23‏/9‏/2011

انتبهوا للنصابين

أعزائي
 وحشتوني 
النهارده مش حنتكلم في السياسه ولا علي الحكومه الشريفه
خلونا نحكي في حاجه تانيه 
حاسه اني بقيت مدمنه سياسه ولازم اتعالج 
خلوني الاول اشكر اللي علقوا علي المقال اللي فات 
---
جحاالمصري المصري
ياعمي المقامات محفوطه والعين مش ممكن تعلا علي الحاجب 
الا لو ورمت 
انا اكون ايه جنب معاليك وكتاباتك 
وصفتني باني  بكتب بطريقه استاذنا الكبير احمد رجب 
بس انا فين وهو فين انا لسه في سنه اولي كتابه 
---
استاذي عبدالعزيز اول من شجعني علي الكتابه 
سعدت جدا بتعليقك وربنا يديم الود بينا 
---
الاخ ابو روتا العفروته 
ثورة 25 يناير مش دي اخلاقها بس دي اخلاق الفلول 
---
حكيم عقول مصحح لغتي العربيه اللي بعافيه شويتين قول تلاته 
اكيد حكتب علي اضراب المدرسين بس منتظره اشوف اخرتها 
وانا اقدر انسي المدرسين ده حتي بابا وانا واخواتي لما كنا في المدارس 
كان بيعيد علينا مرارا وتكرارا ويقولنا 
قم للمعلم وفيه التبجيلا . كاد المعلم ان يكون رسولا
---
نرجع للحكاوي بتاعتنا 
اللي فكرني اكتب في الموضوع اللي حتقروه ان في وحده من اصحابي 
حكتلي علي حكايه شبيهه باللي ححكيهالكم 
بس انا حصلت معايا من مده وهي كان اللي حصل  معاها الاسبوع اللي فات 
كنا في المكتب  وهو في الدور الارضي  وحوليه زرع مش جنينه 
كنا منهمكين في الشغل واذ فجأتن سمعت هرج ومرج وصويت 
جريت اشوف ايه اللي حصل لقيت والله الشباب بيجروا بره المكتب وخايفين 
ولقيت اتنين  لابسين جلاليب واقفين في وسط الرسبشن وكل واحد شايل تعبانين
طبعا كنت مرعوبه بس عملت سبع رجاله في بعض وسالت في ايه ؟
السكرتيره كانت واقفه ورايا وعملاني ساتر ماكانتش عارفه ان لو حصل حاجه حشدها قدامي 
هو العمر بعزقه  وياروح مابعدك روح 
قالتلي ان الاتنين دول دخلوا وقالولنا ان المطبخ فيه تعابين 
ورحنا المطبخ وفعلا سمعنا حفيف التعابين 
وعرضوا علينا انهم يطلعوهم وافقنا وطلعوهم وده اللي خلي الموظفين يجروا في الشارع 
لما شافوا التعابين 
سالتها يعني مين اللي سمع الحفيف قالت كلنا 
اخدت الاتنين في مكتبي وقلت للموظفين يرجعوا 
وياحرام لقيتهم مرعوبين والله الشباب كان مرعوب اكتر من الصبايا 
وفي منهم روحوا وقالوا بلاها شغل القهاوي فيها متسع للجميع 
المهم سالت الاتنين ايه اللي عرفكم ان في تعابين في الشركه هنا 
واحد قالي انه كان معدي وبما انه من الرفاعيه بيسمع الحفيف 
شكرتهم وقلتلهم طلباتكم ايه 
قالوا لا مالناش طلبات التاني بقي قالي هاتي ايدك عشان اعزم عليها 
قلتله تعزم ليه قالي عشان لو في تعبان تاني تقدري تطلعيه 
طبعا بيضحك عليه وفهمت انهم نصابين 
قلتله وماله عزم قالي طلعي اللي معاكي 
قلتله اطلع ايه المشط والا المرايا ماعنديش الحاجات دي في شنطتي  
قالي لا طلعي الفلوس كلها ومش حاخد منها حاجه 
طبعا انا مش هبله للدرجه دي طلعت متين جنيه  عشان اشوف اخرتها ايه 
وكنت سايبه باب المكتب مفتوح والموظفين اللي رجعوا 
وقفوا يتفرجوا علي اللي بيحصل 
عشان كده كنت مطمنه انهم مش حيقدروا يعملولي حاجه 
الا لو رموا تعبان عليهم ساعتها ولا حلاقي حد معايا واديلهم كل اللي معايا 
