21‏/7‏/2013

سؤال من اللهو الخفي

أعزائي
رمضاااان كريم 
ينعاد عليكم بالخير 

ده فانوس رمضان الاصلي  ابو شمعه مش الصيني 
تقبل الله منا ومنكم صيامنا وقيامنا 
وجعلنا واياكم من عتقاء الشهر الفضيل 
---
قريبتي اللي مش يتبطل كلام عن مصر 
اللي سمنها اللهو الخفي 
من يومين فجأتني بسؤال ماكنش يخطر علي بالي !!!
السؤال هو 
ياتري ياليلي لو بقيتي رئيس الجمهوريه حتعملي ايه ؟
السؤال صعب  وعايز تفكير قلتلها حرد عليكي بمقال 
قالتلي لا ده حيبقي الرد عليه في اكتر من مقال 
حفكر معاكم بصوت عالي 
----
اولا وبدون تفكير لازم اشوف حلول  لكل اللي بيحصل 
واول شيء اشوف حل في الاخوان 
يعني  اخلص مصر منهم 
مش حموتهم طبعا بس حدور علي حل معاهم 
ايه هو ؟
ده السؤال اللي تعبت في التفكير فيه 
--- 
لازم اغير علم مصر وبفكر ارجع العلم القديم 


شايفه  انه انسب علم لمصر 
كفانا سواد  اللون الاخضر حتي بيريح العينين والاعصاب
---
الزراعه
طبعا ححل مشكله اثيوبيا ومنع بناء السد 
الاراضي الصحراويه لازم تتخضر والشباب مافيش احسن منه لتخضرها 
ممكن نرجع قانون فدادين خمسه خمس فدادين 
بس حيكونوا فدادين صحراويه يتملكها الشباب 
ويزرعوا ويحصدوا ويكفوا احتياجيتنا في الاول 
بعدها يجي دور التصدير 
---
الصناعه 
حفتح المصانع اللي اتقفلت 
حشجع اصحاب المصانع ممكن الدوله تساعدهم بشرط 
تشغيل الشباب ,, ومش معني كده اننا حنستغني عن الكبار اصحاب الخبره 
الخبره مطلوبه مع حماس الشباب 
بشرط ان العماله تكون للمصريين 
يعني نمشي بمبدا سياسه التوطين 
 ---
الاقتصاد 
ده بقي المشكله الكبيره 
بس ممكن باراء الخبراء الاقتصاديين حنلاقي حل
ساعتها ممكن نشوف الصين واليابان عملوا ايه ونتعلم منهم
---
السياحه 
بجد حاجه توجع القلب لما تبقي البلد اللي فيها تلت اثار العالم 
بتعاني من السياحه 
حد بذمتكم شاف حتي اعلان سياحي  واحد يوحد ربنا 
يفتح النفس في الخارج 
ده في ناس لغايه دلوقتي واحنا في القرن ال21 
فاكرين اننا لسه بنركب الجمل وفي قمه التخلف 
ليه مانعملش البورصه المصريه للسياحه 
زي بورصه برلين 
ويجوافيها اهل السياحه واصحاب الفنادق من كل مكان في العالم 
يعرضوا اللي جايبنهولنا واحنا نعرض احسن ماعندنا 
ايه حيكون احسن من تلت اثار العالم 
ده كمان حيدخل لمصر دخل مش وحش 
بس بشرط التنظيم مش اي حاجه اقلب واجري 
او بالاحري اعمل اي كلام واهبش اللي فيه النصيب 
وابوك عند اخوك 
نهتم بالاثاراللي ماحدش بيعبرها 
احنا عندنا مرشدين ممتازين الحمدلله 
بس الترجمان اللي بيبهلوا السياح بتوع 
( جيفت بكشيش ياخواجه )
دول لازم يكون في وقفه معاهم 
كتير جدا منهم فاهمين ليه مانساعدهمش ونديهم دورات ونعلمهم اكتر 
اغلبهم مش بيعرفوا لا يقروا ولا يكتبوا حافظين اللي بيقولوه 
ماشي الحال نحفظهم بس بطريقه كويسه 
ويبطلوا يركبوا السايح الجمل ب5 دولار 
ولما يخلص المده وعايز ينزل من الجمل 
يشترطوا عليه ان النزول ب20 دولار 
سرقه علني هما السياح بيعانوا شويه منهم 
الامارات عمرها اقل من 40 سنه وحاليا 
خامس دوله في العالم سياحيا 
---
العشوئيات 
مش حقول نقضي عليها انما في الاول لازم نحسنها 
يعني ندخلهم الصرف الصحي والميه 
ورجال الاعمال اللي بيحبوا يسعدوا اهلا بيهم 
