19‏/12‏/2013

شخبيط ولخبيط

أعزائي 
معليش بقي كان في مشكله وماكنتش عارفه ادخل المدونه 
والجهود الذاتيه ماجابتش اي نتيجه 
الا لما استعنت بصديقي العزيز احمد حافظ حل المشكله مشكور 
وانا بدين له بدخولي المدونه مره تانيه 
بعد مايأست  من الدخول 
بجد كتر خيره 
---
  

 كل عام وانتم جميعا بالف خير  لقدوم العام الجديد 
يارب سنه جديده علينا سعيده 
نخلص فيها من الاعتصامات والمظاهرات وكل الهم اللي مش جايب  تمنه 
----
في اصدقاء كتير زعلانين مني عشان بقول لو الفريق السيسي 
اترشح للرئاسه مش حنتخبه 
انا ماعنديش اي اعتراض علي السيسي كاشخص 
انما اعتراضي عليه انه في مكانه افضل 
راجل وزير دفاع  عارف شغله كويس  وكمان شغلته مش اي حد  ممكن ينجح فيها 
ده بيراس جيش مصر اللي بيحمي ارضها 
وبيحمي الشعب لو لا قدر الله حد فكر انه يحاربنا 
وبرضه نفسي قبل ما اموت اشوف رئيس مدني 
لا عسكري ولا اخواني
بعتقد ان اللي حيترشح للرئاسه حيفكر الف مره 
وده لاحتمال ان السيسي يترشح لان ساعتها  فرصته للنجاح  حتبقي معدومه 
ولو ان اي رئيس حيحكمنا مش حيعجب الكل 
لان في ناس مننا حيطالبوه بحاجات كتير 
 سقف المطالب ارتفع عند كل الشعب المصري 
والجديد ان جمال مبارك اخد براءه النهارده في قضيه ارض الطيارين 
ومافيش عليه احكام فاذا اخد افراج وده غالبا حيكون 
ساعتها مافيش مايمنع من انه يترشح لرئاسه الجمهوريه 
النهارده كانوا بيهتفوله في المحكمه بعد اعلان براءته وبيقولوا 
ياجمال يا ابن مبارك الرياسه في انتظارك 
والايام الجايه حتجيبلنا اخبار جديده 
وفي الاول والاخر الصندوق هو اللي حيبقاله الرأي النهائي 
بس يارب يمررها علي خير 
---
الحكومه الرشيده بقياده جدو البلاوي 
من اول السنه الجديده قررت ان يكون الحد الادني للمعاش 1200جنيه 
والحد الادني لموظفين الحكومه هو 1500 جنيه 
ماتفرحوش  !!!!! قولتولي ليه 
سؤال بسيط جدا 
المواد التموينيه واللحوم والاسماك والالبان والاجبان 
والخضروات والفاكهه 
حترتفع حتبقي بكام؟
من دلوقتي قبل ما يصرفوا ولا يقبضوا كل حاجه غليت
الحياه في مصر بقت غاليه 
والكل بيعاني فقير  ومتوسط وغني 
انا بقترح تثبيت الاسعار وبلاها زياده 
---
الست آم شيماء حرم الرئيس المخلوع 
ادلت بحوار لوكاله الاناضول وقالت فيه 
ان عندها كل اسرار البيت الابيض لانها صديقه لهيلاري كلينتون 
من ايام ماكانت عايشه في امريكا وولادها بيتعلموا هناك 
عقبال كل الحبايب لما ولادهم يتعلموا في امريكا شيكا بيكا  
وقالت ان الصداقه اتوطدت بعد ما ابو شيماء ركب  كرسي الحكم 
وفي حاله ترشيح مسز كلينتون للرئاسه الاخوان حيسندوها 
زي ماساندوا اوباما في الدورتين 
وناشدت كل زوجات الاخوان الموجودين حاليا في السجون 
انهم يصبروا ولو حصل ان ازوجاهم ماتوا 
هما حيجوزوهم بعد شهور العده 
يالله عالبركه 
زغرتي معايا يا انشرررررراح


وكمان كانت بتناشد بنات جامعه الازهر والاخوات انهم يستمروا 
في الاعتصامات والتخريبات 
ونعمه النصايح 
------
الجو السنه دي بارد جدا 
لا احنا مش متعودين علي كده
 ولا بيوتنا مبنيه علي اساس ان في برد ممكن يجي 
يعني لا الحوائط فيها عازل برد ولا حتي حر 
هي مبنيه بقدره ربنا 
الجمعه اللي فاتت صحينا بعد ليله بارده جدا
 علي التلج مغطي اجزاء كتير من مصر
والنشره الجويه ماقالتش ان في برد جاي بالشكل ده 
بس هي نوهت ان يوم الاربع اللي هو امبارح جايه عاصفه ثلجيه من روسيا 
قلت لاهلي واصحابي وكمان كتبت علي الفيس بوك ده
---
مش قلتلكم انها ( الفشره الجويه )
النهاره الاربع لافي مطر ولا سيول ولا تلج
ولا موجه جايه من روسيا
ولا اي حاجه غريبه في اليوم كله
طول عمر الارصاد الجويه بتفشر
عشان تبقوا تصدقوها
---

الصوره دي والله في مصر 
في التجمد الخامس 
قصدي التجمع الخامس 
---
انا كمان كتبت ده وياريت قرائي الله عايشين في امريكا يفتونا بالصح
---
سؤال ملح 
امريكا كل سنه بتعمل مسابقه ملكه جمال المغتربات وماحدش بيسمع عنها حاجه لانه حدث مش مهم بالنسبه للمصريين !!!!
السنه دي ليه كل الضجه علي ملكه جمال المغتربين ؟
واللي لفت انتباهي ان برنامج العاشره مساء عامل انترفيو معاها هي ومامتها
والبرنامج مستضفها عشان يلمعها مش اكتر ,, ووائل الابراشي لطيف جدا معاها
علي فكره هي وصلت من يومين مصر وهي حفيده المؤلف المبدع طاهر ابو فاشا
سؤال
مش حقول ازاي هي بتمثل مصر وخدمت في الجيش الامريكي مده 4 سنين
ومش حقول لو حصل حاجه بينا وبين امريكا حتقف مع مين ضد مين
انما حقول ازاي تمثل مصر وهي اصلا مش بتتكلم عربي
انا بصراحه شايفه ان في حاجه غلط في الموضوع كله او بالاحري شامه ريحه مؤامره

وكله حيبان في وقته .وعمار يا امريكا يابلاد الفبريكه 
---


هي دي
---


ولحد كده وخلص الماتش خلص ازاي انا ما اعرفش 
والسنه كمان خلصت وان شاءالله اشوفكم السنه الجايه 

واوعوا اوعوا تقلبوا الصفحه 
ابقوا معي