30‏/12‏/2008

عام سيرحل وآخر سيجيء








أعزائي
بعد ساعات سيطل علينا عام 2009
وفي المناسبه الحلوه دي بهنيكم جميعا وبقولكم
كل عام وانتم سالمين
وادعوا الله ان يحقق كل احلامكم وامانيكم
حنقابل العام الجديد بالشموع والورود والعناق والقبلات
زي الصور بالظبط
وابقوا معي واوعوا تفكروا تغيروا المحطه




29‏/12‏/2008

العام الهجري الجديد







أعزائي
النهارده اول العام الهجري الجديد
كل عام هجري جديد وانتم جميعا سالمين
وماتنسوش تصوموا التاسع والعاشر من المحرم
وبدعي انه يكون عام سلام علي الجميع
وتنتهي الحروب ولو سنه مرتاحين من غير مشاكل
ادعوا معايا وقولوا امين
وابقوا معي



26‏/12‏/2008

تلاميذ موديل 2008








أعزائي
النكت فعلا تضحك بس بعد مانضحك حنكتشف تدهور حاله التعليم
مش في مصر بس انما في العالم العربي كله
التلاميذ بيروحوا المدارس عشان يمزحوا ويقضوا وقت وخلاص
تفتكروا الخلل هنا من المدرسه والا من البيت ؟
انا بقول ان الخلل في الاتنين
مش حوجع راسكم علي آخر العام
بس حرجع تاني للموضوع ده
شوفواالتعريفات دي يمكن نستعملها
ماحدش عارف حنوصل لفين
Learn English The Egyptian Way
------
مكتب المراجعات
‎ Vomit office
مقبلات
‎Kissers

لم أهرب قط
‎I never escaped a cat

يتقبل
‎ To be kissed
السلطة المطلقة
‎ Divorced salad

خطر على بالي
‎ Danger on my mind

لا يمت لي بصلة
‎ He does not die to me an onion

كفيل
‎ Like an elephant
إنه أُمي
‎ He is my mother

حقك علي
‎ Your price on me

خليها على حسابي
‎ Keep it on my mathematics
سعيد كتب كتابه على فيفي
‎Happy wrote his book on In In

دستور يا أهل الدار
‎Constitution home parents

قدر ظروفي
‎ Evaluate my envelopes
ظروف قاهرة
‎ Cairo envelopes
راحت عليك
‎ She went on yo

أنا أدفع الحساب
‎ I push the mathematics
مش لاقيه تعليق ينفع
غير ابقوا معي



25‏/12‏/2008

انتبهوا ايها الساده.. مستخدمي شبكه الانترنيت

أعزائي
طبعا كلنا الاسبوع اللي فات عانينا من قطع الانترنت
مش احنا بس كمان البنوك .. البورصه .. هيئه الاتصالات
الجوازات ..حتي المصالح الحكوميه
المره الاولي كانت في اول عام 2008
علي ما اعتقد ان لم تخونني ذاكرتي كانت في فبراير
رجع تاني انقطع الاسبوع الماضي يعني اول العام وآخره
السؤال هل القطع متعمد والا كان حادث عرضي او محض صدفه ؟
حاله شلل تام لمصر وبعض البلاد العربيه وباكستان وجزء من الهند
اكيد كلنا حسينا اننا منقطعين عن العالم او منعزلين
كلنا مقدرين اهميه الانترنيت
سامي البشير المرشد مدير مكتب تنميه الاتصالات في الاتحاد الدولي للاتصالات
صرح في مارس 2008 وقال
ان فكره وجود عمل تخريبي جري امر ليس مستبعد
لاسيما ان انقطاع خطوط الاتصالات البحريه الاربعه في البحر المتوسط
والخليج العربي بفوارق زمنيه قريبه جدا آمر يدعو للشك
واضاف ان قطع الخط البحري عن طريق الخطأ خاصه وان الخطوط تقع
علي أعماق بعيده تحت البحر ولا تطالها السفن .
وصرحت صحيفه ( اميركان كرونيكل ) في اوائل فبراير 2008
ان انقطاع الكابلات جاء ضمن سباقات مختلفه لتهيئه منطقه
الشرق الاوسط لسلسه من الحروب الجديده وهو الامر الذي تعززه
تحركات المدمره الحربيه الامريكيه ( يو أس أي كول )
الي مياه البحر المتوسط مصحوبه بعده قطع حربيه
اما القبطان تامر صادق
الخبير في مد وصيانه الكابلات البحريه
والذي يعمل علي احدي السفن العالميه المسئوله عن خطوط الانترينت حول العالم
قال ان الاحوال الجويه السيئه قد تسببت في قطع الكابلات هو كلام مغلوط وغير صحيح
لان التيارات المائيه في الاعماق التي توجد الكابلات فيها تكاد تكون منعدمه
التساؤل الفني كيف يمكن استهداف كابلين في وقت واحد ؟
خاصه وانهما يبعدان عن بعضهما 5 كم وفق معلومات مؤكده
الاجابه وفقا لما يراه القبطان تامر صادق
ان الامر يسير للغايه اذا تم تحديد مكان الكابل ولاسيما ان هناك مراكب
امداد لديها مخاطف طويله قد تصل الي 300 متر ويمكن رميها وشبكها
بالكابل وسحبها علي المركب وقطعه واذا كانت المسافه بينهما 5 كم
فلن تستغرق العمليه ربع ساعه لتصل المركب الي الكابل التاني وتقوم بتكرار
ما فعلته مع الاولي وهذا اذا افترضنا وجود مركب تدميري واحد
ان جاز التعبير وليس اكثر.
اما الدكتور طارق كامل وزير الاتصالات المصريه
اشار الي انه لا يستبعد فرضيه المؤامرة مؤكدا ميله الي الاعتقاد بوجود شبهه تعمد
بعد قطع الكابل الثالث وقال يومها ان الموضوع كبير وخطر وغير مسبوق
التساؤل هنا كم عدد الخطوط التي قطعت ؟
الخطوط او الكابلات عددها بين خمسه الي ثمانيه
كابل بجنوب مرسيليا في فرنسا
اثنان بالقرب من الاسكندريه
واحد بجوار دبي
واخر ناحيه بندر عباس بايران
وكابل قناه السويس
والاخير بالقرب من بيننانغ بماليزيا
بالاضافه الي اول كابل قد انقطع في الخليج العربي بتاريخ 22 يناير 2008
والذي لم يلفت الانتباه
هل هي صدفه او نصيب العرب والمصريين
خسائر ماليه واضرار اصابت العالم العربي
يبقي السؤال الاهم الا وهو
متي يكون القطع التالي ؟
ابقوا معي
واوعوا تقطعوا الكابل الواصل بيني وبينكم


