24‏/4‏/2012

مارثون رئاسي

أعزائي
اهلا بيكم يارب كلكم كلكم تكونوا بخير 
انا حيرانه جدا زي معظم المصريين 
مش عارفين حننتخب مين او بالاحري مش عارفين حنقدر نختار صح
والا حنختار غلط 
الصوره دي بتوصف حالي بالظبط زي ما اكون في خندق ومش عارفه اطلع منه 
واكيد في غيري بيعانوا لانهم محتارين 
تعرفوا احنا عاملين زي ايه ؟
بشبه حال اللي محتار زي حالاتي  باننا معزومين علي حفله كبيره
 مع كل الشعب المصري
وقالولنا ان سندريلا حتكون في الحفلة واللي لابس كويس حيتصور معاها 
الشعب في منه حيلبس اسموكن وفي فورمل وغالبا الشباب حيلبس كاجوال 
ومش عارفين مين فينا حيفوز بالتصوير مع سندريلا 
---
 
نرجع نشوف باقي المرشحين 
الفريق احمد شفيق 
---
بتقول انك تقدر تقود مصر برصيدك السابق من الخبرات 
بس مش شايف ان تحديث المطارات مش كافي عشان يكون ده رصيدك 
شعارك العدالة الشاملة 
طيب فين الاصلاح السياسي 
ياسياده الفريق المواطن المصري عايز ياكل ويشرب ويلبس  ويتعلم 
ويربي العيال ويضمن مستقبلهم حتقدر تحل كل المشاكل دي ؟
المقربين منك يطلقوا عليك لقب 
كوماندا  ( الورشة  )
حنشوف الاصلاح ياكوماندا
---
حمدين صباحي 
--
تتبنه برنامج الرئيس الراحل عبدالناصر 
عارفين انك ناصري بتؤمن بتراثه 
طيب عبدالناصر بني السدالعالي 
بس دمر السلاح الجوي المصري 
حرر مصر من الملك والانجليز 
وسلمها لاسرائيل 
حتعمل ايه في المشاكل المتلتله الموجوده حاليا 
حتأمم رؤس الاموال المتضخمه الموجوده في مصر 
بلاش والنبي ترتدي عباءة عبدالناصر 
عايزينك حمدين صباحي الاعلامي 
في مقابله لحضرتك قبل انتخابات 2010 وكانت علي برنامج البالتوك 
وكانت بتتم في روم سياسيه .. كانوا بيسالوك ومعاليك بتجاوب 
ولما الترن جه عليه وسالتك زعلت من سؤالي 
وبالتالي ادامن الروم زعلوا عشان خاطرك 
سؤالي كان 
لو لم تتيح لك برامج التوك شو الحديث عن برنامجك لمجلس الشعب 
هل كنت حتنزل للشعب تتكلم معاه في الشارع ؟
والا المسالة وسيله استرزاق وخلاص 
كانت اجابتك انك سردت عليه مواقفك السياسيه 
كنت عايزه اجابه واضحه وصريحه وهي 
نعم او لا 
بس لما اترشحت لرئاسه الجمهوريه لقيتك نزلت في مترو الانفاق 
والمواصلات العامة والمقاهي 
مش عارفه مين غيري اقترح عليك الاقتراح ده ؟
علي فكره ده يحسبلك وانا بحييك لنزولك للمواطن الغلبان 
---
 دكتور عبدالمنعم ابو الفتوح 
---
اسلامي يريد اصوات الليبراليين 
