28‏/3‏/2010

عجبت لك يازمن

اعزائي
النهارة الاحد الموافق 28 مارس 2010 الساعه حداشر الا خمسه صباحا
في وسط ميدان التحرير كان واقف ظابط مرور برتبه عميد بيمضغ لبانه
والله شفته واستغربت للمنظر دورت علي كاميرات
قلت يمكن اعلان عن نوع لبان جديد بس مالقيتش اي كاميرات
---
دكتور جودت الملط رئيس الجهاز المركزي للمحاسبات
دارت مناقشه بينه وبين عبدالقوي تحت قبه البرلمان
قال فيها ان نسبة الفقر23% بعد ماكانت 19%
وقال ان 77%من الفقراء يقيمون في الارياف
وقال احصائيه بس اوعوا يغمن عليكم
20% يملكون 80% من الثروةالقومية
وال5% الآشد ثراء تملك 50% من ثروة البلاد
وأفقر 80% من الناس لايملكون الا 20% من ثروات البلاد
---
جودت الملط كان تاعب حاله وبيتكلم في مجلس الشعب
وعبدالقوي كان بيلعب في موبيله بس المره دي مش بوكر لا سوليتير
وبعد ماجودت الملط اتكلم يجي ساعه ونص علي الموزانه
رد عبدالقوي وقال ماينفعش نقارن التفاح الا بالتفاح
والبرتقال الا بالبرتقال
اعتقد اننا حزمه فجل بخمسين قرش حنقارن بايه ياحسره قلبي
---
شيخ الازهر الجديد الدكتور احمد الطيب
قال انه منتظر مبارك عشان يقدم استقالته من لجنه السياسات بالحزب الوطني
وقال في تصريح سابق اذا تعارض وجودي في لجنه السياسات
مع مشيخه الآزهر حقدم استقالتي من السياسات
السؤال
هي الاستقاله محتاجه لرجوع مبارك ؟
علي فكرة انا بحترم الدكتور احمد الطيب جدا
بس حبيت اسال سؤال مش لاقيه اجابته
---
سمحت حكومتنا الرشيده لوزارةالتجارة والصناعة
بأتخاذ أجراءات تبوير 58 فدانا من أجود الاراضي الزراعية
الواقعة بحوض الحجازي التابع لجمعية قرية سرسق
للاصلاح الزراعي بمركز طلخا
في الطريق بين المنصورة وجمصه
اهم شيء ان التبوير
لاقامة مول تجاري لتنشيط التجارة الداخلية
---
أمتي حتنتهي احتجاجات عمال النيل للاقطان والنوبارية
وطنطا للكتان وامونيستو
اعتقد انها مش حتنتهي لان وزارة الاستثمار وقعت عقود مع مستثمرين جدد
سواء مصريين او عرب بس السؤال هنا
هل يوجد بالعقود بند فصل العمال ونقلهم وتسريحهم ؟
وماشاءالله علي الست وزيرة القوي العاملة
تركت كل شيء العمال يتسرحوا يترفدوا يتنقلوا
يروحوا في ستين داهيه
واهتمت بالسفر حول العالم
ونسيت انها كانت وحده منهم واشتغلت وكان عمرها 14 سنه
حسب ماقالت في برنامج تليفزيوني ايام توليها الوزارة
ونسيت ان بفضل العمال كانت ممثله لهم في النقابات العماليه
وهما برضوا اللي وصلوها لمجلس الشوري وبعدهل الوزارة
ياست الوزيره افتكري اللي فات
وبيقولوا من فات قديمه تاه
وعيشوا بقي عيشه اهليكم
---
مصر طالبت الامم المتحدة بالسماح لها
بالاتجار في تماسيح النيل
ويارب ادعوا معايا وقولوا عقبال مايصطادوا
حيتان الساحل الشمالي
---
أغنيه شعبولا الجديده بمناسبه عوده مبارك
مبروك شفاك ياريس وسلامة حضرتك
ده حتي وانت غايب ماحدش برضه سد
مبروك ياريس علي الحفيدة فريدة
بنت الاستاذ جمال
واييييه
اوعوا تقلبوا الصفحه
ابقوا معي

