30‏/10‏/2011

بلد الاعتصامات

أعزائي 
كل عام وانتم جميعا بخير لقرب عيد الاضحي 
اعاده الله عليكم جميعا باليمن والبركات
اعتصامات كتير لدرجه اننا مابقناش عارفين مين معتصم 
ومين بيفكر بالاعتصام ومين  مش حيعتصم 
المصرية للاتصالات اللي شعارها اتكلم ارضي يابن بلدي 
الموظفين والعمال معتصمين دخلوا الاسبوع الثالث 
مطالبهم اقاله  المهندس عقيل يوسف وبطانته 
---
تزايد عدد معتصمي الشرطه من الامناء والافراد 
لليوم الرابع علي التوالي 
وهددوا بالاضراب العام وكانت هتافتهم 
الحق ياوجدي .....عيسوي زي العادلي 
ومطالبهم هي التدرج الوظيفي والترقي حتي رتبه الظابط 
ومنع احالتهم للمحاكمات العسكرية في المخالفات الانضباطية 
وتسهيل ترخيص السلاح الشخصي لهم 
وتسليحهم اثناء الحملات والمؤمويات والنوبتشيات
طلبوا تدرج وظيفي يعني العسكري يبقي لواء 
ومدام حيكون كده يبقي بلاها كليه الشرطه  واللي عايز يدخلها ياخدها 
من قيصرها ويشتغل عسكري  ماهو في الاخر حيبقي ظابط 
والامناء يصرحلهم بترخيص سلاح خاص عشان تبقي كملت 
ويعملوا في الشعب اكتر من اللي كانوا عاملينه ايام المخلوع 
الظاهر افتكروا انهم دبلوماسيين لان سعاد حسني غنت وقالت 
مايكونش امين شرطه اسم الله والا دبلوماسي 
ولسه في عجايب في الدنيا 
---
اليوم في وقفه احتجاجيه للمعلمين للمطالبة باقاله 
دكتور احمد جمال الدين موسي وزير التربيه والتعليم 
وطالبوا بالكادر الوظيفي وحد ادني واقصي للاجور 
---
مازالت الاحداث مشتعلة بين القضاة والمحامين 
بعد احداث الجمعية العموميه للقضاء 
واطلاق الاعيره الناريه من بعض القضاه علي المحاميين
واصابه محامي في وجهه ور اسه 
وطالبوا اليوم باحاله القضاه الذين اطلقوا النار الي المحاكم العسكريه 
وكان هتاف المحامين كالتالي
ياللعار ياللعار .... حتي القاضي بيضرب نار 
القضاة اصبحوا بلطجيه ... ضربوا النار علي الثورجية 
قوللي ياقاضي قوللي يابيه .المحامي عمل ايه .عشان تضرب نار عليه 
طيب والنبي نعمل ايه لا شرطه تنجدنا ولا قضاة ينصفنا 
كما اصدر المستشار عبدالمعزابراهيم رئيس محكمه استئناف القاهرة 
قرار باخلاء دار القضاء العالي 
وتعليق العمل بالمحاكم 
ياصلاة النبي
الشرطه وحلناها باللجان الشعبيه 
طيب القضاة نستبدله بايه ؟
---
تقدم المستشار مصطفي حسين عبدالرحمن  القاضي بطلب الي 
المستشار عبدالمعز ابراهيم رئيس محكمه استئناف القاهرة 
في نظر الدعوة المقامه لرد هيئه محكمه جنوب القاهرة 
برئاسة المستشار احمد رفعت في قضيه محاكمه المخلوع 
واسم النبي حارسهم اولاده جيمي ولو لو 
وانتيمنه الهارب  رجل الاعمال سونه 
والعادلي ومساعديه 
لانها استشعرت الحرج في مباشرة الدعوة 
