31‏/3‏/2014

السكوت لا يعني الرضا

أعزائي 
ياتري اخبارتكم  ايه  ؟
يارب تكونوا كلكم بخير 
الاحداث بقت سريعه ومتلاحقه  
تعالوا الاول نحكي عن حاجه من كام يوم فكرت فيها 
الا وهي ؟
عنوان المقال  السكوت لا يعني الرضا
 زمان كنت اسمع لما البنوته يجيلها عريس  ويسالوها !!! ها ايه رأيك ؟
تسكت  وسكوتها ده بياخدوه علي انه موافقه 
وكانوا دايما !!   وليه دايما ماهو لغايه دلوقتي بيقولوا 
السكوت علامه الرضا 
انا بقي بقول لا  ممكن السكوت يكون علامه القهر 
لما البنت تكبر في السن  ويجيلها عريس ومايعجبهاش 
ويسالوها ايه رأيك تسكت  ما هي مجبوره 
شايفه انه ممكن يكون اخر أمل او أخر قطر وخلاص حيمشي 
ويسيب المحطه ومافيش اي قطر ممكن يجي تاني 
فتسكت مغلوب علي امرها 
ولو برضه البنوته صغيره وبنحب واد طالب سقيط 
ماشي تاته تاته في التعليم
وممكن بيضحك عليها ومش حتقدر تقول لاهلها انها بتحب
وغارقه لشوشتها في حب واد صايع 
ساعتها بتسكت  مقهوره
انا شخصيا بقيت حاليا اتبع حاجه جديده وهي!!!
لما القي حاجه مش عجباني بكبر واصهين واسكت 
ده مش معناها اني راضيه علي اللي بيتقال او اللي بيحصل 
انما  حاله من اللامبالاه
السكوت مرات كتير بيريح 
يبقي  في الحاله دي 
السكوت لا يعني الرضا 
---
نرجع للسياسه يالله بينا 
ايدكم معايا  عشان نطلع من السكوت للكلام 
--

يوم الثلاثاء اللي فات اعلن السيسي تريشحه لرئاسه الجمهوريه 
انا بحترم رأي الشعب  لان له شعبيه كبيره 
انما بطلب من الشعب يبطل يطبل ويزمر 
بلاش نصنع الفرعون الاله  اللي المصريين بيجيدوا صنعه 
زي ماعصروا الليمون وقالوا بلاها فلول خلينا آخوان 
وهللوا وطبلوا وزمروا وبعد سنه  قلبوا الصفحه 
او بالاحري قطعوا الكشكول 
وطلعوا فيه القطط الفاطسه زي ماطلعوا في مبارك اسوا مافيه 
ليه نحب بالزياده ومره وحده نكره بالزياده 
بيفكروني بالظبط زي ايام الجاهليه لما كانوا بيعملوا تمثال من العجوه 
ويعبدوه ولما يجوعوا ومايلاقوش اكل ياكلوه 
بجد والله احنا شعب غريب الاطوار 
----
ده اللي كتبته علي الفيس بوك 
---