22‏/3‏/2010

حبة فساد ع الماشي

اعزائي
اليوم عقد احمد البردعي مدير بنك القاهرة السابق مؤتمرا صحفيا
وذلك للرد علي ادعاء رجل الاعمال العائد حديثا رامي لكح
والذي اتهمه بالتسبب في تعثرة وتاجير أحدي الشركات الآمنيه
لاغتياله في لندن مقابل 150 الف جنيه استرليني
وكان لكح قد قال ان البردعي دفعها من اموال بنك القاهرة بالاتفاق مع
رئيس الوزراء السابق عاطف عبيد
وذلك لنجاح لكح في انتخابات مجلس الشعب
وكان منافسه هو دكتور عبدالاحد جمال الدين
مرشح الحزب الوطني وصديق دكتور عاطف عبيد
وقال البردعي ان معاملات لكح مع البنك كانت قائمة قبل توليه
رئاسة بنك القاهرة ومشكله لكح لم تكن تعثربل كانت تزوير
وكشفتها هيئات الرقابه وانها هي التي ابلغت عن لكح
ونفي ان يكون قد طلب اشياء شخصية في مقابل التسوية
وسيلجا للقضاء ويتهم لكح بسبه وقذفه
كما ان الحجز علي لكح كان من قبل المحكمة بعد ان اثبتت التحقيقات
من جهة هيئه الرقابة المالية والرقابة الادارية ومباحث الاموال العامة
لان زيادة راس مال الشركات كانت غير حقيقية
وقد اعلنت حين ذاك هيئة سوق المال ان لكح وشقيقه
تلاعبوا علي اسهم الشركات الخاصة به لزيادة قيمتها
بمشاركة شركة الايمان للسمسرة
كما اضاف البردعي ان قانون البنوك رقم 133 المادة 35
تنص علي انه اذا قام المتعثر بالتسوية تحفظ التحقيقات في القضايا
وان ماحدث مع لكح هومن العيوب الخطيرة للقانون
والتي اضرت بالبنوك
وان التعثر ليس جريمه يعاقب عليها القانون
وقال البردعي ان عند توليه البنك وجد 40 عميلا حصلوا علي
ثلاث ارباع محفظه البنك وتعادل 18 مليار جنيه
من اموال المودعين الغلابة
وكذلك 70% من محفظة البنك دون المستوي
برغم من تسجيلها بتصنيف جيد وقد قام بمواجهه العملاء
اما عن عمل تحاليل الدم للعاملين كان بسبب علمه بأن بعض العاملين
يقومون بتعاطي المخدرات في جراج البنك
وفي أخر المؤتمر قال ان لكح يحاول ان يحول القضيه لمشكلة شخصية
لان المحكمة الدوليه استدعته للشهادة في قضية السندات الدولية
التي اصدرها لكح وحصل اصحابها علي حكم ب 120 مليون دولار
وطالب البردعي برفع السرية عن شركات لكح لانه سيلجا للقضاء لمواجهته
برجوكم ماتتعطفوش مع البردعي ولا مع لكح
اتعاطفوا مع الشعب الغلبان
رجوع لكح مصر لاخذ قروض جديدة والسبب هو تسوية القروض القديمة
وكمان ليه في الوقت ده اتفجر الخلاف بين البردعي ولكح
ولما البردعي قال انه لم يبلغ عن لكح ساعتها نسي ان دي اموال المودعين الغلابة
فين الامانه هنا . التستر عن الفساد هو ايضا فساد
ورجال الاعمال اللي اتسجنوا ايام تولي البردعي رئاسة بنك القاهرة
وغلق الشركات والمصانع وقفل بيوت الموظفين والعمال اللي فيها
والله حاجه تضحك فساد بيحارب فساد
انا شايفه ان الحكومه بتعكنن علينا وخلاص
زي ماتكون الاجتماعات اللي بيعملوها عشان يدورا علي سبب يعكنن علي الشعب عيشته
ابتدا من رغيف العيش ومرورا علي ازمه الانابيب وازمه السولار
والدم الفاسد وانفلونزا الطيور وبعدها انفلونزا الخنازير ومنتظرين هبل السمك
وارتيكاريا العصافير
والضريبه العقاريه بتاعه عبدالقوي وغلو الاسعار والبقيه تاتي
ياحرام الشعب الغلبان صابر وساكت
ومصر حملها بقي تقيل
وربنا معانا يقوينا
بس برضوا اوعوا تقلبوا الصفحه
ابقوا معي

20‏/3‏/2010

نور سهاري يكشف ولا يجرحش

أعزائي
بكره مصر كلها بتحتفل بعيد الام
كان يوم 21 مارس من الايام السعيده في حياتي
وعلي قد ما كنت بحبه علي قد دلوقتي مابحمل همه
لان مامتي اتوفت
بدور عليها كل ليله في احلامي وبدعي قبل ما انام اني اقابلها في الحلم
طالما اني مش بشوفها في الحقيقه الا بقلبي وصورتها مطبوعه في عنيه
وبدعي ان ربنا يجمعنا تاني لان الموت فرقنا
الله يرحمها ماكنتش ام وبس كانت صديقه واخت وكل حاجه حلوه
كانت الحياه والامل بعدها كل شيء بقي مر
احلي كلمه ممكن نقولها هي ماما
مافيش حد ممكن يعوضني حنانها ولا لما كانت بتطبطب عليه وتدعيلي
كانت بتفهمني من نظره وانا كنت بفهما بنفس الطريقه
وكنت بعرف هي عايزه ايه بالظبط
كانت بالنسبه لينا كلنا زي نور السهاري اللي بيكشف ومايجرحش
بيتقال لما الاب بيتوفي مات اللي كان الناس بيكرمونا عشان خاطره
انما لما الام هي اللي بتتوفي بيقولوا ماتت اللي ربنا بيكرمنا عشان خاطرها
الحقوا كلكم خدوا رضا امهاتكم واكرموهم
وكل عام وجميع الامهات طيبين وفرحانين ببر اولادهم ليهم
وكل عام وانتم جميعا بخير
وعيد ام سعيد عليكم جميعا
بس اوعوا تقلبوا الصفحه
ابقوا معي

