف 
سالته هو انت ماجر اللي انت شايلها منين  انت اصلا عمرك ماسنت سكينه 
قالي اعمل ايه اكل منين 
يعني اعترف انه ماجرها 
بجد صعب عليه لانه صريح لا لف ولا دار 


اسرار شحاتين
 
اللي بعده ده كان حكايه 
لابس جلابيه مكويه ونضيفه جدا 
ولافح عده النصب وشايل كمان عيل صغيره
ممكن تكون عروسه عشان مغطيها 
وقف جنبي سالته باستعباط نعم في حاجه 
قالي اديني حاجه لله 
قلتله الله مش انت بتسن سكاكين يعني دي شغلتك 
قالي ايوه قلتله طيب بتشحت ليه ؟
قالي مابقاش حد بيسن السكاكين 
قلتله يعني انت شحات واللي شايلها لزومها ايه 
قالي اتكلي علي الله 
قلتله كلنا بنتكل علي الله بس حسالك سؤال تاني 
كنت فاكره انه حيمشي انما لقيته استنه يسمع 
فاجاته بسؤال هو ماكانش متصور اني اساله
قلتله اللي انت شايلها حنفترض انها بنت  مأجرها بكام في اليوم 
لقيته اتخض من السؤال وقالي قلتلك اتكلي علي الله 
ماتمشي ياست  انتي عايزه ايه مني 
قلتله ياعم انا في عربيتي انت اللي جبته لنفسك لما جيت تشحت
عيب عليك شحط طويل وعريض وصحتك زي الحصان 
بتشحت اتكسف علي دمك 
ده لو عندك دم اصلا 
الراجل جري وسط العربيات وتلاقيه بيقول البلوه دي طلعتلي من اي داهيه 
الرابع بقي جه برضه يشحت 
قلتله انت بتعرف تسن سكاكين 
قالي ايوه قلتله طيب نزل العده 
عشان حديك سكينه تسنهالي 
طبعا هو لما قالي انه بيعرف كان بيضحك عليه 
قالك سؤال اهبل من وحده عبيطه اقولها ايوه 
وماكانش فاكر ان ممكن يكون معايا سكينه 
قالي بس الدنيا زحمه والجو حر 
قلتله لا اله الا الله الزحمه انت واقف فيها 
والجو حر لما حتقف تسن سكينه ومش حر وانت طول النهار داير تشحت 
وبصيت للي شايلها لقيت حوالين العجله رابر بس مقطع 
يعني منظر مش شغاله 
قلتله ايوه بقي قول انك ماجرها والنبي ياشيخ بكام بتاجرها 
قول وانا حرضيك بس احكيلي الحقيقه 
قالي بناجرها ب10 جنيه في اليوم 
قلتله وانت بتقدر تدفع 10 جنيه 
قالي دول ولا حاجه 
سالته بتاجرها منين قالي من واحد  اسمه الزعيم عنده 15 وحده كلهم بايظين 
سالته وهو فين الزعيم ده  
قالي في عذبه النخل
قلتله طيب مدام دي شغلانه مربحه ماتشغلني معاك 
ضحك وقالي انتي شكلك مش وخده علي الشقا
قلتله طيب ممكن اصورك 
قالي تبقي حتطلعي صورتي في التليفزيون والزعيم يبطل ياجرهالي 
ورفض رفضا تاما 
شفتوا بقي عالم الشحاتين 
كل يوم في عندهم جديد بيفاجئونا بيه 
طيعا العربيات اللي ورايا في الاربع نواصي اللي وقفت فيهم 
بهدلوني من الكلاكسات والشتيمه 
وانا ولا هنا عامله حالي مش منتبهه 
واديني عرفت حاجه عن عالم الشحاتين 
بقولكم اوعوا تتقلوا في الفسيخ بعدين يالله السلامه 
ويارب ينعاد عليكم جميعا اقباط ومسلمين بالخير
واوعوا اوعوا تقلبوا الصفحه 
ابقوا معي 

 

 

