27‏/3‏/2009

سلام صعيدي شحط محط لوزارة الثقافه

أعزائي
الاهمال والتسيب وعدم تحمل المسئوليه
كانوا السبب في سرقه ثروتنا من الاثار والتحف والمخطوطات
طالعتنا الصحف والفضائيات يوم العاشر من مارس ببيان
وزارة الثقافه عن سرقه 9 لوحات نادرة
من قصر محمدعلي باشا الكبير بشبرا الخيمة
وقد قام اللصوص بفك اللوحات من براويزها
واكد البيان ان مسئولي القصر قد شاهدوا اللوحات
اخر مره داخل القصر الساعه الخامسه من مساء 9 مارس
عند اغلاق القصر وتسليم مفاتيحه بمحضر رسمي لشرطة السياحة
التي تتولي حماية القصر وتامينه
صوره القصر من الداخل
قصر محمد علي باشا بشبرا الخيمه

****

وقد كانت اللوحات المسروقه في عهدة

مديرة القصر وامينه القصر

وقد نفوا صلتهم بحادث السرقة

****






اللوحات المسروقه

****

كما اكد افراد الامن المكلفين بحراسة القصر

في تحقيقات النيابه

ان مهمتهم تقتصر علي تامين القصر وابوابه

وليس لديهم تعليمات بتفتيش المترددين والزوار

عند دخولهم القصر او الخروج منه

كيف نزعت اطارات اللوحات ليلا في وجود الحراسات المخصصة للتامين ؟

****

افتتح قصر محمد علي باشا الكبير

في 26 ديسمبر 2005

بعد الانتهاء من ترميمه وتطويره

بتكلفه قدرها 50 مليون جنيه

اي مايوازي 9 مليون دولار تقريبا

ليتحول الي مركز للاحتفالات القوميه

والاستقبالات الرسمية لضيوف مصر

بعد ان تمت استعادته من كليه الزراعة

****

ياعالم ياحكومه حتي كارفور بيفتش الناس اللي داخله

وفي وحده بتفتح الشنط الحريمي

خوفا من حدوث اي انفجار

انما القصر تابع لوزارة الثقافه

مال سايب مالوش صاحب

في اختراع يمكن وزارة السخافه

اقصد الثقافه اكيد سمعت عنه هو النظام الالكتروني للحراسة والحماية

****


دكتور زاهي حواس

****
الخواجه حواس المسئول عن حماية اثارنا ومخطوطاتنا وثروتنا من التحف الفنيه

اتحفنا بتصريح بغلق القصر والمتحف الموجود به

امام السياح والمصريين

ونقل جميع ما بالقصر من لوحات وتحف

لمخازن متحف محمد علي بالمنيل

ونقل تبعيه القصر الي قطاع الاثار الاسلاميه والقبطيه

ونقل جميع العاملين فيه وتوزيعهم علي المتاحف الاخري

يا دكتور حواس قرارك اهدر الملايين التي انفقتها الدوله

علي تجديد القصر والمتحف

وبكده بتدمرالمقتنيات النادره بتشونها في قصر المنيل

ياعم زاهي هو مولد وصاحبه غايب والا ايه

الملايين دي مالهاش حساب عندك

والا عشان مش مالك الخاص ماتخافش عليه

في سؤال ليك يا زاهي باشا

ياتري حيتباع القصر لامير عربي

والا حيتحول لمكان حفلات وافراح وليالي ملاح

للناس اللي فووووووق زي قصر المنيل ؟

****

نروح لعمنا الكبير الوزير الفنان فاروق حسني

اللي اتسرق في عهد معاليه اكتر من 600 قطعه أثرية

في اول بيان له بعد الحادث قال

ان اللوحات ليست ذات قيمه لو اتباعت

وبعد ماتم العثور عليها ادلي معاليه

بأن وزاره الثقافة ستقوم باعاده اللوحات الي المخازن المتحفيه

للحفاظ عليها لكونها قيمه تاريخيه

سبحان الله ياربي منكم ومن تصريحاتكم

لما اتسرقت ماكانش لها قيمه

ولما لقتوها بقي ليها قيمه

اللوحات دي يامعالي الوزير عمرها حوالي 150 سنه اذا معاليك ناسي

لسه اللي جاي اقروا

الوزارة ستقوم بعمل نسخ طبق الاصل

لوضعها في نفس اماكنها بقصر محمد علي بشبرا

طيب منين بقي نضمن ان اللوحات الموجوده في المتاحف اصليه ومش مزيفه

والاصليه اتهربت والا اتباعت والا فين هي

******
اللوحات المسروقه بس ماعنديش فكره

دي المسروقه فعلا والا التقليد

يعني مش عارفه ياباني والا تايواني
****

لوحه لمحمد علي من الورق المقوي مرسومه بالزيت


ديبه هانم قادن احدي محظيات محمد علي





الخديوي اسماعيل وهو شاب يرتدي الزي العسكري




الاميره فاطمه اسماعيل بنت الخديوي اسماعيل

الخديوي عباس حلمي



الاميره جشم افت