سواء عشان يعملوا عمل خير 
او يتقال عنهم انهم شاركوا في عمل خير 
لزوم الفشخره يعني !! المهم يساعدوا وخلاص 
وبشويش بشويش  حنلاقي العشوئيات بقت احسن من دلوقتي 
---
الضرايب
ماينفعش الضرايب العشوائيه 
وكمان لازم مأمور الضرايب يراعي ربنا 
مايساعدش المتهرب عشان بيطلعلوا منه كام الف 
وكمان مكاتب المحاسبين والمراجعين  يراعوا ضمايرهم
ويقدموا ميزنيات حقيقيه مش مضروبه 
طبعا في كتير من مأموري الضرائب عندهم ضمير 
وكمان اللي بيدفعوا الضرايب لازم يكون عندهم ضمير 
مش يكونوا بيكسب بالملايين ويدفعوا كام الف وعليكم السلام 
---
حعمل قانون جديد
عدم اعطاء الجنسيه المصريه لكل من هب ودب 
يعني وحياه النبي لما وحده مصريه تتجوز واحد مش مصري 
عارفه ان ولادها حيتبعوا جنسيه ابوهم 
ليه بقي تطلب لهم الجنسيه المصريه 
اللي عايزه ولادها يكون جنسيتهم مصريه تتجوز  مصري 
وحطالب بسحب الجنسيه من ملايين الل متجنسين بيها
اشكال حماس والمناظر المهببه اللي اخدوا الجنسيه بدون وجه حق 
كمان حنحط قيود علي فيزات الدخول لمصر 
زي مابيطلع عين أم اللي خلفونا في اي سفاره اجنبيه
 يبقي المعامله بالمثل 
لينا الحق نمنح ونمنع 
---
التاكسيات 
نعمل شركه تابعه للدوله لكل تاكسيات الجمهوريه 
يتوحد العداد يعني مش كل واحد يزوده بمعرفته عند 
كهربائي السيارت 
يبقي في متابعه مستمره
حتي ساعتها مش حيبقي في مشاكل بين الراكب وسواق التاكسي 
لو في مشكله في شركه تابعلها التاكسي والسواق تحل المشكله 
التوك توك يبقي موجود بس برخصه مش عشوائي 
حتي نعرف لو لا قدر الله حصل مصيبه نجيب السواق 
---
المروووووور
المشكله الاساسيه 
لازم نظبط المرور  اول حاجه بلاش نتلكك علي المخالفات 
يعني بلاش نخالف كده وكده عشان ناخد المعلوم 
ونسيب المزز يخالفوا زي ماهما عايزين 
لان لو في قانون رادع كان المرور اتظبط 
والمسئوليه كمان علي اللي بيسوقوا 
لما بيطلعوا يسوقوا في مكان غير مصر 
بيكونوا ملتزمين وخايفين وبيطبقوا القانون بحذافيره 
انما في بلادهم انسي ان في قانون 
علي فكره انا وحده من الناس دول يعني بخالف ما انا عارفه ان اخرها 
20 جنيه للامين وامشي 
وهو بيضربلي اعظم سلام صعيدي شحط محط من فوق لتحت 
تعالوا بقي للعساكر الغلابه اللي واقفين في الاشارات 
واللي اغلبهم ياولاداه مايعرفش الالف من كوز الدره 
طيب ازاي حياخدوا نمره المخالف 
دول مجندين الاقاليم
ويا حفيظ علي لبسهم المهلهل
لازم يلبسوا احسن من كده دول عنوان مرور مصر 
وكمان تلاقيه غلبان وواقف حيموت من التعب 
عطشان وجعان وقرفان وزهقان 
ولو حد اتعدي عليه مش معاه ولا حتي عصايه يدافع بيها عن نفسه 
---
الشرطه 
عايزه تظبيط جامد 
ادخل اي قسم شرطه تعمل محضر يالهوي 
تفضل تتنقل من امين لامين  واولويه المحاضر 
للمعارف و المحاسيب 
تلاقي الظابط عنده خدمه ليليه بيسموها 
( مرور سياسي )
نايم في بيته وراكن البوكس في اي شارع جانبي
وسايب القوه اللي هما العساكر يولعوا  ماهو البيه نايم 
ومعاه الجهاز لاي طاريء ساعتها بسلامته يقوم من النوم وينزل 
كمان لازم يكون في تناسق في شكلهم 
مرات تلاقي ظابط مرور كرشه قدامه متر 
منظره بشع ده لو احتاج يطارد حد حيعمل ايه 
ده ياحرااام بيمشي بالعافيه حيجري ازاي ؟