بما فيهم الساعه والجزمه والشنطه حتي الدبله
مسك ايدي زي مايكون بيسلم عليه وقعد يقرا حاجات ممكن يكون كان بيغني 
بس عشان يوهمني   انه بيعزم   ولقيته بيجز علي سنانه  وبقي زي الكتكوت المبلول 
وقالي تقدري تمسكي اي تعبان بفيتي رفاعيه 
قلتله طيب مافيش شهاده تثبت قالي امسكي التعبان مش حيعملك حاجده
 وفعلا مسكت التعبان  بس ممكن لانه مش سام 
وفي جنينه الحيوانات  في بيت التعابين بنقدر نمسك التعبان 
واخد المتين جنيه
قلتله طيب هات بقي الفلوس انا سالتكم ايه طلباتكم قولتوا مالناش طلبات 
قالي لا دول بركه منك قلتله ليه انا من اولياءالله لا بركه ولا حركه
ثم ان دول اللي معايا لاخر الشهر يرضيك البيت مايبقاش فيه فلوس 
يعني الراجل والست عيال  وحماتي المريضه وحمايا المشلول ياكلوا ايه طوب 
طبعا هو عارف اني برضه بتكلم اي كلام بالضالين اخد ميت جنيه وغار 
بس الموظفين كانوا قلقانين وبطلوا يدخلوا المطبخ 
ده نوع من انواع النصب ولما صحبتي حكتلي  حاجه قريبه من اللي حصلي 
عرفت ان النصب هو هو مستمر 
--- 
نوع تاني من انواع النصب  
في بياعين جرايد بيقفوا في الميادين بالليل يبيعوا جرايد اليوم التالي 
لقيت في ميدان واحد  عامل انه بيعيط وانا باخد منه الجرايد سالته مالك 
قالي اصل الجرايد ضاعت ولازم اورد تمنهم  قلتله ضاعت ازاي ؟
قالي كنت سايبها علي الرصيف مالقتهاش
قلتله ماهي موجوده قالي لا مش كلها  وكان في كذا عربيه واقفه 
سمعوا اللي قاله طبعا في ناس صدقته وناس لا 
اللي صدق اداله فلوس 
بعد الواقعه دي بكام يوم كنت في نفس الميدان ولقيت نفس السيناريو 
مش فاهمه النصابين حيفضلوا ينصبوا براحتهم لغايه امتي ؟
ماهو لا في شرطه ولا جيش ولا ظابط ولا رابط 
اخر نصبه دي بشياكه وقنزحه 
كنت بجيب دواء من الصيدليه ورجعت العربيه لقيت عربيه  بيجو حمرا وقفت قدامي 
نزلت منها وحده لابسه اسود ودخلت الصيدليه 
ونزل شاب شيك لابس ساعه دهب وسلسله مفاتيح دهب  وخاتم برضه دهب
ومعاه علبتين سجاير مالبورو وولاعه ديبون
قالي ممكن عشره جنيه  ماصدقتش سالته وقلتله ماسمعتش قول تاني 
قالي اصلي راجع من اسكندريه ووالدتي مريضه 
وبينها في المهندسين والبنزين خلص وماعيش قلوس
حتي اختي دخلت تجيب الدواء واحنا مش معانا فلوس 
قلتله عايز تفهمني انك عايز عشره جنيه تحط بنزين 
انت راجع من اسكندريه وطبيعي ان المهندسين في سكتك مش مصر الجديده 
وبدل حضرتك ماتدخن علبتين سجاير  هات بتمنهم بنزين 
او بيع الساعه الشيك او الخاتم او الولاعه وماتشحتش 
لقيته قالي خلاص خلاص وطلع خد العربيه وجري 
حتي ساب اخته  اكيد بعد مامشيت رجعلها 
روحت البيت بحكيلهم لقيت اخويا بيقولي استني 
عربيه بيجو حمرا وفيها ست لابسه اسود قلتله ايوه 
قالي امبارح لقيتهم في محطه البنزين وطلبوا مني عشرين جنيه 
عشان يحطوا بنزين ونفس الكلام اللي حصل معايا 
طيب بالله عليكم احنا ناقصين نصابين كمان مش كفايه البلطجيه والفلول 
---
شفت كتاب العربي لسنه اولي ابتدائي فيه صوره المخلوع 
ومكتوب محمد حسني مبارك رئيس الجمهوريه 
طيب الاطفال يصدقوا الاهالي والا كتاب الوزارة ؟
---
معليش سؤال اخير
