30‏/10‏/2012

زياره لترزي الدستور

أعزائي 
كل عام وانتم بالف خير 
العيد خلص وبالتالي الاجازه خلصت 
وينعاد عليكم جميعا بالخير 
---

طبعا لازم كلنا نعرف الدستور اللي بيتفصل علي المقاس 
ترزيه شاطرين جدا ولا اجدع بيت ازياء شهير 
يقدر يفصل بالمقاسات المظبوطه اللي اتفصل بيها الدستور
زي ما قالوا علي الفيس بوك وتويتر 
قنابل موقوته في الدستور 
خليكم معايا وصحصحوا كده عشان نعرف ناخد وندي 
شوفوا انا ححلل واحد واحد 
نبتدي علي بركه الله 
يالله بينا 
---
1- لا يوجد في المسوده ماينص علي تعيين نائب للرئيس 
وقد كان مطلب ثوري 
الساده الترزيه ماعندهمش حاجه اسمها مطلب ثوري 
انا شايفه اننا قاعدنا 30 سنه من غير خيال مأته  , بقصد نائب 
اذا جت علي دي نمشيها ونعصر ليمونه ماهو كتير عصروا ليمون 
---    
2- مسموح لمزدوجي الجنسيه الترشح للرئاسه 
وماله ماهو كتير من عليه القوم بقوا بجنسيتين 
وفي كتير اولادهم بجنسيتين يالله بقي مش يمكن حنرجع نظام التوريث 
ماهي هيصه واللي يلحق الكومي يقش
قارئي العزيز مستر جمالي في استراليا  انبسط بقي ممكن تترشح للرئاسه 
وبجد حعملك احلي واجب في الانتخابات 
ماتقلقش بس انوي عشان اخزن الشاي والزيت والسكر 
لزوم الانتخابات 
---
3- من حق الرئيس تعيين كل رؤساء الاجهزه الرقابيه علي اعمال الحكومه والرئيس 
ماشين بمبدا من دقنه وافتله 
الحكومه بتاعتنا يبقي لازمن حنمن الرقابه برضه تبقي بتاعتنا 
---
4- له حصانه برلمانيه مدي الحياه لعضويته في مجلس الشيوخ 
ولا توجد طريقه لمحاكمته الا التلبس 
المخلوع لو الترزيه بتوعه شاطرين كانوا انتبهوا وعملوا كده 
تلاقيه ياولاده متحسر علي انه استعان بترزيه خايبين 
ماهو معاه عضويه يعني حصانه 
بس ياتري التلبس ده معناه ايه ؟
ممكن يكون عنده ترزيه شاطرين وحكومه في جيبه الصغير ويتلبس 
انا لا اعتقد 
---
5- من حق الرئيس تعيين الضباط العسكريين وعزلهم دون قيد او شرط 
ياصلاه النبي  
يعني حسب مزاجه اللي يرضي عنه يعينه 
واللي مش عاجبه خلقته يديله استماره 6 
ويقعد في البيت لابس الجلابيه والطاقيه 
بس  الترزيه نسيوا حاجه مهمه وده غلط لا يغتفر      
نسيوا كمان يضيفوا للضباط العسكريين
ضباط أمن القري السياحيه والمولات وبالمره العمارات 
شوفوا كنت حنسه اهم حاجه وكانوا حياخدوا علي خاطرهم مني 
ظباط الايقاع المزكاتيه لازم برضه يبقي تعينهم وعزلهم مش علي كيف اي حد 
لازم سحص مهم 
---
6- يكلف الرئيس رئيس وزراء لتشكيل الوزاره 
دون وضع معايير لاختيار رئيس الوزاره 
يعني ممكن يكون مائي او نباتي او طبي 
سلفي اخوانجي
  صغير كبير
اي رئيس وزاره  بيسمع الكلام وينفذ
---
7- حق اعلان حاله الطواريءبعد موافقه مجلس الوزراء 
ثم يعرض علي البرلمان وليس العكس 
خلصنا من 30 سنه طواريء رجعهولنا تاني 
وماله عالبركه 
---
8- من حق الرئيس حل مجلس الشعب في حاله اعتراض البرلمان علي تشكيل الحكومه 
   مرتين متتاليتين دون قيد
يعني البرلمان مالوش اي لازمه  لو عمل استجواب لاي وزير 
والوزير كان النئيب خاله يبقي حنحل البرلمان