24‏/12‏/2008

Merry Cheristmas













أعزائي
كل عام وجميع اخوانا المسيحيين الغربيين بالف صحه وسعاده وسلام
بهني كل اصحابي بالكريسماس
في مصر. سوريا . استراليا . امريكا . اوربا
وبهني كل اصحابي بالروم بتاعنا
شجره الكريسماس من اهم مظاهر الاحتفال
تعالوا نشوف اصلها ايه ؟
الاصل يرجع الي يونيفاس وهو الذي ادخل الديانه المسيحيه المانيا
وطلب من الشعب ان يقطعوا شجره صغيره ويحملوها الي قصر الملك
احتفالا بميلاد السيد المسيح عليه السلام
وكانت من نوع الصنوبر او كما يطلق عليها السرو
وانتشرت عام 1605 ثم انتقلت الي بلاد العالم
زوج الملكه فيكتوريا وضع شجره الكريسماس بالقصر
وبعد ان اخترع توماس اديسون الكهرباء اضيئت اول شجره
علي يد ادوارد جونسون عام 1882
اما الروايه الفرعونيه لاصل شجره الكريسماس فهي
كانت الملكه ايزيس تبحث عن زوجها اوزوريس
ووجدته علي شواطيء لبنان
فاهدتها الملكه عشترت ملكه لبنان
تابوت اوزوريس واحاطت به شجره
وظهرت بعد ذلك هذه الشجره في اعياد الرومان ثم اعياد المسيحيين
اما بابا نويل او سانت كلوز
فنجد القصه مستمده من قصه القديس نيقولاس
وهو اسقف ميرا الواقعه في ليسيا التي كانت مدينه يونانيه
قبل ان يستولي عليها الاتراك وسميت فيما بعد كوجاك
وتقع في جنوب تركيا
المطران نيقولاس عاش في اواخر القرن الثالث واوائل الرابع
وكان يقوم ليلا بتوزيع الهدايا والمؤن للفقراء
وعائلات المحتاجين دون ان تعلم هذه العائلات من هو
وبابا نويل كلمه فرنسيه معناها ( اب الميلاد )
الصوره القديمه والمعتاده لبابا نويل انه شخصا ذو لحيه بيضاء ويرتدي ملابس حمراء
ومعه عصا سحريه وله جسم قوي
يركب عربه تجرها غزالتان ومن خلفه يضع الهدايا
ليوزعها علي الاطفال وذلك اثناء هبوطه من المداخن او دخوله من النوافذ
الرسام الامريكي توماس
هو الذي حدد صوره سانت كلوز الحاليه والمتعارف عليها منذ عام 1882
كل عام وانتم سالمين
وللحديث بقيه في الاعياد التاليه
بس ابقوا معي
اوعوا حد فيكم يغير المحطه