جنان يار هانم زوجه الخديوي اسماعيل




عزيز باشا عزت
ده غير عزيز باشا الاليت بتاع اخبار اليوم



الامير محمد علي
***
وهنا ادرك شهر ذاد الصباح
فسكتت عن الكلام المباح
وذلك بسبب القهر اللي بتعاني منه
من التصريحات والسرقات والتهليب
وكافه اشكال وانواع الاحباط للشعب الغلبان المستكين
والله حراااااااااام
وعمار ياوزاره الثقافه
وسلميلي ياوزراه علي التروماي
اوعوا حد يسرقكم مني هنا في نظام الكتروني للحمايه

ابقوا معي











21‏/3‏/2009

كلام عن الحب والصداقة

أعزائي
من حوالي شهر كنت قاعده مع صحباتي قاعده صفا
لقيت سؤال بيدور في راسي قلت اسالهم واعرف رايهم
وكمان سالت غير صحباتي
وسالت اصحابي في الروم اللي بدخل فيه في البال توك
*****
السؤال هو
كلنا عارفين ان ممكن الصداقة تتحول لحب
فهل ممكن الحب يتحول لصداقه ؟
تعالوا نشوف صحباتي كان رأيهم ايه الاول

شوشو
--
لا طبعا مافيش حب يتحول لصداقة
الحب حب والصداقه صداقه
****
مني
--
اعتقد ان ممكن الحب يتحول لصداقة . بس مش ممكن
الوحده تحكي لصديقها اللي كانت قبل كده بتحبه علي أي حب جديد
****
جيجي
--
ممكن طبعا في واحد اعرفه بيحب كل شوي وبعدها
حبيبته بتبقي صديقته
لانه بيحب غيرها وهكذا
****
جوليا
--
لا مافيش حب يقلب لصداقه
الحب حب والصداقه صداقه
بلاش نلخبط الامور علي بعضها
****
خديجه
--
لا ماينفعش اللي حبيته يبقي صديقي
****
داليا
--
حب ايه وصداقه ايه يالولا
احنا بنتعود علي اللي بنتجوزه وبيكون ده حبيبنا
****
نيفين
--
لا مش ممكن ماينفعش اصلا نحب وبعدين بقدره قادر يبقي صديقنا
****
نغم
--
حب ايه يالولا هو بقي في ايامنا دي
حاجه ممكن نسميها حب
بس في صداقه وصداقه قويه
بس قديمه مش جديده
انا بشجع الصداقه اكتر من الحب
ودي اراء تانيه
****
دكتور صلاح خليل
---
طبعا كون الصداقة تنقلب الي حب ده موضوع وارد جدا لسبب بسيط
وهو أن كلا الطرفين مادام أصبحوا أصدقاء
فده في حد ذاته معناه أن كل منهما يجد في الآخر بعض الأشياء التي يحبها ويستريح اليها
وأنا كنت أعتقد ولمدة طويلة أنه لا توجد صداقة نقية أبدا بين رجل وأمرأة
ولكنها علاقة عاطفية ، علاقة حب ناقصة، لأن الانجذاب الحسي وارد في جميع الأحيان
وقد يحدث شيء يحوله الي حب بسهولة شديدة
أما أن ينقلب الحب الي صداقة فهذا وارد أيضا
وذلك يحدث عندما يحس أحد الطرفين بزوال الشغف
أو مايسمونه بالانجليزية Passion أي أن الحب تبرد حرارته
ويبدا أي طرف في الاحساس بالملل ويفقد احساسات اللهفة والشوق الي اللقاء
اذن فالتحول من الحب الي الصداقة ممكن ولكنه يحدث بقلة
لأنه غالبا بيكون من جانب واحد والطرف الآخر بيحس انه مجروح
وبالتالي من الصعب ان توجد الصداقة في هذه الحالة
ولكن اذا أحس الطرفان باحساسات مماثلة، فقد يتحول الحب الي صداقة
وأخيرا فانني أعتقد أن الحب الذي يستمر الي الأبد هو خيال أكثر منه حقيقة
لأن الحب مهما استمر، تجيء أوقات ويذهب مع الزمن .
مش عارف أرجو أن أكون أجبت علي السؤال.
****
دكتور احمد الجمال
----
ممكن الصداقه تتحول لحب بس مش مع كل الناس
لانها بتحتاج لنوعيه معينه من الناس
نضوج كامل للطرفين بمعني ان يكون عندهم استعداد لتحويل مسار العلاقه
من حب لصداقه وتكون النيه صادقه
واهم شيء مايكونش الحب انتهي بنهايه ماساويه
او احد الطرفين انجرح
يعني لو وحده حبت واحد وخانها لا يمكن انها تفكر انه يبقي صديقها
او واحد حب وحده وسابته واتجوزت غيره مش حيوافق انها تبقي صديقته
وغالبا بتكون صداقه ناجحه لان كلا الطرفين
بيكون فاهم وعارف تفكير الطرف اللآخر
والله ياليلي عليكي اسئله غريبه مش فاهم بتجبيها منين
****
دكتور محمودالزهار
---
ممكن طبعا ودي بتلاقيها
بين كتير جمعهم حب وزواج وانفصال
بس لازم الانفصال يكون من غير جراح
اما اصحابي في روم البال توك
فكانت دي ارائهم
****