والا حيقول الحق حرامي امسك حرامي وهو واقف مكانه
كان في وزير داخليه من احسن وزرائها 
اسمه احمد رشدي 
سمعت انه كان بينزل ينظم المرور بنفسه 
ويلف علي الاقسام والمديريات 
وعشان كده طلعوه بدري بدري 
التجمع الخامس مش بلاقي فيه ولا اي كمين ولا عسكري واحد يوحد ربنا
هو التجمع ده تابع لجمهوريه كامبوديا ؟
---
البنوك 
ده بقي الامن فيها قصه تانيه
يعني العسكري اللي واقف قدام البنك من غير سلاح 
 ب20 جنيه تعرف منه كل اللي انت عايزه 
ممكن يقولك امتي البنك المركزي بيبعت العربيه المصفحه
اللي فيها الفلوس للبنك 
وكام واحد بيكون راكب فيها 
ولو عايز تعمل مصيبه قدام البنك مع العربيه دي 
ب500 جنيه يبعلك البنك ويجري  وممكن يقول انه راح الحمام
----
البلديه
اللي اسمها المحليات 
لما يطلع في دماغها او بالاحري لما تبقي عايزه تشتغل 
وده كل حين ومين تلاقيها نزلت تشيل التعديات 
بس حتشيل ايه والا ايه 
بتشيلها كام عربيه بيسترزق منها الغلابه 
طيب مانعمل حاجه احسن 
كل محل ممكن ياجر مكان صغير قدامه عشان زباين المحل 
في الامارات وتحديدا في الشارقه 
محل لارين  في شارع جمال عبدالناصر 
 مأجر من البلديه مكان قدامه بيدفع فيه 
اكتر من 100 الف درهم في السنه 
عشان الزبون يقف فيه 
ولو وقف اي حد غير زباينه المرور بيحصل منه غرامه فوريه 
قيمتها كااااام 1000 درهم 
ليه مانعملش كده بدل الصف التاني والتالت 
وبرضه حيكون  دخل كويس  
ونعمل سوق للي بيتعدوا علي الرصيف مكان صغير بايجار معقول 
يكون في مكان قريب مش نحدفهم في اماكن بعيده 
ساعتها نبقي ماعملناش حاجه 
لا حيشوفوا زباين ولا حد حيشوفهم
---
التامين الصحي 
ده بقي فيه امتهان لكرامه المواطن 
بس الغلابه يعملوا ايه
مضطرين يقعدوا بالساعات وده يزوع فيهم والتاني يتأمر عليهم
كل ده عشان شريطين ضغط وممكن مسكن او كام حقنه انسولين 
---
المعاشات 
دي مشكله المشاكل 
الموظف قعد طول عمره يدفع التامينات والاخر ياخد 80% من راتبه كمعاش 
والورثه ياخدوا من 75 ل80 % من المعاش اللي كان بياخده
يعني الدخل بينزل 
والاسعار بترتفع
مش حاطين في اعتبارهم ان اللي بيطلع معاش له مصاريف 
دواء  حتي لو في تامين صحي لانهم مش بيصرفوا كل الادويه 
بحد اقصي 3 ادويه 
كل دواء شريطين يعني 20 قرص
اللي بياخد قرص في اليوم مش بيكفيه 
طيب ازي الحال لو بياخد مرتين او تلاته في اليوم 
العيد جه مش له احفاد عايز يديهم عيديه 
راح يزور حد من اولاده مش حياخدله كيس جوافه مثلا 
عايز يشتري لبس  عايز يجامل قريب او جار 
ولو ورثه وفي اولاد بيتعلموا دي لوحدها كارثه 
انا لو حصل وبقيت رئيس جمهوريه اول حاجه حعملها
حثبت الاسعار وارفع المعاشات 100%
والغي السوق السوده مش في العمله بس 
في كل حاجه ممكن يكون فيها سوق سوده 
كل اللي كتبت عنه عايز اعاده هيكله 
ولسه في حاجات تانيه حكتب عنها بس كفايه كده النهارده 
حسيت انكم ملتوا مني ومن كلامي 
تفتكروا اللي عايزاه ده كتير 
سامعه اللي بيقول انها عايزه تعيش في المدينه الفاضله 
وليه مصر ماتبقاش هي المدينه الفاضله 
اللي ربنا سبحانه وتعالي قال عليها في القرأن الكريم 
ادخلوها امنيين 
نفسي اصلح كل اللي كتبت عنه 
وللحديث بقيه 
واوعوا اوعوا تقلبوا الصفحه 
ابقوا معي