22‏/12‏/2008

مولد وصاحبه غايب

أعزائي
كل سنه في شهر ديسمبر بيتجدد الصداع اليهودي لمحافظه البحيره
والسبب هو مولد ابو حصيره
مين هو ابو حصيره تعالوا نشوف
محمد بن يعقوب بن يوسف ولد في سنه 1907
تحكي الروايات انه سافر من المغرب لفلسطين
للج في الاماكن المقدسه التي يدعي اليهود انها مقدسه لديهم
وغرقت السفينه قبل ان تصل الي فلسطين وبسط حصيرته
علي سطح الماء وسبح ووصل الي سوريا ومنها الي فلسطين وادي الحج
ده بقي الرجل ذو القدرات الخارقه شبيه سوبرمان يعني
وبعد اداء طقوسه الدينيه عاد الي المغرب سيرا علي الاقدام
عشان ماكانش في رصيف عالي ولا مطبات في الطريق
ولا حوادث جمال علي اعتبار انها وسيله السفر
او سفينه الصحراء
وعند وصوله الي قريه دميتوه بمحافظه البحيره مات واوصي اتباعه
بأن يدفن في مصر فدفن في الضريح
بمنطقه المقابر التي تقع علي ربوه عاليه
ودفن اتباعه بجواره
وعقب توقيع معاهده كامب ديفيد عام 1987
بدا اليهود يقومون برحلات دينيه الي قريه دميتوه بمحافظه البحيره
للاحتفال بالمولد
لمده 15 يوما وبدا عددهم يتزايد
عام بعد عام
لانهم يدعوا انه ولي من اولياء الله وله كرامات
كما قاموا بتوسيع المقبره من مساحه 350 مترا الي 8400 متر
ويقيموا احتفالا ليس من عادات واخلاق المصريين
سواء مسلمين او مسيحيين
في ليله المولد تراق كميات مهوله من الخمر والحشيش
وتدق الارض بالعصي ويبدا الاحتفال
بالمزاد علي مفتاح الضريح ومن يرسوا عليه هذا المزاد
وبعدها يبدا السكر والرقص
و يحتفلون بزكري القديسه أستر
وهي زوجه ملك من ملوك الفرس
التي يقولون انها انقذتهم من الاباده علي يد هامان
بتحذيرهم منه
وعند زكر اسم القديسه أستريتزايد دقهم للارض
لاعتقادهم انهم يدقون راس هامان
المحامين المصريين اثبتوا امام القضاء انه رجل مسلم وليس يهوديا
ويمتد نسبه الي طارق بن زياد
وقد صدر حكما قضائيا نهائيا من المحكمه الاداريه
في الاسكندريه ( دائره البحيره )
عام 2001 بالغاء هذا الاحتفال ولم يتم تنفيذه
المحامين المصريين كتبوا في اوراق دعواهم لليهود
ان كنتم تريدون رفات ابو حصيره فخذوه عندكم
كم من حكم قضائي لم ينفذ
السؤال هل مولد ابو حصيره تخطيط اسرائيلي جديد ؟
او حجه للتوغل في ارض مصر ؟
او زي ما بنقول مسمار جحا
ابقوا معي واوعوا تملوا وتغيروا المحطه

21‏/12‏/2008

الاحتفال بمئويه جامعه القاهره






















أعزائي
تبلغ جامعه القاهره اليوم مائه عام
وتعتبر من افضل 500 جامعه في العالم
في البدايه كانت جامعه اهليه اقيم لها احتفاليه
حضرها الخديوي من قرن مضي
في عام 1902 كانت دعوه جورجي زيدان
علي صفحات مجله الهلال لانشاء جامعه مصريه
عام 1904 دعا الزعيم مصطفي كامل الشعب لابداء الرأي
لمشروع انشاء جامعه مصريه علي صفحات
جريده اللواء
اكتوبر 1906 كان اجتماع اللجنه التحضريه بمنزل الزعيم سعد زغلول
للنظر في الاكتتاب لبناء الجامعه
عام 1908 اجتماع اللجنه الفنيه بسرايا الامير
فؤاد الاول لبدء نشاط الجامعه
تلاه اجتماع مجلس الجامعه في 5 ديسمبر 1908
للنظر في الافتتاح
21 ديسمبر 1908 كان الافتتاح الرسمي للجامعه
بقاعه شوري القوانيين بحضور الخديوي
وكبار رجال الدوله وقناصل البلاد الاجنبيه
والاعيان ومفتي الديار المصريه
تبرعت الاميره فاطمه اسماعيل ب 6 فدادين مع وقف 661 فدان بمديريه الدقهليه
واعلنت استعدادها لتكاليف البناء وكان قدرها حين ذاك
( 26000 جنيها )
كما عرضت حليها ومجوهراتها للبيع
وتبرع الزعيم مصطفي كامل ب 6 فدادين و6 اسهم
ومحمد عبدالحميد حبيب ب 5 افدنه
وعوض بك عريان ب 72 فدان
بدات الدراسه بسراي جانكليس بميدان التحرير
المقر الحالي للجامعه الامريكيه
عام 1925 صدر المرسوم الملكي بانشاء جامعه حكوميه
تشرف عليها وزاره المعارف
وزاره التعليم العالي حاليا
ضمت اليها الجامعه الاهليه
وكان رئيسها حين ذاك الدكتور احمد لطفي السيد
واصبح اسمها جامعه فؤاد الاول
وبعدها تغير الي جامعه القاهره
اسهمت جامعه القاهره في مسانده العديد من الجامعات المصريه
التي انشئت فيما بعد مثل
جامعه الاسكندريه عام 1950
وجامعه اسيوط عام 1957
وكان لها فروع خارج الجيزه
في الفيوم وبني سويف
وفيما بعد تم انفصالهما ليصبحا كلا منهما جامعه مستقله
اسهمت جامعه القاهره في تاسيس عدد من الجامعات العربيه
في السعوديه والعراق والكويت
كما اتجهت الجامعه الي استحداث العديد من البرامج الدراسيه الجديده
والمتميزه وانشات اقسام وشعب جديده بكلياتها
كما بدات برامج الدراسه باللغات الاجنبيه
الفرنسيه والانجليزيه
وذلك في كليات التجاره والحقوق والاقتصاد والاعلام والاثار
كما قامت بتطوير الماده العلميه والمقررات علي شبكه الانترنت
وتسجيل المحاضرات بنظام المالتي ميديا ويبث بنظام
الفيديو كونفرانس
لعده مدن بالخارج وهو ما يطلق عليه برامج التعليم المفتوح
كما اسست رابطه خريجي جامعه القاهره
و انشئت مباني تعليميه امتدادلها في مدينه الشيخ زايد
نحن المصريين لنا ان نفخر جميعا بوجود جامعه القاهره
وستظل دائما مناره للعلم
وابقوا معي