Love_ruby
---
في اعتقادي انه من المحال ان الحب يتحول لصداقة
لان المشاعر بتكون مجروحه والله اعلم
****
Ghezel@
---
فعلا الحب لا يمكن ان يتحول لصداقه
يتحول لقطع العلاقه
****
Ibnzaidon_58
----
ليس لدي رأي لاني لم اجرب الحب
هذا غير اني لم أجرب الصداقة بعد الحب
ولكن أمامي حالتين واقعيتين منهما وحده من أعز صديقاتي
والذي انتهي حبهما الجنوني بالزواج
وانجابهما لطفلين وبعده طلاق
وعاشا سنين طويله اصدقاء حميمين جدا
وهو الآمر الذي يعطي مؤشر واقعي
أن الحب ممكن ان ينتهي ولكن يتطور الي علاقه صداقة قوية جدا
****
Ibrahim_148
----
لكل قاعدة آيه ؟
فممكن في حالات قليلة جدا الحب يتحول لصداقة
لكل قاعدة استثناء ومن الممكن في حالات فريده
يتحول الحب الي صداقه بس صعب
****
x_Sarah_x
---
في احيان كتير ممكن
****
omdet_canada
----
لو كان حب حقيقي مش ممكن يتحول لصداقة صعب

Dr_Zeyazan
----
لا الحب لا يمكن يتحول لصداقة لان ببساطه
الحب علاقه أسمي واعمق من الصداقة وطبيعة الاشياء والاحاسيس
لا تسمح بالارتداد للخلف
****
Ovinus_1
---
صعب اوي ياليلي بس ده يتوقف علي عقليه الاتنين
ممكن لكن في حالات نادره جدا
****
Alaa elkhayam
----
الصداقة ممكن تتحول لحب عن طريق العشرة والتعود
اما الحب لا يمكن يتحول لصداقة ابدا
لكن في أحيان قليلة يتحول الحب مع ايقاف التنفيذ
ويخدع البعض نفسه ويسميه صداقه
انا بسميه حب مع ايقاف التنفيذ مش صداقة الحب مشاعر مختلفه عن الصداقة
ولا يمكن ان نساوي بينهما
****
elrayek
---
مايبقاش حب يبقي تعود
الحب أسمي شيء
الصداقة تتحول لحب في حاله وحده
لما يتجوزا ويبقي عندهم عيال
الحب بياخد شكل الصداقة وبيكون تعود اكتر
ذروة الحب قبل المشاكل والاولاد والرتابه شوي شوي بتقل الذروة
****
Tiger4ever_1
----
مافيش صداقه ممكن تتحول لحب
لكن الحب في بعض الاحيان بيتحول لصداقة
Kamal555
----
لا اعتقد وقد أكون مخطيء لاني شاهدت أمثلة كثيره هنا في كندا
تحول فيها الحب لصداقة
ولكني لا اؤمن بهذا
من تجربه الآخرين ممكن
شخصيا غير ممكن
****


Alaatelb
----
لا عمره .. ممكن الصداقة تبقي حب
اقولك بس ده يتوقف علي شيء الحب م القلب والا حب اونطه
لو حب بجد مستحيل يبقي صداقه تاني
الصداقة احترام بدون تفكير
الحب احترام وتفكير وحرقه وعذاب
ولو ده موجود يبقي الحب موجود
علاء طلب حب ولا طلش
****
gebee_1
----
صعب لان مشاعر الحب الصادق لا تتبدل
ولكن يمكن ان تختبيء في عباءة الصداقة امله ان تطفو
علي سطح الاماني يوما ما
فاذا غرقت في ظلمات الياس قتلت معها الصداقة
****
Maseryyya
----
ممكن لو شراره الحب راحت من الطرفين
بس مازال بينهم الاحترام وده نادر جدا
****
Masryforever2007
-----
نعم يمكن ان يتحول الحب لصداقة
لو تمتع الطرفين بنفسيه سويه


