26‏/3‏/2012

ع العصفورية

أعزائي

مش عارفه ايه اللي بيحصل في مصر 
الشعب اتجنن والا اتهبل والا ايه الحكايه 
ياساده ياكرام  العصفوريه بلغه اهل الشام 
هي مستشفي المجانين او السرايا الصفرا 
وليه صفرا مش عارفه ؟
حمي الترشيح لرئاسة الجمهوريه بلغت اشدها عند الشعب المصري 
تعالوا كده نشوف نوعيه المرشحين لقياده مصر 
او بالاحري الكنانه او في قول آخر المحروسة 


الست هويدا ارمله  رشحت نفسها للرياسه 
والله والله سمعتها بوداني وشفتها بعنيه وكانت بتقول 
انها حتهتم بالعشوئيات والثروة الداجنه 
وشعارها كتكوت لكل مواطن 
يعني كل مواطن مصري حيمتلك كتكوت وبعدين يبيض 
ويفقص ومع مرور الايام حيملك المواطن مشروع يعيش منه 
لا وكمان ايه اكل الكتكوت حيكون ببلاش حتصرفه الحكومه 
طيب هو مش ممكن الكتكوت ده يبقي ديك مش فرخه ؟
يبقي ساعتها ايه العمل ؟
وكمان الفرخه حتبيض لوحدها بالاشعال الذاتي والا بالريموت كنترول 
مش عايزه ديك ؟
ولو الكتكوت مات  يبقي المشروع اتفركش 
ياريت  نطلب كلنا طلب جماعي ونقولها 
ياست هويدا خليهم كتكوتين لكل مواطن 
----


ده مرشح تاني راح يقدم ورق الترشيح بالشبشب 
مع ملاحظه اننا في الشتاء 
كان لبس شراب وشبشب كانت تبقي مبلوعه 
---


جاله مبارك في المنام وقاله اترشح يا احمد 
صحي من النوم راح يترشح 
---



اقولكم ده حيعمل ايه 
بس والنبي بلاش ضحك 
حيأسس حزب للمافيا والحشاشين 
يالله خلي البلد تحشش وتخرب اكتر 

ده بقي راح يتقدم علي موتوسيكل 
طالما بيقود الموتوسيكل يبقي حيعرف يقود مصر وشعبها 
علي رأي حكيم عقول صديقي ومصحح لغتي العربيه 
كتبلي علي الفيس بوك 
ان قياده مصر اسهل من قيادة الموتوسيكل 
لان قياده مصر مش محتاجه رخصه 
والله كلام معقول ياحكيم 
---

شوفتوا رئيسكم القادم
علاء سعد ممكن يكون بديل علاء مبارك 
بس مدينا منظر محترم 
---

ده بقي جاله سيدنا محمد عليه الصلاة والسلام في المنام 
وقاله اترشح  مستقل 
راح مترشح مستقل 
---

جامع لكل حاجه عسكري ومدني واسلامي 
لاول مره في تاريخ مصر 
كان ناقص يكتب تاجر وترزي 
---

دي الست بثينه كامل 
مذيعه التليفزيون المصري 
راحت تقدم ورق الترشيح بالزي البلدي وعبايه المعلمه اطاطا 
---

عم القادر الفاجر 
سمعته في برنامج تبع التوك شو 
بيقول ان هو الاقوي 
بس في ملاحظه بسيطه بعد اذن  عم سيف رئيسنا القادم 
في مثل بيتقال في مصر وهو 
جوز الاتنين ياقادر يافاجر 
تفتكروا متجوز اربعه ؟
---

ده بقي اللي حيغير اسماء كل المصريين ليكون 
عبد ........
واسماءالله الحسني حتساعنا كلنا 
وانا بحجز اسمي من دلوقتي عشان مانتشاكلش بعد كده 
انا حيبقي اسمي القادم 
عبد الشكور 
الحجزباولويه الطلبات 
---
ابو تريكه لاعب الاهلي والمنتخب