17‏/12‏/2008

الله علي صلاح جاهين

أعزائي
رتم الحياه بقي سريع جدا
الاحداث المتتاليه خلتنا ننسي حاجات كتير حلوه
ماتجوا شوي نروح لرباعيات صلاح جاهين
عشان نقدر نواصل لازم نقف ناخد نفسنا
بس تكون مع كلام جميل
شوفوا بيقول ايه
كيف شفت قلبي ياطبيب
همد ومات والا سامع له دبيب
ومالوش دوا غير لمسه من ايد حبيب
وعجبي !!
كرباج سعاده وقلبي منه انجلد
رمح كأنه حصان ولف البلد
ورجع لي نص الليل وسالني ... ليه
خجلان تقول انك سعيد ياولد
وعجبي !!
مزيكه هاديه الكون فيها انغمر
وصيف وليل وعقد فل وسمر
ياهلتري الناس كلهم مبسوطين
ياهلتري شايفين جمال القمر ؟
وعجبي !!
انشد ياقلبي غنوتك للجمال
وارقص في صدري من اليمين للشمال
ماهوش بعيد تفضل لبكره سعيد
ده كل يوم في ألف ألف احتمال
وعجبي !!
ياللي عرفت الحب يوم وانطوي
حسك تقول مشتاق لنبع الهوي
حسك تقول مشتاق لنبع الغرام
ده الحب .. مين داق منه قطره .. ارتوي
وعجبي !!
ياميت ندامه ع القلوب الخلا
لا محبه فيها ولا كراهه ولا
حتي ياقلبي الحزن ماعادش فيك
معلهش .. لك يوم يرضه راح تتملا
وعجبي!!
ايديا في جيوبي وقلبي طرب
سارح في غربه بس مش مغترب
وحدي لكين ونسان وماشي كده
وبابتعد .. ما أعرفش .. أو بافترب ..
وعجبي !!
انا كنت شيء وصبحت شيء ثم شيء
شوف ربنا .. قادر علي كل شيء
هز الشجر شواشيه ووشوشني وقال
لابد مايموت شيء عشان يحيا شيء
وعجبي !!
ياللي نصحت الناس بشرب النبيت
مع بنت حلوه .. وعود , وضحك , وحديث
مش كنت تنصحهم منين يكسبوا
تمن ده كله ؟ .. والا يمكن نسيت
وعجبي
ليه ياحبيبي ما بينا دايما سفر
ده البعد ذنب كبير لا يغتفر
ليه ياحبيبي مابينا دايما بحور
أعدي بحر ألاقي غيره اتحفر
وعجبي !!
طبعا ماينفعش اقول حاجه بعد الكلام الحلو ده
بس ابقوا معي واوعوا تغيروا المحطه

15‏/12‏/2008

الحذاء الطائر ماركه منتظر الزيدي




أعزائي
الصحفي منتظر الزيدي
البالغ من العمر 29 عاما
ويعمل في قناه البغداديه الفضائيه العراقيه
منذ عام 2005
فاجا العالم كله اثناء المؤتمر الصحفي الخاص
بالرئيس الامريكي بوش في بغداد
بقذفه بفردتي الحذاء الخاص به
عبر عن رأي شعب العراق في سياسه بوش
تعرض منتظرالزيدي للاختطاف علي ايدي مجهولين
اثناء توجهه الي عمله في 16/11/2007
وبعد ثلاثه ايام اطلق سراحه دون مقابل مادي
وعاد الي اسرته في 19/11/2007
بعد مروره لاجراء فحص طبي بالمستشفي
عقب الافراج عنه
منتظر الزيدي يبث علي شاشه البغداديه تقارير
تهاجم السياسه الامريكيه في العراق
العراق دوله ذات سياده ومافعله الزيدي
لا يدرج تحت بندالجريمه الدوليه
وهو الان معتقل ويحقق معه بواسطه
حرس رئيس الوزراء العراقي
نوري المالكي
سامح عاشور نقيب المحامين عقد اليوم مؤتمر صحفي
تضامنا مع الزيدي
المتظاهرون في العراق يطالبون باطلاق صراحه
عائله الزيدي تطالب باطلاق صراح ابنها
طالبت قناه البغداديه باطلاق سراح مراسلها
فهل من مجيب
الشعب العربي بجميع فئاته سعيد بما حدث
ولكن لا احد يدري ما سوف تاتي به الايام القادمه
التصفيه الجسديه
ام الافراج عنه وهذا ما نامله جميعا
سلمت يداك يا منتظر
وللحديث بقيه
ابقوا معي





