28‏/11‏/2010

انتخابات مجلس الشعب 2010







أعزائي
كل خمس سنين وانتم بخير  النهارده كانت انتخابات مجلس الشعب
قلت اعمل جوله علي لجان مصرالجديده بصفتي من سكانها 
اول شيء شفته الصبح الساعه 9 ونص صباحا في التليفزيون
عمنا الحاج الكبير لما انتخب هو ومرات عمنا واولاد عمنا في لجنه
مصر الجديده الثانويه النموذجيه للبنات
ودي تعتبر اشيك وانضف لجنه في مصر كلها
اللجنه دي بالذات لما لها من اهميه تلاقوها دايما هادية
نقول الاول عن نظام الانتخابات
المرشحين 508 نصفهم عمال وفلاحين والباقي فئات
منهم 64 سيده ودي كوته المرأة
فتحت ابواب اللجان في الثامنه صباحا
واغلقت في السابعه مساء
222 لجنه انتخابية بيتبعها   144.500 لجنه علي مستوي الجمهورية
تحت اشراف 2286 قاضيا و276 الف موظف من العاملين
بالحكومة  والهيئات والمؤسسات وذلك لتولي رئاسه وعضوية اللجان
لما تدخل اللجنه تلاقي بوستربيوضح كيفيه الادلاء بصوتك
بعد ما تنتخب ستجد صندوقين الاول للمقاعد العادية اما الثاني فهو الخاص بمقاعد المرآة
لجان هاديه جدا ولجان ساخنه جدا
طبعا انا كنت حكتفي باني الف علي لجان مصر الجديده انما جاني تليفون اثناء مروري علي اللجان
قلب كل شيء  بوفاة احد اقاربي وكانت الجنازه من السيده نفسيه
طبعا وصلت قبل صلاة العصر بدقايق لقيت هدوء غريب
بعد صلاه الجنازه علي المرحوم  رحنا ندفنه في مقابر الامام الشافعي
المهم بعد كل ده رجعت اكمل المرور علي الدوائر وكان من حسن حظي اني تهت
اه والله تهت ولقيت نفسي في ازقه وحواري وزحمه رهيبه في الامام الشافعي وتحت كوبري التونسي وزينهم
والمنيل وشارع الهرم 
شفت بصراحه حاجات ماكنتش اعتقد اني ممكن اشوفها
وقابلت ناس غلابه جدا رايحين ينتخبوا  سالت ست هو حضرتك بتنتخبي ليه
قالتلي اصل اللي حنتخبه وعدني انه حيطلب انهم يزودا معاشي
ووحده تانيه سالتها ليه بتنتخبي  قالت عشان بيدوني 100 جنيه
طبعا الكارت الدوار  بقي حاجه عاديه واللي مش عارف ايه هو  حعرفه
تدخل اللجنه ومعاك بطاقه ادهولك بره هما محددين اللي حتنتخبه
بتدخل  وطبيعي انهم يدوك بطاقه عشان تعلم علي اللي انت عايز تنتخبه
بتطبقها وتشيلها وتحط اللي معاك من الاول ولما تخرج تديها للي كان ادالك البطاقه اللي علموا عليها
وتاخد المعلوم  وهو غالبا بيكون 100 جنيه
وحده ست كبيره لقيتها بتبكي سالتها مالك قالتلي اصلي حطيت الفاضيه
وضاعت عليه الفلوس
سالت واحد راجل  مسن هو حضرتك بتنتخب كل مره قالي ايوه
قلتله منتظر ايه من اللي حتنتخبه
قالي هو وعدنا انه يكون معانا ولو لينا طلبات حيحققلنا طلباتنا
لقيت ست  مسنه ومعاها ولد حوالي 10 او 11 سنه مسندها
سالتها حضرتك عندك تذكره انتخابيه قالتلي ايوه سالتها جايه تنتخبي حد تعرفيه
قالتلي ايوه انا بنتخبه كل مره