احد الاحزاب الموجوده حاليا دعت ابوتريكه للمشاركه في وضع الدستور 
واعتذر ابو تريكه تفتكروا حيدعوا مين شيكابالا 
والا  بركات وممكن جدو او خالو  او عمو 
علي فكره جدو ده لاعب كوره 
ومحمد زيدان لا ليه مش حيفهم في وضع الدستور لانه محترف بره مصر ؟
هو اساتذه القانون الدستوري في جميع كليات الحقوق 
علي مستوي الجمهوريه 
مش حيعرفوا لا يحوروا ولا يدورو في التشريع 
بس ابو تريكه حيسدد في الجون علي طول 
وحيحضر جلسات وضع الدستور  بفانله الراعي الرسمي 
لوضع الدستور  ياتري ممكن يكون موبنيل والا اتصالات وممكن فودافون 
انا بقترح يكون شيبسي لان الاطفال كلها بتحبه 
طالما انهم دعوا ابوتريكه يبقي لازم قياده من قيادات التراس 
عشان يبقي واحد من الملعب وواحد من المدرج 
ولازم يجيبوله شويه كور يمضيها عشان خاطر عيون المعجبات 
اللي حيترسوا لابو تريكه 
وعلي هذا القياس  باهيب بالحزب انه يدعو 
 الست فيفي عبده مندوبه الراقصات لوضع الدستور 
وعفاف شعيب مندوبه عن الممثلات 
وممكن شعبولا عن المطربين الشعبيين 
وبعد كل بند يقول 
واهههههه 
وحماده هلال عن المطربين الشبان علي اعتبار غني لثوره 
25 يناير واحيا حفل للاخوان في اسكندريه 
-----
والله صعبانه عليه بلدي  واللي بيحصل فيها 
ضحكوا العالم علينا 
انا كمان عايزاكم تضحكوا النكته دي ضحكتني 
اضحكوا اضحكوا قبل ما الضحك يغلي 
ونستمتع بالسيء لان الاسوا قادم
واوعوا اوعوا تقلبوا الصفحة 
ابقوا معي 