Dr_fox1969_1
----
كل شيء ممكن أذا تحدثنا في منطقة السلوك

والعلاقات الانسانيه

****
BB_SS_5
---
اعتقد من الصعب يتحول الحب لصداقة

وهذا الرأي ليس عن تجربه ولكن عن ملاحظة للواقع

اللي شفته في حياة الآخرين وكذلك يتوقف

علي مفهوم الحب والصداقة لدي ولدي الآخرين

****

Platinum hide
----
انا لا اظن ان كلاهما يمكن أن يؤدي الي الآخر

فالحب والصداقة خطان متوازيان

والا فاننا نعترف ضمنيا أن الصداقه كمعني ومفهوم

يختلف فيما بين الرجل والرجل

وما بين الرجل والمرأة

أنا اتصور ان الصداقة صداقه والحب حب

****

Sona1977_2
----
صعب مهما حاولنا اننا نخليه صداقة

سيظل جزء من القلب ينبض بالحب

رغم كل مظاهر الصداقة في التعامل

الا ان الطرف الآخر سيظل صديق مميز

****
عيش حب الناس وعيش

هشام ابو عيش
----
الحب الصادق الطاهر العفيف القوي

اكيد ممكن يقلب لصداقه قوية العمر كله


Wally
---
طبعا ممكن ان يتحول الي صداقة خصوصا ان كان الحب من الطرفين

اما ان كان من طرف واحد فلن يكون صداقة ابدا

اما بالنسبه لوصفه ان يكون من الطرفين متفهمين لبعض تماما

ومعرفه عيوب ومميزات كل طرف بدليل الحب المتبادل سابقا

والصداقة تعتبر باب مفتوح لمواصله الود ولكن داخل دائرة المودة

وخارج دائرة العاطفة

وذلك الاشتياق من كل طرف للاخر ولكن ليس حتميا ان يكون الشوق طاغيا

وفي النهايه ممكن تكون الصداقة مسكن ل الام الفرقة العاطفية

****
Zezo first
----
الصداقة تتحول لحب ماشي انما الحب يتحول لصداقة مستحيل

الحب ان لم ينتهي بالزواج يبقي فاشل

وفي هذه الحالة لا يمكن يستمركصداقة فقط

****
Blue_hat
---
الصداقة علاقة انسانية قائمه علي الحب

وحب الرجل للمرأة والعكس

أن كان هذا هو المقصود يمكن ان يكون فيه كثير من صفات علاقة الصداقة

كانهما دائرتان تلتقيان حتي انه يمكن ان يقال

أن كثير من الحب يوجب الصداقة

****
Sindbad44
----
من وجهه نظري انا

الحب يتحول لصداقة حيكون دمه تقيل

الصداقة مش حتنجح

****

HOUMOM
----

يمكن للشاويش أن يترقي ليكون ضابط

ولا يمكن للضابط بالمطلق أن يتحول لشاويش

الحب يحوي في طياته صداقة رائعة

****
Lilactulipe
--
صعب جدا اني اكتب بعدكم

ممكن الحب يتحول لصداقة

بس مش النهارده حبيبي وبكره صديقي

بعد ما تندمل الجراح ويعدي وقت يكون كافي

ممكن ساعتها يرجعوا اصدقاء

وبتكون صداقه ناضجه وممكن كل واحد يحكي مع التاني بصراحه

كانه بيحكي مع حاله

انا بشكركم جدا علي الاراء اللي بعتهولي

وبشكركم اكتر علي سرعه استجابتكم

حقيقي حقيقي يابختي بيكم

واوعوا تغيروا الصفحه

ابقوا معي







19‏/3‏/2009

أحبك يا ست الحبايب


أعزائي
يوم السبت 21 مارس اول يوم في الربيع
هو اليوم اللي بنحتفل بعيد الآم
كل عام وكل الامهات بخير
ومبسوطين بالتفاف اولادهم واحفادهم حواليهم
ببعت تهنئه بالصحه والسعاده لكا ام سهرت وتعبت وربت
بس بصراحه هو عيد بيوجع قلوب اللي فقدوا امهاتهم
امي وحشتني جدا وادفع عمري كله
لدقيقه استمتع بحضها الدافيء الحنون
لما كنت في المدرسه الاعدادي عملوا مسابقه لاجمل خطاب
للام في عيدها وكتير منا كتبوا جوابات لامهاتهم
والحقيقه انا اللي طلع جوابي لامي هو الفائز في المسابقه
انا ببعته لامي تاني .. انا حاسه انها معايا في كل وقت
وان موتها مش بعدها عني
الجواب كان بيقول

