19‏/1‏/2012

سياسه ورومانسيه اتنين في واحد

أعزائي
وحشتوني وكل عام وانتم بخير ويارب سنه 2012 تكون احسن من 2011
ونعيش في وطن آمن يساع الكل
الحقيقه الاحداث كتييره وسريعه
تعالوا نعمل جوله لبعض الاحداث
---
اصحاب المعاشات  كانت ليهم وقفه يوم الاحد الماضي
بيطالبوا بعلاوتهم المتاخره لسنوات
2005 - 2006 - 2007
كانوا من كام شهر ادوهم علاوة 2008 المتاخره
ووعدوهم بصرف العلاوات الباقيه في شهر يناير
وطبعا وعود خايبه بيسكتوهم بيها
وعدوهم انهم حيبقوا يصرفولهم انما المره دي اصحاب المعاشات
مش مصدقين الحكومه  وهو يعني من امتي الحكومه بتوفي بوعودها
في وقفه يوم الاحد 22 يناير واذا ماسالوش فيهم في اعتصام يوم 27 يناير
وفضيحه مصر حتبقي بجلاجل لان كل العالم بيحترم اصحاب المعاشات
الا مصر بتعتبرهم عاله علي الحكومه او بالاحري
زي خيل الحكومه لما بيقدم بيعدموه
مش فاهمه بصراحه هي الحكومه بتديهم من جيب ابوها والا من اللي دفعوه
بس نقول ايه ماهو عبدالقووووي المعروف بيوسف بطرس غالي
 سرق اموال التامينات وشرخ بالناقه
ربنا لا يكسبه ولا يربحه اخد شقا الناس
ياحكومه اعملي حاجه وبطلي طناش
----
الانهيار الاقتصادي دي الفزاعه اللي بيستعملها المجلس العسكري
للشعب المصري عشان يقول ان الثورة هي السبب
دكتور محمود عيسي وزير الصناعه والتجاره الخارجيه
في حكومه جدو السادس عشر   دكتور الجنزوري
كشف عن مفأجاة وهي حقائق موثقه بارقام تفصيليه
ان عام 2011 شهد تحسن كبير في مجال الصادرات
%18.5 بنسبه ارتفاع 130 مليار و760 مليون جنيه
مقارنه بعام 2010 كانت الصادرات
110مليار و259 مليون جنيه
بتشمل الاتي
مواد البناء 22%
الصناعات الغذائيه16%
الغزل والمنسوجات 16%
الصادرات الهندسية 15.8%
الحاصلات الزراعيه 3%
الصناعات الطبيه 2.3%ات
كما حققت 10 مجالس تصديريه ارتفاعا كبيرا في الصادرات
مقابل تراجع صادررات مجلسين فقط هما الاحذيه والمنتجات الجلديه
بنسبه 7%
والكتب والمصنفات الفنيه 115مليون بنسبه تقل عن 1%
دي بيانات وزير الصناعه والتجاره الخارجيه
بعتقد ان الاحذيه والمنتجات الجلديه تراجعت لغزو المنتج الصيني
الناس بتلاقيه سعره اقل
ايه رأي مجلس العسس في البيان ده
ياريت نلاقي رد وبلاش الفزاعه اللي مخوفه الشعب
وعمااااار ياعسس
----
هشام طلعت مصطفي ومحسن السكري
كلاكيت اكشن صوووووور
اول كلاكيت الغاء حكم الاعدام
تاني كلاكيت الغاء الحبس 15 سنه
تالت كلاكيت حيطلع براءه وابقوا شوفوا
لانها تحولت من محكمه قانون لمحكمه موضوع
وطبعا حيخلوا سبيلهم لانقضاء مده الحبس الاحتياطي
ومولد يادنيا
والحياه بقي لونها بمبي والكلاكيت جنبك و انت جنبي
----
في مهنتين انتشروا بكثره بعد 25 يناير
تساله او تسالها بيشتغلوا ايه الاجابه ثورجي
والتاني  لافح اللاب توب علي كتفه
تساله  او تسالها بتشتغل ايه 
الاجابه ناشط سياسي  او برضه ناشطه سياسيه
اكيد الوظفتين تيواني مش ياباني
انا بشوف انها وظايف  بتدنجاني
----
خطه الامن ل25 يناير 2012
مجلس العسس ووزاره الداخليه وضعوا خطه اكيد متهيالهم ماتخرش الميه
الخطه متدرجه لمواجهه اي احداث شغب
حيستخدموا الهراوات  في يد الجنود البواسل
عشان يضربوا بيهم اهل بلدهم ماشاءالله
ومكبرات الصوت  يمكن المرور داخل في اللعبه وبيقول الجمرك  والنقل يرجعوا لورا
وبعدها يجي دور المياه الملونه اللي تظل علي البشرة لمده 6 شهور
( زي التاتو يعني )
بس برضه الميه الملونه لها حل وهو دهان الوجه والاجزاء الباينه من الجسم
بفازلين  واكيد اصحاب الصيدليات حيكسبوا  كويس  من بيع الفازلين يوم 25 يناير
واخر حاجه اطلاق النار علي الاقدام
وعلي رأي مرجانه جاريه علي بابا
يارب سلم القلل بتتكلم
----
