28‏/11‏/2011

صحوة شعب

أعزائي
النهارده يوم حافل جدا ولم يسبق له مثيل 
بمناسبه مولد سيدي منتخب 
يفط الانتخابات غطت كل حاجه موجوده
وفي عربيات نص نقل بقالها كام يوم واقفه في مكانها شايله صور المرشحين  
اما الزحمه البشعه النهارده دي حدث ولا حرج 
الميادين مقفوله بالعربيات لا حد عارف يروح ولا يجي 
لدرجه ان اصحاب العربيات نزلوا ينظموا المرور 
لان المرور بعافيه النهارده 
بس الحق يقال ان الشرطه والجيش مأمنين الانتخابات 
اول مره تبقي الشرطه والجيش ايد واحده 
---
بما ان اللجنه اللي حنتخب فيها قدام البيت 
من امبارح  شايفهه ان العمل فيهاعلي قدم وساق 
والنهارده متواجدين اعضاء اللجان من 6 صباحا 
في انتظار فتحها الساعه 8 صباحا 
نزلت انتخب الساعه 8.30 بما اني حعدي الشارع بس
وصلت للباب واستغربت جدا لان مافيش حد واقف 
واكتشفت ان الدخول من الباب اللي في الشارع الجانبي 
رحت  الشارع الجانبي وبصراحه اتخضيت من الاعداد الموجوده
طوابير  طويله جدا ماعرفتش اشوف اخرها 
قلت اعمل ايه اتصرف ازاي وانا مش بحب الزحمه بتخنق منها
قلت خلاص اقف انا واختي اول الطابورنوع من الاستهبال 
وعشان ماحدش يقولي روحي اقفي في اخر الصف 
ابتديت اتكلم مع الموجودين 
والحمدلله استفدت بدعاء امي الله يرحمها 
لما كانت بتقولي ربنا يحبب فيكي خلقه 
ماحدش قالي اقفي في الاخر 
ولما اختي لقتها بتبص فين اخر الطابورغمزتلها انها تسكت
اغلبهم كانوا ستات كبار في السن يعني اصغرهم فوق 65 سنه 
منهم جايبين كراسي عشان لو الانتظار طول 
ومنهم اللي جايبن متوضبين علي الاخر 
كوافير وميك اب  وبرفان
استغربت دول قاموا عملوا كل ده امتي  قلت يمكن ماناموش عشان شعرهم 
يبقي زي ماهو وقالوا نروح  الانتخابات ونرجع ننام 
ولابسين المحزق والملزق والشفتشي والشيكينيلي والفحلقي والمشمشي والحمصي
زي ما تكون الانتخابات حيقابلوا فيها فارس الاحلام 
والجيش والشرطه واقفين بينظموا 
واقف علي الباب نقيب شرطه بصراحه صعب عليه
كل وحده فيهم تشده وتساله سؤال وهو ياولداه حيران 
يرد علي ماما ستو  والا خالتو والا عمتو 
وقال  انه بيدخل 10 من الكبار و5 من الصغيرين
وحده من المسئولين علي الانتخابات اتعصبت وصقفت وقالت 
بلاش دوشه اسكتوا سالت اللي واقفين وقلت  
بتسقف ليه فاكره انها في مظاهره في التحرير 
والا عايزه تفرجنا الضوافر الاكلريك اللي مركباها 
كل وحده من جداتي الامامير اللي زي العصافير 
وهي خارجه بعد ما انتخبت بتوري الواقفين 
الحبر الفسفوري اللي علي صبعها
وكل وحده بطريقتها منهم اللي بترفع ايدها وتحي الناس 
ومنهم اللي بتشاور علي صبعها وتقول عقبالكم 
بصراحه كانت مسخره ياريته كان فيلم كوميدي 
---
دخلت انا واختي وكانت هي في لجنه وانا في لجنه تانيه 
كشف الاحزاب صغيير
كشف الفردي كبيرلكثره المترشحين 
بما ان ماحدش فيهم ممكن يعمل اي حاجه 
يعني زي العاده بننتخب وخلاص ومش بنشوف العضو الموقر 
الا في الانتخابات الجديده
قررت انتخب ست في المستقل
دورت لقيت اسم عجبني علمت عليه 
قلت اشجع بنات جنسي 
تماشيا مع مقوله شويكار في مسرحيه سيدتي  الجميله وهي 
ربنا يجعلها سوده علي اللئيم بيضه علي الكريم بمبه علي اللي مايساعد الحريم 
وبما اني  مش عايزها بمبي قلت اعمل بحكمه الست شويكار
وانتخب ست عشان ابقي ساعدت الحريم
---
لما اختي دخلت لجنتها كنت واقفه علي باب اللجنه 
وشوي شوي دخلت ولقيت المستشار المسئول عن اللجنه 
رحت وقلتله ممكن اسال سؤال قالي اتفضلي 
قلتله اسماء عبدالفتاح انسحبت من الانتخابات 
ومع ذلك اسمها نازل ليه ؟
قالي في مواعيد ترشيح ومواعيد انسحاب 
هي انسحبت بعد الموعد وده ماينفعش 