12‏/3‏/2012

حنفي كلمته نزلت الارض

أعزائي
كنت ساكته وبسمع وبشوف برامج التوك شو 
اللي كانوا بيرغوا كتير علي قضيه التمويل الاجنبي 
بيقولوا ان ده انتهاك للسياده الوطنيه 
انا بقول دي صفقه مش اكتر 
بس الظاهر الحبل فرط من ايديهم وماعرفوش يلموه 
امبارح قعدت اتفرج علي جلسه مجلس الشعب 
والله كانت مسخرة بكل المقايس 
النواب بيتخانقوا مع الكتاتني 
علي فكره اختي لما بنجيب سيره المجلس بتقول 
مجلس كنتاكي  ومش بتغير الاسم ابدا 
نرجع للمجلس الموقر  
النواب كانوا معترضين علي ان الجنزوري بعت اعتذار عن الحضور 
نائب قال هو بيستهتر بالمجلس في الجلسات المهمه 
زي ماكان نظيف بيعمل 
نظام الكتاتني كل اللي يتكلم ويطول عن دقيقتين 
يقفلوا المايك عليه وبرضه النواب يكملوا بصوت عالي
دقيقتين بصراحه مش كفايه عشان ابداء رأي 
وكلمته الشهيره اجلس اجلس لكل نائب لو اعترض
بصراحه بحس انهم مش نواب  انما تلاميذ مدرسه ابتدائي وهو المدرس
امبارح طرد واحد  .فعلا حسيت انه مدرس وواحد من التلاميذ
 عمل دوشه فحرمه من استكمال الحصه 
خلينا في القضيه 
وزير العدل المستشار عادل عبدالحميد 
قال انه لا يتدخل في شئون القضاء
ومهمته تنفيذيه 
وزيرعلي ماتفرج والا ايه ؟
---
بعده كان وزير الطيران 
مهندس حسين مسعود وده كان من النظام السابق 
كان بيشغل  منصب رئيس مجلس اداره الشركه القابضه 
لمصرللطيران 
قال ان الطياره اخدت  تصريح دخول وهبوط من برج المراقبه 
وانها جايه لمهمه حكوميه والطياره مدنيه وليست عسكرية 
ومملوكه للخارجية الامريكية 
وكان الكروه مكون من 2 طيارين و2 مضيفين 
وتسع 32 راكب 
ولما سالوا الكابتن  عن الركاب 
قال انه جه ينقل مجموعه لا يعلم عددها  ولا جنسيتها 
الوزير قال انه نقل افراد لاحكوميين ولا رسميين 
وعشان هي مش في مهمه حكوميه وحتنقل افراد 
الزموهم بالغرامه اللي هي من 10000 جنيه ل 50000 جنيه 
وطبقت عليهم اقصي غرامه 50000 جنيه 
افتكر ان ده مبلغ تافه جدا عند امريكا 
وغادر الركاب الي  مطارلارناكا في قبرص  
والكروه باتوا علي الطياره ولم يسمح لهم بالدخول 
ووزاره الطيران مش الجهه المعنيه بسفرهم او منعهم 
---- 
اما الوزيره فايزه ابو النجا 
وزيره التخطيط والتعاون الدولي 
حديثها كان ممل وطويل واول حاجه قالتها 
انها بتتشرف بادارتها الوزارة 
هي برضه من ايام المخلوع الله ياخده 
لدرجه ان الكتاتني قالها ما معناه انجزي  
كانت بتقول تاريخ قديم وممل ومعاد
وكل اللي فيها ان الوزاره بتاخد معونه 
كبروها وصغروها وكلام فارغ وخلاص 
---
اما الوزيره نجوي خليل 
وزيره التامينات والشئون الاجتماعيه 
اللي رفضت انها تطلع تتكلم علي المنصه 
وقالت انا حتكلم من مكاني هنا وسط احبابي 
كان جنبها الوزراء  مش حتحب الاعضاء طبعا 
هنأت وشكرت المجلس 
وقالت انه مجلس الانتخابات الحرة 
وان الحكومه ادت ماعليها وجميع من اختيروا للوزاره 
كان ادائهم متميز وبيتبنوا كل وجهات النظر 
والجمعيات اخدوا توصيات منهم جمعيه السنه المحمدية 
وان التاريخ سيكتب الكثير عنهم 
ومنتظرين هذا التاريخ  
وانها باحثه للجمعيات الاهليه
بالله عليكم ده كلام وزيره مسئوله 
---
انا شايفه ان الوزراء جايين يستهينوا بالنواب 
وكل واحد بيقول انا وماليش دعوه بحد تاني نسيوا ان المسئوليه متضامنه 
وطبعا لا بيستجيبوا للنواب ولا حيستجيبوا 
اولا الطياره نزلت قبل الحكم يبقي الحكم معروف مقدما 
نقول بقي كانت صفقه بالنسبه للدوله 
وصفعه بالنسبه للشعب وكانت علي القفا 
طيب المحكمه ممكن تستدعيهم  ؟ولو ممكن ياتري حيجوا ؟
عاملين زي المثل القديم اللي بيقول 
ابني علي كتفي بدل ما اروح ادور عليه 
الحكومه لم تجاوب بس حارت ودارت واي كلام وخلاص 
القضاء اهتز قدامنا دي مافيهاش كلام 
المستشار محمد شكري رئيس محكمه جنايات القاهرة 
ليه اتنحي عن نظرالقضيه ؟
طبعا الاجابه معروفه مش عايزه ذكاء 
والمستشار مجدي عبدالباري  الرئيس بمحكمه استئناف القاهره 
سمح للمتهمين بالسفر كانت التعليمات من مين ؟
اذا كانت من المستشار عبدالمعز ابراهيم رئيس محكمه استئناف القاهرة 
يبقي برضه نفس السؤال التعليمات جاتله من مين ؟
اي جهه سياديه  املت تعليماتها عليه ؟
قريت حاجه  عن الصفقه او الصفعه 
وهي اقرب للواقع الا وهي 
موافقه امريكا علي تصدير وتوفير قطع غيار للاسلحة 
المملوكه للقوات المسلحة .. امريكا كانت بتماطل 
وكمان تصدر  لنا اسلحه  حديثه امريكيه الصنع 
تتعلق بالسلاح الجوي 
ومساعده امريكا لنحصل علي قروض ميسرة 
من صندوق النقد الدولي بمقدار 3.4 مليار دولار 
وتضغط علي السعوديه والامارات لتوفير المعونات 
دي صفعه الشعب المصري اللي نزلت علي قفاه 
كان لازم اسال محامي عشان اعرف ايه عقوبه اللي حصل 
سالت محامي صديق من زمان وموجود علي الفيس بوك 
اسمه نادر العسال 
قالي ان اداره مكان بدون ترخيص جنحه 
العقوبه فيها غرامه او الحبس 6 شهور 
وغلق المكان 
اللي طبعا مالوش ترخيص 
ومافيش ماده في القانون تدين 
ممكن بس يتحبسوا احتياطي وده اللي حصل 
وبكده تبقي القضيه كلها فشنك واحنا برضه اخدنا علي قفانا 
بس السؤال ليه تشويه القضاء المصري قدام العالم بالصوره البشعه دي ؟
ده بيصب في مصلحه مين ؟
لما عرفت ان الاجانب سافروا بعد الضجه اللي حصلت 
افتكرت عبدالفتاح القصري في فيلم ابن حميدو 
لما بيصمم علي حاجه ويقول كلمتي ماتنزلش الارض ابدا
مراته  القويه تقوله حنفي 
يرد ويقول المره دي تنزل 
نفسي قبل ما اموت  اشوف 
 حكومه لا تقبل وصايه المجلس العسكري
عايزين نعرف مين الجهه السياديه 
ياتري هو في غير المجلس العسكري ؟
واوعوا اوعوا تقلبوا الصفحة 
ابقوا معي 
