ياجماعه الفيس بؤ
انا بناشد الجميع يعني السيساويه والاخوان والسلفيين واللي مالهمش لا في التور ولا في الطحين
خلاص بقي ماينفعش انكم تنزلوا بوسترات عن الحاج ابو شيماء ولا علي بابا حسني ولا حتي للسيسي
ياريت تركزوا في شغلكم وكفايه علينا اكتر من 3 سنين راحوا من عمرنا وعمر مصر ,,, استقيموا يرحمكم الله .
---
بنزول السيسي حلقه سباق الرئاسه بعتقد انه قضي علي اي فرصه 
لاي حد وده نظرا لشعبيته الجارفه  
وعشان كده بقترح ان الانتخابات تتلغي  وفلوسها تروح في حاجه تفيد البلد 
وبلاها حمله عارفين نتيجتها 
وممكن البرنامج الانتخابي للسيسي ينزل في كتيب صغير 
ويتباع في المكتبات والعيال اللي بيقفوا في الشارع اللي كانوا بيبيعوا بطاقه السيسي 
هما يقدروا يبيعوه ممكن يكون تمنه 3جنيه !!! 
جنيه للواد البياع 
وال2 جنيه  يتلموا 
وبرضه يتعمل بيهم حاجه تفيد البلد 
---
اللواء احمد وصفي  قائد الجيش التاني الميداني 
كان له انترفيو مع عمرواديب 
في برنامج القاهره اليوم  قال فيه 
لو السيسي بقي رئيس يبقي ده انقلاب  !!!!!
طيب ياتري ايه رأي معاليه بعد الترشيح للرئاسه ؟
---
بالمناسبه كيلو الليمون النهارده ب12 جنيه 
مش بقصد اني بدعو الشعب لعصر الليمون 
انما ياتري ياعم الحاج عبده السيسي لما تركب الحكم 
سعر الليمون حيفضل زي ماهو والا يغلي والا يرخص 
الايام بيننا 
---
ده كمان نزلته علي الفيس بؤ
---

واحنا بنسمع خطاب السيسي أكبر طفل عندنا في البيت أقل من 7 سنين، قال يبقي راجل كويس لو طلع مرسي من السجن وسابه يسافر بره البلد،سبحان الله حتي اﻻطفال ليهم رأي في السياسه، وعجبي. .


البوست ده تحيه لابننا اللي بقي له رأي في السياسه
---

الصوره دي اهداء مني للربعاويه والسيساويه 
وبسالهم هي الهوجه اللي كانت في ميدان التحرير واستمرت 18 يوم 
مش برضه اسمها ثوره ؟
انا مقتنعه تماما ان الاتنين اللي في الصوره دي 
مسئولين قدام ربنا عن دم المصريين اللي سال 
---


واشوفكم يارب في وطن حر يساع الكل 
---
واوعوا اوعوا تقلبوا الصفحه 
ابقوا معي  
---





14‏/3‏/2014

مقتطفات من الفيس بوك

اعزائي 
بجد والله بعتذر لطول غيابي عنكم 
وبقولكم 

وحشتوني جدا  بس المشكله ان الاحداث بقت سريعه 
وانا يوميا علي الفيس بؤ 
زي ما بسميه , وانا نشطه جدا هناك 
يمكن عشان مش محتاج لمقال كبير 
يعني كلها حاجات صغيره 
بقترح عليكم اني انقلكم اللي بكتبه علي الفيس بوك 
ويستاهل اني انشره هنا 
ها خلاص اتفقنا 
ماشي الكلام 
---
سمعت ان حمدين عايز يعمل مناظره مع السيسي
لو الكلام ده حقيقي انا مش بنصح السيسي انه يعمل مناظره مع حمدين 
لان حمدين بيعرف يتكلم اما السيسي مش بيعرف وده واضح 
لان كل كلامه للشعب ارتجال 
كنا بنضحك علي الحاج ابو شيماء 
ماعلينا 
وبفكركم بالمناظره اللي كانت بين ابو الفتوح وعمرو موسي 
بعدها اغلب اللي كان حينتخب ابو الفتوح رجع في كلامه 
انما عمرو موسي كان معروف انه مش حينجح
في النهايه الاتنين لم ينح احد 
وياريت السيسي يستعين بحد كويس يكتبله حطبه وتكون قصيره وموجزه
لاننا بقينا نمل وماعندناش مراره للكلام الكتير ..