10‏/3‏/2010

فسحه في شارع الحكومه

أعزائي
تعالوا معايا افسحكم في شارع الحكومه
توفي الشيخ محمد سيد طنطاوي شيخ جامع الازهر
عن عمر 82 عاما في مدينه الرياض
متأثر بازمه قلبيه
وقد تم تعينه مفتيا للديار المصريه في 28 اكتوبر 1986
وعين شيخا للجامع الازهر الشريف عام 1996
واثار المرحوم جدلا بين السياسيين والاعلاميين
في مصر والعالم العربي
نظيف رئيسنا حاليا بالنيابه يمكنه تعين شيخ الازهر الجديد
واذا تم ذلك فلن يستطيع مبارك اقالته
لان شيخ الازهر لا يقال
وذلك حسب قانون الازهر لعام 1961
بأن منصب شيخ الازهر بالتعين بدلا من الانتخاب
من سيكون شيخ الازهر الجديد
اهو من الحزب الحاكم او انصار الحزب
---
الداهيه السياسي هنيري كيسنجر له عبارة شهيره وهي
اقرأ اي نص بالعكس فربما كان هذا حقيقه النص
انما نص الحكومه الرشيده بتاعتنا
احنا بقي لا عارفين نقرا فيه ولا كلمه سواء
بالعكس او بالعدل ولا بالورب ولا حتي من فوق ولا من تحت
مش فاهمين ونفسنا نفهم
ياتري حيجي اليوم اللي حنفهم فيه
---
استقبال الشعب المصري للبرادعي في مطار القاهره
استقبال حار بكل معاني الكلمه
استقبال تقدر تفهم منه ان الشعب منتظرطوق النجاة للخلاص
والبرادعي قال نحن مع التغير
ساعدوني عشان اساعدكم
ياريت يكون في أمل
---
دكتور رفعت السعيد في مقابله تليفزيونيه قال
الشعب ممكن يغير التاريخ
وبيقولها بصفته بيدرس تاريخ
وانا اتفائلت جدا بهذه العبارة
---
الماده 76 ممكن تتغير بتصميم الشعب وارادته لكن واه من لكن
حتكون الانتخابات نزيهه؟
هل من مجيب؟
---
محكمه النقض ستعيد محاكمه هشام طلعت مصطفي
ومحسن السكري
والقضيه عادت لنقطه الصفر
وخلعوا ملابس الاعدام الحمرا وبدلوها بالملابس البيضاء
ملائكه رحمه ياخونا
وفريد الديب وبهاء الدين ابو شقه
مشغولين في الفضائيات
واحنا عاملين زي الاطرش في الزفه
مش عارفين مين فيهم اللي اعاد القضيه لنقطه الصفر
ده مش زي صفر المونديال الشهير
---
رفعوا الحصانه عن شوبير
ورفعوا عنه كمان البرامج الرياضيه اللي كان بيقدمها
في قناه الحياة
بس بيعدلوا العده لقناه خاصة بالرياضه
يعني مافيش خسارة رفعوا عنه البرامج والحصانه
ورفعوا عند الشعب المصري الضغط
---
طلب المستشار محمود مرعي وزير العدل
رفع الحصانه عن النائب المستقل طلعت السادات
لتلقيه250 الف جنيه من رئيس مجلس اداره
شركه جنوب الوادي للاستثمار السياحي
لمساعدته في ترخيص من وزارة السياحه لمزاوله نشاط النقل السياحي
ووافقت لجنه الشئون الدستوريه علي طلب رفع الحصانه برئاسه
الدكتوره امال عثمان
بكره حيرفع قضيه عليها وممكن كمان علي مجلس الشعب
---
18 شهر مر علي تنفيذ عقوبات قانون المرور الجديد
بلطجه سائقي الميكروباصات
سلوكيات خاطئه وعدم التزام مروري
ومخالفات سير في الاتجاه المعاكس
وتعاطي مخدرات اثناء القياده
وحودث طرق
طيب السؤال هنا هو خبراء المرور بيعملوا ايه
بيتفرجوا ويشربوا شاي وفهوه ونسكافيه في مكاتبهم
ويتحرق الشعب علي المرور
ماينزلوا يشوفوا شغلهم بصراحه ماشفتش بلد مرورها بايظ زي بلدنا
---
من الواضح ان لاتستقيم العدالة في مجتمع الصفوة فاين الشعب ؟
في الاخر كلنا واعني بها الشعب المصري
بندور في ساقيه اسمها الحياة
مغمضين عنينا وعقولنا
والمرارة بتتراكم علي نفوسنا وبنطلع للامل
وياريت الامل مايكونش سراب
عارفه اني نقلتلكم مود الكابه اللي عندي
بس برضه اوعوا اوعوا تقلبوا الصفحه
ابقوا معي