23‏/9‏/2012

نيللي نيللي وشيرهان شيرهان


                            

                                                  أعزائي                                 
                        نشرت البوست ده في صفحتي علي الفيس بوك
                                         كان يوم 9 سبتمبر

                   التعليقات اللي وصلتني تعليق للدكتور مصطفي عبدالعال
          علي فكره ده استاذي اللي علمني السياسه وشجعني علي الكتابه وكان تعليقه
Mostafa Abdelaal تعرفي ان فعلا دي حاجه قربت تنقرض في مصر غالبية الناس (بتطجن) في كلامها ودي ظاهره تحتاج انك تكتبي فيها مقال من مقالات الحلوه
                             وفعلا فكرت اني اكتب في الموضوع ده ونسيب السياسه
بس راجعينها في المقال الجاي
          بنلاحظ حاليا ان الشباب  مش عايزه اقول مابقاش مؤدب انما بقي الادب عنده حاجه مش مهمه
           يعني مابقاش في احترام للكبير حتي بنلاقي الشباب  بيكلم مامته وباباه زي مايكونوا اصحابه
                     واستبدلوا  نعم بايه ,, وحاضر  بطيب حبقي اشوف ,,وحضرتك بانت
                              ومابقاش في لو سمحت , ومن فضلك ,وبعد أذنك               
                                غير بقي الترقيه والضحك علي الجيل القديم
                      الشباب مابقاش يعجبوا العجب ولا الصيام في رجب زي مابيقولوا
              اللي شفته من كام يوم وانا في ميدا ن روكسي بمصرالجديده  خلاني لازم احكيلكم
                      بجد ماصدقتش اللي شفته  وخصوصا من بنت شكلها كلاس
                وقفنا في الاشاره اللي قدام سينما روكسي  وكنت رايحه يمين  في طريق الميريلاند
                في عربيه راكبها ظابط شرطه هو مش لابس ميري انما معلق البدله في شماعه العربيه
        وفي عربيه جنبها لشاب وبنوته  لما جينا نحود علي اليمين في عربيه كسرت علي عربيه ظابط الشرطه
                               وبالتالي  هو كسر علي عربيه الشاب والبنوته اللي وياه
             وقف الشاب ونزل يتشاكل مع الظابط , الظابط اتعصب وقاله ان اللي جنبه حدف عليه وهو كان بيتفاداه
                                 ماعجبوش الكلام وكان حيمسك في الظابط ويضربه .
                                 وبما ان الظابط كان بدي بلت  زي مابيقولوا جته
                                فوجئنا بالبنوته نزلت وابتدت تشرشح ولا اجدع شرشوحه
                                  ومسكت في التي شيرت بتاع الظابط ووقفت المرور
                                 وقالتله انت بتتعدي عليه عشان انت ظابط , ده السبعه منكم بقرش ,
                                     والفاظ بشعه ماينفعش اقولها
               وواقفه تطول وتقصر وتشاور بايديها اجدع من وقفه يوسف وهبي علي المسرح
                       وبتشهد الناس اللي نزلوا يفضوا المشكله والناس اللي ماشين في الشارع
                وهي مافيش فايده عايزه تضرب الظابط وهو ياحرام مش عارف ولا قادر يعمل حاجه
                           بعتقد انه اتصدم ومابقاش عارف حتي يتحرك وقف كانه تمثال
                       عربيتي كانت ورا عربيه الظابط فشفت وسمعت كل حاجه وانا في مكاني
        في ست كبيره كانت في العربيه اللي جنبي مع ابنها  لقت ان مافيش فايده
نزلت وراحت قالت للبنت
                 عيب يابنتي اللي بتعمليه مايصحش كده بنات الناس مش بتطلع منهم العيبه
               رد ت عليها قالتلها هو اللي ابتدا وعايز يضربه  , بتقصد الشاب اللي معاها
                       الست المحترمه قالتلها وهو مش راجل ويعرف يدافع عن نفسه
                                                    انتي ليه بتتكلمي وتشرشحي                
    قالتلها انا لسه ماشرشحتش هو عملي نيللي نيللي انا حعمله شريهان شريهان
                      طبعا الناس بقت تضحك لان الجمله دي كانت في فيلم الناظر صلاح الدين
                              لما اللمبي كان بيعلم الراحل علاءولي الدين الصياعه
               قاله  اذا حد قالك حاجه ابقي قوله ( لو حتعملي نيللي نيللي  حعملك شيرهان شيرهان )
                           الست قالتلها انتي بنت ما اتربتيش واوعي بقي وزقتها
                              وقالت للظابط روح يابني اركب عربيتك وامشيشوف اللي وراك
                        وانتي اركبي مع اللي عامل راجل وسايب وحده تتخانق عشانه ومبسوط
                                         واتفضت المشكله بحكمه الست الكبيره المحترمه                          
               انا قلت دول رجاله ايه , المفروض ان الراجل هو اللي بيحمي الست  في اي مكان
                        انما الست تحمي الراجل وتتشاكل وتشرشح عشانه ومع راجل دي جديده
                  اتعلمنا من صغرنا لما يكون في مشكله طالما في راجل معانا نبقي ماينفعش نفتح بقنا بكلمه
مش نقف نشرشح ويبقي ماعندناش ادب ونفرج الناس علينا 
ونحرج الراجل اللي معانا 
ولسه ياما حنشوف 
واوعوا اوعوا تقلبوا الصفحه 
ابقوا معي

