22‏/1‏/2010

اتكلم ارضي يا ابن بلدي

أعزائي
كل ما نحتاج نكلم اي خدمه من خدمات التليفون الارضي تسمع الاغنيه الشهيرة
اتكلم ارضي يا ابن بلدي صوتك بقي واصل اوي عندي
بس الحقيقه مافيش صوت بيوصل عندهم وخصوصا لو شكوي
اعلنوا ان فاتوره يناير حنقدر نعرفها يوم 20 يناير
والمحاسبه حتكون 4 شهور مش 3 شهور
واعلنوا عن جوائز اللي يدفع في الاسبوع الاول
يحق له دخول السحب اربع مرات في الشهر
واللي حيدفع تاني اسبوع حيدخل السحب 3 مرات في الشهر
والجائزة100000 جنيه للفائز الاول
75000 جنيه للتاني
50000 جنيه للتالت
25000 جنيه للرابع
وده غيرجوائز عباره عن
20 جائزه كل منها 10000جنيه
طبعا ده كلام للاستهلاك المحلي وكل واحد يجري يدفع يفتكر انه ممكن يكسب
المشكله ان حاليا بنعرف الفاتوره عن طريقين
الاول بنكلم 111 نعرف قيمه الفاتوره
اما الثاني بتدخل علي الانترنت تعرف قيمتها
او حضارتكم تروحوا تقفوا في طابور ولا طوابير العيش
تسالوا عن الفاتوره وتتحايلوا
غير انكم برضه بتقفوا في نفس الطابور لما بتدفعوها
الوسيله الاولي والتانيه غير متاحه بمعني
انك لو اتصلت علي رقم 111 حتقول كل بياناتك
بس الاول تسمع كل الاغاني التابعه لهم
وكمان تسمع خدماتهم وبعدها يدولك اختيارات تطلب قيمه الفاتوره
يطلبوا منك كود المنطقه - رقم التليفون
وطبعا بين كل اوبشن والتاني بتنتظر عشان المكالمه تبقي اطول
وبعد مايقولك ان الرقم اللي حطيته هو كذا
هههههههه
بعدها يقولك اتصل في وقت لاحق
اما اذا دخلت علي الانترنيت برضه نفس الاجابه
يعني الطريقين مسدودين
انا بصراحه استفذوني طلبت 111 بس خدمه الفواتير
اللي ردت عليه قلتلها ان الطريقتين مش شغالين
وان دي خدمه عامه ماينفعش انها من يوم 20 تبقي عطلانه
يبقي لما تليفونات بيوتنا او شغلنا تعطل شهر
مش حنلومك
قالتلي ممكن اقولك الفاتوره كام
قلتلها انا بتكلم اشتكي اديني مسئول الشكاوي
قالتلي دقيقتين واوصلك بالاستاذه ياسمين
انتظرت ورجعت قالتلي الاستاذه معاكي
كلمت الاستاذه ياسمين وقلتلها ان الخدمه عطلانه
ودي خدمه عامه ومش كل الناس عندهم انترنيت يعرفوا يشوفوا الفاتوره
قالتلي اصل الضغط علي معرفه الفاتوره السبب في العطل
لان 80 مليون عايزين يعرفوا الفاتوره
ده بقي عشان تليفون لكل مواطن
حتي الاطفال عندهم تليفونات خاصه بيهم
قلتلها بس دي خدمه عامه وبفلوس مش ببلاش يبقي ازاي تتعطل 3 ايام
يبقي احسن نستعمل الموبيلات
ردها كان رد بايخ ورد وحده عمرها ماعرفت تعامل الجماهير
ده براحتك لو عايزه تستعملي الموبايل يبقي اختيارك
قلت الله ماطولك ياروح
سالتها الخدمه دي تكلفتها كام
قالت زي المكالمه العاديه
قلت يعني كام
ردت ان فتح الخط 8 قروش وكل دقيقه وطبعا من اول دقيقه 3 قروش
شوفوا بينضحك علينا قد ايه يعني لو عايز تتكلم بتاخد حوالي 10 دقايق