سالته طيب ماهو ممكن في ناخبين ماعرفوش انها انسحبت وحينتخبوها 
قالي ممكن سالته في حاله انها تاخد اصوات كتير تمكنها من الفوز 
يبقي الوضع حيكون  ايه ؟
قالي تبقي عضو في المجلس 
---
اعضاء اللجان بيساعدوا الناخبين في كل حاجه 
بيفهموهم يعملوا ايه وينتخبوا ازاي 
متعاونين الي اقسي حد 
حتي في وحده حطت الكشف المستفل في صندوق كشوف الاحزاب 
قام المستشار وفتح الصندوق بنفسه ونقل الكشف وقفل تاني 
---
وانا خارجه قولت للنقيب اللي علي الباب 
ممكن تدخلوا اكتر من العدد لان اللجان فاضيه والتكدس في الشارع
رد وقالي ما اقدرش اعمل حاجه الا لما يقولولي 
قلت سبحان المعز المذل 
الشرطه بقت تاخد اوامر من الشعب 
---
امبارح رحت الهيئه العليا للانتخابات 
عشان اسال في حاله عدم الانتخاب حيكون في غرامه فعلا
والا بيخوفونا عشان نروح وده من باب العلم بالشيء
 قابلت مسئول هناك وضحك وقالي مين قال كده
قلتله انا سمعت دكتور عبدالمتعم ابو الفتوح بيقول 
ياريت يعملوا غرامه للي مش حينتخب 
بس مافيش تاكيد علي الغرامه 
وسالته طيب دي حيتم حصرها ازايفي حاله وجودها فعلا
 رد عليه قالي هو ده جواب سؤالك ازاي تتحصر  
قلتله بيقال انها حتتحصل عند تجديد الرقم القومي 
قالي لو حصل فعلا  لها حل  بشهاده مرضيه من اي دكتور 
---
في لجان في مدينه نصرالناخبين انتظروا امام اللجان اكتر من ساعتين 
لعدم وصول ورق الترشيح 
---
وفي لجنه ابتدت الساعه 4 بعد الظهر ودي حتستمر في العمل 
للساعه 3 صباحا علي ان تبدا في الثامنه صباحا غدا
---
لجنه ابتدت قبل وصول المستشار وتم غلقها
---
مامور قسم عين شمس تم وقفه لانه ماوصلش صناديق الاقتراع للجان الانتخابيه 
---
لجنه بالمطريه تابعه لعين شمس  دخل المستشار وقفل الباب 
ومنع الناخبين من الاقتراع وقام هو بعمليه الاقتراع 
استنجد الناخبين بملازم اول شرطه باللجنه 
فكان رد المستشار اعلي ماخليكم اركبوه 
قام الناخبين بحبس المسئولين علي اللجنه  في غرفه 
وايتنجدوا بالشرطه والجيش 
وكذلك استنجدوا بالاعلامي عمرو اديب 
---
لجان مدينه نصر اكثر ازدحاما 
قريب ليه مراته لجنتها في مدينه نصر
كلمني وقالي ان بقاله 3 ساعات قاعد علي قهوه منتظرها 
تخيلوا عشان ننتخب لازم نعطل الدنيا كلها 
---
اصحاب السيارات نزلوا ينظموا حركه سير السيارات  
---
اتمدت الانتخابات الي التاسعه مساء
ظباط الشرطه حيباتوا بجوار صناديق الاقتراع
شفت ست كبيره جايه تنتخب علي كرسي متحرك 
انا سعيده بالصحوه الانتخابيه بس برضه في سلبيات 
شفت النهارده في لجنتي وحده شبه متخلفه جايه بصحبه وحده تانيه تنتخب
طيب دي حتقدر تختار ازاي  ؟
كل اللي معاه رقم قومي بينتخب طالما بلغ 18 سنه
اللي مش بيعرفوا يقروا ويكتبوا حيحفظوا الرموز  ويعلموا عليها 
بس دي حتبقي اختيارتهم ؟
والا اختيارات اللي له مصلحه ؟
---
وانا واقفه في البلكونه لقيت ام محمد مرات بواب العماره اللي جنبنا 
راجعه من الانتخابات وهي ست كبيره وعمرها ما طلعت الرقم القومي 
عشان تستعمله في اي حاجه 
ياتري اللي انتخبتهم كانوا اختيار مين ؟
---
المصريين بالخارج لقوا صعوبه في الادلاء باصوتهم ومعظمهم لم يتمكن 
بس اللي مش بيعرف لا يقرا ولا يكتب وعنده رقم قومي 
وعايش في  عموم الجمهوريه له الحق 
هما اخوتنا اللي عايشين في المهجر مواطنين درجه تانيه والا ايه ؟
---
بمناسبه الانتخابات بياع الموز اللي بيقف في الميدان قدام بيتنا 
مشي بدري النهارده وده عشان الموز اتباع بدري 
دي بركه سيدي منتخب 
---
بس فعلا كنت سعيده جدا بالشباب الصغير المشارك  
فعلا عمار يامصر 
واوعوا اوعوا تقلبوا الصفحه 
ابقوا معي

