المستشفيات الاستثماريه


أعزائي
قادنا سوء الحظ بعد انتهاء اجازه العيد الي التعامل مع مستشفي اسثماري
زي مابيقولوا مستشفي بس الحقيقه هي مش مستشفي
المستشفي من اهم مستشفيات مصر الجديده
وكان التعامل معاهم لاحد افراد اسرتي
المهم مش حطول عليكم حدخل في الموضوع علي طول
وصلنا المستشفي حوالي الساعه 10 مساء يوم الجمعه الموافق 12/12
بصراحه الاستقبال كان سريع جدا كرسي متحرك بسرعه جدا
وقف قدام العربيه واخدوا الحاله
وعملولها رسم قلب بسرعه البرق
وقالولنا روحوا ادفعوا رسم القلب وقبلها كان في تسجيل البيانات
بعدها اشاعه علي الصدر
والدكتور قال ان في شوي التهاب علي الرئه
مش التهاب رئوي
وده يلزمه دخول المستشفي طبعا كل حاجه اتعملت ادفعت في ساعتها
بيخافوا المرضي تهرب وماتدفعش والا ايه مش عارفه
كتبولها دخول الحاله هي ماكانتش عايزه تدخل قالت اروح مش عايزه
الدكتور طلب من ابنها انه يكتب اقرار انها خارجه علي مسئوليته
ساعتها خفنا قلنا يمكن الحاله خطيره اقنعناها انها تستنه في المستشفي
طبعا حولونا علي الحسابات عشان ندفع مقدم كان 3000 جنيه
دفعناهم واحنا شاكرين مهللين
طلعت غرفه بعدها جت دكتوره صغيره قالتلها سلامتك ياحاجه
انشاءالله حتبقي كويسه
عملولها جلسه ( نبولايزر )
ودي ممكن تتعمل في البيت ناس كتير بيعملوها في البيت
وحقنه ( انتي بايوتك )
وخلاص علي كده
انا كنت المرافقه لها فضلت استنه يجيبولي غطاء ومخده
لغايه الساعه اتنين ونص صباحا قلت مافيش فايده
لازم اطلب رنيت الجرس ماحدش عبرني خرجت قلتلهم انا مرافقه للمريضه
قالولي عارفين قلتلهم طيب فين الغطاء والمخده
جابولي ملايه وبطانيه خفيفه جدا ومخده
وكانوا متضررين جدا والاستياء واضح لاني قلقتهم
الصبح عملولها جلسه تانيه وحقنه
بعدها جابولها الفطار
اول مره القي مستشفي تقدم للمرضي بليله وبارده كمان
ومافيش فطار مرافق
برضه طلعت وقلتلهم هو المرافق صايم قالولي حاضر حنجيب الفطار للمرافق
فضلت من الساعه 9 صباحا ل12 الظهر بطلب دكتور يفهمني الحاله
وكمان قلتلهم انها بتاخد دواء غده علي الريق اديهولها والا اعمل ايه
قالوا الدكاتره مشغولين في المناظير
قلتلهم هي المستشفي مافيهاش الا قسم المناظير
بصراحه اشتغلتهم في الجنان
شوي ورحت تاني قالوا الدكتور مشغول
سالتهم مشغول علي الكمبيوتر
قالوا مش عارفين
قلتلهم اكيد بيلعب جيم ولما يخلص حيجي
كل شوي اخرج القي هيئه التمريض قاعده تحكي حكاوي القهاوي
طلبت رقم مدير المستشفي لانه مش بيرد قالولي حاضر حنكلمه
كانوا بيوزعوني الساعه 12 جه دكتور صغير الظاهر المستشفي بتشجع شباب الخريجين
سالني هي مالها حاسه بايه قلتله انا مش المريضه
تقدر تسالها هي مش في غيبوبه وبتسمع وبتعرف تتكلم
سالها مالك قالتله الحاله قالها طيب قلتله احنا طلبنا استشاري صدر
قال حيجي بس امتي مش عارف
وسابنا ومشي بعد ربع ساعه لقينا وحده من التمريض جايبه كيس كبير
فيه ادويه ومحاليل وسرنجات وكمان جونتيات
زي اللي بيستعملوهم في الولاده
والله كيس جونيات حتي وحده من قرايبنا كانت موجوده
سالت الممرضه دول لايه هي جايه تولد
سالت الممرضه مين كتب الادويه
قالت الدكتور اللي جه قلتلها بس انا طالبه اخصائي
والدكتور ده يكتب كل الادويه دي ليه
مافيش جواب سابت الادويه ومشيت
ولا حد سال علينا ولا حد عبرنا لغايه الساعه 2 الظهر
عرفت القي مدير المستشفي عن طريق الرقم الداخلي لمدير العيادات
كلمته قلتله ممكن حضرتك تتفضل عندنا قالي اؤمري
قلتله ان مافيش دكتور عدي علينا الا الدكتور الصغير
رد عليه وقالي ده رئيس قسم مش قلتلكم بيشجعوا الجيل الصاعد
قلتله ان هيئه التمريض مش بيردوا وعاملين حكاوي القهاوي وبيطقوا حنك
قالي هما بيدوكم العلاج ومش مطلوب منهم غير تنفيذ تعليمات الدكتور
قلتله احنا مش بنلاقي الدكتور اصلا
قالي اضربي الجرس وبعد خمس دقايق يكون عندك الدكتور
قلتله اني قعدت اطلبه 3 ساعات لغايه ماجه
قالي حنشوف كل ده بعدين ثم انكم دخلتوا الفجر
يعني اللي دخل الفجر مالوش حق يتكلم
قلتله يادكتور احنا كنا في الغرفه الساعه حداشر
وسالته سؤال ساذج جدا
هو الفجر عندكم بيجي الساعه حداشر
قالي الاستشاري جاي قلتله لو ماجاش حنخرج
بعد 10 دقايق بعتلي دكتوره صغيره برضه
