26‏/4‏/2010

خسارتك يامصر

أعزائي
والله وحشتوني وعارفه اني بتاخر عليكم كتير
بس الحقيقه الظروف بقت صعبه
وكمان الاحداث مش حلوه
نفسي اكتب مره عن حاجه احس انكم لما تقروها تبقوا مبسوطين
بس حنعمل ايه ظروف البلد بقت صعبه
مجلس الشعب وافق مبدئيا علي مشاركة القطاع الخاص
في البنيه الاساسيه
نواب الاغلبيه طبعا موافقون موافقون
وبيقولوا انه السبيل الوحيد لتنفيذ المشروعات الاستثمارية
لان الموزانه مش حتقدر تتحملها
اما نواب المعارضه وصفوا اللي بيحصل انه خطير جدا
وانه حيدلهم فرصه التحكم في مقدرات الشعب الغلبان
لان مشروع القانون ده روشته البنك الدولي
القانون حيقضي علي اي حياه كريمه لمحدودي الدخل
وحيفتح الباب علي مصراعيه للراسماليه
وقال عز ان القانون حدد بوضوح كيفيه تعامل الدولة مع المشروعات
وان اسعار الخدمه حتحددها الحكومه لانها حتشتري الانتاج من منفذي المشروعات
طبعا اي كلام هو حد بيحاسبه
كل اللي بيتقال عشان الموزانه
في نفس الوقت بنلاقي عمنا يوسف بطرس الشهير بعبدالقوي
بينكر اي رقم بيناقش يعني في رقم للجهاز المركزي ورقم تاني للبنك المركزي
وعمنا عبدالقوي له رقم تالت
يعني نلاقي ان قيمة القروض ذادت 105 مليار
ده بيمثل عجز في الموازنه ومزيد من القروض ومزيد من الاعباء لسد الدين
اما الضرائب القطاع الخاص يحصل علي 80% من اجمالي الدخل العام
وبيسدد 29%من ضرائب الدخل
اما اصحاب المرتبات والاجور بيحصلوا علي 20%وبيدفعوا 16%
اما قطاع البترول وقناة السويس والشركات العامة
بتسدد 55%من الضرائب
وكمان لسه اوعوا تملوا
مصر اللي بتشتكي من عجز دائم فتحت الباب للاستيراد
حنلاقي في عام 2008 / 2009
مصر استوردت سلع استهلاكية ب9 مليار ونص
دي عباره عن ايه
خبز -فطائر -وكعك -وبسكويت
15 مليون استاكوزا وجمبري
دي لزوم عزايم الحكومه والصفوه ورجال الاعمال
40 مليون سجق - وكافيار ومعلبات اسماك
نفسي اعرف الكفيار اسود والا احمر لان هناك فرق في السعر والطعم
133 مليون زوارق للنزهه ويخوت
57 مليون بنس وتوك وامشاط وايس كريم
بس خساره نسيوا الفليات
المهم في الاخر مش سلع استفزازيه وبس لا كمان عبا علي ميزان المدفوعات
لسه ماتقفلوش الصفحه
استيراد سلع لها مثيل عندنا زي
133 مليون احذيه
184 مليون موبيليا
135 مليون فواكه طازجه ده بقي اكيد التفاح الصيني
941 مليون ملابس واقمشة
44 مليون موكيت وسجاد
فين بقي العداله الاجتماعيه
البضائع الصيني غزت كل المحلات في الاسواق
بجانب البضائع والمنتجات الاجنبيه
الاول كانوا الصينيات بيلفوا علي البيوت بالبضائع
اما حاليا بقي ليهم سوق في مدينه نصر وكمان كل المحلات بتعرض البضائع الصيني
وفي مصانع في 6 اكتوبر بتنتج كل ماهو صيني
ياخسارتك يامصر
اوعوا تقلبوا الصفحة ابقوا معي