23‏/4‏/2013

قول حاحا

أعزائي 
بجد  بجد اللي بيحصل في مصر بقي غير محتمل 
كل واحد ماشي بمزاجه    
تعالوا شوفوا اللي حصل
محمد عيد 30 سنه بيشتغل موظف في نقابه المهن الموسيقيه 
عايش في المنيا 
كان في فرح  شعبي والافراح دي عاده بيكون فيها خمور 
محمدعيد رجع من الفرح راكب ميكروباص 
عادي جدا ان الميكروباص يقابل كمين 
واحد من الظباط اللي في الكمين شك في محمد 
بس مش عارفه اذا كان قاله حاحا اللي بتبين انه سكران من عدمه 
ده تبع فيلم التجربه الدنماركيه لعادل امام 
لما اشتبهوا فيه في كمين وقالوله قول حاحا 
نرجع للقصه الغريبه 
الظابط بعت محمد علي قسم  شرطه مدينه مطاي 
لان القانون المصري بيعاقب من تظهر عليه 
علامات السكر في الطريق العام 
قضي عده ساعات محبوس 
بعدها اتحقق معاه لمده 3 ساعات 
من السيد حسين عيد وكيل النيابه 24 سنه 
الاجراء المتبع في الحالات دي 
حبسه 4 ايام علي ذمه التحقيق 
او اخلاء سبيله بضمان محل اقامته 
انما السيد حسين عيد  له قانون غير القانون المصري 
اللي درسه والمفروض بيشتغل بمقتضاه 
واللي اذهل الجميع بما فيهم النائب العام 
وهو ايه اقروا 
تكليف احد  الضباط بتوقيع حد شرب الخمر وهو 80 جلده
واذا الظابط مانفذش يبقي  كافر
سبحان الله ولا اله الا الله 
في ايه في مصر حصل ايه ؟
دي صوره لقرار السيد وكيل النيابه كما جاءت في جريده السفير 



طبعا النائب العام الغي العقوبه 
طيب الفوضي اللي بتحصل مين السبب فيها 
وكيل النيابه مش من سلطته انه يدي لاي بني ادم حكم 
دي سلطه القاضي 
حتي لو القاضي  حكم في نقض 
انا واللي زي حالاتي مش بنفهم في القانون بس دي بديهيات 
عرفناها وفاهمنها 
وكمان بقي عندنا في مصر عقوبه دينيه 
هل هي منصوص عليها في القانون او لا؟
اغيثونا يا اهل القانون وفهمونا 
وكمان حيعاقب الشرطه اذا مانفذتش حكمه 
طيب ازاي حيجلدوه اذا كان السارق والقاتل 
بيتحكم عليهم بالسجن او الاعدام 
هو في خيار وفقوس 
بجد مابقتش مستوعبه حاجات كتير بتحصل 
زي ماقلت في الاول كل واحد شغال علي مزاجه 
اللي يطلع في دماغه حاجه بينفذها طالما هو صاحب سلطه 
اخرتها ايه ؟
مصر رايحه علي فين ؟
الخوف من الجاي ان اي بني ادم عادي ينفذ الحد مع اي واحد اختلف معاه 
نقلتلكم الاكتئاب اللي عندي صح 
اكتئاب الشعب المصري بقي عادي جدا 
لك الله يامصر 
واوعوا اوعوا تقلبوا الصفحه 
ابقوا معي
 
 
 

13‏/4‏/2013

اسرع جلسه

اعزائي 
النهارده السبت  13 ابريل يوم مهم  
لانه يوم محاكمه مبارك واولاده 
وكمان حبيب العادلي و6 من مساعديه 
اكاديميه الشرطه وهي مكان المحاكمه كان بها اليوم 
اكثر من 3 الاف ظابط وعسكري 
بالاضافه الي الشرطه العسكريه 
و7 سيارات اسعاف 
ومدرعتين بجوار البوابه رقم 8

اقلعت طائره مبارك المجهزه من مستشفي القوات المسلحه بالمعادي 
الساعه ال8.40  صباحا 
وصلت لاكاديميه الشرطه الساعه 8.55
وصل جمال وعلاء وحبيب العادلي في عربات مصفحه 
الساعه قاربت علي العاشره ولم يعلن عن ابتداء الجلسه 
اليوم كان سوء تنظيم وعدم استعداد 
وكذلك لا مبالاة 
المراسلين الاجانب  - هيئه الدفاع عن مبارك
والصحفيين والاعلاميين  واهالي الشهداء والمدعين بالحق المدني 
كانت لهم جميعا بوابه واحده للدخول وهي بوابه رقم 8
التصاريح كانت متاخره 
وفي كمان تصاريح فوريه 
لم يعلن عن استخراج تصاريح قبل الجلسه الا لقليل 
بدات الجلسه التي لم تستغرق دقائق 
وهي اقصر جلسه في هذه القضيه 
كان يراس الجلسه المستشار مصطفي حسن عبدالله 