فاكرين فيلم وا اسلاماه بتاع جهاد ومحمود 
لما مبعوث التتار سال وقال 
مع من اتحدث عندما اريد مخاطبه اهل مصر ؟
انا بقي اللي بسال 
ياريت لو حد عنده اجابه يفيدني 
جزاه الله كل خير
خلوا بالكم وماتخلوش حد ينصب عليكم 
واوعوا اوعوا تقلبوا الصفحه 
ابقوا معي










14‏/9‏/2011

طق حنك

 أعزائي
الحقيقه اني متاخره عليكم لان  الكتابه في الوقت ده صعبه 
الكل بيتكلم في السياسه والدين 
الكل بقي ضليع فيهم من الصغيرللكبير 
الاول بس خلوني اشكر اصحاب التعليقات علي مقالي الاخير 
دكتور دودي سعدت بمرورك الكريم 
ومدونتك جميله بس ماعرفتش اعلق 
بيني وبينك اصل معرفتي بالتربيت زي معرفه حضرتك باللغه اليابانيه 
يعني بستعمله بالقدره وبعافر معاه 
ياريت تعرفيني ازاي اعلق  
---
الاخ العزيز ماجد الجلاد شكرا علي تعليقك 
كنت فاكره انك نسيت المدونه بس سعدت فعلا بتعلقك 
---
دكتور احمد الجمال زعلانه ومقموصه عايز تعملي آمر اعتقال
كل ده عشان فتحت شباك العربيه وكلمت واحد من فلول الميكانيكيه 
حاضر حبقي احاول اسمع الكلام 
---
اما الاخ العزيز مصحح لغتي العربيه التعبا نه حكيم عقول 
بالنسبه للوحات الارشاديه دي موجوده في العالم كله ماعدا عندنا 
دي حاجه انقرضت مع الديناصورات
اما الفك المفترس اللي الصيع بيسموه
ماكرباز  ده حدث ولا حرج 
واول مابيلاقوا وحده سايقه بتجلهم ارتكاريا ويزنقوا عليها 
ولازم وحتما يسبقوها عشان الرجوله علي رأي اللمبي مش هز اكتاف 
الرجوله انه يسبق المزه اللي سايقه حتي لو كانت مرضعه قلوان 
وبما ان معاليك حافظ العجوزه حاره حاره وبيت بيت
انا كنت في الحاره اللي بعد مستشفي العجوزه 
وورا زنقه عماره السعوديين 
وتحياتي للريس معمر 
والله كنت حكتب سور مش صور
بس خفت يطلع غلط 
وتضحكوا عليه وتفتكروني بقلد شويكار وبنطق الصاد سين 
والقاف كاف 
منتظره رمضان الجاي عشان اجي انا واختي نفطر عندك حسب عزومتك 
وبكده ابقي دخلت معقل اللغه العربيه من اوسع ابوابه 
واغني واقول اللغه العربيه الفصحي 
استيقظ وركز واصحي وترالا ترالي ترالم 
----
كفايه كده نبتدي المقال دي كانت مقدمه بس عارفه انكم مليتوا 
عمنا شرف شرف بعد ماركب الوزارةوتولي مهام منصبه 
عين ابن اخت معاليه السيد احمد عادل في شركة ثروة للبترول 
وده طبعا بمعرفه ومباركه المهندس عبدالله غراب وزير البترول
علي فكره معظم موظفي هذه الشركه من ابناء الوزراء والمسئولين 
وابن اخته التاني النبي حارسه وصاينه 
اتعين في وزارة الطيران المدني 
السيد المحترم محمد الدمرداش مدير مكتب رئيس الوزراء
اتصل بوزير الطيران المدني وطالبه بتعين ابن اخت رئيس الوزراء
وقال معالي الدمرادش لوزير الطيران 
عايز أخد تمام بكره بانه تم تعينه 
لهجه أمره وقويه قويه من التسوس محميه 
ويابخت من كان النقيب خاله او عمه 
___
دكتور عصام شرف عين  مستشارين لمعاليه تتراوح مراتبتهم بين
18 الف و 25 الف جنيه مصريا فقد لا غير 
محمد حجازي  مستشار شئون خارجية
نجلاء الاهواني  مستشار اقتصادي 
عمر باسم  مستشار تكنولوجيا المعلومات
وده خريح هندسه اتصالات دفعه 2004
ويمتلك شركتين في مجال الاتصالات وشريك لرجل اعمال 