1‏/4‏/2010

نعالوا نتسلي مع الحكومه

أعزائي
لم يبتعد رامي لكح عن الظهور في الفضائيات والصحف
ونسي تماما تسامح الحكومه معه واعاده جدولة ديونه
واسقاط فوائد كثيرة عنه وتناست الحكومه انها اموال المودعين
وذلك تمشيا مع المثل القائل
الخساره القريبه احسن من المكسب البعيد
ونسي حاله لاستضافة الفضائيات له بعد هروبه
باموال المودعين بالبنوك كان اماهه خيارين السجن او الهرب كما فعل غيره
هدي عبدالمنعم والهواري وايهاب طلعت وأشرف السعد
وقد اصدر بنك القاهرة يوم السبت بيان بعدم تسديدة الكامل لمديونيته
ولكنه تسوية وان الجزء الاكبر سيتم سداده علي عدة سنوات
---
فجأة زار وزير التربيه والتعليم دكتور احمد زكي بدر
مدرسة الخلفاء الراشدين الآعدادية للبنين بحلوان
ووصف المدرسة بانها الاسواء وان جميع العاملين بها ليس لديهم ضمير
وذلك لغياب المدرسين ومدير المدرسه الذي حضر بعد الحصه الاولي
بعد علمه بوجود الوزير
وتم الغاء معظم الحصص لعدم وجود المدرسين
وانتشرت القمامة في فناء المدرسه ودورات المياة
وذلك لغياب العمال ايضا
وقد قرر الوزير نقل جميع العاملين بالمدرسه الي ادارة اطفيح التعليمية
اما السيد المدير الهمام فقد تم نقله الي مديريه المنيا التعليمية
كما زار ايضا مدرسة الزهراء الثانويه للبنات
وقرر نقل مدرس اللغه العربيه ومدرسة اللغه الانجليزية
الي ادارة اطفيح التعليميه لتغيبهم
كما قررالغاء المكاتب الادارية لجميع القيادات الفنية العامله
بالمديريات التعليمية
وتكلفهم بالعمل الميداني اليومي لمتابعة المدارس بجميع انحاء الجمهورية
يعني من الآخرمالهمش لا رابط ولا ظابط يروحوا او مايروحوش
اللي عنده مشوار خاص يروح يعمله
واللي عندها طبيخ تقعد في البيت
ويجعله عامر ياوزير التربية
---
هدد دكتور فتحي سرور بعدم موافقة المجلس علي الحساب الختامي
للدولة للعام السابق لوجود مخالفة قانونية تتعلق بتحويل
24,3 مليار جنيه من اموال المعاشات للخزانة العامة
في حين انها يجب وضعها بصناديق المعاشات
مافيش داعي انكم تفرحوا
لان المجلس رجع اقر بالحساب الختامي للموازنة العامة
للدولة للعام المالي 2008 \ 2009
بعد تصويت موافقون موافقون اغلبيه
وقد قاموا بالتصفيق الحاد عقب اعلان نتيجة التصويت
يعني بالظبط زي مابنقول
حسن + حسن = حسنين
---
اشتبك النواب المستقلون بمجلس الشعب
مع المهندس احمد عز واتهموه بمخالفة الدستور
وقاموا برفع الدستور عاليا والضرب علي الطاولات الموجوده امامهم
وقد قام نواب الحزب الوطني بالالتفاف حول عز وكان يقف
علي منبر المجلس لحمايته تحسبا لاي هجوم
وانفعل عز مؤكدا عدم مخالفة المجلس للدستورولا القانون
وقال لاحد الاعضاء المستقلين
انا بفهم اكتر منك واللي مش بيفهم مايزايدش في كلامه
وقال للنائب اشرف بدر ( الذي رفع الحذاء تحت قبه البرلمان العام الماضي )
أنت اللي بتتكلم عن الدستور يارافع الحذاء
وعمار يامجلس
---
ضرائب عبدالقوي سجلت أعلي معدلات للزحام
قبل قرار تلقي الاقرارات الضريبية بدون غرامات
وكان يوم 31 مارس آخر يوم في المهلة
ياعبدالقووووووووي
---
اوباما كان من المحتفين بالعالم المصري
دكتور سمير نجيب بانوب
لنجاحه في وضع أسس نظام التامين الصحي الشامل
في الولايات المتحده الامريكية
وشارك في رسم مشروع للتامين الصحي ليغطي كل فئات
المجتمع الامريكي لاول مره
مصر تريد ان تستضيفه لتكريمه
طيب ما الحكومة تنتدبه من امريكا يمكن يصلح حال
التامين الصحي للشعب المصري
والا احنا زي القرع بنمد لبره
كفايه عليكم كده لان قلبي وجعني
وبرضه اوعوا تفكروا تقلبوا الصفحة
ابقو معي