                                                    
  1.                          

11‏/9‏/2012

كلام في حاجات كتيرين

أعزائي 
الكام يوم اللي فاتوا كان فيهم احداث كتير 
ممكن نحكي عن بعض منها 
نبتدي بلقاء الحاج ابو شيماء بالفنانين والمبدعين من الكتاب
استمر اللقاء مده ساعتين في قصر الاتحاديه 
وقال في لقائه 
انه مؤمن بدور  الفن الابداع 
وسيسعي ليكون الفن اكثر تقدما 
وعبر عن استياءه لمهاجمه بعض الفنانين 
فنانين خرجوا من اللقاء متفائلين واخرين ابدوا تخوفهم 
واعتبروا اللقاء مش اكتر من كونه صوره احتفاليه 
برضه ابو شيماء مش حيقدر يرضي الجميع 
لان ارضاء الكل مش سهل 
دي شهاده حق مني ولسه ال100 يوم عشان نقيم ادائه
---
دكتور  عبدالله بدر استاذ التفسير بجامعه الازهر 
اللي هاجم الهام شاهين في قناه فضائيه 
زعل من الحاج هو والكتاب والمفكرين الاسلاميين
نزلوا بيان يعلن غضبهم من لقاء الفنانيين 
ولما وائل الابراشي تحدث معه في برنامج العاشرة مساء 
قال انا بعترض علي الرئيس مش بهاجمه 
لانه اذا اعطاهم هذا الحق واستمع اليهم  
يبقي من حقنا انه يسمعنا 
 طلب معقول لان اللي بيحكم  في مشكله لازم يكون عادل 
يسمع من الطرفين ويعقل الكلام 
مش كده والاايه
---
صلي عمنا الحاج ابو شيماء الجمعه الماضيه 
في مسجد السيده زينب رضي الله عنها 
تحت حراسه 100 سياره شرطه 
وتفتيش للمصلين من الحراسات والبوابات الالكترونيه 
فقالت له امرأه حسب ماجاء بجريدة الشروق 
ربنا قال ادخلوها بسلام امنين لو خايف تصلي في المسجد 
اقعد في بيتك  انت مش حتصلي لوحدك في المسجد
فكرتنا بالمواجهه اللي كانت بين 
امرأه مسلمه  وامير المؤمنين عمرابن الخطاب 
( اصابت امرأةواخطأعمر )
المساجد لله مش للرؤساء ده حقيقه لازم يفهموها 
لان اللي بيدخل بيوت الله لا بيكون معاه مطوه ولا سنجه  
---
انا كنت كتبت عن تعطيل المرور  زي ايام مبارك في الفيس بوك يوم 2 اغسطس 
ده اللي نزلته علي صفحتي 


