20‏/12‏/2011

واحد اتنين مصر رايحه فين ؟

أعزائي
مصر رايحه علي فين ؟ مصر في النازل 
مش عارفين بكره جاي معاه آيه ؟
اختلطت الاوراق 
علامات الاستفهام بقت مغطيه كل الاحداث
قريبتي المهمومه بكل الاحداث  وده ممكن لانها عايشه بره مصر 
فبتعاني اكتر مننا لانها بعيده عن الاحداث 
حفكركم بيها هي اللي شاركتني افكار مقال 
وقفه للتامل مع اللهو الخفي  بتاريخ  23 فبراير 2011
هي حزينه جدا من اللي بيحصل كل يوم تكلمني كل ماتشوف 
اي حاجه في الفضائيات وتعلق عليها 
وده  ملخص اللي دار بينا 
----
اللي بيحصل مش في صالح مصر ولا المصريين 
خيام ميدان التحرير لازم تتشال 
لان قاعده الميدان مش حل 
ونشوف حكومه الجنزوري حتعمل ايه 
ننتظر 6 شهور لاننا محتاجين مش حكومه انقاذواحده
محتاجين حكومات للانقاذ السريع والفوري 
الحكومات دي تشتغل قد 10 سنين عشان تعرف تتعامل مع 
مطالب التحرير وتظبط البلد وتحل مشاكلها 
زي توظيف الشباب العاطل  - رفع المرتبات والمعاشات - منظومه التعليم 
الفقر الجهل المرض - تحديد النسل - اطفال الشوارع - العشوئيات - التامين الصحي
وغيره وغيره حاجات كتير 
------
نعتبر ان حكومه الجنزوري  ضيف تقيل 
جه يزورنا واحنا مضايقين منه قلنا ضيف ونستحمله 
يقعد يتعشي  ويمشي  واذ فجأتن اتشاكلنا مع بعض وفضل قاعد 
يتفرج علينا كل اللي عمله انه بقي يهدي فينا 
بالظبط يا ساده يا كرام زي عركه عليوه وعطوه 
------
او ممكن نعتبر ان مصر شركه ورئيس مجلس الادارة  
ملازم الفراش  جابوا واحد من الشركه يمضي الورق
عشان الشغل مايقفش لغايه مايرجع رئيس مجلس الادارة
6 شهور مش كتير . ننتظرواذا ماحصلش المراد 
الميدان جاهز والشباب موجود في وضع استعداد
 ونرجع نقول ان الميدان مش حيعجبه اي وزارة  
لا وزاره الجنزوري ولا وزاره زيد ولا عبيد ولا نطاط الحيط 
والله لو جابولهم نبي يمسك الوزارة  برضه الميدان حيطلع فيه القطط الفاطسه
------
لو كل واحد دخل الميدان حاليا وايام المليونيات دفع جنيه في حب مصر 

وفي اول كل شهر استقطعوا من مرتبات موظفين الدوله خاص وحكومه 
جنيه في حب مصر 
ورجال الاعمال كل واحد يساهم باللي يقدر عليه 
ويتعمل صندوق ونسميه صندوق الثورة 
شوفوا كنا لمينا كام مليون 
كنا عملنا بيهم مشروع كبير يلم الشباب العاطل 
ونمشي عجله الانتاج اللي مش باين لها مشيان 
------
المستثمرين هربوا  علي الامارات وقطر 
والبلدين استفادوا برجال الاعمال ومشاريعهم 
مش كنا احنا اولي بيهم ؟
------
المعتصمين فيهم كتير متعلمين ومثقفين وكمان فيهم قادرين ماديا 
ليه مالموش بعضهم وسافروا لاوربا وامريكا في جوله لتنشيط السياحه 
اللي بتطلع في الروح او ماتت فعلا ولا عزاء للسياح
لان كل طيارات  Charter
اللي جايه في اعياد الكريسماس وراس السنه  اتلغت
الخسارة دي علي مين ؟ 
------
الاحزاب بما لديهم من موارد ماليه  ليه مايساهموش في سفر 
من يجدوهم كفءلهذا
والا هما عايزين المجلس والكرسي وخلاص 
واكتفوا بتوزيع البطاطين والخمسين جنيه 
وازازتين الزيت وكيلو السكر 
------
 الانتخابات مشيت مش بطال  يعني نجحنا في اختبار ال Mock
 واتدربنا علي اننا نقول رأينا ونفهم ونعرف حقنا الانتخابي 
يعني كانت بروفه جنرال 
------
كل اللي بيحصل في الميدان من تجاوزات من تسيب 
وحرق ونهب  وسرقه 
بيقولوا انه بايدي خفيه 
زي ايام مبارك لما كانت بتحصل اي مصيبه في البلد 
كانوا بيقولوا 
ماس كهربائي او مختل عقليا 
------
النهارده سيدات وصبايا مصر اتظاهروا ضد المجلس العسكري 
والانتهاكات اللي حصلت منه في حق المتظاهرات 
 كنت بتفرج علي قناه الجزيرة وهتافاتهم فكرتني 
بفيلم ثورة المدينه اما اهل البلد وقفوا قدام بيت عماد حمدي وهتفوا 
الغازيه لازم ترحل .. الغازيه لازم تنزل 
بس الهتاف هنا كان 
بنات مصر ماتتعراش ياعسكر يا اوباش 
والي هنا ادرك شهرذاد الصباح فسكتت عن الكلام المباح 
واوعوا اوعوا تقلبوا الصفحه 
ابقوا معي

 

هناك 6 تعليقات:

جحا المصرى المصرى يقول...