وقبل الطلب المستشار عبدالمعز وسيتتحد  دائرة لردالقاضي 
كله تاخير في المحاكمه مش كفايه اننا رجعنا تاني لنقطة الصفر 
يدينا ويديكم طولت العمر لغايه ماتخلص المحاكمه 
ده لو في محاكمه في الاصل 
الله غالب 
---
45 عماره بمشروع بيت العائلة في 6 اكتوبر 
استولي عليهم مسجلون خطر بلطجيه يعني 
وبعد حرب جديد سميت 6 اكتوبر برضه
40 سيارة آمن مركزي مصفحه 
6 مدرعات تابعه للقوات المسلحة 
20 سياره شرطه 
 ومئات من افراد الشرطه والشرطه العسكرية
نجحت قوة من الجيش والشرطه واللجان الشعبيه 
وتم اخلاء 891 شقه 
وبادرت المجموعات المستوليه علي الشقق باطلاق زجاجات الملوتوف 
والحجاره كما استخدمت الشرطه قنابل مسيله للدموع 
وطلقات في الهواء
والحمله مستمرة لاخلاء باقي الوحدات 
وقررت الداخليه تعين حراسه علي الوحدات التي اخليت 
ماليش نفس اعلق 
او ممكن خايفه من البلطجيه يرموني بوحده مولوتوف يالله السلامه 
---
الفلسطينيين بادلوا جلعاد شاليط 
اسمه مكعبل خالص 
بحوالي 1000 آسير فلسطيني 
مصر بقي دمها خفيف خالص 
بادلت الجاسوس الاسرائيلي ب 25 آسير مصري 
من 80 آسير 
مع انها كان ممكن تسترد كل الاسره المصريين 
انما نقول ايه كريمه يامصر
والنبي لو انا اللي كنت بفاوض كنت حجيب نتيجه احسن من دي 
---
خبر كوميدي 
اعتصامات امناء الشرطه تسببت في تاخير سفر 
وزير الداخليه لمدينه آسنا للعزاء في زوجه عمه 
وطبعا طبعا كل القبادات الامنيه حتشد الرحال علي آسنا 
لتقديم واجب العزاء في زوجه عم الوزير 
ياريت اللي رايح يجيبلنا عدس من آسنا لانها مشهوره بيه 
وتفنكروا زوجه عمه تكون كام سنه ؟
---
مجلس العسس نفي صلته بحمله ترشيح المشير الامير 
قال انه لا علاقه له بائتلاف مصر فوق الجميع 
الذي دعا الي ترشيح حسين طنطاوي رئيسا للجمهوريه 
كاد المريب ان يقول خذوني 
---
الفريق احمد شفيق حيترشح في اانتخابات الرئاسه 
السؤال هنا بيقول هو والبلوفر ؟ والا رئيس الجمهوريه لازم يكون فورمل ؟
وبكده يبقي حيتخلي عن البلوفر خساره حقيقي 
---
الخساره الحقيقيه انهم قفلوا باب الترشيح لانتخابات البرلمان 
قبل ما اترشح بس بقكر اترشح في انتخابات الرئاسه 
واكيد البالتوك حيدعمني هو طنطاوي احسن مني والا ايه
-----
اخر حاجه بدعو جميع رواد البال توك اللي اسمهم  لونه اسود 
اننا نعمل وقفه احتجاجيه عشان يصبغوا اسامينا بالازرق 
او الاخضر ولاسيما الموف 
طبعا انا صاحبه الفكره يبقي انا صبغتي موف 
-----
حقول ايه تاني  الا ان السبب في اللي بيحصلنا 
ان الخير اختلط بالشر ..والابيض بالاسود ..والدين بالسياسه
---
كده كفايه حروح اخد دواء الضغط 
كل عام وانتم بخير وعيد سعيد عليكم جميعا 
واوعوا اوعوا تقلبوا الصفحه 
ابقوا معي