 

8‏/3‏/2012

زياره سريعة لدار ابو العربي

أعزائي 
الاسبوع اللي فات قلت اروح ازور دار ابوالعربي 
حزمت شنطتي ورحت اشوف حال البلد 
كان بقالي حوالي 10 سنين مازرتهاش 
الجو كان برد جدا وحسيت اني في سيبريا مش بورسعيد 
وانا ماشيه في الشارع حسيت اني ماشيه في برد منهاتن او اكسفورد استريت 
بجد مصر اتعرضت لموجه برد جامده مش متعودين عليها 
ممكن اهل السواحل متعودين انما القاهرين جديده عليهم 
وصلت هناك في جو مترب اولا وبعدها ممطر جدا 
نزلت استطلع حال البلد 
لقيت انها مش المدينه اللي زرتها كتير زمان 
المحلات مقفله اغلبها واللي فاتح منها بيقفل بدري 
سالت صاحب محل وقلتله انتوا بتقفلوا بدري ليه 
والنهارده الخميس يعني الناس سهرانه 
قالي ده كان زمان ايام ماكنا منطقه حره 
كنا فاتحين طول اليوم وكان بيوصلنا في اليوم 100 اتوبيس 
غير الميكروباصات والملاكي 
حاليا مش بيوصل الا كام اتوبيس ومش مليانه 
دخلت صيدليه كنت بشتري دواء سالت الدكتور  المحلات اخبارها ايه 
قالي بناتي بينزلوا القاهره يشتروا منها 
المتاح هناك ورخيص جدا ارخص من القاهره بكتير 
الشيكولاته والبنبون 
عرفت رئيس الوزراء السابق شفيق ياراجل 
قال للي قاعدين في التحرير حجبلكم بونبون لانه رخيص جدا هناك 
بس الهولز اللي الكتاتني بيوزعه علي المجلس ده بنفس سعر القاهرة 
الشامبوهات والشاور جيل المستورد ارخص كتير جدا من القاهرة 
ومش مغشوش والكمبوت كمان رخيص عن القاهره 
اطقم الصيني هناك رخيصه ومنها الفرنساوي والامارتي 
يعني العرايس ممكن يروحوا يشتروا من هناك 
خلاص مابقاش في جمارك 
المهم كان لازم اسال عن الحاله العامه بعد المجزرة 
سالت العامل اللي بيعبي البنزين في المحطه ايه الاحوال 
قالي والله احنا بنحبكم بس مش بنحب الاهلي 
وبعد اللي حصل كانوا كل يوم يقولولنا ان الاهلاويه 
جايين يكسروا البلد .. كنا بنطلع كل يوم لمدخل بورسعيد وننتظر 
والآخر المحافظ قال مافيش حد جاي ده كلام فارغ 