قلتلها وهو بيساعدكم قالتلي كل مره يوعدنا  طبعا مفهوم الباقي
ناس غلابه وطيبين وبيصدقوا كل حاجه
هما دول اغلب الشعب المصري
اغلب اللي راحوا الانتخابات هما المسنين والغلابه 
انما الشباب بيهتف ويرقص ويهيص
في الازقه والحواري اللي رحتها لقيت الطبل والرقص والميكرفونات
  وده مايمنعش من وجود البلطجيه  والبادي جارد للمرشحين
سالت واحد كان متطوع انه يمشي المرور عشان سياره فولكس باست سوده
كانت عايزه تركن في الزحمه .سالته بعد ماوقفني عشان يخليها تركن
قلتله مين ده اللي وقفتني عشانه قالي ده ابن الدايره
طبعا ضحكت من كلمه الدايره وسالته هما هنا في ابناء كتير للدايره
قالي ايوه طبعا  وسابني وجري عشان ابن الدايره نزل من العربيه
في دائره مدينه نصر الدعايه مكثفه امام شركات البترول
وطبعا كلها لوزير البترول سامح فهمي
كل مندوبي مرشحي الحزب الوطني هادين جدا
انما مندوبي المستقلين والاحزاب  في غايه العصبيه
الشرطه موجوده بكثرة وكمان عربيات الامن المركزي
طبعا رحت انتخب حوالي الساعه 6.10 مساء
دخلت اللجنه  الشرطه وقفتني علي الباب عشان تشوف بطاقتي الانتخابيه قلتلهم انا بنتخب بالبطاقه
قالولي طيب ادخلي بصراحه كانوا في منتهي الادب
دخلت  سالوني انتي لجنه كام قلتلهم لا مش عارفه  لاني فعلا ناسيه
قالتلي وحده ممكن تروحي الكمبيوتر تعرفي لجنه كام  سالت فين هو
شاورتلي علي ممر  دخلت لقيت ناس كتير قاعده
سالتهم فين الكمبيوتر فوجئت ان مافيش كمبيوتر 
وحده اتبرعت وخدت اسمي واتصلت بحد علي الموبايل وقالتله اسمي
اقل من دقيقتين وقالتلي لا مش موجود
قلتلها ازاي قالتلي في كتير مالقوش اسمائهم قلتلها ايه الحل قالتلي مافيش حل
قلتلها يعني اروح  وبلاش انتخب قالتلي ايوه
قلتلها لا انا حنتخب بالرقم القومي قالتلي لا مش حينفع
لقيت مافيش فايده من الصوت الواطي  وبصوت عالي سالت الموجودين
هو احنا لما بنطلع باسبور مش بيطلبوا منا الرقم القومي
ولما بنصرف شيك في البنك برضه بيطلبوا الرقم القومي
ولما بننزل في اوتيل بيطلبوا الرقم القومي
ولما يطلب مني اثبات شخصيتي بيكون برضه عن طريق الرقم القومي
وفي خانه في استماره الرقم القومي بتخيرنا ننتخب في مكان اقامتنا والا في مكان ما اتولدنا
 وده علي اعتبار ان مش كلنا مواليد القاهرة
ماحدش رد زي ما اكون بحكي مع حالي 
طلعت الموبايل وقلتلهم خلاص انا حطلب بوليس النجده يجي يعملي محضر
اثبات حاله انكم مش عايزني انتخب او بالاحري بتسلبوا مني حقي الانتخابي
لقيت الكل قام وجريوا ندهولي رئيس اللجنه
جالي وقالي ايه اللي مزعلك  قولتله مش حعيد تاني  هما حكولك
قالي خلاص هاتي الرقم القومي وراح معايا بنفسه اللجنه وانتخبت والحمدلله
ماهو انا دايما ارازيهم في الانتخابات
واقولكم اوعوا تقلبوا الصفحة
وللحديث بقيه بعد الاعاده
ابقوا معي