جحا المصرى المصرى مساء الخير يا خال شفت فعل العيال طب نموت ونندفن وهاتوا الكفن بقى اسمى من محارب قديم وامشى بخطوتى مستقيم استاهل بعد عمرى من ابنى اللطيم دا فعل اللئيم مش جيش مصر العظيم
انت فاكر يا خال يوم ماسمعت الارض هز الجبال
ادارى نفسى فين هاتوا الكفن شامم ريحة عفن
كنا يا خال سباع الارض نحمى العرض زى الارض
فاكر يا خال خط المحال بقى لعبه فى ايد الرجال
تعالى وشوف العرض مجرور على الارض اااااااااااااه
والاه ما تكفى ولو مليت من الدمع كفى
ولو يستر العرض القول تاهت منها العقول
وغضبى سكوتى وسكت يا خال
ادارى من بنتى وشى ولا اختشى
لما تسئلنى مين دول اقول شوية عجول ما فيش عقول

غير معرف يقول...

السلام عليكم
دائما ليلى تطلين علينا بمقالك الجميل والمثير ،، ولأني أعرف محور تفكيرك ،، وأثق غالبا في قدرتك على التحليل ،، فإني أوافقك على معظم ماجاء في هذا المقال ،، ورغم إني متوقف عن التعليق على الأحداث السياسية وذلك لأن الرؤية غير واضحة وضاع الحق واختلط الحابل بالنابل وصارت الصورة غائمة تماما ،، وتاه عقل الحليم والحكيم ،، لكني فقط آخذ عليك مأخذ بسيط هو أنك ورغم خبرتك الكبيرة مازلت تنقلين روايات عن إعلام فاسد مثل موضوع البطاطين والخمسنين جنيه فهذا في تشويه لصورة الكثيرين من شعب مصر فأنا وكثير من أصدقائي المحترمين لم تصبنا بطاطين الإخوان ولا فلوسهم ،، إنما كان اختيارهم عن قناعة بكفاءة كوادرهم من جهة ،، ومن جهة أخرى اخترتهم لأنهم على الأقل لن تكون مصر أسوأ مما كانت عليه في عهد حكم الليبرالية العلمانية ،، لهذا أعطيت صوتي للإخوان رغم أني مش إخواني إنما اخترتهم لأنهم أحسن المعروض في السوق من الآخر ،، أما بقى لو أنك رأيت بنفسك من يوزع بطاطين وخمسين جنيه ،، فأنا زعلان منك ،، كان لازم تقولي لي وأنا أولى برضه أنا أعطيتهم صوتي ببلاش والله ....
عموما خليني أروح أسمع شعبولا وبلاش تنكشيني في وجع القلب ده وإإييييييه
حكيم عقول

د/دودى يقول...

لما كان حد من اصحابنا بقولنا سؤال"هى مصر رايحه فين؟" كنت انا واصحابى نرد "مش تعرف قبل ما تركب"....

بس بعيدا عن الظرافه...

مصر مش تروح لحاجه...مصر محلك سر..احيلنا بتهيألك ان فى حاجه بتحصل بس الحقيقه ان مفيش حاجه بتحصل خالص...بنضرب زى ايام حسنى..بنخسر فلوس زى ايام حسنى..الشباب بيتسجن زى زمان :(((

منجي باكير يقول...

شكرا لحسّ وطني قويّ..

البلد في حاجة الى البناء من كل طاقات ابناءه و ليس الهدم من كل واحد من موقعه .

اللهم احفظ مصر و شعب مصر

مدونة الزمن الجميل يسعدها دعوتك إلى جديدها:مفارقات و احباطات!


*

أشرف العدل يقول...

مصر رايحة الى خير انشاء الله . لا بد من الام المخاض والخروج من عنق الزجاجة .
ولا يتعجل عاقل الاستقرار لان التغير الحاصل كبير جدا .وضريبة الحرية والاستقرار لم تكتمل بعد وعلى كل حاوي ان يفرغ ما في جعبته .ليعرف المشاهدون قدرة الجميع عندما يطالعون النظر في حقائبهم الفارغة 30 سنة من العار لن تكفيها سنة للاستقرار .لا بد من دفع الثمن كاملا قبل التنعم بالسلعة والسلعة غالية من سنين نشتهيها الا وهي الحرية .

elasaala.net يقول...

المخرج هو المجلس العسكري لأنه مسؤول عن اللي بيحصل حاليا لازم المجلس يقول من الطرف التالت اللي صدعنا بيه وإلا برده هو ها يكون السبب في حصول انقلاب سواء عسكري او غيره .... عايز اسأل سؤال المجلس العسكري بأجهزته والمخابرات مش عارفيين انه حاجة ها تحصل في المجمع العلمي .. ومش عارفين مين اللي بيمول ... طيب لو عارفين ليه مش بيقولوا ... ولا دي تمثيلية بيعملوها ... ولا هو ايه بالظبط

محمد الباز

أنا متفق معاكي أنه لازم نهدى عشان الأمور تهدى ونبطل نسخن من المناشيتات اللي بتخرج علينا كل يوم ونفكر نبني البلد وكل واحد في مجاله وكل واحد يساعد باللي يقدر عليه بس مش عارف الجو المحيط مش مناسب ولا احنا اللي غلط .....