ماذا اكتب لامي ؟ لمن وهبتني الحياة

ولمن بذلت من قلبها وشبابها واعصابها وعمرها

لتعطني الحياه ولتعطيني السعادة والصحه

مهما كتبت لها لا استطيع او اوفيها جزء من حقوقها علي

أمي الحبيبه يا اغلي مالي في الآيام يا املي ياسندي في الحياة

كل ما استطيع ان اقدمه لك يوم عيدك دعوات بالصحه والسعادة

التي طالما فقدتيها من اجلي

فلطالما سهرتي من اجلي .. لقد اعطيتيني الكثير من صحتك

وراحتك وشبابك لتعطيني الصحه والقوة

فادعوا معي ان يحفظها لي الله وأن يبقيها لي حتي استمد منها القوة

ومن نورها أري طريقي .. ربي احفظ لي أمي

يارب حقق أملها في .. يارب اجعل لي مستقبل عظيم لتسعد بي

يارب احفظها لي فهي يدي اليمني وعيني ونبضات قلبي

هي طريقي المضيء الذي يهديني

فادعوا معي وادعوا لي ان يمد لي الله في عمرها

حتي احقق املها في ان اكون من بناتها الصالحات

وشابات المجتمع الناجحات

ربي أحفظها لي حتي استطيع آن ارد بعض افضالها

ربي اجعل لي مستقبل عظيم من اجلها لتري امي بعينيها

جزاء تعبها وسهرها .. ربس اسعدها فلطالما اسعدتني

أمي يامكافحة يامجاهدة من أجل ابناءك

لقد آن الاوان لترتحين .. فقد اديتي واجبك نحو ابنائك ونحو الله

لقد أخرجتي أبناء صالحين

فلكي منا كل احترام وتقدير وشكر

******

كانت اول وحده شافت الجواب وفاكره انها كانت بتبكي وهي بتقراه

وبعدها ضمتي بحنان

انا مش ناسيه حضنها ولا حنانها ولا عمري حقدرانساه


فادعوا معي بالرحمه لامي

وادعوا لي بالصبر علي فراقها

وياريت الفاتحه علي روحها الطاهرة النقيه
يارب علي قد ما اسعدتنا ترحمها


16‏/3‏/2009

قواعد السعادة السبع


أعزائي
قريت ان دي قواعد السعاده
قلت انتوا كمان تقروها
****
1- لا تكره أحد مهما أخطأ في حقك
2 - لا تقلق أبدا
3 - عش في بساطه مهما علا شأنك
4 - توقع خيرا مهما كثر البلاء


5 - أعطي كثيرا ولو حرمت
6 - ابتسم ولو القلب يقطر دما
7 - لا تقطع دعاءك لاخيك بظهر الغيب

الهم ياعزيز ياجبار اجعل قلوبنا تخشع من تقواك
واجعل عيوننا تدمع من خشياك
واجعلنا يارب من أهل التقوي وأهل المغفرة
ياريت تكرروا الدعاء
وصلوا علي حبيبنا المصطفي صلي الله عليه وسلم
وعلي أله واصحابه تسليما كثيرا
وابقوا معي


12‏/3‏/2009

رساله شكر من السمكه لوزير التموين

أعزائي
سمعت قصه المفروض انها طريفه
هي بس لها مغزي
والمغزي بصراحه يوجع قلبك علي مصر
واللي وصله شعبها الطيب
دي رساله مهداه لوزير التموين
يمكن قلبه يحن ويخفض الاسعار
ولو اني عارفه انه حتي لو قراها قلبه مش حيحن
ويحن علي مين علي الشعب الغلبان واللي الاسر اللي بتكمل الشهر بالعافيه
والا اللي بياكلوا طقه ويجوعوا طقه
بس برضه حيكون في امل ان حالنا يبقي احسن
نقرا القصه
يروي أن صيادا عاد الي زوجته وهو يحمل سمكه كبيره
طالبا منها ان تقليها فاعتزرت الزوجه لانها لا تملك الزيت
(طبعا لان الزيت بقي غالي )
فطلب منها ان تشويها فاعتذرت بسبب اختفاء الرده من الاسواق
(لان الرده رخيصه فبقت شيحيحه في الاسواق )
فطلب ان تطبخها مع الصلصه
فلما عرف ان سعر الطماطم وصل لخمسه جنيه
أخذ السمكله وألقاها غاضبأ في البحر مره أخري