---
بجد مش بحب شهر مارس
فيه عيدميلاد امي الله يرحمها !!!
وكمان عيد الام اللي بيوجع قلب كل اللي مالوش آم
اللهم ارحم امي وامهات المسلمين جميعا ..
---
النهارده سمعت برنامج في اذاعه ( نغم اف ام )وانا راجعه البيت .
البرنامج بيسال المستمعين سؤال وهما يردوا اما بمسدج او بمكالمه تليفونيه .
السؤال كان خاص للرجاله !!!
لو اللي حتتجوزها طلبت منك ان العصمه تبقي في ايدها تعمل ايه ؟
ياريت اعرف رأيكم في الموضوع ده ايه .
انا شخصيا ما ارضاش اتجوز واحد يرضي ان العصمه تبقي في ايدي .
هو انا حتجوز قفص جوافه والا كيس برتقان .
ده لو العصمه في ايدينا ماكانش بقي في مصر ولا وحده متجوزه ..
 ---



طنط كوزه لاموزه اللي دايما بتاكل استكوزا !!
طبعا عارفنها موزه قطر !!!!!
قال ايه الست ياولداه نفسها ومني عنها تيجي مصر حاسه بالحنين ليها 
 ياحرام الدمعه فرت من عيني ,حتي بتشحتف اهه طبعا حاسين بيه .
الدكتور سعد الدين ابراهيم قال انها بتنتظر الدعوه الرسميه .
هي رجعت في كلامها والا ايه جايه تعتذر والا ياتري في ايه جديد ؟
يمكن جايه تاخد السفير في ايدها ونرجع ؟
علي اي حال بعتقد ان لا رئيس الجمهوريه المؤقت ولا المشير السيسي 
ولا حتي رئيس الوزاره ممكن يوجه دعوه لوحده اتأمرت علي مصر .
حتي لو هي مزه طحن مش موزه ..
--- 
الجيل ده مش مكتوبله علام 
---
 النهارده الصبح نزلت من البيت كنت ركنه العربيه قدام البيت اللي جنب بيتنا
 دايما قبل ما اركب أبرم حوالين العربيه اشوف ممكن يكون كاوتش مريح 
 تفتكروا لقيت ايه؟ 
مالقتش فرده الكاوتش ورا يمين، والله زي مابقولكم كده ،،،،
مع اعتبار اني ساكنة قريبه جدا من ميدان
 وكمان تحت البيت محﻻت شغاله 24 ساعه 
 ماهو لو في دوريات شرطه كانوا الحراميه خافوا يتمسكوا 
شفته اﻻمن واﻻمان اللي بنتمتع بيه في المحروسة 
وعمار يا آم الدنيا ..
---
اعتقد كفايه كده 
مش حتاخر عليكم تاني 
بس اوعوا اوعوا تقلبوا الصفحه 
ابقوا معي 

19‏/12‏/2013

شخبيط ولخبيط

أعزائي 
معليش بقي كان في مشكله وماكنتش عارفه ادخل المدونه 
والجهود الذاتيه ماجابتش اي نتيجه 
الا لما استعنت بصديقي العزيز احمد حافظ حل المشكله مشكور 
وانا بدين له بدخولي المدونه مره تانيه 
بعد مايأست  من الدخول 
بجد كتر خيره 
---
  