17‏/10‏/2011

وعد

أعزائي
المقال السابق  أهل الذمه كان له نصيب كبير من الجدل 
مابين معترض وموافق ومن وقف علي الحياد 
بشكر كل المعترضين والموافقين واللي واقفين علي الشط  
بيتفرجوا علي السمك
قريت شعر عامي هو نقدر نقول انها نصوص عامية 
باسم ابوك في الحزب  
الناشر هو مدبولي الصغير 
والشاعر هو يوسف المنيلاوي 
 حفيدالشيخ يوسف خفاجي المنيلاوي
الكتاب معاه سي دي بكل النصوص الموجوده في الكتاب 
بصوت الشاعر يوسف المنيلاوي
النص بعنوان وعد 
تعالوا نشوف يوسف المنيلاوي الحفيد بيوعد مين 
وبيوعد بآيه
---
وعد اني اعيش ليكي
واحني الارض تحتيكي 
واكون عاشق تراب ولهان ..
امدد راسي فوق الحجر
واصلي تحت رجلك فجر
وادعي لربنا يصونك 
واكون عونك 
علي المماليك وفرعون ..
واغنيلك ..
ولو ميلتي .. راح اشيلك 
علي كتافي ..
وادور بيكي ..
وانا الحافي !
وازين توبك المنقوش
وانسيكي زمن قراقوش ..
واحكيكي وانا تعبان
رواية حب ..
بحر حنان ..
واجيب سيرتك في كل مكان  
وارسم صورتك الحلوه ..
علي الوجدان ..
واكون انسان ..
واصلي ..
اصلي لربنا الواحد
في أي مكان 
ف ايد انجيل ..
وايد قرأن ..
وارتل 
ارتل بعد كل أدان
بأي لسان ..
واكون طاهر ..
واتوضا لصلاة باكر
واقرا الفاتحة ف القدس
واتشاهد مع الاجراس ..
وأحب الناس واتسامح ..
ونحرس كلنا بابك 
تكون قبلتنا محرابك ..
ونتكاتف ..
نتكاتف يزيد خيرك 
وشيخ لازهر يصون ديرك 
ونعبد ربنا ف نورك
بحرية ..
وعدل ونخلص النية .
وعد اني أكون طينك
واكون نخلك واكون 
نيلك ..
ونبنيلك في السما غيمة
تظلل كل اولادك 
بترنيمة ..
ونرقي بسورة الرحمن  ..
ونبقي كلنا خلان 
نعيش اخوان 
تعودي منارة زي زمان 
ويرجع مجدنا تاني .
------
الله عليك يامنيلاوي ياحفيد 
الله علي وعدك وعهدك لحبيبتنا كلنا ونور عنينا  
مصر امنا
طبعا مش معقول اكتب اي حاجه بعده 
ده حتي يبقي عيب  اطلعكم من المود الجميل
اوعوا اوعوا تقلبوا الصفحه 
ابقوا معي

13‏/10‏/2011

أهل الذمه

أعزائي


كانت مقدمه المقال غير كده امبارح كنت في روم علي البال توك 
وكان التوبك علي احداث ماسبيرو
او بالاحري علي الفتنه اللي شايفنها حاليا 
واحد من اليوزراستفذني جدا لانه كتب علي التكست ما معناه 
ياريت المسيحيين  يسيبوا مصر ويمشوا
انا بقول ان عيب علينا اهل الذمة دول في رقبتنا 
الذمه معناها العهد والضمان والآمان
يعيشوا في حمايه الاسلام وفي كنف المجتمع الاسلامي 
وعهد الذمة يعطيهم حقوق المواطنين والالتزام بالواجبات
فين راحت الوحده الوطنيه 
المجلس العسكري بيهاحم متظاهري ماسبيرو بدل مايحميهم 
نسينا ايام التحرير ماحسناش بالفرق ده 
المسيحي  كان بيصب الميه لوضوء المسلم 
ماكانش في فرق بين دم المسلم والمسيحي لان كلهم شهداء
لانهم شركاء في الوطن وليس مواطنين درجه تانيه 
انا بفكر اللي عارف وبعرف اللي مش عارف 
جامع  ابن طولون  صممه القبطي سعيد ابن كاتب الفرغاني 
عام 263 هجريا 
مسجد السيده نفيسه صممه المهندس المعماري المسلم محمد صالح مكيه 
مع المهندس كواد ديزين  من الاسم مفهوم ديانته 
يعني لا اول اسمه محمد ولا احمد ولا اخر اسمه مهدي 
 المتحف المصري صممه المهندس الفرنسي مارسيل دور نو
وده مسيحي مش مسلم ولا اشهر اسلامه 
قصر البارون القصر الاثري صممه الكسندر مارسيل 
وزخرفه جورج لويس كلود 
لو حد حيقول القصر ده بناه البارون ادوارد امبان 
حرد واقوله مبني في مصر الجديده يعني في القاهره 
واخيرا برج القاهرة تصميم المهندس نعوم شبيب 
والامثله كثيره
اللي بقصده اننا متعايشين مسلم ومسيحي جنبا لجنب 
وكمان مش لازم ننسي ان علاقه سيدنا محمد عليه الصلاة والسلام 
مع اخونا الاقباط امتازت بالمسامحة وكان التعايش السلمي بينهم
وعندما قدم وفد نصاري نجران باليمن علي سيدنا رسول الله 
عليه افضل الصلوات 
وكان الوفد يضم سادتهم وكبار المطارنة والقساوسة 
احسن الرسول الكريم استقبالهم وتناقش معهم في آمور الدين 
ولم يجبرهم علي الاسلام ولكن أمنهم علي ارواحهم واموالهم وكنائسهم 
وعادوا الي بلادهم سالمين امنين 
وقد قال القرآن الكريم 
بسم الله الرحمن الرحيم 
ولتجدن أشد الناس عداوة للذين آمنوا اليهود والذين آشركوا 
ولتجدن أقربهم مودة للذين آمنوا الذين قالوا أنا نصاري
ذلك بآن منهم قسيسين ورهبانا وانهم لا يستكبرون 
صدق الله العظيم 
( المائده 82 )