18‏/11‏/2010

لعبه الكراسي الموسيقه

أعزائي
كل عام وانتم جميعا بخير بمناسبه عيد الاضحي المبارك
والسنه الجايه ان شاءالله نكون جميعا صحبه علي عرفات
بصراحه اشتقتلكم جدا وانا عارفه اني وحشه خالص خالص لاني بتأخر عليكم
بس والله الظروف والجو الغير مستقر  وحرق قش الرز كل دي عوامل مساعده
للحساسيه  الصدريه . شفاكم الله وعافاكم
طبعا مستغربين من شعار الحزب الوطني بس قلت افكركم بيه
طالما اني حكتب عن الحزب ولو اني مش عضوه فيه
ولا في اي حزب تاني الا حزب وداد قلبي
طبعا اتفاجئت زيكم من ترشيحات الحزب الوطني اللي كانت مفأجاه
وليه رشحوا اكتر من عضو في كل دايره وفي دايره منهم رشحوا  فيها
ست قدام 4 رجاله  والله دي حقيقه
طب الشرع بيقول ان الراجل له 4 ستات انما الست مالهاش الا راجل واحد
هي دي الحاجه زهرة والا ايه
معليش بقي اصل القافيه حبكت معايا
والسؤال هو حيضحوا بمين لصالح مين والتضحيه دي لزوم عيد الاضحي
يبقي لازم نضحي باكتر من مرشح لكل دايرة
عشان المرشح اللي عليه العين ومظبط اموره هو اللي حينجح في الانتخابات
اكيد النتيجه في الكونترول قالت ان كل الوزراءالحاليين نجحوا نجاح ساحق
وحينالوا شرف التواجد في المجلس الموقر او ( سيد قراره )
بس برضه في دواير مقفوله من 32 سنه زي دايرة الباجور
كانت مقفوله للمرحوم كمال الشاذلي
بس اكيد الحزب حيرشح حد تاني واعتقد ان التاني ده ممكن يكون ابنه
دي مجرد تخمينات بس الايام الجايه حتورينا الكتير
عارفين الانتخابات دي شكلها زي الكراسي الموسيقيه
بس المرشح اللي عليه العين والنيه بيفضل واقف
جنب الكرسي والباقي بيلف علي الموسيقي
واول مايشار للمرشح ان الموسيقي حتقف يقعد علي الكرسي وبكده ضمن الدايره
وباقي المرشحين في الباي باي وسعيهم مشكور
في حاجه تانيه شغلتني جدا  وفكرت فيها كتير لغايه مالقيت تفسير انا اقنعت حالي بيه
عاملين شعارين للحزب الهلال والجمل طب مين حياخد الهلال ومين حياخد الجمل ؟
الهلال اكيد اللي حينجح وحيعلا زي الهلال في السما
اما رمز الجمل ده بقي للي حيشيل الهم ويقعد يفكر ياتري ياهل تري
ناجح والا لا حنول الشرف والا لا
وفي الاخر يطلع من المولد ويقعد علي دكة الاحتياطي لمده 5 سنوات
ياعالم حيحصل فيهم ايه ؟
تفكير جاني من ايام فجأة وهو لو انا رشحت حالي حيكون ايه شعاري
هما شعارين فكرت فيهم الاول الجردل ماتضحكوش مش بقلد عادل امام  في الجردل والكنكه
بس لقيته رمز مناسب ليه  لاني مش حفهم حاجه واكيد حبقي زي الجردل ويجي اي حد يدلقني
والشعار التاني برضه مناسب جدا جدا  برضه اوعوا تضحكوا
هو شعار الحمار لاني اكيد في مساله الانتخابات حشبه الحمار في عدم الفهم
والله يسهل علي عبيده
معليش انا طالعه من دور مرض جامد وممكن يكون مقالي هلوسه برلمانيه
استحملوني زي كل مره امركم لله انا برضه اخف من الانتخابات والترشيحات
وللحديث بقيه بعد النتيجه
بس اوعوا اوعوا تفكروا تقلبوا الصفحه
ابقوا معي