سالت بتاخد علاج ايه قلتلها هو الاستشاري مش جاي
قالتلي هو حيتاخر بس احنا حنجيبلكم واحد تاني بعد شوي حيطلعلكم
سالتها عن اسمه واسم اللي كان حيجي
قالتي وطلع الاتنين باطنه وقلب
قلتلها احنا طالبين استشاري صدر
ردت رد هي فاكره انه مقنع الا وهو
الدكاتره بتفهم في كل حاجه
قلتلها معليش بقي اصل انا فهمي ضعيف
لان اهلي خرجوني من المدرسه بعد الاعداديه
اللي يطلب استشاري صدر ماينفعش يجيبوله استشاري باطنه
اللي عرفته ايام ما كنت بتعلم في المدرسه ان دي تخصصات
وقالتلي انتوا جايين الفجر ليه زعلانه كده
قلتلها احنا جايين الساعه حداشر
ردت كنتوا في الغرفه الساعه اتناشر
قلتلها يعني افهم من كلامك انك وكل العاملين في المستشفي
بتقولوا للناس الساعه اتناشر ودقيقه صباح الخير
قالتلي نشوف الحاجه وبعدين نتخانق
طبعا وهي خارجه ماعبرتنيش
قولتلها يادكتور انا مش بتخانق انا بطلب حقي زي ما انتوا بتاخدوه حقكم
بعدها جه الاستشاري برضه باطنه
جه وهو زي مايكون الله نزل من السماء
دخل قالها سلامتك مالك
وحده من اللي موجودين قالتله امبارح لقينا وشها وشفايفها بقوا بيض
وعندها كرشه نفس
قالها البياض ده ممكن يكون نور من عند ربنا
والله والله والله ده اللي حصل وده كلام الاستشاري
وكمل وقال يمكن حد خضها ابقي هاتيلها شيوخ والحاجات دي
المهم طلب سماعه يسمع خبط علي السماعه لقاها بايظه
اعزروني في اللفظ اللي حقوله هو الاستشاري قال كده
قال للدكتور والممرض اللي كانوا معاه
مافيش اوسخ من السماعه دي تجيبهالي
بعتذر تاني علي اللفظ
انا رديت وقلتله اصل البطاريات خلصت
المهم بالظبط حط السماعه 3 مرات علي صدرها
لا شاف ضهرها ولا اي حاجه المفروض يكشف علي ضهرها
شاف الاشعه وقال بسيطه
المريضه اول مادخل قالتله عايزه اروح رد باستهزاء اه تروحي حاضر
مرتين طلبت ومرتين الاستهزاء
قال فين اخر تحليل
اخدواعينه قبل مايدخل الدكتور
انا قلتله احنا عايزين نخرج من فضلك اكتبلنا خروج
قلتهاله مرتين ورا بعض يمكن سمعه تقيل والا حاجه
ورد ابنها وقاله ايوه احنا مش مرتاحين هنا وعايزين نخرج
قال طيب اشوف نتيجه العينه وتخرجوا
قلتله طيب يادكتور حضرتك حتروح والا منتظر قالي حروح ويبلغوني في التليفون
قلتله في حد ممكن يكتب خروج بدلك قالي ايوه
المهم مشي ولما قريبتنا سالته اسمك ايه
قالها اسمه وطلع برضه باطنه
يعني مافيش فايده ده العلاج الاجباري
بعد كده تعبنا لغايه ماالهيئه الموقره تبع التمريض
تبعت الفايل للحسابات
ولما لقوا الحاحنا وكمان قلتهم اني حنزل علي الكمبيوتر
مقاله زفت علي سوء المعامله
بعتوا اخدوا الادويه اللي كتبها الدكتور بتاع الجيل الصاعد
وكتبولنا دوين نجيبهم من بره المستشفي
واخدنا الفاتوره اللي كانت جميله جدا ومليانه جدا جدا
بس بصراحه ابنها قال الحمدلله عايزين نطلع من هنا وخلاص
المهم خرجنا من المستشفي علي خير
بصوا بقي
الحاله ماكانتش تستوجب انها تفضل في المستشفي
وماكانتش برضه تستوجب التحاليل والاشعات ورسم القلب
يعني كل ده عشان الفاتوره تعلي وتعلي
بيمارسوا علي المرضي اساليب تخوفهم
يعني احنا بصراحه خفنا واترعبنا لما الدكتور قال لابنها
اكتبلي انها خارجه علي مسئوليتك
هنا بقي فين الرقابه علي المستشفيات
فين وزير الصحه قاعد في مكتبه مش داري باي حاجه
فين وكلاء وزاره الصحه
هما قاعدين في مكاتبهم والا بيشتوا في اسوان والاقصر
ويصيفوا في مارينا
ويبعتوا الفنانين تتعالج في الخارج
اصلهم ياحرام مايقدروش يتعالجوا علي نفقتهم
فريد شوقي واحمد زكي وغيرهم وغيرهم
والله حرام الناس الغلابه بتموت مش بتلاقي علاج
لان مايملكوش تمن العلاج
واللي مش محتاج يسافر علي نفقه الدوله
مش بيقولوا يابخت من كان النقيب خاله
دول بقي الحكومه خالهم وعمهم ووزير الصحه ابوهم وامهم
دكتور هاني سرور تفتكروا حيعملوله ايه ولا اي حاجه
واللي وافقوا في بنك الدم علي اكياس الدم الفاسده
برضه ولا اي حاجه كلهم براءه
والشعب الغلبان هو الجاني الاول يبقي نحبس الشعب ونخلص
وبالاخص الناس الغلابه الشقايه اللي الامراض كلها بيعانوا منها
يروحوا لمين ومين يسمع ومين يفهم
لامتي حنفضل مستحملين الفساد
وعمار يامصر وسلملي علي الترومااااااااي
وابقوا معي واوعوا تغيروا المحطه