 
 

 

 



 
 
 




 
 

5‏/7‏/2013

دلعوه يا دلعوه السيسي عملها وخلعه

أعزائي 
الف مبرووووك مصر رجعت تاني لينا 
عنوان المقال ده الهتاف بعد رحيل نظام الاخوان 
مش مصدقه بجد ان ورقه تمرد عملت كل ده  
النظام سقط لا بالفيس بوك ولا بتويتر ولا باي حاجه غير ورقه تمرد
وشباب مصر الواعي 
 بس الفضل لابناء مصر وحزب الكنبه اللي اخيرا نزل 
شعبنا شعب جميل 
دي ثوره حزب الكنبه 
المقال ده موجه للعايشين بره الجمهوريه 
لا نزلوا اتحاديه ولا تحرير كانوا بيتابعوا من شاشات القنوات الفضائيه 
تعالوا نشوف حصل ايه 
ده االلي نزلته علي الفيس بوك يوم 30 يونيه 
وكان بعد رجوعي من الاتحاديه 
النهارده كانت المسيره بتعكس حب الشعب لمصر،،،، رجاله وستات وعواجيز وصبايا وشباب وكمان اطفال كلهم في المسيره،،، مشينا من ميدان الحجاز لﻻتحاديه بجد والله ماحسناش بالوقت،،،ناس كتير كانوا بيوزعوا اعﻻم علي اللي مش معاه علم وغيرهم بيوزعوا الكروت الحمرا ،،،اللي ماقدرش ينزل ياكان واقف قدام بيته او في البلكونه وبرضه ماسك العلم والكارت اﻻحمر ،،،الشباب كان محوط علي الصبايا مافيش تحرش بلعكس كانوا خايفين علي الصبيايا ،منظومه جميله في حب مصر ،،،الكل كان قد المسئوليه يارب تمم علي خير ،،، الحق اشوف اﻻخبار في التليفزيون وبرضه بقولكم ،،،، تصبحوا علي وطن حر يساع الكل .
------

دي الاتحاديه شفتوا بقي مصر جميله بشعبها قد ايه
-------
تعالوا معايا نروح النحرير نشوف ايه الاخبارات هناك
حزب الكنبه قاعد قدام المجمع بكراسي بلاستك 
ايجار مع السخن او الساقع