قلتلها ايوه عشان كده بتتاخروا علينا في الرد
وكمان بتسمعونا اغاني والاوبشن تبعكم وتعيدوا وتزيدوا فيهم
غير ارقام 0900 تبع المسلسلات وكرومبو وبايره الخاطبه والرسام رسم صورة مين
وغيره وغيره اللي بتضحكوا علي الشعب بيها
قلتلها اقدم شكوي فين قالتلي انا ممكن اقدمك الشكوي مليني
طبعا ملتها وانا مقتنعه انها مش حتقدم ولا حتي حتاخر
ما اقتنعتش كلمت اوبشن تاني هو شكاوي الفواتير
اللي ردت عليه قلتلها عايزه مسئول عن الشكاوي
قالتلي طيب اعرف ايه المشكله
قلتلها لو عرفتي حتعملي ايه انا عايزه حد مسئول
قالتلي طب دقيقتين واوصلك بالمسئول
انتظرت وبعدها قالتلي معليش دقيقتين تاني انتظرت
بعدها برضه دقيقتين تاني بقوا 6 دقايق
واخر مره قالتلي دقيقتين براجع بيانات
قلتلها كل اللي بترجعيه هو رقم التليفون واسم صاحب التليفون
واذا كان بيسدد الفواتير والا لا وده مايخدش الوقت ده كله
الا لو بيعينوكم وبعدين يودوكم محو الاميه
قالتلي خلاص اخر دقيقتين حوصلك بالاستاذه ياسمين
قلتلها انا مش عايزه الاستاذه ياسمين انا عايزه رئيسها
وصلتني بالاستاذة مريم
نفس الكلام ونفس الاجابات
قالتلي انا ممكن اجيبلك قيمه فاتوره تليفونك
رديت وقلتلها شكرا انا جبتها
ردها عليه كان غريب وهو كالاتي
طيب خلاص يبقي زعلانه ليه وبتشتكي ليه
قلتلها انا جبتها بس في غيري كتير ماعرفوش يجيبوها
هي المشكله مدام بعيده عني تبقي لو ولعت الدنيا اقف متفرجه
وقلتها لو كل واحد قال وانا مالي عمرنا ماحنتقدم
وحنفضل محلك سر يعني اللي مش عارف يجيب الفاتوره يولع
بصراحه لقيت سلبيه في الردود
مش عارفين حتي يشغلوا موظفين تقدر تمتص غضب الجمهور
اللي هو في الاول والاخر بيدفع الفواتير اللي هما بياخدوا الرواتب منها
اخر المكالمه قلتلها لكي الله يامصر
ماسكتش طلبت الدليل وطلبت رقم مكتب رئيس مجلس الادارة
رد عليه واحد قلتله مساءالخير يافندم
ممكن اخد رقم مكتب المهندس عقيل بشير
رد عليه قالي في اي منطقه
قلتله هو حضرتك ماتعرفوش قالي لا
قلتله ممكن سؤال هو حضرتك بتشتغل فين
قالي في المصريه للاتصالات
قلتله وهو رئيس مجلس الادارة
اداني رقم مكتب الشكاوي الاداريه
طبعا النهارده الجمعه اجازه وبكره كمان
بس برضه حتكلم يوم الاحد
طولت عليكم بس عايزه اوضحلكم حاجه
الشبكه المصريه اللي بتقربنا كلنا
فتح الخط 8 قروش كل دقيقه اعتبار من الدقيقه الاولي 3 قروش
المكان اللي حتكلمه يبعد عنك باقل من 60 كيلو 8 قروش
اكتر من 60 كيلو 16 قرش
لو اتصلت بموبايل 30 قرش للدقيقه بيقولوا خفضوها ل15 قرش
بس اشك في التصريح ده
الدولي له سعرين الاول من 8 صباحا ل8 مساء
والتاني من 8 مساء ل8 صباحا وده بيكون سعرة اقل
اما الدليل فكان مجاني ثم ب3 قروش للمكالمة
انما الان ب50 قرش للمكالمة
من يونيو 2008 رفعت اسعار تعريفه المكالمه بنسبه50%
وكانت بالتزامن مع خفض رسوم التركيب نفسها