دي موجوده في كل المناطق 
رحت الاستاد بس ممنوع ادخل سالت ايه الاخبار 
قالولي ان المجلس بعت نواب عشان يشوفوا الاستاد 
ويشوفوا اللي حصل فيه 
واحد قالي اصل الشارع البورسعيدي مالوش دخل باللي حصل 
قلتله هو احنا خلاص قسمنا المناطق بقي الشارع البورسعيدي 
والشارع الاسواني والشارع السكندري 
كلنا شارع واحد اسمه
الشارع المصري ولما نحب نحدد المنطقه نقول 
الشارع المصري في بورسعيد 
او الشارع المصري في المنيا 
او الشارع المصري في القاهره 
لاننا في الاول والاخر مصريين 
عديت من امام النادي المصري يوم الجمعه 
كانوا بيستعدوا لوقفه امام النادي 
لفت نظري يافطه مكتوب عليها 
اذا كانت مصر كلها الاهلي ... نتبرا من الجنسيه الاهلاوية
ماكنش ممكن ااقول اني اهلاويه جدا لاني لو قلت 
كنتوا اكيد حتشيعوني بعد صلاة العصر يوم الجمعه 
يادوب لاني مش حاخد في ايديهم غلوه 
عاملين مهرجان يوم 21 مارس اسمه 
مهرجان بورسعيد في حبك يامصر 
برضه جنب المساجد لقيت يافطه مكتوب عليها 
القرآن هو دستور الحياة وتحتها شباب الدعوة 
اليافطه اللي لفتت نظري انا واللي معايا كان مكتوب فيها 
البلد اللي حارب 3 دول .. مش حيقتل عشان 3 نقط 
لما وصلنا وكنا بنسال فين شارع الكورنيش كانوا بيضحكوا علينا 
منهم اللي قال كورنيش لا مافيش 
ومنهم اللي اكتفي بالابتسام 
لكن واحد طيب قالنا ماعندناش شارع اسمه الكورنيش 
انما اسمه  شارع طرح البحر
لما رحنا نشوف تمثال ديليسبس عشان الا طفال  اللي معانا يتفرجوا عليه 
فوجئت بالمنطقه اللي كانت انضف مكان زمان 
بقت بشعه مش نضيفه والتمثال مكتوب عليه كلام كتير 
عن الثوره وطبعا حروف وقلوب دول المحبين اللي بيعملوها 
زعلت والله لما لقيت المنطقه الجميله وصل بيها الحال لكده 
حتي كان في جنبها منطقه محلات  للمستورد 
اتقفلت والمحلات الموجوده مش علي ربع المستوي اللي كان زمان 
بجد حزنت علي بورسعيد  لاني شفتها شكل غير اللي كنت متوقعاه 
بس في المجمل اهلها طيبين وبيحبوا اهل القاهره 
ورجعنا بعد ما اخدنا علقه المطر والبرد 
ياريت المحافظ يهتم بيها زي الاول 
ماهي في الاول وفي الاخر بلد مصري 
واوعوا اوعوا تقلبوا الصفحة 
ابقوا معي