 هرج ومرج من محامين المدعين بالحق المدني 
ومطالبتهم باحاله القضيه الي محكمه الثوره 
ولكن المستشار انهي كل هذا بالتنحي عن القضيه 
 لشعوره الحرج وبذلك تنقل القضيه الي استئناف القاهره 
بعد القرار نقدر نقول القاعه بقت سلطه 
قرار لم يعمل له حساب 
يقال ان قراره بالتنحي لانه سيجري جراحه في عينيه 
طيب مافي تاجيل 
ومقوله اخري  انه كبر وقرب يطلع معاش 
مكانوش حيطلعوه الا لما يخلص القضيه 
كتير كانوا مش عايزينه لانه كان قاضي موقعه الجمل اللي طلعهم براءه 
يس هو برضه اللي ادان احمد عز واداله حكم في قضيه الحديد 
وهو كمان اللي حكم باعدام قاتل بنت ليلي غفران 
في الاخر لازم نسلم بان 
قاضيان في النار وقاضي في الجنه   



ده كان حال مبارك واولاده في الجلسه 
دخل الجلسه قاعد مش نايم كالعاده 
وطبيب خلفه 
كان بيشاور لمؤيديه  وروحه المعنويه كانت مرتفعه جدا 
افتكر حاله لما كان رئيس وكان بيتعامل من المنطلق ده 
ولم يقف علاء وجمال امامه لابعاد الكاميرات عنه 
تحس انه حاسس بانتصار 
زي مابيقول المثل 
ياناكر خيري شوف زماني من زمن غيري 
او شفتوا مش قلتلكم يا انا يا الفوضه 
صحته كويسه حتي مش ناسي يصبغ شعره 
لابس شيك جدا والشوز تبعه من غير رباط  وضهرها بيقول انها اول لبسه 
والدبله الدهب والساعه والنظاره  ( السنيه)
وبيوضب هدومه كل شوي 
يعني مرفوع الراس عكس الجلسات السابقه 
لاحظت ان العميد اللي واقف ورا مبارك كان سعيد جدا 
كان نفسي اعرف من ايه ؟
جمال دائم الكلام مع مبارك
اما علاء فاكتفي بالجلوس وايده اليمين مربوطه برباط ضاغط 
ممكن تكون اتلوت وهو بيلعب تنس في بورتو طره 
وتحسه بعيد عن كل حاجه واولها السياسه 
اما جمال فكان دائم الحركه  وبيلعب بصوبعه 
بس مش صوابع عمكم الحاج ابو شيماء 
زي مايكون بيسمع اغنيه وبيدندن بصوبعه مع النغمات 
مش متصوره انها تكون حركه عصبيه لانه كان هادي جدا 
بس ماكانش لابس ساعه 
ممكن ده يدينا ايحاء بان الوقت مش مهم عنده 
بس اكيد لو كان بره السجن كان حيروح يزرع شعر 
لان شعره وقع وده واضح جدا
حبيب العادلي كالعاده رابط الجأش  تحس ان اللي بيحصل مش علي باله 
وكمان صحته تمام التمام 
لابس شيك كالعاده  
بس مش فاهمه ليه اللبان اللي بيمضغوه بعض مساعدين العادلي ؟
منظر مش حلو 
اما البرنس اللي حاطط السيجار وتحس انه متاكد 
او زي مابيقولوا واثق الخطوه هو ديبو
او فريد الديب قاعد يوزع الابتسامات ويكلم ده ويحكي مع ده 
كان في هيئه الدفاع علي مبارك
المحامي الكويتي   فيصل العنتيبي 
وهو من اشهر المحامين في الكويت وابرعهم  


 
خارج الجلسه كان شكل تاني 
اهل شهداء 25 يناير عايزين  حكم  النهارده 
عايزين اعدام 
صور الشهداء كانوا رفعنها 




اما مؤيدي مبارك كانوا منتظرين حكم براءه 
وتنحي القاضي زعلهم جدا 
وكانت لهم هتافات  
شفنا الذل وشفنا العار بعد مبارك الطيار
اللي قالوا علينا فلول خربوا البلد في 6 شهور 
قول يامصري ازي حالك بعد ماسبهالك مبارك 
وكتبوا علي ارض الاكاديميه 
وحشتنا ياريس  

 



ووقعت اشتباكات بين مؤيدي مبارك واهالي الشهداء 
وفرضت قوات الامن حاجزا امنيا بينهم وسط الشارع 
ده اللي حصل في جلسه اليوم 
وبرضه حنقول اسلمي يامصر 
رئيس راح رئيس جه مش ده المهم 
المهم ان مصر هي الباقيه 
واوعوا اوعوا تقلبوا الصفحه 
ابقوا معي