قال رسول الله صلي الله عليه وسلم 
من أذي ذميا فقد آذاني 
ومن آذاني فقد آذي الله 
رواه الطبراني في الاوسط باسناد حسن 

وحديث عبدالله ابن عمرو رضي الله عنهما 
عن النبي صلي الله عليه وسلم 
من قتل معاهدا لم يرح رائحة الجنه 
وان ريحها توجد من مسيرة اربعين عاما 
( رواه احمد والبخاري )

واخيرا قال الرسول الكريم صلوات الله عليه 
من آذي ذميا فانا خصمة
ومن كنت خصمة خصمته يوم القيامة 
( رواة الخطيب باسناد حسن )
دي سماحه الدين الاسلامي ياتري المجلس العسكري سمع عنها 
 ----
دكتور حازم الببلاوي وزير الماليه قدم استقاله فردية 
وده لانه شاف انه مش قادر يحقق اي حاجه للشعب المصري 
اقول زي الفرنسيين مابيقولوا شابوه 
وممكن اقولها بالتركي  تشكرات افنذم 
-----
هو مش احلي م الشرف مافيش قال انه سيتخله عن منصبه 
اذا فشل في مهمته هو لا سمح الله فاكرانه نجح في المهمه 
بيضحك علينا والا علي حاله باين لحس كلامه 
هو كان بيقصد يحقق ايه بالظبط لسه فاضله حاجات خا صه لم تتحقق بعد 
هو باين عايزها ارتجاليه مش انتقاليه 
معليش ياجماعه اصل المجلس العسكري نسي يديله كرسي تيفال 
مش بيلزق 
-----
بحضور الجيش والشرطه ورعايه السيدالمحافظ تم املاء شروط علي خادم 
كنيسه المريناب
منها عدم وضع صلبان وبناء قباب لعدم استفذاذ المسلمين
اشمعني بقي فيه استفذاذ دلوقتي وماكانش موجود من سنه 1940 
لما اتبنت الكنيسه
علي فكره الكنيسه مرخصة وارسلت الكاتدرائيه الملف للمجلس العسكري 
وكمان دي مش مضيفه زي ماقال السيد المحافظ 
المضيفه مش بيكون فيها هيكل 
-----
يبقي قياسا علي كده باناشد المسئولين اللي بينادوا بعدم الاستفذاذ
يحرقوا عربيات الاسعاف اللي عليها الصليب الاحمر 
الطيارة الورق تبع الاطفال اللي بيطيروها في الجو 
مصنوعه فوق غاب علي شكل صليب 
نحرق طيارات الورق وبلاش الاطفال يلعبوا بالطياره الرخيصه
خليهم يلعبوا بلاي استشن لاننا بلد غني بما فيه الكفايه 
وعلامه + نلغيها من الحسابات ونستبدلها ونكتب كده
1 زائد 1 = كام يامسئولين نسينا كل حاجه 
مش انتوا اللي بتحكموا يبقي انتوا اللي تقولوا
 -----
البداية كانت كنيسه صول  ويارب تكون النهايه كنيسه الماريناب
-----
نداء للمجلس العسكري 
اين انتم مما يحدث لاقباط مصر ؟
لماذا حرق الكنائس وهدمها ؟
اين حرية العبادة ل15 مليون مسيحي مصري ؟
-----
صلاح جاهين رحمه الله عليه قال 
من ارضنا هل الايمان والدين 
عيسي ومحمد ثورتين خالدين 
----- 
كفايه كده صح الكلام 
بس اوعوا اوعوا تقلبوا الصفحة 
ابقوا معي