وهنا هتفت السمكه وهي في الماء
تحيا جمهورية مصر العربية
اعزائي ماينفعش اعلق لاني مش لاقيه تعليق مناسب
لو عندكم تعليق مناسب ياريت تكتبوه
وللحديث بقيه

9‏/3‏/2009

الحب في الشمال

أعزائي
نشرت في المدونه العام الماضي قصه كتبها دكتور صلاح خليل
اسمها أحزان الخريف ... كريستي
بس مش اول وحده انشرها لانها نشرت في مجله الهلال الشهريه
لكن القصيده اللي بنشرها اليوم هي اول تجربه شعريه
للكاتب الدكتور صلاح خليل
هو اختصني بالنشر وانا بشكره فعلا علي هذا التخصيص
تعالوا نقرها مع بعض

ونحن في شرخ االشباب
ودعتني الي لقاء
وعندما صاح الطائر الفضي الضخم صيحته
وجدت نفسي بين السحب
حملني الرخ الي بلاد شمالية
بيضاء في الشتاء خضراء في الربيع
والحب في تلك البلاد
يهب مع النسيم
يحدث كالمطر
عربيد كالرياح
عذب كالغناء
حار كالشمس في بلادنا
***
الحب في تلك البلاد ليس كالحب عندنا
الحب عندنا قدر ومكتوب
وقد لايزول مع الزمان
الحب في تلك البلاد كالسراب
كالابحار في الضباب
اذا حدث في المساء
قد يذوب مع الشمس والجليد في الصباح
قد يحدث في الشتاء
ويرحل مع الربيع
أو قد يحدث في الربيع
ويزول مع سحابات الصيف
الحب في تلك البلاد
لا يأتي من القلوب
وحتي اذا خفقت القلوب فهي قلوب عاقلة
ليست كقلوبنا
ولكن الزمان لا يبوح بأسراره
الا بعد فوات الزمان
اغفري لي
هناك نسيتك لزمن
حملتني نسمات شمالية معطرة
الي عوالم وردية وزهرية وبنفسجية وخضراء
الي سموات بيضاء وأرجوانية وزرقاء
في ضوء القمر
حملتني قوارب النسيان
في بحيرا ت من فضة
الي جنات شمالية
زهورها برية
وجنياتها شعورها من حرير وذهب
عيونها خضراء مثل عينيك
أو زرقاء
وأحيانا لا نعرف ألوانها
***
نعم ......هناك نسيتك لزمن
ونسيت معك بلادنا الصفراء
صحراءنا الجرداء
وشمسنا وقيظنا
وسطوة جلادينا
نعم نسيتك لزمن
وأبحرت في بحر الزمن
بقيت في الشمال
حتي جف الرحيق ورحل الشباب
وكشف الزمان عن أسراره
وجاء الخريف
واهتزت مياه بحيرات الشمال الحالمة
وكلت اليدان عن مجاديفها
وأكفهرت سموات الشمال الوادعة
ولاحت فيها طيور شاردة
تحن الي الهجرة للجنوب
وآن الأوان
لرحلة الجنوب
***
ذكرتك بعد عودتي
بالأمس فقط صحوت من حلمي الطويل
أدركت أنك لي
عندما جاء المساء وجلست وحيدا
حبت الي ذكريات لقاء أخير بعيد
تذكرت كلمات قليلة قلتها لي وانا أودعك
تذكرت لمسة خجلة منك علي خدي
وضغطة متخفية علي يدي
لم تكوني تودعيني الي فراق
كنت معي الي لقاء
لقاء قادم لا فراق
فلم يكن الفراق في قاموسنا ولا كلماتنا ولا حتي أثناء غضبنا
وجاء الغدر مني
فاغفري لي
***
ربما لم يبق لنا الا الخريف فليكن
ليكن خريفنا مبرقا يشيع االنور في أرواحنا
والضياء في سمواتنا
والدفء في أجسادنا التي هدها الشوق الي السكينة والرضا
ليكن خريفنا شابا مفعما بالعواصف العذبة والرياح
والبرق والأمطار وقوس قزح
ليكن خريفنا هو كل عمرنا
هو ملاذنا من غربتنا في الزمان
هو مرفؤنا بعد طول ارتحال
ليكن خريفنا هو ربيعنا هو حلمنا هو اسطورةالأيام
لايهم ان كان خريفنا وهما أو حلما أو رؤي
ما يهم أن نكون معا فوق السحاب أوتحت المطر
ما يهم أن نكون معا في قصرنا أو في قارب القرصان
مايهم أن نكون معا وحتي آخر الزمان.
***
ربما لم يبق لنا الا الشيب علي رؤوسنا
ولكن القلب الضعيف لا زال ينبض بالهوي
والفرحة باللقاء لا زالت ترفرف كالعصفور داخل أرواحنا
وبريق الحب لم يزل يشع من عيوننا
وألحان ماضينا لا زالت ترن في اسماعنا
تطربنا وترضينا وتدلل ما بقي من سنين عمرنا
قولي لي أنك لا زلت لي
حبك لي قلبك لي
ليل شعرك لي
عيناك لي
شفتاك لي كلك لي
لاتحزني علي ما فاتنا
فالغد لنا وبعد الغد لنا
الليل والنهار لنا
الربيع والصيف لنا و الخريف لنا
وحتي الشتاء سيكون لنا
اغفري لي جهلي
فلم استطع أن أقرأ رسائلك
اغفري لي صممي
فلم أستطع أن أسمع قصائدك
اغفري لي سذاجتي ورعونتي وضعف بصيرتي
فلم أر انك كنت لي
منذ أول الزمان
وحتي آخر الزمان
فاغفري لي
***
فعلا حلوه وبصراحه يابختها
شفتوا الحب
واقولكم اوعوا تفكروا تقلبوا الصفحه
ابقوا معي