---
9- تدرج جميع نفقات رئاسه الجمهوريه والاجهزه الرقابيه التابعه لها 
الميزانيه العامه للدوله وتخضع لرقابه الجهاز المركزي الحسابي 
التابع للرئاسه وهو جهاز للاحصاء فقط وليس للمحاسبه 
حلوه صلاه النبي  عاشق جمال النبي
تاتاه ترراتتاه 
مع الاعتذار لمحمد طه 
انا مش فاهمه مين حيحاسب مين ؟
واتوبيس نمره كام بيروح فين ؟  
يعني المحاسبه والرقابه كله من كله 
اه قولتولي دود المش منه فيه 
الاكاده ماده الاحصاء دي تعبتني جدا 
مش عارفه ازاي نجحت فيها 
احصاء احبوش     
---
10- يعين الرئيس ربع اعضاء مجلس الشيوخ والذي من صلاحياته 
امكانيه الاعتراض وتعطيل اي قانون صادر عن مجلس الشعب 
يعني حيكون فيه اعتراض  كويس كويس 
معني كده اننا اتنقلنا من موافقون موافقه  بالاجماع  ننقل علي البند اللي بعده 
جميل دا حيبقي معترضون معارضه  بالاجماع  ننقل علي البند اللي بعده   
شفته هو ده التغير , هي دي الثوره 
---
11-حق الرئيس ان يختار قضاه المحكمه الدستوريه المسئوله 
عن محاسبه الرئيس شخصيا والحكومه والبرلمان عن عدم 
دستوريه اي قانون يتم اصداره 
ده بقي جديد لنج ,او جديد نوفي 
انا اعرف ان اي حد ممكن يختار يلبس ايه ياكل ايه يتجوز مين 
يحب مين  يشتري  ايه يبيع ايه يشتغل ايه 
انما يختار القضاه اللي يحاسبوه هو والحكومه 
طب ازاي ؟
---
12-لا زكر لاستقلال الهيئات القضائيه او الطب الشرعي 
وقد كان مطلب شعبي 
ياعم دي عزبتهم بلا شعب بلا بطيخ 
---
13- تقليص دور الجهاز المركزي للمحاسبات لمراقبه الاموال العامه فقط 
وليس الخاصه وتلك كارثه 
يعني كل واحد يتغني براحته بطرق مشروعه ممكن 
سرقه نهب  كله مباح 
الله الله الله 
---
14- الغاء الاشراف القضائي الكامل علي الانتخابات واسنادها 
الي مفوضيه مع عدم وجود معايير لاختيار اعضاء المفوضيه 
يعني ممكن عم عبده البواب او عم سيد بتاع البيبسي 
يكونوا دراعتهم طالت ويبقوا من اعضاء المفوضيه      
ياريت لو حد يعرف كيفيه الانضمام للمفوضيه 
يقولي عشان ابقي مفوضه امري لله 
---
15-الاقتراع والفرز سيقوم به تابعون للمفوضيه ولا توجد  اليات محدده 
لاختيار هؤلاء التابعون ولا تحديد من يقوم بالاختيار 
اكيد اعضاء المفوضيه  اللي ممكن يختارو
بس ياواقعه سوده لو عم عبده وعم سيد ماكانوش علموه ولادهم 
مش حيقدروا لا يقرعوا ا ولا يفرزو  
---
16- لم  يتم ذكر من يعين محافظ البنك المركزي ولم ينص 
علي تقديم  تقرير العمل لمجلس النواب 
هي جت علي دي ماهي مفهومه حيبقي حق الرئيس 
حنستهبل علي بعض 
---
17-لا يجوز تغيير مواد الدستور قبل عشر سنوات 
لا مش كفايه ياريتكم خلتوه ساري المفعول 
مافيهوش تاريخ صلاحيه 
---
كده ال17 بند خلصوا 
فين بقي حق الشعب ؟ كله حق الرئيس 
السؤال بقي هو عم الحاج ابو شيماء  حيعمل ايه والا ايه 
ياحرام  كان الله في العون 
---
النهارده تقلت عليكم وتلاقيكم مليتوا مني 
وممكن تكونوا قلبتوا الصفحه في نص المقال 
وبجد بجد ضغطي عالي من اللي بشوفه وبسمعه 
بس برضه حقول 
واوعوا اوعوا تقلبوا الصفحه 
ابقوا معي