مع زياده رسوم الاشتراك الشهري بنسبه 20%
يعني المواطن بيحملوه زياده مش عامل لها حساب
وحده من اصحابي كانت قاعده وبتسمع كل اللي حصل
لقيتها بتقولي عصبتي حالك تفتكري ان اي حاجه ممكن ينصلح حالها
قلتلها ماهو انا وانتي وفلان وعلان لو اتكلمنا يمكن نصلح الحال
وقلتلها كمان اني قدام نفسي كفايه اني شفت غلط وماسكتش
بس ده بقي حالنا
ونقول زي مابيقولوا في الاغنيه
ياجبيبي قوم كلمني وكلم ماما
ومن اسوان لسكندريه
طنطا لاسماعيليه
الخدمه ميه ميه
ده علي اعتبار ان 111 بترد علينا
شبكه مصريه بتقربنا كلنا
فعلا بتقربنا من الاكتئاب
خساره
واقولكم اوعوا تفكروا تقلبوا الصفحه
ابقوا معي

18‏/1‏/2010

مراجعه معلومات عامة وهامة

أعزائي
كنت من حوالي 4 او 5 ايام علي البال توك في روم
دخلت لقيت اللي علي المايك دكتوراه في القانون
تطرق الحكي لحمورابي
استغربت لما لقيت اسئلة علي التكست
بيسالوا مين حمورابي
بصراحه مش عارفه اذا كان السؤال حقيقي
والا سؤال بيقصدوا بيه المزح
بس انا قلت يمكن في كتير نسيوا معلومات
بعتبرها انا شخصيا انها مهمة قلت نعمل مع بعض
Revision
يفكرنا لو ناسين
حنتكلم عن 3 شخصيات مهمه
حمورابي
---
اسمه الحقيقي حمورفو وهو اسم مركب من اسمين
(حمو) و (رفو)
سادس ملك من ملوك السلالة المعروفة بسلالة بابل الاولي
حكم من عام 775 حتي عام 792 ق.م
حكم بابل وكانت البلاد دويلات منقسمه تتنازعها السلطة
فضمها وكون امبراطورية حكمت
العراق وبلادالشام حتي سواحل البحر المتوسط
مسلته الشهيرة محفوظة في متحف اللوفر بباريس
كتب عليها قوانينه باللغة المسمارية واللغة البابلية
وهي مصنوعة من حجر الديورت
يبلغ ارتفاعها 8 اقدام حوالي 225سم
قطرها165سم ومن الاسفل 190 سم ومن الوسط 60سم
ورسم علي أعلي المسلة صورة
الاله شمش (اله الشمس - واله الحق والعدل)
بالمسلة 282 مادة تعالج مختلف شؤون الحياة
تشمل حقوق وواجبات الافراد كلا حسب وظيفته
ومن اوائل القوانين في تاريخ البشر شريعة حمورابي
وركزت علي السرقة والزراعة ورعاية الاغنام
واتلاف الممتلكات وحقوق المرأة وحقوق الاطفال وحقوق العبيد
والقتل والموت والاصابات
ورقمت البنود من 1 الي 282 مع الاشارة الي البنود
13-66-99-110-111 مفقودين
---
ابوقراط او ابو الطب
---
هو ابن اقليدس ابن ابو قراط
طبيب يوناني ولد عام 460 وتوفي عام 377 ق.م من جزيرة كورس
ويطلق عليه ابو الطب ومن اعظم اطباء عصره
القرن الخامس قبل الميلاد
سعي لفصل التطبيب عن الدين والفلسفة
لانه كان يؤمن بان الامراض تنشأ من اسباب طبيعية
وليست من عمل الالهه
تعامل مع الجسم البشري ككتلة واحدة مترابطه
وقام بوصف مرض الالتهاب الرئوي والصرع عند الاطفال
وكان يؤمن بان اساس الصحة هو الطعام الصحي
والهواء النقي والنظافة والراحة
اول من دون الطب والف الكتب بثلاث طرق