21‏/11‏/2011

كرسي في الكلوب

أعزائي 
هو ايه اللي بيحصل الدنيا كلها قايمه علي بعضها 
المظاهرات في كل مصر
حالا سامعه ان الحكومه استقالت 
مع الف سلامه بس ايه البديل حاليا 
قالوا انهم قبلوا استقاله وزير الداخليه ده جميل 
وحيجيبوا وزير داخليه غيره ده اجمل 
التفاوض مع من سيحل محله حيكون النهارده وممكن يحلف اليمين 
ويمسك الوزاره بكره كل ده ممكن بس فيه سؤال 
هل الوزير الجديد سيتحمل مسئوليه انتخابات قادمه  بعد اقل من اسبوع ؟ 
ده علي ما يقعد ويتمطع  ويفهم يكون فات يجي شهر او اكتر
وياريت المره دي يجيبولنا وزير اصغر من اللي فات 
ممكن يكون  عمره في بدايه السبعينات مش في نهايتها 
الظاهر ان الخمسينات في عرفهم لسه اطفال 
عالبركه
----
كده يبقي التحرير نجح في ازاحه العيسوي 
كانوا من ساعه في التحرير بيطالبوا  بمحاكمته 
واعدامه لمسئوليته عن تزويد الشرطه بالذخيرة الحيه 
والخرطوش 
---
من كام ساعه المجلس العسكري كلف حكومه شرف ببحث الازمه 
هي حكومه شرف تعرف تبحث شئون طفل في الكي جي 
عشان تبحث ازمه  وفين الازمه في مصر
وفي ميدان التحرير 
والله ضحكوني وماكانش ليه نفس اضحك
---
ميدان التحرير بعتقد بقي اشهر ميدان علي مستوي العالم 
والجميع في الميدان يطالبون برحيل المشير وعنان 
واستقاله المجلس العسكري 
وانتخاب مجلس انتقالي
----
مرات بيتهيالي ان ثور ة 25 يناير اللي قدم فيها الشهداء
دمائهم واروحهم كانت من اجل جلوس المشير الامير 
علي كرسي الحكم 
يعني مصائب قوم عند قوم فوائد 
----
في التحرير حرقوا كاوتش العربيات عشان الدخان يعمي الشرطه عنهم 
ويحميهم من الرصاص المطاطي والغاز المسيل للدموع 
-----
الحرايق طالت بلكونه في التحرير والنار ولعت البيت 
السكان ذنبهم ايه 
قاعدين كافين خيرهم و شرهم بلاقوا البيت اتحرق
----
الغاز المسيل للدموع ده جديدمستورد من بلاد العم سام 
ناحيه تطلق الغاز والناحيه التانيه تولع نار 
يعني بيشتغل بروحين 
---
الحصيله كانت من ساعه  تقريبا
33 قتيل 
وحوالي 2000 مصاب 
وده نتيجه الرصاص المطاطي 
والخرطوش  والرصاص الحي 
والاصابات نزيف داخلي وكسور 
اللي بيحصل ده يرضي مين ؟
----
الجيش بيحمي الداخليه
علي رأي شعبوله  بس خلاص
---
مناشده جميع اطباء مصر  النزول للميدان 
وكل الميادين 
---
الجيش والشرطه بيسحلوا المتظاهرين 
مش بيفرقوا بين شباب وبنات 
وبيجروا القتلي لوضعهم بجوار صناديق القمامه 
واكيد بيقولوا وهما بيجروا القتيل 
كلب وراح 
ربنا ينتقم منهم
---
المتظاهرين بيرموا مولتوف وحرقوا  سيارات الشرطه 
وسيارات الجيش وكمان سيارات المدنيين 
وبيقولوا سلميه سلميه طب ازاي ؟
ده يبقي شغب مش تظاهر 
---
الخبر ده خاص بالبورصاجيه 
البورصه خسرت النهارده مليارات 
---
شفت النهارده  في التحرير ظابط من الامن المركزي 
في المظاهره لابس زي الامن المركزي الاسود وايس كاب 
ده بقي اسمه ظابط كاجوال 
---
والله مابقيت عارفه فين الصح وفين الغلط 
الهتافات  بتنادي وبتقول 
يسقط يسقط حكم العسكر 
ولسه قريب كانت الهتافات 
الجيش والشعب ايد وحده 
دي بقي شيزوفرانيا 
---
اكيد ميكروب الاحباط اللي عندي وصلكم 
ارحموا مصر يااااااااا بشر
--- 
واوعوا اوعوا تقلبوا الصفحه 
ابقوا معي