تقول ان دور الرئيس ان يساعد العدالة علي اتخاذ قرار مستقل 
من اجل استرداد حقوق المصريين 
كيف سيتم ذلك ؟
تؤمن بالفكر الاسلامي الوسطي الذي يمثله الازهر 
وستختار اكثر من نائب 
ياتري فيهم شباب وفلول  وعواجيز تعدوا 75 سنه ؟
في برنامجك كما تقول 
سيكون اول مائة يوم استقرار الامن في مصر
وتعود الاوضاع الامنية 
مشكله البنزين والسولار ماهي حلولك فيهم ؟
مشكله ضياع تامينات اصحاب المعاشات والدوله بتنقطهم من فلوسهم
اللي دفعوها طوال فتره عملهم حتكون ليها اولوليه ؟
مشكلة العشوئيات واولاد الشوارع  والبطالة والشباب المكدس في المقاهي 
حتاخد حيز من اهتمامك ؟
تقول ان مصر دولة غنيه  ويجب ان تكون ثروتها للمصريين 
ويشعر المواطن بذلك  كيف سيتحقق ذلك ؟
امس كنت عند دكتور الاسنان وهو صديق ايضا 
لما تطرقنا للانتخابات الرئاسيه 
قال ياخوفي يكون لسه مع الاخوان . نفس الكلام سمعته من ناس كتير
خايفين بصراحه لان بكده يبقي الاخوان ماسكه كل شيء في مصر 
ياريت يطلع ظننا مش في محلة 
بس ليه تحفظ بسيط 
دكتور عبدالمنعم مصر مش غرفة عمليات  حتعمل العمليه وتطمن علي المريض 
وبعدها مساعدينك يلاحظوا حالته 
دي مصر يادكتور 
---
الداخليه اعلنت انتهاء تطوير مستشفي طره 
ياتري ده كلام في كلام ؟
---
هل ممكن ان يصاغ الدستور في شهر واحد ؟
يمكن بمناسبه شم النسيم حيكون دستور مسلوق 
---
بمناسبه شم النسيم  السنه دي غيروا اسمه 
بقي شم الحريق 
وده بمناسبه الحرايق اللي كانت يوم الاحد 18 ابريل 
---
شركات الزبالة الاسبانيه نهوا تعاقدها 
وحاليا لا في اجنبيه ولا مصرية 
والزباله مكدسة في ارقي شوارع القاهرة 
وقال ايه عمال الزباله  مش عايزين يلموا الزبالة 
 معتصمين لرفع رواتبهم 
اشمعني هما اللي مش حيعتصموا 
--- 
مليونية الاحزاب 
مليونيه الاخوان 
امتي مليونيه السلفيين ؟
انا شايفه انه استعراض قوه مش اكتر من كده 
---
في التحرير يوم الجمعهة 20 ابريل 2012
ميكروفونات كتيييييير 
الاول بيقول  اسلامية اسلامية 
التاني - مدنية مدنية 
التالت - الشعب يريد حازززززم 
الرابع- شفت ايه من ربنا غلط عشان تكرهوا شرعيته 
الخامس - ربنا واقف معانا احنا وليسقط الاخرون 
السادس  - شعب وبرلمان ايد وحده  
باقي الشعب اكيد بيقول 
يالهووووووووووتي 
---
حريم ابو سماعين نزلوا التحرير مطالبين ببرائته 
من الباسبور الامريكي 
----
الجرعه النهارده كانت زياده 
واوعوا اوعوا تقلبوا الصفحه 
ابقوا معي