بعضها بطريق الالغاز
وبعضها بطريق الايجاز
والثالث اعتمد فيه علي التصريح والبيان
ومن كتبه
الاجنه - طبيعة الانسان -الاهوية والمياه والبلدان
والفصول
صاحب فكرة القسم الشهير الذي يقسمة الاطباء قبل مزاولة مهنه الطب
وقد اعلن في 19 سبتمبر عام2003 يوم عالمي لابوقراط
----
سيبويه
---
هو عمربن عثمان بن قنبر ابوبشر
ولد عام 760 بمدينة بيضاء (نساباك) باقليم فارس
علي بعد8 فراسخ من شيرازبايران
وتوفي عام 793
فارسي الاصل قدم الي البصرة حيث كانت مراكز العلم والعلوم
اشتهر باسم سيبويه وهو لقب فارسي يعني
(رائحة التفاح )
وسمي بهذا الاسم لان وجنتيه كانتا كانهما تفاحتان
اول من بسط علم النحو وصاحب كتاب حجة العربية ودستورها
تتلمذ علي يد عبقري العربية الخليل بن احمد الفراهيدي
وابو الخطاب الاخفش
وعيس بن عمرو
وابو زيد النحوي
لم يصغ لكتابه اسما ولا مقدمة ولا خاتمه
ويقال لان الموت لم يعطيه مهله
وعرف الكتاب باسمه واول ما يخطر علي البال عند الحديث
علي اللغه العربيه هو سيبويه وكتابه
نهج في دراسة النحو منهج الفطرة والطبع
يدرس اساليب الكلام في الامثلة والنصوص
ويكشف فيها الصح والخطأ
او الحسن والقبيح
او القليل والكثير
ومن تلاميذ سيبويه عالمان جليلان
فطرب (ابومحمد بن المستنيد المصري )
والاخفش (ابوالحسن سعيد بن مسعدة )
----
اعتقد انها مقاله دسمه
كل فتره حكتبلكم عن عظماء زمان
عشان نفضل فاكرينهم
علي فكره لو سيبويه كان موجود وحيقرا مقالي كان اترحم علي اللغه العربيه
اللي بكتبها من غير همزات وممكن تلاقوا فيها غلطات
استحملوني
بس اوعوا تقلبوا الصفحة
ابقوا معي

5‏/1‏/2010

هلوسه في الشارع السياسي

أعزائي
كل عام وانتم بخير بمناسبه العام الجديد
في الحقيقه كان نفسي اكتب حاجه تفرحنا كلنا
بس ظروف مصر مش مساعداني
اعتبروا اللي حتقروه ده هلوسه
----
علاءالدين فهمي كان مدير هيئة البريد
كان في مكتبه لغايه الساعه وحده ونص الظهر
يوم 3 يناير وفجأه نزل يجري الساعه اتنين الا ربع
عشان يحلف اليمين ويبقي وزير المواصلات
الوزير الجديد خصخص هيئه البريد
والفلوس حطها عالبركه في البورصة
ولما خريجي تجارة حلوان قسم بريد قدموا في الهيئه
رفض تعينهم وكمان دفع لجامعه حلوان
5 مليون جنيه عشان تلغي قسم البريد
وبالتالي جامعه حلوان لغت القسم وكتمت علي ال5مليون جنيه
من لا يملك دفع لمن لا يستحق
اطرف تعليق علي السكه الحديد سمعته من دكتور الاسنان بتاعي وهو
اختصار سكك حديد مصر
س . ح . م
سافر حتموت محروق
الوزير الجديد صاحب رئيس الوزارة الرشيده
بالاحري من شلة نادي المعادي
الشلة اللي بيرئسها رئيس الوزراه النظيفه
يوووووووه اقصد الرشيدة
والوزير كان اشتغل مع رئيس الوزراة قبل كده
يعني بقي زيتنا في دقيقنا
---
مجلس الشعب وافق علي الضريبه العقاريه
ورجع يدرس تاني الغاء الضريبه علي المسكن الخاص