6‏/10‏/2011

اعتصامات ومظاهرات وحاجات ومحتاجات

أعزائي
حاولت بكل ما امتلك من قوة اني ابعد عن السياسه
ابطل ادمانها بس والله ماقدرت
كان نفسي ابعد عنها  بطلت اقرا الاخبار وبطلت الفيس بوك كنت بدخل العب جيم
بطلت اشوف برامج التوك شو
وادخل البالتوك اتكلم في اي حاجه هايفه
او اسمع اي هيافه. او ادخل مايسمي رومات السونجات
يعني ادخل اسمع اغاني دخلت بس ماقدرتش
وتاني تاني تاني رجعت لوجع القلب تاني
وده باختياري او غصب عني المحصله النهائية هي عودتي للسياسه
---
السؤال اللي بيلح عليه مرارا وتكرارا وفي الرايحه والجايه هو :-
احنا رايحين علي فين ؟ او بالاحري مصر رايحه علي فين ؟
اكيد السؤال ده كل واحد ساله لنفسه وسال اللي حواليه
فين راح الامان والاستقرار؟
مصر حتبقي علمانيه ؟والا مدنية؟ والا سلفيه؟ يمكن اخونجية
كلها رايحه في المهلبية والا الطعمية ويمكن الملوخيه بالتقليه
---
المظاهرات اخرتها ايه ؟
الفضائيات الممولة برضه اخرتها ايه ؟
المجلس العسكري بيعمل ايه ؟
ولا حد فاهم حاجه ممكن اعرف هو مع مين وضد مين ؟
والا مع الكل ضد الكل ؟
زي مابيكتبوا علي محلات الترزيه تاجر وترزي
بيشتغل علي الوشين
---
مين رئيس الجمهوريه الجاي؟
عايزين زي  الحكاوي اللي كانوا جدتنا بيحكوهالنا واحنا اطفال
ان ست الحسن والجمال  اللي هي مصر جالها
فارس علي حصان ابيض وخطفها  
يكون بيحبك وبيحب اهلك وبيتقي ربنا في شعبك
ياتري حنلاقي !
---
طيب يا اهل مصر هي الكورة مع مين ؟ في ملعب مين ؟
المحاكمات طولت اخرتها ايه ؟
الاضرابات مقابل الطلبات يعني بالعربي كده
سيب وانا اسيب
---
أمن مصر في خطر طول ما الوزراء لابسين البدل الواسعه
واولهم رئيسهم احلي م الشرف مافيش لابس البدله الواسعه
يجي كده بنمرتين تلاته ولو قلت اربعه والنبي مش حكسفك واقولك تمام يافندم
واعظملك واقولك الله الموفق
حكومه عمنا شرف ضعيفه جدا عايزه مقويات وفيتامينات
في دواء بيرفع المناعه ممكن الحكومه تاخده اسمه
SINGULAIR
---
طيب حيلغوا كامب ديفيد ؟ لا مش حيلغوا
احنا باين عايشين اغراب علي ارضنا طول مافي يافطه بتقول
ممنوع الاقتراب والتصوير
وفي صندوق اسود ممكن لو البلد وقعت نفتحه عشان نعرف في ايه ؟
---
مجلس العسس بيتشرط علينا 
ينهوا الطواريء بشرط استقرار الاوضاع
زي ماتكون الاوضاع دي في جيبنا
الاستقرار ده بقي ان شاءالله امتي ؟
هو استقرار الاوضاع شغلهم والا شغلنا يعني نستقر مننا فينا
---
حتي ياحرام الاحزاب بقي فيها انشقاقات 
بعد بيان العسكر واتهام بعضهم لبعض بالتنازل عن حق الشعب
والله الشعب بقي غلبان لا عارف يروح ولا يجي
راكب التوك توك وبيلف وخلاص
---
وكمان استنوا ده العسس قاعد ومربع ومريح
لغايه 2012 ياتري ده من ايه عدوي والا فيرس