---
 

14‏/4‏/2012

مارثون الرئاسة

أعزائي 
بقالي مده عايزه اكتب بس المارثون خلاني اجري وراه 
كنت عايزه اشوف ايه اخرتها 
لكن للاسف ماعرفتش ولا اي حد في مصر عارف حيحصل ايه ؟


لقيت ان دي انسب صوره توضح مصر حالها ايه 
فعلا مصر علي حافة الهاويه 
الانتخابات قربت بس ياتري هل الانتخابات حتكون نزيهه
هل التصويت حيكون للفئه المنتفعه من الانتخابات 
بمقابل مادي ؟
والصوت حيكون بكاااام 
 والكوره متداولة بين مجلس الشعب والمجلس العسكري 
كان الاول الاخوان بينتقدوا ترزيه القوانين 
وسبحان الله هما حاليا بيفصلوا القوانين علي مزاجهم 
الماده 60 تعطي مجلس الشعب والشوري حق تشكيل 
لجنه المائة  طب ليه ؟ 
لان المجلس العسكري موافق  ماهو اولي الامر حاليا 
الملايين اللي اتصرفت علي الدعايه الانتخابيه 
مش كانت تروح للعشوئيات او بنك الطعام او القري والنجوع 
اللي لا فيها ميه ولا نور ولا تعليم 
وكانوا خدوا ثواب بدل البوسترات اللي ماليه البلد 
سؤال صغير 
مش الشرعيه للبرلمان وليست للميدان 
ليه لجاتوا للميدان ؟
تعالوا نشوف بعض ممن ترشحوا للرئاسة 
---
عمرو موسي 
----
المرشح للرئاسة  عمل زي مبارك في الانتخابات الاخيره 
قلع الكرافته  عشان يبقي قريب من الشعب 
او بالاحري من الشباب 
ماكان يلبس تي شيرت وجينز ده الاقرب 
ليبرالي  محتاج اصوات الاسلاميين 
سمعنا ان له ورقه اقتصادية 
فين هي ؟ لماذا لم يعلن عنها ؟
دبلوماسي  اختصاصه شئون خارجيه
بس ده مش كفايه 
---
دكتور محمد مرسي 
---
رئيس حزب الحرية والعداله
مرشح قاعد علي دكة الاحتياطي 
في حاله عدم قبول ترشيح خيرت الشاطر 
من الناحيه القانونية 
زي مايكونوا في ماتش كورة 
عايزين يجيبوا اجوان وياخدو نقط 
اي واحد يحط جون 
حتي لو واحد من الفريق المنافس غلط وحط جون في نفسه 
يبقي خير وبركه  وبارك الله فيما رزق 
زمان معاليه رفض ترشيح اي حد مكان زكريا عزمي 
ويوسف بطرس غالي 
وطبعا كان علي اعتبارانهم رموز النظام 
من الاخر مؤيدين للنظام السابق 
بيعقدوا الصفقات ويرتبوا لكل شيء 
دكتور محمد مرسي  استاذ جامعي 
زي الاف الاساتذه بس هل يصلحوا جميعا 
لرئاسة الجمهوريه 
الرئاسه مش غنيمه حرب ضد شعب مصر المطحون 
---
المهندس خيرت الشاطر
---
ماشاءالله عنده 10 اولاد 
و16 حفيد ربنا يخلي ويبارك 
لو حتكون رئيس جمهوريه الشعب مش حيقلدك 
ويفضل يخلف ويخلف 
ماهو الريس عنده 10 اشمعني احنا
تقدرتقول للشعب حدد النسل ؟
تعهدت شخصيا بان الجماعه مش حترشح حد لمنصب الرئيس 
بس بريق الكرسي خلاكم تغيروا رأيكم كالعادة 
نضمنكم ازاي ؟
تقولون مالا تفعلون 
بتقولوا حتنهضوا بمصر 
عايزين نعرف ايه الخبرات اللي عندكم بتخليكم تتعهدوا بكده 
( الاخوان المسلمين   ) 
معناها ان انتم  بس المسلمين في العالم 
يعني مسلمين ياباني والباقي مسلمين تيواني 
ثروتك ماشاءالله اللهم لا حسد 
حتقبل لو بقيت ريس ان الشعب يحاسبك عليها 
هل تعتقد ان المصريين سيصوتون علي العقيدة يوم الانتخابات ؟
---
صلاح ابو اسماعيل 
---
الدلائل بتقول ان والدتك امريكيه انت بتنفي 
بس ده مش بيت القصيد 