 كل عام وانتم جميعا بالف خير  لقدوم العام الجديد 
يارب سنه جديده علينا سعيده 
نخلص فيها من الاعتصامات والمظاهرات وكل الهم اللي مش جايب  تمنه 
----
في اصدقاء كتير زعلانين مني عشان بقول لو الفريق السيسي 
اترشح للرئاسه مش حنتخبه 
انا ماعنديش اي اعتراض علي السيسي كاشخص 
انما اعتراضي عليه انه في مكانه افضل 
راجل وزير دفاع  عارف شغله كويس  وكمان شغلته مش اي حد  ممكن ينجح فيها 
ده بيراس جيش مصر اللي بيحمي ارضها 
وبيحمي الشعب لو لا قدر الله حد فكر انه يحاربنا 
وبرضه نفسي قبل ما اموت اشوف رئيس مدني 
لا عسكري ولا اخواني
بعتقد ان اللي حيترشح للرئاسه حيفكر الف مره 
وده لاحتمال ان السيسي يترشح لان ساعتها  فرصته للنجاح  حتبقي معدومه 
ولو ان اي رئيس حيحكمنا مش حيعجب الكل 
لان في ناس مننا حيطالبوه بحاجات كتير 
 سقف المطالب ارتفع عند كل الشعب المصري 
والجديد ان جمال مبارك اخد براءه النهارده في قضيه ارض الطيارين 
ومافيش عليه احكام فاذا اخد افراج وده غالبا حيكون 
ساعتها مافيش مايمنع من انه يترشح لرئاسه الجمهوريه 
النهارده كانوا بيهتفوله في المحكمه بعد اعلان براءته وبيقولوا 
ياجمال يا ابن مبارك الرياسه في انتظارك 
والايام الجايه حتجيبلنا اخبار جديده 
وفي الاول والاخر الصندوق هو اللي حيبقاله الرأي النهائي 
بس يارب يمررها علي خير 
---
الحكومه الرشيده بقياده جدو البلاوي 
من اول السنه الجديده قررت ان يكون الحد الادني للمعاش 1200جنيه 
والحد الادني لموظفين الحكومه هو 1500 جنيه 
ماتفرحوش  !!!!! قولتولي ليه 
سؤال بسيط جدا 
المواد التموينيه واللحوم والاسماك والالبان والاجبان 
والخضروات والفاكهه 
حترتفع حتبقي بكام؟
من دلوقتي قبل ما يصرفوا ولا يقبضوا كل حاجه غليت
الحياه في مصر بقت غاليه 
والكل بيعاني فقير  ومتوسط وغني 
انا بقترح تثبيت الاسعار وبلاها زياده 
---
الست آم شيماء حرم الرئيس المخلوع 
ادلت بحوار لوكاله الاناضول وقالت فيه 
ان عندها كل اسرار البيت الابيض لانها صديقه لهيلاري كلينتون 
من ايام ماكانت عايشه في امريكا وولادها بيتعلموا هناك 
عقبال كل الحبايب لما ولادهم يتعلموا في امريكا شيكا بيكا  
وقالت ان الصداقه اتوطدت بعد ما ابو شيماء ركب  كرسي الحكم 
وفي حاله ترشيح مسز كلينتون للرئاسه الاخوان حيسندوها 
زي ماساندوا اوباما في الدورتين 
وناشدت كل زوجات الاخوان الموجودين حاليا في السجون 
انهم يصبروا ولو حصل ان ازوجاهم ماتوا 
هما حيجوزوهم بعد شهور العده 
يالله عالبركه 
زغرتي معايا يا انشرررررراح


وكمان كانت بتناشد بنات جامعه الازهر والاخوات انهم يستمروا 
في الاعتصامات والتخريبات 
ونعمه النصايح 
------
الجو السنه دي بارد جدا 
لا احنا مش متعودين علي كده
 ولا بيوتنا مبنيه علي اساس ان في برد ممكن يجي 
يعني لا الحوائط فيها عازل برد ولا حتي حر 
هي مبنيه بقدره ربنا 
الجمعه اللي فاتت صحينا بعد ليله بارده جدا
 علي التلج مغطي اجزاء كتير من مصر
والنشره الجويه ماقالتش ان في برد جاي بالشكل ده 
بس هي نوهت ان يوم الاربع اللي هو امبارح جايه عاصفه ثلجيه من روسيا 
قلت لاهلي واصحابي وكمان كتبت علي الفيس بوك ده
---
مش قلتلكم انها ( الفشره الجويه )
النهاره الاربع لافي مطر ولا سيول ولا تلج
ولا موجه جايه من روسيا
ولا اي حاجه غريبه في اليوم كله
طول عمر الارصاد الجويه بتفشر
عشان تبقوا تصدقوها
---