13‏/12‏/2008

عاشق الاسكندريه ( محفوظ نوبل )













أعزائي
دكتور صلاح خليل وعدنا بمقال عن محفوظ نوبل
وفعلا بعتلي المقال
تعالو نقراه مع بعض
يعتبر نجيب محفوظ من أحسن الروائيين في عصره، ان لم يكن أفضلهم علي الاطلاق
أضفى نجيب محفوظ شهرة عالمية على الأدب المصري وعلى معالم مصر
وقد جاء في تنويه من لجنة نوبل عند منحه جائزة نوبل في الآداب عام 1988
استطاع نجيب محفوظ من خلال أعماله الغنية بالظلال ،
احيانا واقعية واضحة المعالم وأحيانا أخري مثيرة وغامضة
، استطاع نجيب محفوظ خلق فن قصصي عربي يسري علي كل الجنس البشري“
وعرف عن محفوظ كونه أديبا ليبراليا،
ومناصرا لحقوق المرأة،
وسبب تأييده لاتفاقية السلام التي وقعتها مصر واسرائيل في سبعينيات القرن الماضي
خلافا مع بعض كبار الأدباء المصريين في ذلك الوقت
.وتقوم الجامعة الأمريكية بالقاهرة بمنح جائزة سنوية باسم محفوظ،
كما أطلق اسمه على أحد شوارع القاهرة.
ويعرف نجيب محفوظ عند بعض النقاد الأجانب بالروائي الفيلسوف لما تحتويه كتاباته علي أعماق فلسفية،
وقد تمحور فكر نجيب محفوظ حول قيم أساسية ثلاث هي الحرية والعدالة الاجتماعية والعلم
كما اهتم نجيب محفوظ بالسياسة أيضا والتي تجلت في العديد من أعماله الأدبية
كما اهتم نجيب محفوظ بالتاريخ أيضا خصوصا في بداية كتابته الأدبية.

مراحل في أدب نجيب محفوظ
-------
يمكن تقسيم المراحل التي مر بها الانتاج الأدبي لنجيب محفوظ الي ثلاث مراحل: -
أولا: المرحلة التاريخية ( الفرعونية)
وهي المرحلة الأولي لانتاج نجيب محفوظ
ومن رواياتها: عبث الأقدار - رادوبيس وكفاح طيبة
ثانيا: المرحلة الواقعية ،أو الواقعية الاجتماعية
وهي المرحلة الثانية لانتاج نجيب محفوظ
ومن روايات هذه المرحلة : القاهرة الجديدة -زقاق المدق-بداية ونهاية –والثلاثية.
ثالثا: المرحلة الرمزية
وتبدا هذه المرحلة برواية أولاد حارتنا
برواية وتشمل أيضا اللص والكلاب والسمان والخريف
و الطريق والشحاذ وثرثرة فوق النيل وميرامار .
وقد أرتفع الأسلوب في هذه الروايات واعتمد علي الرمز
وغلب عليه الطابع الميتافيزيقي ويكاد يكون هناك اتفاق علي ضم هذه المجموعة
من الروايات كمجموعة واحدة لها سمات مشتركة.

العلم ونجيب محفوظ
-----
يكاد يكون الايمان بالعلم الحديث احدي القيم المحورية لفكرنجيب محفوظ
ويتجلي ذلك اما بطريقة مباشرة علي لسان أبطال رواياته
واما من خلال أحداث تلك الروايات
وقد ظهر ذلك بوضوح في رواياته
القاهرة الجديدة(1945) الثلاثية1957) والشحاذ(1965).
أما في أولاد حارتنا فيلعب العلم دورا أساسيا في هذه الرواية متمثلا في شخصية عرفة،
وقد عبر نجيب محفوظ في هذه الرواية علي لسان عرفة
رمز العلم عن ايمانه الشديد بالعلم وما يمكن ان يحققه من معجزات للبشرية .
ويظهر نجيب محفوظ أن انبهاره المبكر بالعلم تحول الي ادراك أكثر نضوجا للوجه الآخر للعلم
وخطورته علي القيم الانسانية كما تبين الرواية أن نجيب محفوظ
يعتقد أن سيطرة العلم في غياب الايمان بالقيم الروحية يؤدي الي اختلال قيمة هامة أخري
ألا وهي العدالة وأن العلم وحده ليس السبيل الي سعادة البشر
ولاسعادة للانسان الا بالايمان بالقيم الروحية الي جانب العلم الحديث.

اسكندرية نجيب محفوظ
-----
اذا كانت القاهرة القديمة وحاراتها هي البيئة الأساسية التي اتخذها نجيب محفوظ
مسرحا لمعظم اعماله الابداعية، فقد كا ن نجيب محفوظ مفتونا بمدينة الاسكندرية
وعاشقا لها ولقد احتفي بالمدينة العتيدة وخلدها في انتاجه الأدبي
ولقد تجلي ذلك بوضوح في اسكندريته
اسكندرية نجيب محفوظ
-----
وهي تضم رواياته الثلاث السمان والخريف ( 1962)
الطريق(1964 )و ميرامار ( 1967)
( أنظر اسكندرية نجيب محفوظ لكاتب هذه السطور - الهلال نوفمبر 2004)
وكانت الاسكندرية ببحرها وميادينها الشهيرة
وشوارعها السنجابية المغسولة بماء المطر وسموات خريفها
مسرحا لأحداث روائعه الثلاث
بل انه من الانصاف القول بأن الاسكندرية وفنادقها ومقاهيها وشتائها المرعد
لم تكن مجرد خلفية لأحداث هذه الروايات
بل أن المدينة العتيدة قد شاركت أبطال هذه الروايات في أدوارهم
ولعبت دورا أساسيا في أحداثها
وقد استخدم محفوظ في وصف أجواء اسكندرية الفاظا عذبة رقيقة وصورا رشيقة فريدة
، وأسلوبا يرقي الي مستوي الشعر لم يسبقه اليه أحد
واذا كان من العبث محاولة ايجاد تفسير احادي لأعمال نجيب محفوظ الروائية
خصوصا تلك التي تنتمي الي المرحلة التالثة من انتاجه
فليس في الامكان أيضا انكار أن روايتيه السمان والخريف وميرامار
هي روايات سياسية أو ذات أبعاد سيا سية علي أقل تقدير
فمن المعروف أن نجيب محفوظ روائي يهوي السياسة،
وأحيانا يبدو وكأن السياسة هي وسوا سه القهري الذي لا يستطيع منه فكاكا
ولكن العالم الروائي لنجيب محفوظ عالم ثري متعدد الأبعاد
حيث يتجاوز ابداعه الروائي السياسة الي عالم أكثر رحابة
وقد تجلت في هاتين الروايتين قدرة نجيب محفوظ المتفردة
علي المزج بين السياسة والفلسفة والتاريخ وعبقرية المكان
الي جانب حرفيته في الحكي ومهارته في الاقتراب من أعماق النفس البشرية
ومحاولة سبغ غورها وكشف أسرارها واظهار تفردها وتنوعها وتناقضاتها .