او اللي مش بيدر ربح علي صاحبه
موافقون .موافقه بالاجماع
---
عبدالقوي الشهير بوزير الماليه
بيفكر يفرض ضريبه جديده علي ممرات الطائرات
بمطارات الجمهوريه
اللي مش عاجبه مايركبش
الشهير بوزير الطيران المدني
حيزعل من عبدالقوي
وممكن يصعد الامر لعم الحاج الكبير
ويشتكي عبدالقوي
وبم ان اللي مش عاجبه مايركبش كان زميل عم الحاج
يارب يارب ادعوا معايا ان عم الحاج يدي عبدالقوي استمارة 6
قولوا امين
---
السيد المحترم ابراهيم سليمان وزير الاسكان السابق
اخد 20 مليار جنيه بس رشوه
وخصص اراضي للمدام واخوتها والاولاد
والحبايب والمعارف والقرايب
وزغرتي ياللي مش دريانه
20 قطعه لاخوات المدام واولادهم
بواقع قطعه ارض وفيلا بمارينا لكل واحد
حسن دره رجل الاعمال 1500 فدان
بالقاهرة الجديده و6اكتوبر والشيخ زايد والشروق
وجدي كرار رجل الاعمال فندق بمارينا بحق الانتفاع
وباع له كمان سينما مارينا ومبني البولنج
كما باعتله مدام الوزير قطعتين ارض بالشيراتون
كما اعطي بالامر المباشر لشركة المهندسون المصريون
300 فدان
وللشركه المتحدة للاستثمارات 300 فدان
بشارع 90 بالتجمع الخامس سعر المتر 250 جنيه
ضيع 11 مليار جنيه
فين الحكومه من كل ده
دلوقتي جايين تحاسبوه
اكيد اختلف مع حد من كبرات البلد ودي قرصه ودن
عشان مايعملش كده تاني وبكره تختفي مستندات مهمه
ويطلع زي الشعرة من العجين
ويابخت من كان النقيب خاله
---
السكر غلي وبم انه غلي اي حاجه السكر
داخل في صناعتها حيغلي ودي هدية وزارة التموين
للمواطنين بمناسبه السنه الجديده
---
وزير صحه الفنانين الشهير بوزير الصحه
ساب الفنانين لان صحتهم عال العال
نشكر ربنا علي كده
وغير المسار وبقي عداد
كل شغله حاليا انه يعد وفيات انفلونزا الخنازير
---
وزير التربيه والتعليم السابق
اتطعم وخد استمارة 6 وراح علي اسكندريه
قال اصيف في الرواقه
---
الوزير الجديد لوزارة التربيه
دكتور احمد زكي بدر
لما كان رئيس جامعه عين شمس
وفقه الله وحول معيدين وباحثين لموظفين
وكان بيمشي في الجامعه وسط حراسه امنيه مشدده
ومعروف عنه الاستعانه بالامن والاستقواء به علي العاملين والطلاب
طيب ده حيتعامل ازاي مع تلاميذ المدارس الابتدائيه
بعد ماكان بيضرب طلاب الجامعه بالشلوت
---
تطعيم انفلونزا الخنازير مسئولي الوزارة بيقولوا
انه آمن آمن آمن بالتلاته
سؤال صغير حساله ؟
الموبيلات عمرها في مصر حوالي 14 سنه
وفي امريكا واستراليا واوربا موجوده من قبلنا
والي يومنا هذا لم يثبت اذا كانت أمنه او مضرة
يبقي امتي عملواتجارب علي التطعيم
واثبتوا انها آمنه بالتلاته
---
حقيقي قلبي وجعني عليكي يامصر
مش عارفه حيعملوا فينا ايه اكتر من كده
ولا حنصحي من الكابوس ده امتي
بس اكيد الظلم له نهايه
جالكم اكتئاب طبعا زي ماجالي
معليش بس اوعوا تقلبوا الصفحه
ابقوا معي