8‏/3‏/2009

شجرة تسلسل نسب الرسول عليه الصلاة والسلام

أعزائي
كل عام وانتم سالمين
بمناسبه المولد النبوي الشريف
ويارب ينعاد عليكم مرات ومرات
تعالوا نشوف شجره تسلسل نسب حبيبنا النبي
عليه الصلاة والسلام

من منا يعرف اسم رسولنا محمد علية افضل الصلاة
بقصد بالكامل غير اللي كلنا بنعرفه
هو محمد ابن عبد الله بن عبد المطلب ابن هاشم بن عبد
بن قصي بن كلا ب بن مرة , بن كعب , بن لؤى , بن غالب , بن فهر , بن مالك
بن النضر , بن كنانةبن خزيمة , بن مد ركة , بن الياس , بن مضر
بن نزار, بن معد , بن عدنان ,ابن أد , بن أد د, بن اليسع, بن الهميسع
بن سلامان , بن نبت , بن حمل, بن قيذار, بن اسماعيل, بن ابراهيم , بن تارح
بن ناحور , بن ساروغ , بن أرغو , بن فانغ, بن عابر , بن شالخ , بن أرفخشذ
بن سام ,ابن نوح, بن لمك , بن متوشلخ , بن أخنوخ,بن يارد , بن مهلا ييل
بن قينان , بن أنوش , بن شيث , ابن آ د م صفى الله
هذا هو اسم ونسب خير البريه صلى الله عليه وسلم
المرجع كتاب (الشجره النبويه في نسب خير البريه)
لمؤلفه الامام جمال الدين يوسف بن حسن بن عبدالهادي المقدسي
(ابن المبرد)
ياريت ترددو الدعاء التالي
لا اله الا الله عدد ما كان وعدد مايكون
وعدد الحركات والسكون
عارفه انكم مش حتقلبوا الصفحه وحتبقوا معايا

4‏/3‏/2009

بابا بيقولك ياعمو انه مش موجود

أعزائي
مقالي السابق اتكلمت عن آثر التليفزيون او برامجه بالنسبه للاطفال
البرامج اللي بتبث فيه بتعلم الاطفال كلام وتصرفات وحركات مش كويسه
وطبعا دي بتكون مسئوليه الاباء والامهات
يعني ممكن يخصصوا وقت معين للطفل يتفرج فيه علي التليفزيون
وتكون البرامج مفيده ماينفعش الاطفال يتفرجوا علي
كليب قبل مانطلع فوق ع الروف نحط النقط فوق الحروف
وماشابه ذلك من الكليبات اللي مش ولابد
الاهل قدوه لاطفالهم بيتعلموا منهم الكويس والوحش
مرات نلاقي الاب يطلب من ابنه الطفل انه يرد علي التليفون
ويقوله لو عمو فلان قوله بابا مش موجود
او الام تقول لطفلها لو طنط فلانه طلبتني قولها ماما نايمه
او الاب يقول للاولاد ماتدخنوش لان التدخين بيضر الصحه
وهو طول اليوم السيجاره في ايده
وكمان بنلاقي الاب والام بيفهموا اطفالهم انهم كانوا من الاوائل في المدرسه
ولما الطفل يحتاج شرح يلاقي لا بابا ولا ماما بيقدروا يشرحوله
الاطفال برضه بيفهموا وبيعرفوا ان بابا وماما كذابين
منين بقي اوائل .. ولو كل الاباء والامهات اوائل مين ياتري كان الاخير
ومين اللي كان بيسقط في الامتحان ويعيد السنه
يبقي مافيش داعي نعمل حركات علي اطفالنا
الاطفال بيتعلموا من الاهل كل شيء
وبنلاقي الخلافات بين الام والاب علي اسلوب التربيه له آثر مش كويس علي الاطفال
مرات الاب يرضي ان الاولاد يروحوا رحله مثلا
تجي الام ترفض وتبقي مشكله بين الاب والام
او الام توافق علي ان الاولاد يروحوا السينما
ويجي الاب يرفض
الاطفال هنا بيتشتتوا وبيبقوا مش عارفين
يحبوا اللي قال اه ويكرهوا اللي قال لا
واللي حيقول لا المره دي المره الجايه حيقول ايوه
لازم التفاهم والاتفاق بين الاب والام علي اسلوب التربيه
كمان الاهل اللي بيوعدوا اولادهم لما تطلع الاول حجيبلك كذا وكذا
ولما الطفل يطلع الاول يطنشوا ويعملوا حالهم ناسين
كده بنعلم الاطفال انهم يوعدوا وعند التفيذ يطنشوا وينسوا
وكمان في اطفال بيكونوا عدوانيين وده من تصرفات الاهل معاهم
يعني لو الاب عود الاطفال علي اسلوب الضرب
الاطفال حينفذوا الاسلوب ده مع زمايلهم