في مركب سياحي اسمه ( كوين )
بس تفتكروا دول كانوا في التحرير مع شرف بيسندوه 
وارجع اقول تاني
احلي م الشرف مافيش ياآه يا آه
مع تحيات توفيق الدقن 
-----
فرق كبير بين الثوريه والفوضوية 
اقتحام السفارة فوضه 
هدم الجدار ثورة 
---
ليه الامعان الزايد في ازلال الشرطه 
ماهي برضه فيها ظباط عندهم شرف ومبادي
ومنهم اخوتنا واولاد عمنا وخالتنا وعمتنا وخالنا 
بلاش نقصي علي الكل نديهم فرصه ونشوف 
والميدان موجود مش حيطبئوه ويحطوه في علبه
---
انا بشوف ان النظام اتبع سياسه فرق تسد
وكل واحد بيلقي اللوم علي التاني 
---
ياجماعه ماحدش شاف او لمح وائل غنيم ؟وغيره
هما اختفوافين والا كانت مأموريه عليها بدل سفر 
ورجع اخوك عند ابوك 
 ---  
كنا محتاجين من البلاد اللي بتمارس الديمقراطيه 
كتالوج بس يكون مبسط عشان نعرف نفهم اللي لينا واللي علينا 
----
الاطباء اضربوا يوم السبت 10 سبتمبر لمده 4 ايام 
وزير الصحه الهمام نزل الاطباءالمحالين علي المعاش 
لجميع مستشفيات الوزارة لمتابعه المرضي اثناء الاضراب 
الاطباء مطالبهم مش كتير وكلها مطالب عادله 
بيطالبوا بتامنهم من عمليات البلطجه المتكررة
ورفع الحد الادني للاجور 
وعزل جميع التيارات الفاسدة 
كان من ضمن لافتات شباب الاطباء الاتي 
انا دكتور انا انسان .ليه ابات مديون وجعان 
حوفزنا تخس النص . نقابة هس هس 
جبلي .. حلمي .. اشرف حاتم .نفس الظلم ونفس الحاكم 
بقترح علي معالي رئيس الوزراء انه يخفض مرتبات مستشاريه 
ويرفع مرتبات شباب الاطباء 
والا دول ولاد البطه السوده والتانين ولاد البطه البيضه 
-----
ياتري ليه سحب التليفزيون الرسمي للدوله 
نبأ تقدم رئيس الوزراء استقالته ورفض المجلس العسكري لها ؟!
----
سؤال خبيث الا لو رئيس الوزراء استقال المستشارين 
واولاد اخو معاليه حيفضلوا مستمرين في وظايفهم 
والا حياخدوا استماره 6 ؟
---
3 محامين كويتين تطوعوا للدفاع عن المخلوع مبارك 
واسائوا لبلادهم 
و4 محامين كويتين برضه تطوعوا للدفاع عن آسر الشهداء
شتان بين الموقفين 
بيتي وبيقول بيته اللهم لااعتراض
----
من اقول  السيد عمروموسي المرشح لرئاسة الجمهورية 
الدستور يحمي الدولة المدنية وليس الجيش 
دستورياسيادي اشتاتا اشتوت 
---
محافظ الجيزه دكتور علي عبدالرحمن قال 
المحافظة ازالت المتبقي من الجدارالخرساني المقام اما السفارة
ولن تتم اعادة بنائة
هما ليه بنوه من الاصل
ده يفكرني بافتح الشباك والا اسده 
عشان بس تكونوا عارفين انها قرارات عشوائيه بدون دراسه 
يعني السور اتكلف قد كده كان لزمته ايه 
---
العجيب ان السياسه فرقتهم والسفاره لمتهم 
---
بهني الشعب المصري 
علي انه لبس قطونيل 
واختار الفستان البمبي  
وهش السلعوه ورقصلها وسمعها اغاني 
وخد نفس طويل وقال هوووووووووووب
مع تحياتي لاعلانات رمضان 
---
اخر سؤال وهو برضه خبيث 
الداخليه ماقدرتش تحمي شقه في عمارة 
حتي لو تبعه للسفاره الاسرائليه 
ازاي حتحمي 20 الف لجنة انتخاب ؟
----
بصراحه وما اخبيش عليكم انا بشفق عليكم من طول المقال 
بس حتقروه حتقروه 
وحتعلقوا حتعلقوا 
يالله بقي نظام بلطجه 
واوعوا اوعوا تقلبوا الصفحه 
ابقوا معي