اللي انتخبواالحاج مرسي فرحانين قال ايه عشان مش زي مبارك مش بيعطل المرور , لا بقي بيعطل المرور النهارده الساعه 5 قدام دار المدفعيه عند سويتي سويتي في الماظه , المرور كان واقف اكتر من 25 دقيقه وزحمه جدا ومش عارفين نعدي للناحيه التانيه , لما الوقفه طولت الناس نزلوا من العربيات وبالتالي نزلت اسال ليه التاخير افتكرت حادثه , فوجئت بالناس بيقولولي لا بس مرسي حيعدي . طبعا الناس كانت متزمره وبيقولوا عامل
زي مبارك ,ولما لقيت الموكب مر ذهلت من كثره سيارات الحراسه والموتوسيكلات , يسلامته كان مروح بيته عشان يلحق الفطار , وان شاءالله الشعب ما طفح خليه يقف في الحر وهو صايم اياكش يولع الشعب ويريحهم والبلد تفضلهم ,مش قالوا مش بيعطل المرور وهو كان عاملنا كوكتيل مكون من طرزان وسوبرمان والرجل الاخضر في التحرير وفاتح الجاكت وبيقول مش لابس قميص واقي من الرصاص , والا كان كلام بيضحك بيه علي الناس اللي واقفين في التحرير كلام للاستهلاك المحلي . وحنروح بعيد ليه ماهي دي عاده الاخوان (يقولون مالا يفعلون ),بصراحه ساعه ما مر الموكب وشفته قلت للناس الواقفين , مش انتخبتوه اشربوا بقي , ولسه ياما في الجراب يا اخوان ..
---
بسال فين رئيس  الوزراء هشام قنديل من مشكله جامعه النيل  
  ملخص المشكله 
جامعه النيل جامعه خاصه  لا تهدف للربح 
وتحولت لجامعه اهليه بتبرعات المصريين 
والنهارده عايزين يزيلوها  لصالح زويل 
طيب الطلبه يتشردوا 
فين القانون الخاص بمشروع زويل ؟
ماصدرش  !!!
جامعه النيل انشائها احمد نظيف في عهد مبارك 
بس خلاص بقت كيان 
شفيق ياراجل ايام ماكان رئيس وزراء 
حاول اعاده تخصيص ارض جامعه النيل لصالح زويل 
وعمل (كونفراس كول )
مع مجلس امناء الجامعه 
وجه بعده رئيس الوزراء احلي م الشرف مافيش 
ولم يصحح الوضع 
انا شايفه ان الطلبه المعتصمين اصحاب حق 
الحكومه لازم تتحرك وتحسم الامر بسرعه 
والا عشان جامعه النيل من ايام مبارك 
اذا كده يبقي لازم نخصص اراضي 
البورصه ومكتبه اسكندريه ومدينه الانتاج الاعلامي 
وغيرهم اللي انشئت ايام مبارك  لحاجات تانيه 
عايزين قرار بلا فصال 
---
 نادر بكار 
المتحدث الرسمي لحزب النور 
دخل البرامج الفضائيه المعروفه( بالتوك شو)
وهو عضو في تاسيسيه الدستور 
واعتذر عن عضويه المجلس الاعلي للصحافه 
بعتقد ان ممكن يجيبوه 
رئيس وزراء في الحكومه الجايه  
حاصل علي تجاره انجليش  
بيفكرني ببكار الكرتوني ومعزته رشيده 
بس ده خريج تلفزيون قسم كرتون 
نادر بكار حاصل علي شهادات استراتيجيه 
واداره المشاريع وفي المرحله النهائيه من 
ماجستير اداره الاعمال 
بعتقد ان دي مؤهلات تتيحله الفرصه 
انما هشام قنديل  رئيس وزراء مائي 
 نادر بكار
---
بكار ورشيده
---
أخر حاجه ححكيلكم عليها هي
برنامج زمن الاخوان في قناه القاهره والناس
هو اتذاع في رمضان وبما اني في رمضان مش بتفرج علي التليفزيون 
بتفرج عليه في الاعاده حاليا 
عجبني جدا الحلقتين اللي كانت مع 
الدكتور طارق الزمر
دكتوراه في القانون الدستوري 
اخد الدكتوراه وهو مسجون 
 