---


10‏/11‏/2011

دعايات كوميديه

أعزائي
نقول تاني كل عام وانتم بخير العيد خلص ايامه عدت بسرعه
زي كل الحاجات الحلوه بتعدي بسرعه 
---
المرشحين الاسلاميين استخدموا المساجد للدعايه الانتخابيه في العيد
جماعات خطبت في الناس بدون تصريح بعد ان تخلي امام المسجد 
عن مكانه ليفسح الطريق للدعايه الانتخابيه 
وفي بعض المساجد الامام قال انتخبوا فلان وفلان 
هوجه وصاحبها غايب 
---
الشوارع والميادين كلها ازدحمت باليفط الانتخابيه 
موجود عليها اسم المرشح ورمزه ورقمه وصورته 
وفي كمان قائمه باسماء وصور المرشحين 
ودي بتكون للاحزاب  
وبما ان المرآه مسموح لها بالترشيح في الحاله دي 
الدعايه بتكون فيها الصوره والاسم والمنطقه اللي مترشحه فيها 
ورقمها الانتخابي والرمز
عادي زيها زي الراجل 
في جماعه استبدلت صوره المرأة بصوره ورده 
ولما لقوا الكلام كتر عن صوره الورده 
استبدلوا الورده بصورة  زوج المرشحه الكلام ده حصل فعلا 
وكتبوا انتخبوا حرم الاستاذ فلان  المرشحه لمجلس الشعب 
اكيد انتوا بتضحكوا وبتقولوا انا بمزح بس دي الحقيقه 
يعني اروح الانتخابات واكتب حرم فلان الفلاني 
بس نسيوا يكتبوا هي اللي حتحضر جلسات المجلس الموقر 
والا هو برضه حيحضرها بالنيابه عنها 
والله الورده كانت ارحم من صوره جوز الست النايبه 
وبينزلوا الجولات الميدانيه  بيبحثوا مشاكل النساء 
دون التحدث مع الرجال 
طب تجي ازاي هي لو لا قدر الله ونجحت 
حتروح المجلس وتقعد بعيد عشان ماتتكلمش مع اي راجل 
الست النايبه خاصه للمرأه فقد
 خلاص نعمل مجلس شعب رجالي والتاني حريمي 
---
 كتير من المرشحين كان  ضمن برنامجهم  الانتخابي  
محاربه العنوسه 
مش فاهمه حيعملوا ايه  حيتجوزا العوانس  
والا حيستوردوا رجاله للزواج من العوانس 
هو الجواز بقي فيه دليفراي
يا سبحان الله 
---
الرموز اللي وزعوها علي المرشحين رموز مضحكه جدا 
يعني مش سايبين اي حاجه ماعملهاش 
الرموز اللي شفتها طبعا مش كلها بس حقولكم علي اللي شفته 
 قسم الاجهزه الكهربائيه 
---------------------------
مكوه -مروحه سقف - تلاجه - خلاط -تكيف  - كمبيوتر 
راديو - تليفزيون -بوتاجاز -سخان -نجفه 
---
ادوات خاصه للمطبخ
----------------------
حنفيه -براد شاي - كوبايه- معلقه  -فنجان شاي
---
منتجات مزارع مصر من الفاكهه
------------------------------------
برتقانه -بطيخه -منجايه -عنقود عنب -تفاحه 
----
مستلزمات ترزيه 
---------------------
مقص  - كرافته - قميص رجالي 
وده بقي اللي فضلت اضحك عليه 
مرسوم قميص رجالي ومكتوب رمز القميص الرجالي 
واللي عايزه بشوفه حيلاقيه في مدينه نصر 
---