مبارك طااااهر اليد وعادل
ده اللي قاله محاميه فريد الديب
واعلن عن مفاجأه تنسف القضيه يعني من الاخر
المخلوع راجع وحياخد براءه
ويمكن بعدها يطلب العوده لموقعه الاول من الاعراب
ياساتر ياساتر
معقول ده يحصل ده كابوس
بس المحكمه بتحكم بالاوراق
وممكن كونه ابن المؤسسه العسكريه يقدموا اوراق تبرا عم الحاج
ويدينوا غيره ويقولوا هو ده السبب وبعد كام يوم
ممكن يقولوا لا ده ماس كهربائي او مختل عقليا
سبحان ربك العليم
استرها من عندك ياكريم
----
طبعا كلنا عايشين ازمه البنزين وشايفين التكدس الرهيب في محطات البنزين
يوم الاحد شفت الشوارع واقفه ومحطات البنزين يا فاضيه من البنزين
او العربيات بطول كيلو او اكتر قدامها
يوم الاتنين قلت لازم لازم ولابد وحتما احط بنزين
كنت في مدينه نصر عشان ارجع مصرالجديده قعدت ساعه ونص في الطريق
قلت اروح محطه من المحطتين اللي بتعامل معاهم
قال يعني عشان عارفيني 
رحت اول وحده لقتها فاضيه مافيش فيها بنزين
العمال قالولي الساعه 5 صباحا حيكون عندنا بنزين
او 7 الصبح بس ممكن ماتلحقيش
قلت خلاص اروح البنزينه التانيه . رحت بس لقيت الطابور طويل جدا
قدامي اكتر من 90 عربيه قلت خلاص حقف وامري لله
كل شوي اقدم خطوتين تلاته الساعه عدت 12  وانا واقفه
مش حتنازل عن دوري ابدا
اقعد في العربيه شوي وانزل منها شويات لكسر ملل الانتظار
بعد ساعتين لاح الامل وشفت البنزينه طبعا فرحت جدا لاني قربت
لقيت عربيه جايه بسرعه وقفت عند مدخل البنزينه والكل وسعلها الطريق
نزلت وسالت اشمعني دي دخلت من غير دور
قالولي اصله حيمون 95  انما احنا حنمون 80
قلتلهم انا مش بمون 80 انا بمون 92 قالولي لا مافيش
المتوفر 80 او 95
قلتلهم خلاص حمون 95 لقيت الكل بيوسعلي الطريق عشان ادخل المحطه
كان احساسي اني صلاح الدين الايوبي  وبفتح حصن عكا
دخلت ومونت وخرجت في حوالي 10 دقايق
سالتهم مافيش بنزين 92 ليه قالولي لا حيجي الصبح
بس تعالي الساعه 7 لانه الساعه 12 بنكون شطبنا 
 قالي واحد من العمال تعالي الصبح وربنا يسهل
قلتله اي صبح قالي بكره قلتله قصدك النهارده
طيب البنزين اللي حطته اشربه والا ايه رايك
قالي اه طيب تعالي بعد بكره
--
بصوا وصلوا علي اللي حيشفع فيكم يوم القيامه
بنزين 90 سعر اللتر 170 قرش
ينزين 92 سعر اللتر 180 قرش
اما بنزين 95 ده سعر اللتر 275 قرش
والله لقيت عربيات 128 مكحكحه وعربيات حالتها يرسي لها بتمون 95
بالذمه ده مش حرام  الغلبان اللي عنده عربيه مكحكحه بيقضي بيها مشاويره
شوفوا حيدفع فرق قد ايه ومضطراكيد
وبيقولوا المضطر يركب الصعب
ومايركبش الميكروباص لانه اكيد حيغلي
ولتر في التنك ولا مليون في البنك
ووزاره البترول بتقول مافيش ازمه لو حقيقي مافيش ده يبقي اسمه ايه
ترشيد استهلاك والا بروفه لما قد يحدث
وسلامات ياوزير البترول
---
تعالوا بقي نتكلم كلمتين في الرومانسيه ولو اني مش باجيدها
بس حقولكم علي حاجه بحس بيها
كنا قبل الانترنيت
بنقرا كتاب من الورق بنلمس صفحاته  باصابعنا وبنطلب صداقته
حاليا مابقناش نقرا الا علي النت
وكمان الرسائل الالكترونيه مالهاش في رسائل الحب الملونه
حتي التواصل بينا في كتير بيرتدوا اقنعه عند التعامل معهم
كتير بحن اقرا كتاب ورقي واعيش معاه
بسيب النت وارجع للورق وما احلي الرجوع اليه
----
تعريف بسيط للرجل المغرور
بيتصور انه قرا كتاب المرأه وبيعرف اصلها وفصلها
وبيفهم في اسرارها وطقوسها ومناخها
والحقيقه انه مر علي فهرست الكتاب
وانه لم يقرا الصفحات المحزوفه  ولا المكتوبه بالحبر السري
-----
معليش بقي دخلت السياسه في الرومانسيه
 اخر مره اكتب حاجه رومانسيه من نفسي
بس مش حتتكرر تاني
واوعوا اوعوا تقلبوا الصفحة
ابقوا معي