اغلبهم كبار السن 
شباب الميدان واقفين في عز الشمس 
طلبوا علي المنصه شباب لتنظيم الميدان 
كان الشباب مشبكين ايديهم وبينهم وبين الصبايا حبل 
لمنع التحرش 
اللي يطلع من الميدان ماحدش يساله ليه طلعت 
بس لو وحده  كانت كبيره او صبيه  يوصلوها لبره 
ويفضلوا يسلموها لبعض لغايه ماتطلع في سلام 
حتي بره الميدان مافيش نحرش 
ولو مجموعه بيكون قدامهم واحد ووراهم واحد وبيوسعلهم الطريق 
والكبار بياخدوا بايديهم 
قريبتي المهمومه بحب مصر اللي سميناها في مقالاتنا قبل كده 
باللهو الخفي 
خرجت من الميدان ورجعت  تاني الميدان 
لقت واحد ماشي وراها وفي لحظه لقت شباب الميدان 
بيجري وبيقوله هنا ستات انت رايح فين 
هي تعدي انت لاروح انت مع الرجاله 
 في دكاتره وعربيتين اسعاف 
ظبطوا ست حرميايه طلبوا من منظمين الميدان ياخدوها بره الميدان 
لقوا محفظتين ضايعين وحده فيها كارنيه نادي وادي دجله 
والتانيه فيها بطاقه واصحابهم استلموهم بعد التنويه عنهم 
ست كبيره طلعت المنصه  لابسه علم مصر وهتفت 
مصر مصر   الشباب سندوها كان حيغمن عليها 
وكان الشباب بيحفذوها  وهي بتهتف
طلعت ام شهيد وقالت 
ابني شيفكم ومبسوط بيكم شباب  ستات بنات رجاله انتوا مصر كلها 
انتوا شعب مصر العظيم وكملت كلامها وقالت 
سامعه صوت ام شهيد بتنادي حتجيبوا حقي وحق ولادي 
الشيخ مظهر شاهين صلي العصر في الميدان 
ودعا بالخلاص لمصر 
مافيش حد معاه حتي عصايا يدافع بيها عن نفسه 
الا العصايه اللي شايله علم مصر 
ودي عصايا بلاستك لا تهش ولا تنش
فعلا كانت سلميه سلميه  
الاغاني الحماسيه كانت مشعلله الميدان 
اكتر اغنيه كانت بتحفذ الميدان 
بسم الله الله اكبر بسم الله 
باحلف بسماها وبترابها 
ازاي لمحمد منير 
يا احلي البلاد يابلادي 
وفي وسط الاغنيه تلاقيها وقفت عشان الميدان يكملها 
 ملحمه بكل اركانها
الستات كانت كتيره جدا ممكن نقول اكتر من الرجاله 
ستات مصر اللي كان ابوشيماء عايز يقعدهم في البيت 
كلهم جابوا رجالتهم وجم الميدان 
في ستات كانوا بيقولوا ان رجالتهم رفضوا ينزلوا الميدان 
بس هما نزلوا وشاركوا 
طبعا الرفض ده من منطلق هو انا يعني اللي حعدل المايله 
ستات اغلبهم مش جامعين وفيهم كمان اللي مش بيفكوا الخط 
جايبين بناتهم وجاين الميدان
غير اللي جايين من المحافظات 
مترو الانفاق هو الوسيله الاكتر انتشارا 
وتسمع فيه احلي احاديث عن الوضع الراهن 
وكان في حديث بين اللهو الخفي وبين واحد في المترو 
كان بيقول ان مرسي بوظ الدنيا وعمل حاجات مبارك ماقدرش يعملها 
واحد اخواني رد عليه وقاله انه كان عايز يعمل مؤسسات 
ويمحي فساد النظام السابق 
اللهو الخفي ردت عليه وقالتله 
الفساد في نظام مرسي ونظام مبارك ما انتهاش ليه ؟
طول ما المدرس بياخد 300 جنيه 
وامين الشرطه 500 جنيه 
حيبقي فيه فساد 
اللي كان بيتكلم الاول قاله 
لو عندك بيت فيه شروخ حتهده والا ترممه 
وتوضبه من بره وجوه  
ماردش  والركاب قالوله انت اخواني
 نزل في المحطه اللي وراها
 الاكله الرئيسيه هي الكشري 
وكشري التحرير ماشاءالله عليه 
الشرطه وزعت علي المتظاهرين ميه معدنيه 
في مطرب جه الميدان قال ايه مطرب الميدان 
عامل شعره ديل حصان وقعد يغني 
والشباب بيضحك 
سعاد حسني شاركت في الميدان  بالبوست ده 




تحيه واجبه لتمرد لجهدهم في الحمله 
والجهد الاكبر في تنظيم الميدان 


وتصبحوا علي وطن حر يساع الكل 
واوعوا اوعوا تقلبوا الصفحه 
ابقوا معي