---
المشير الامير زار وسط البلد قالوا ده بيتقرب للشعب عشان عايز
يركب الحصان الابيض ويخطف ست الحسن مصر
ده افتراض وارد وفي افتراض تاني الا وهو
يكون بيجس نبض الشارع بعد الشهاده اللي كانت في صالح المخلوع
---
الشعب لو اتظاهر 30 سنه كمان قدام مجلس العسس
مش حيتحرك اصله خارج نطاق الخدمة
ويمكنكم معاوده الاتصال في وقت لاحق بعد 30 سنه
---
جامعه عين شمس فيها مظاهرات ضد رئيس الجامعه
جامعه طنطا برضه مظاهرات  لاقاله رئيس الجامعه
جامعه الاسكندريه مواصله الاضرابات
الحاصلين علي الماجستير والدكتوراه في وقفه احتجاجية
للمطالبة بالتعين في الجامعات
---
اهالي الدويقه اتظاهروا مطالبين بالحصول علي وحدات سكنيه كوعد الحكومة
بعد انهيار منازلهم منذ اكثر من عامين
---
الموظفين المؤقتين بوزارة الموارد المائيةوالري
اغلقوا شارع القصر العيني للمطالبه برفع اجورهم
---
العاملين في مركز تحصيل كهرباء المعادي اعتصموا احتجاج
علي اعتداء ظابط من العسس علي آحد موظفي المركز
واستخدم الفرفر الميري وضرب الموظف علي راسه
بس الراجل الحمدلله مامتش ولا راحت جثته الطب الشرعي
وطلع التقرير وقالوا هبوط في الدوره الدمويه
---
اخونا الاقباط بدوا مسيرة من منطقة دوران شبرا لمبني الاذاعة والتليفزيون
في ماسبيرو وقطعوا طريق الكورنيش
ويطالبون بانهاء اجراءات بناء كنيسة ادفو التي تعرضت للتحطيم
واقالة محافظ اسوان
---
موظفي هيئة النقل العام علقوا اخيرا الاضراب
حتي ديسمبر القادم ومستمرون في المطالبة بحقوقهم
اما العمال الرافضون لتعليق الاضراب
نقلوا اعتصامهم لمقر الادارة المركزية بمدينه نصر
والمتضرر هو المواطن البسيط او في قول أخر
الغلبان اللي مش بيقدر يركب ميكروباص او تاكسي
لضيق ذات اليد
---
وقفه للصحفيين امام النقابه احتجاجا علي الرقابة العسكرية للصحف
ودعوه لاضراب شامل في الاول من نوفمبر
---
كل مصر يا في اضرابات يافي اعتصامات
لا في شغل ولا عجله انتاج ولا اي حاجه كله معتصم
الي متي ؟
---
بفكر اعمل اضراب وابطل اكتب طبعا كتير منكم حيقولوا ياريت نخلص منها
انما ابدا مشاغبه ابديه  اشمعني مبارك قعد علي قلبكم 30 سنه
انا برضه يحينا ويحيكم قاعده علي قلبكم انا حلاقي احسن منكم يستحملوني
---
اخر حاجه قال ايه ياساده ياكرام
وزير الماليه بيقول
مصر لن تتعرض للافلاس
يرد عليه وزير القوي العامله ويقوله
مصر علي وشك الافلاس
بالله عليكم نصدق مين فيهم  
---
النهارده 6 اكتوبر كل عام وانتم بخير بمناسبه مرور 38 سنه
علي العبور العظيم
اول سنه من غير المخلوع  . ماحدش حيقوله اخترناك اخترناك
حنقوله
خلعناك وخلعناك
 وحبسناك وحبسناك 
بقول ايه كفايه عليكم كده النهارده
واوعوا اوعوا تقلبوا الصفحة
ابقوا معي