اللي عجبني في حواره حاجتين لما طوني خليفه المذيع ساله
بما معناه رائيك ايه في حكم الحاج مرسي
رد وقال لو سابوه يحكم لوحده حيكون افضل 
طبعا بيقصد المرشد بديع والشاطر ده يعتبر اعتراف ضمني 
لتدخلهم  في حكمنا 
وده اللي علق عليه طوني خليفه
عجبتني صراحته 
الحاجه التانيه عجبتني اكتر 
طوني فرجه  صوره جيهان السادات 
وقاله  بتدين لها بالاعتذار لقتل السادات 
رد وقاله لا 
ساله تاني طيب بتدين لها بالشكر في خروجك من السجن 
قال نعم  هي اللي اثارت بقائي في السجن بعد انقضاء مده حبسي 
قاله طيب ممكن تزورها وتشكرها 
قاله ايوه لانها باثاره موضوعي ده كان لفته كريمه منها 
وانا بفكر في الموضوع ده 
قاله  قولها علي الهوا انك حتزورها 
سكت واحتار واحرج جدا
ومع اصرار طوني المستميت وتصويب نظراته لطارق 
قال  بلا خوف  وبكثير من الاحراج  حسال الجماعه رائيهم 
ولما طوني استغرب  هز دماغه بما معناه 
هي دي الحقيقه 
حلقتين  حلوين ممكن تلاقوهم في اليوتيوب 
انصحكم انكم تتفرجوا عليهم 
وبكده خلصت كلامي 
ربنا يجعله خفيف عليكم 
المقال الجاي مش حيكون سياسي
بس مقال مهم 
واقعدوا بالعافيه 
واوعوا اوعوا تقلبوا الصفحه 
ابقوا معي
 
 

 




6‏/9‏/2012

جرس انذارلظاهرة خطيرة

أعزائي 
بجد وحشتوني  قربت علي الشهر مش بكتب 
بس الحقيقه انا تعهدت في الفيس بوك علي صفحتي اني حلتزم الصمت 
لمده ال 100 يوم اللي قال عليهم الحاج مرسي
كتير من اصحابي وقرائي زعلوا من هجومي المستمر علي الحكومه 
والحاج ابو شيماء ولما اتشكلت الحكومه وهاجمت رئيس الوزراء 
برضه زعلوا مني واعتبروني بهاجم لمجرد الهجوم 
بس الحقيقه انا عايزه ينصلح حال البلد 
ولما لقيت رئيس الوزراء بيشتغل كويس 
اثنيت علي اداءه وقدمت اعتذار علي صفحتي في الفيس بوك 
ده كمان زعل اللي كانوا مبسوطين من هجومي علي الحكومه 
يعني لا كده عاجبه ولا كده عاجبه
زي جحا ركب الحمار الناس لموه 
ابنه ركب الحمار برضه لاموه 
مشيو  هو وابنه جنب الحمار مافيش فايده 
شال الحمار اعتبروه مجنون 
ده عادي لان مافيش حد ممكن يرضي الجميع 
بس  اللي حصل مش  حيخليني ابطل اكتب عنيده انا جدا 
سيبنا النهارده من السياسه وعايزه احكيلكم علي شيء خطير جدا 
هو التحرش 
بجد ماكنتش فاكره انه وصل للدرجه البشعه اللي بنعاني منها 
الا لما بنوته صغيره عندها 16 سنه حكتلي اللي حصل معاها 
هي عايشه بره مصر وهنا في اجازه هي بنت قريبتي
تعالوا بقي احكيلكم اللي اتحكالي منها وده كمان مع عدم اجادتها 
للغه العربيه  بس قالتلي كلام حكتب جزء منه والباقي حيائي يمنعني 
كانت في الساحل الشمالي وبالتحديد في طيبه روز وده مكان تابع للقوات المسلحه 
كانت ضيفه علي عمتها 
راحت مع اخوتها 6 سنين و9 سنين البارك اللي هناك تمرجحهم 
وهي بتمرجحهم لقت طفلين  حوالي 6 سنين و7 سنين 
ومعاهم واحد عنده 12 سنه 
الطفل الصغير عاكسها وقالها انتي مزه طحن 
طحن بلغه الصيع معناها مزه تمام التمام 
الطفل الاكبر قاله مالكش دعوه بيها  دي تبعي وانا حعرف اظبطها 
وكل واحد يتشاكل مع التاني واحد يقول البت بتاعتي والتاني يقول البت دي تبعي 
البنت طويله والاطفال قصرين نظرا لسنهم
واحد اتعلق في رجلها وبقي يشد البنطلون لتحت يعني حضنها من ورا
والتاني يتنطط ويمسك صدرها 
يعني حصار من فوق ومن تحت 
البنت بتحلف وتقولي والله ماكنتش قادره عليهم
بحاول امسك البنطلون لانه بيقلعوني وفي نفس الوقت بحاول
اشد البدي لتحت عشان صدري مايبنش 
وبتحلف انهم قفشو في كل حته في جسمها 
اسفه علي اللفظ 
وتقولهم عيب  بلاش كده 
والفاظ بقي من اللي بيقولوها العربجيه والبلطجيه 
حيائي يمنعني من اني اقولها 
البنت حكتلي وده لانها مش بتعرف معني الكلام لعدم اجادتها العربيه 
الولد اللي كان عنده 12 سنه حاول يمنعهم ولا فايده 
الاهل كانوا قاعدين بيشيشوا وبيتفرجوا ويضحكوا 
وهما مروحين راحوا ياخدوا الاولاد بعد ما استمتعوا بالفيلم اللي كان قدامهم 
وكان ابطاله اطفالهم . فرحانين العيال كبرت وبتعرف تتحرش وتحسس
كل اللي قالوه  اسفين هما الاولاد ضايقوكي 
ياسلام في منتهي البساطه  . مش العيال اتبسطوا وعملوا شو قدامهم 
يبقي البت وشعورها واحترام الناس ليها واحترامها لنفسها
يغور في سبيل اثباث الرجوله المبكره لاطفالهم
قريبهم ال عنده 12 سنه  قالهم كفايه 
الاطفال سبوه وقالوله يا ابن التيت والتيت 
التيت والتيت معناها برضه سب الاب والام 
واماكن حساسه في جسم الام  
ووصف الاب باوصاف قبيحه
والاهل مسخسخين علي روحهم من الضحك 
طيب لما الاطفال يعملوا كده المراهقين والكبار يعملوا ايه 
ازاي الاهل يسيبوهم يستبيحوا جسم بنت بالطريقه المقززه اللي حصلت 
بجد مش لاقيه كلام اقوله 