الظاهره اللي ازعجتني فعلا لما كنت في شرم الشيخ

وطلعت الرحله البحريه كان الاكل Open Buffet

وكانت كل المشروبات Frre

كنت في الدور التاني في البوت من دوشه الاطفال

نزلنا الدور الاول اللي فيه المشروبات

انتبهت ان الاطفال المصريين ينزلوا ياخدوا المشروبات

ويطلعوا فوق يشربوها وينزلوا يجيبوا غيرها

وفي اطفال ياخدوا في المره مشروبين علي اعتبار ان في كل ايد مشروب

لدرجه ان المشروبات البارده انتهت واحنا لسه في تلت الرحله

نزل طفل مع مامته وملا نص الكبايه كولا

الام شخطت فيه وقالتله املاها كلها

رد وقالها مش قادر اشرب تاني ياماما

قالتله لا حتقدر وطبعا ملا باقي الكبايه

الام دي نفسها لو في سوبر ماركت وابنها كان عايز يشتري

اكتر من حاجه ساعتها كانت حتوافق والا حتقوله لا حاجه وحده بس

وممكن ماترضاش تجيبهاله

وده عشان المشروبات كانت بالمجان

يبقي الاولاد يشربوا اكتر من احتياجتهم

وكمان الاطفال مارحموش الشاي والنسكافيه

كانوا يطلبوه وبعد ما ياخدوه يرموه لانهم مش متعودين عليه

طب هنا فين رقابه الاهل عليهم ؟

شفت طفل اجنبي نزل مع مامته وقالتله املا نص الكبايه

عمل اللي مامته طلبته وسمع كلامها

نهايكم بقي علي Open Buffet

بيزقوا بعض عشان يلحقوا الاكل والاطفال تزق اكتر من الكبار

العجيب ان الكبار كانوا بيملوا الاطباق بشكل بشع

يعني السلطه علي الرز

علي السمك وفوقها الفراخ واللحمه

طيب ازاي ياكلوا الهرم ده ويستطعموا الاكل وهو علي بعضه ازاي

ماهو الاكل موجود ياخدوا قد احتياجهم

ولما يخلصوا اذا عايزين ياخدوا تاني

ده حتي العين بتاكل الاول

لما الاكل يكون شكله حلو قدامنا ده بيشجعنا علي الاكل

انما علي بعضه كده ازاي يقدروا ياكلوه

الظاهر بياكلوا في اخر ذادهم

او بعد الاكل حتحصل مجاعه

طبعا لما الكبار بيعملوا كده تفتكروا اولادهم حيعملوا ايه

اكيد حيتصرفوا زيهم بالظبط ان لم يكن اكتر

الاجانب كانوا بيتفرجوا وبيضحكوا ومش مصدقين اللي شايفينه

وانا واهلي كنا بنتفرج ومكسوفين م اللي بيحصل

لازم اعاده نظر في التربيه للكبار قبل الاطفال

توعيه بكيفيه التربيه السليمه

المدرسه مش بتربي المدرسه بتعلم

الاهل هما اللي عليهم مسئوليه التربيه

اي حد ممكن يخلف اطفال

انما السؤال اي حد ممكن يربي الاطفال تربيه سليمه ؟

حقول ايه اكتر م اللي قولته

ابقوا معي واوعوا تقلبوا الصفحه