هناك 4 تعليقات:

غير معرف يقول...

استاذتنا الغاليه
حضرتك نسيتي كلاكيت مهم جدا وهو
انك كاتبه رومانسيه كمان مش سياسيه بس
فضلا عن خفه الدم اللي اعتدنها منك . وقفشاتك المتمكنه
رينا يوفقك وعايز اقولك حاجه تانيه صورتك بتقول انك جميله فعلا
مش حعلق علي حاجه تانيه
دكتور وائل سمره

غير معرف يقول...

كلامك رائع اوي يا لينا ، بتمشي خطوات صغيرة لكن كلها ثقة ، بجد اسلوبك رائع ومهذب وبسيط وبيطلع من القلب للقب ، كنا احييك على لغتك المستيقظة والتي ظهرت في كلمة فهرست وليس فهرس كا اعتاد الأخرون ان يكتبوها ، لك مني التحية و في انتظار الجديد
قرطبة المصري

غير معرف يقول...

العزيزة ليلى
تحليلاتك السياسية الممزوجة بطابع الفكاهة والسخرية صارت أكثر نضوجا ،، وثقلتها خبرة المقالات المتتالية ،، عجبني جدا لفظ جدو إشارة للجنزوري ،، أما بخصوص البنزين فالواقع أن كمية البنزين التي تدفعها الوزارة طبيعية وكافية ،، لكن تهريب البنزين المدعم من الدولة إلى لبنان وتركيا عن طريق شركات البترول مثل التعاون وغيرها هو السبب ،، لو كان المجلس السمكري بداخليته وباشواتها عارفين يحكموا البلد مش يقمعوها ماكان في أزمة ....
أما الرومانسية ،، فسنة أولى رومانسية نغفر خطاياها،، لكن لن نسامحك إذا توقفت ،، مافيش أحلى من الرومانسية حتى في السياسة ...
حكيم عقول

غير معرف يقول...

كنت فى شغف ولهفه هاذه المره لأن أقرا المقال ولسبب بسيط أننى قرأت كلمه رومانسيه حيث اننى افتقدها تقريبا من عام افتقدها بسبب وبغير سبب بالرغم من ان مفهومى للثوره هوا احتضان الشعب للضعيف والاكنى لم اجد فى مقالك اى شىء يدعو او يشير للرومانسيه غير لون مدونتك البمبى واتخيل ان لون سيارتك بمبى ايضا ولا انكر انى ابتسمت عندما علمت انكى شربتى المقلب ومونتى بنزين 95 تماما كما كان يحدث فى حكومه مبارك وكان تجار الحشيش يمتنعون عن بيع الكميه المخصصه لهم ويبيعون الكميه الرديئه المخصصه للحكومه ولجهاذ الشرطه كمااخبرنى صديق فى مكافحه المخدرات أن ذاك .....كنت انوى الذهاب لميدان التحرير يوم 25 بملابس انيقه لعل وعسى تقابلنى مذيعه او مقدم برنامج حتى اشجب واندد ولاكن بعد تأكيدك ان فيه مياه ملونه سوف أذهب يوم 25 بملابس البحر شورت وفانله وكاب ... حتى اشعر بالندم اننا تخلينا عن الميدان عندما تركناه لحكومه شفيق التى اعطت الدعم لمبارك واعوانه فى طمث كل شىء يدل على مسرح الجريمه العيب فينا وليس فى غيرنا ولابد من دفع الثمن .......... تحياتى يا برنسيسه ودائما للأمام والرقى كما عاهدت فيكى ...ملحوظه أخيره الرجل الذى يقر بأنه صائد للمرأه وأن الفريسه أضعف من الصياد أقول له من خلال خبرتى المتواضعه فى الحياه أن الصائد المحترف فى هاذه العلاقه هى الفريسه وليس الصائد المزيف وقوه الفريسه فى انها توحى للصائد انه هو الصياد تحيااا تى .. هشـــام أ بوعيش