شفتوا الفرق بين الصورتين 
يعني لا حجاب ولا نقاب ولا اي حاجه بتمنع التحرش 
بنشوف في التليفزيون حفلات أم كلثوم  مش بنلاقي في الجمهور لا محجبه ولا منتقبه 
بس كان في احترام للمرآه 
مش عارفه ليه حاليا مابقاش في احترام لاي حاجه ؟
لعدم قدرة الشباب علي الجوازلارتفاع تكاليفه وللبطاله الموجوده ؟
والا ده بقي اسهل بالنسبه للشباب  ؟
والا مباها للشباب بينهم وبين بعض 
كل واحد فيهم يقول انا اتحرشت باتنين النهارده التالت يقوله ياخايب 
انا اتحرشت باربعه وهكذا سباق التحرش 
في الحقيقه في اسباب كتيره لانحدار المستوي الاخلاقي للشباب
في حاجه تانيه حكولي عليها اصحابي وجربتها وياريتني ماجربتها 
قالولي مره افتحي البلوتوث تبع موبايلك وانتي في الشارع 
وشوفي حيحصل ايه 
اتبعتلي كميه صور وافلام بورنو بشعه بجد 
في شباب كل شغلتهم انهم يبعتوا كل ماهو قبيح لاي حد 
وحاليا بنلاقي الاطفال معاهم موبيلات لما يستقبلوا الحاجات دي 
يبقي يعملوا اكتر من اللي اتعمل مع قريبتي
بجد الاخلاق اتعدمت ولا بقي في ادب ولا اخلاق 
بستغرب هما دول الشباب اللي وقفوا في ميدان التحرير
وهما برضه اللي بيتحرشوا بالصبايا  ويستبيحوهم ويبعتوا افلام بورنو 
كده يبقي لازم وقفه لوجود خلل في المجتمع  
والا مجتمعنا مصاب بالشيزوفرانيا ؟
ياريت الاطباء النفسانيين يجاوبوني
مش لاقيه حاجه اقولها 
الا حسبي الله ونعمه الوكيل في كل من يدمراخلاق شبابنا 
مقاله موجعه انا عارفه بس لازم ننتبهه قبل فوات الاوان 
واوعوا اوعوا تقلبوا الصفحه 
ابقوا معي