 مستلزمات موسيقيه 
----------------------
كمانجه - عود -ميكروفون 
---
زهرة الطاوله
للحريفه نبع الشيش بيش 
---
قسم الحيوانات 
-------------
تمساح - حوت -حمامه
---
متفرقات زي ايه 
--------------------------
مشط -بايب -خاتم - اشارة مرور 
موبايل - تليفون --طابع بريد - سياره
ريشه - نخله - سي دي  ساعه يد - فانوس - مركب شراعي 
نظاره - هلب  - مسدس - ميزان  - سماعه دكتور  
كف - ميزان
الرموز دي اللي قدرت اشوفها بس فيه حاجات تانيه 
ربنا يفوت الرموز دي علي خير 
---
دائره الساحل وروض الفرج وشبرا والشرابيه والزاويه الحمرا 
المقاعد الفرديه 
6 سائقين علي مقعد العمال 
جزار  مقعد فئات 
قهوجي  مقعد عمال 
وبيقول انه بيمثل القهوجيه في المجلس الموقر 
كهربائي  مقعد عمال 
3  نجارين مقعد عمال 
لا تعليق 
---
قبل العيد اختي  بطارية عربيتها كانت عايزه شحن 
رحت معاها لكهربائي السيارات  عشان ىيجي  يفك البطاريه وياخدها
بعت معانا صبي من الصبيان اللي بيشتغلوا عنده عشان ياخدها
يكشف عليها 
بعد ما فك البطاريه وركب معاناعشان نوديها للكهربائي 
لقيته بيقول لو الستات تقعد في البيت وتبطل شغل وسواقه حنرتاح 
اختي سالته هو انت اخوان  رد وقالها ان شاءالله اخوان 
قلت فرصه افتح معاه حديث قلتله هو انتوا لو حكمتوا البلد حتقعدونا في البيت 
قالي ياريت عشان الشباب يلاقي شغل 
قلتله تقصد اننا مزحمين الشباب قال ايوه 
وماتسوقوش كمان 
قلتله افرض ان في واحد عنده عربيه وسافر وكان بيوصل اولاده المدرسه 
مامتهم ماتوصلهمش قاللي ايوه
قلتله ولو ابوهم  ماعندوش قدره يدفع باص المدرسه يقعدوا الولاد من المدارس 
يبقي قياس علي كلامك مانعلمش البنات 
قالي لا يتعلموا بس يقعدوا في البيت 
قلتله حيعلقوا الشهاده في المطبخ تفكرهم بالتعليم وهيما بيطبخوا
والدكتوره اللي درست 7 سنين وخدت بعد كده ماجستير ودكتوراه 
برضه تقعد في البيت 
قال ايوه تقعد في البيت 
قلتله  ولما حضرتك تتجوز ومراتك تجي تولد حيولدها راجل 
رد وقالي مافيش مانع لو دكتوره كبيره تشتغل 
خدوا بالكم من الرد دكتوره كبيره يعني الصغيرين ماينفعش يشتغلوا 
لما يخلصوا تعليم يستنوا لما يكبروا ويشتغلوا 
ساعتها حيكونوا نسيوا الطب
وكنا وصلنا المحل رمي قنبله خلتني مش عارفه 
اضحك والا اعيط والا اتحسر علي مصر
القنبله انه قالي 
انا حترشح لرئاسه الجمهوريه 
يالله هيصوا رئيس جمهوريه مصر العربيه صبي ميكانيكي 
مين حينتخبوا
وبكده يبقي لازم نستمتع بالسييء لان الاسوا اتي 
حقيقي حزينه جدا  علي مصر 
مع اني دايما اقول بكره حيبقي اجمل من النهارده بس حقيقي مش قادره 
واوعوا اوعوا تقلبوا الصفحه 
ابقوا معي