 يوم تقديم اوراق ترشيحك كان معاك الاف التوكيلات 
وكان ده سبب كافي لعرقله المرور 
في المؤتمر الصحفي بمسجد اسدبن الفرات  
دي دار عباده  مش للانتخابات بنروحها عشان نتعبد 
مش عشان نبايع رئيس مهما كان 
وكانت مذاعه علي الهواء
تابعوك  بايعوك بالدم 
يعني نفهم من كده اللي مش حينتخبك حيقتلوه 
طب انا مش حنتخبك ومنتظره اللي بيعوك بالدم حيعملوا ايه 
تابعوك احتشدوا امام مجلس الدولة وداخله لارهاب القاضي 
وكان مش ممكن يرجع لبيته  لو اصدر حكم ماجاش علي هواك 
شعارك سنحيا كراما 
اي كرامه تقصد ؟
كيف نضمن حقنا ؟
اي كرامه حنعيشها وسط اتباعك اللي بيمارسوا سلوك عدواني 
وهددوا باعلان الجهاد لو صدر حكم ضد رغبتكم الساميه 
طول عمرنا بنعرف ان الجهاد في سبيل الله 
مافيش جهاد في سبيل صلاح ابو سماعين  
---
الاعلام الجديد هو اعلام المنابر 
يستغل فيما يسمي الاسلام السياسي 
المنابر اصبحت للدعوة السياسية 
وده حصل في الانتخابات البرلمانيه والتصويت عليها في 
19 مارس 2011
كانت المساجد مكان دعايه للاسلام السياسي
---
دكتور سليم العوا 
---
دورت كتير علي برنامج له مش لاقيه 
كل اللي لقيته ان الكتاب الفلاني للدكتور العوا بيقول كذا 
والكتاب العلاني للدكتور بيقول كيت وكيت 
وانا في الطريق من اسبوعين لقيت تاكسي قدامي 
عليه بوستر للدكتور سليم ورقم موبايل وبيقولوا للتواصل 
ماصدقت سجلت الرقم باسم الدكتور 
وفضلت اتصل يوميا اكتر من مره  وفي اوقات متفرقه 
الموبايل مقفول لما يأست قلت ابعت ميني كول 
وكان .. قلت فيه 
الرقم ده اخدته من بوستر علي تاكسي ابيض 
ومكتوب للتواصل بتقصدوا اي تواصل بالظبط 
بقالي اسبوع بطلب والموبايل مقفول 
يادكتور سليم حضرتك صدقت انك بقيت رئيس الجمهوريه 
وقلت اذل في الشعب براحتي 
انا كنت عايزه اسال  عن برنامج سيادتك 
بس خلاص شكرا ومش حنتخبك 
بعد كام يوم قلت احاول تاني يمكن حد يرد 
اتصلت لقيته رن بس ماحدش رد 
حاولت تاني  رد عليه واحد 
قلتله السلام عليكم انا اخدت الرقم من علي بوستر قاطعني وقالي 
ده مش رقم دكتور العوا رقمه اخره 3 اصفار 
اكدت عليه وقلتله هو هو بس الاخر اغير واحط 3 اصفار قالي ايوه 
شكرته وقفلت 
وبما اني سجلت الرقم بالاسم بيطلعلي الاسم  يعني مش بشوف الرقم 
وطبعا مش حفظاه  طلعته فوجئت بان الرقم  اخره 3 اصفار 
اتغظت ورجعت طلبته  بقي يكنسلني  وبعدها ماردش  
والله ده اللي حصل حتي الرقم هو 
 010066655000
---
المطرب الشعبي سعد الصغير  لما اترشح للرئاسه 
كان بيستهزاء باصحاب التوكيلات لانه قدر يجمع 
25 الف توكيل 
وبعدها صرح انه ماكانش جاد في الترشيح 
وقال انا ما اقدرش امسك حي من الاحياء 
ازاي امسك بلد زي مصر 
وقال كمان ان اي حد ممكن يجمع توكيلات 
بصراحه احترمته جدا 
شابو  لسعد الصغير 
---
اخر حاجه سؤال بريءوالله 
القيادات الجديدة اللي حيتم اختيارهم للرئاسة 
اللي زوجاتهم منتقبات 
ياتري حيقابلوا الملكات وزوجات الرؤساء السافرات ازاي ؟
وده حيكون في المؤتمرات والزيارات الرسميه ؟
وللحديث بقيه عن مرشحي الرئاسة 
واوعوا اوعوا تقلبوا الصفحة 
ابقوا معي