دعوة الي انشاء مركز نجيب محفوظ للدراسات الأدبية
---------
يعتبرنجيب محفوظ من الأدباء الأفذاذ علي المستوي العالمي
وقد حقق لمصر وللأدب العربي مكانة عالمية كبيرة بفوزه وبجدارة بجائزة نوبل في الأدب.
وتقوم الدول العظمي بتخليد أبنائها العظام
ليس فقط بانشاء التماثيل لهم أو باطلاق اسمائهم علي الشوارع
ولكن أيضا بانشاء المراكز العلمية والأدبية بأسمائهم
وقد سبق لكاتب هذه السطور ارسال رسالة شخصية ومفتوحة أيضا
الي السيد الدكتور اسماعيل سراج الدين –رئيس مكتبة الاسكندرية
وذلك للدعوة الي انشاء مركز نجيب محفوظ للدراسات الأدبية
بمكتبة الاسكندرية تخليدا للراحل العظيم
وانتهز هذه المناسبة مرة أخري أبعث اليكم بهذه الرسالة لنشرها
الي كل من يهمه الأمر من المهتمين بالشئون الثقافية في مصر
وذلك للدعوة الي انشاء مركز نجيب محفوظ للدراسات الأدبية تخليدا للراحل العظيم
حيث يقوم المركز بتجميع تراثه الأدبي
ما كتب هو وما كتب عنه من رسائل جامعية ودراسات ومقالات باللغات المختلفة
كما يقوم المركز أيضا بتنظيم اللقاءات
والمؤتمرات المحلية والاقليمية والدولية احياء لأدبه وفكره
انكم تعلمون جميعا كيف تقوم الدول المتحضرة بتخليد أدبائها ومفكريها
ومما لاشك فيه أن أديبا بعظمة نجيب محفوظ يستحق انشاء مركز باسمه
ربما بجامعة القاهرة أو بمكتبة الاسكندرية او بأي هيئة أخري
وربما تهتم وزارة الثقافة بذلك أيضا
لقد مر اكثر من عامين علي وفاة الراحل العظيم
ومرت ذكري وفاته في 30 أغسطس الماضي
ولم يذكره أحد ، أمعقول أن تنسي مصر نجيب محفوظ؟

د.صلاح خليل

وانا اضم صوتي لصوت دكتور صلاح واناشد وزاره الثقافه
ومكتبه الاسكندريه وجامعه القاهره
وبكل المهتمين بالشئون الثقافيه
بسرعه انشاءمركز نجيب محفوظ للدراسات الادبيه
ويارب حد يسمعنا
اشكر عاشق نجيب محفوظ دكتور صلاح خليل
علي اختيار مدونتي لنشر مقاله عن محفوظ نوبل
وابقوا معي
اوعوا تغيروا المحطه










7‏/12‏/2008

لبيك اللهم لبيك






























أعزائي
يقف الان ضيوف الرحمن علي صعيد عرفات
لاداء الركن الاعظم من الحج
يقف في هذا العام ثلاثه ملايين ونصف حاج
قضواامس يوم الترويه في مشعر مني
ويقضون اليوم وهم يلبون ويكبرون
لبيك الهم لبيك
لبيك لا شريك لك لبيك
ان الحمد والنعمه لك والملك
لا شريك لك
تلبيه لدعوه الخليل ابراهيم
بعد ان ادوا صلاه فجر اليوم التاسع من ذي الحجه
اليوم هو اعظم يوم طلعت فيه الشمس
ويظل ضيوف الرحمن اليوم علي عرفات ليؤدون
صلاتي الظهر والعصر جمعا وقصرا
وقبل ان تغرب الشمس يبتهلون لله العلي العظيم
ان يتقبل حجتهم
اليوم يباهي الله ملائكته بعباده
ويقول عز وجل
انظروا الي عبادي يأتون شعثا غبرا يرجون رحمتي
أشهدكم اني قد غفرت لهم
وعند غروب الشمس يفيض الحجيج
بالنفره الكبري الي المزدلفه
وعند وصولهم للمشعر الحرام يؤدون صلاتي المغرب والعشاء
بأذان واحد واقامتين ثم يجمعون الجمرات
وبعد صلاه الفجر يتوجهون من مزدلفه الي مني
ليرموا جمرة العقبه الكبري
بسبع حصيات ويتوجهون الي الكعبه لاداء طواف الافاضه
قبل عودتهم الي مني ليقضوا ايام التشريق
المبيت في مني ليس ركنا من اركان الحج
لكن وقفه عرفات هي الركن الاساسي
كما قال سيدنا محمد عليه افضل الصلوات
الحج عرفه
الهم اكتبها للجميع
ويارب العوده
كل عام وانتم سالمين