الصوره دي والله في مصر 
في التجمد الخامس 
قصدي التجمع الخامس 
---
انا كمان كتبت ده وياريت قرائي الله عايشين في امريكا يفتونا بالصح
---
سؤال ملح 
امريكا كل سنه بتعمل مسابقه ملكه جمال المغتربات وماحدش بيسمع عنها حاجه لانه حدث مش مهم بالنسبه للمصريين !!!!
السنه دي ليه كل الضجه علي ملكه جمال المغتربين ؟
واللي لفت انتباهي ان برنامج العاشره مساء عامل انترفيو معاها هي ومامتها
والبرنامج مستضفها عشان يلمعها مش اكتر ,, ووائل الابراشي لطيف جدا معاها
علي فكره هي وصلت من يومين مصر وهي حفيده المؤلف المبدع طاهر ابو فاشا
سؤال
مش حقول ازاي هي بتمثل مصر وخدمت في الجيش الامريكي مده 4 سنين
ومش حقول لو حصل حاجه بينا وبين امريكا حتقف مع مين ضد مين
انما حقول ازاي تمثل مصر وهي اصلا مش بتتكلم عربي
انا بصراحه شايفه ان في حاجه غلط في الموضوع كله او بالاحري شامه ريحه مؤامره

وكله حيبان في وقته .وعمار يا امريكا يابلاد الفبريكه 
---


هي دي
---


ولحد كده وخلص الماتش خلص ازاي انا ما اعرفش 
والسنه كمان خلصت وان شاءالله اشوفكم السنه الجايه 

واوعوا اوعوا تقلبوا الصفحه 
ابقوا معي 


4‏/11‏/2013

صندوق الدنيا

أعزائي
فاكرين صندوق الدنيا بتاع زمان  او سمعتوا عنه
انا ماشفتوش بس بسمع عنه
مثر حاليا بقت زي صندوق الدنيا
بقت بلد الغرايب والعجايب


هو ده صندوق الدنيا
حد يصدق اننا في ظرف 25 شهر حاكمنه رئيسين
النهارده كانت محاكمه مرسي او زس مادايما بقول
الحاج ابو شيماء
تحت حراسه مشدده اعتقد انها  اكتر من حراسه محاكمه مبارك
20 الف ظابط ومجند
ابرار جوي
جميع اسطح المنازل القريبه من اكاديميه الشرطه مؤمنه
200سياره اسعاف لنامين المحاكمه
غطاء جوي من مروحيات الاباتشي
تكثيف امني علي اول الطريق الدائري المتجه للاكاديميه
كان دخول المحامين والصحافيين حاملي التصاريح
كالعاده من البوابه رقم 8
متاريس كثيره لا يسمح بتخطيها الا لحاملي التصاريح
لان من باب الدخول لمدرج المحاكمه مسافه كبيره
تفتيش علي البوابات
لا يسمح للسيارات بالدخول الا بعض السيارات الحامله لتصاريح
اوراق القضيه 20 الف ورقه
وصل الحاج ابو شيماء بطائره هيلكوبتر
وبعد ذلك ميكروباص لباب الجلسه
وكان وصوله الساعه السابعه و40 دقيقه
وكان يرتدي بدله كحلي
وكذلك وصل المتهمين في نفس الوقت تقريبا
الموجودين منهم هم
البلتاجي - العريان - اسعد شيحه -جمال صابر
ايمن عبدالرؤف -جمال حمزه
اما باقي المتهمين الهاربين هم
عبدالحكيم اسماعيل -هاني توفيق -وجدي غنيم
عبدالرحمن عز -جمال صابر-احمدعبدالعاطي
رضا الصاوي -لملوم جمعه
المستشار  احمد صبري يوسف بذل جهد كبير
ولكن اضطر ان يرفعها مرتين للهتافات
لحظه دخول الحاج ابو شيماء القفص صفق له المتهمين
وكان هتافهم
يسقط يسقط حكم العسكر
مصر دوله مش معسكر
المستشار احمد صبري سال مرسي هل يقبل العوا مدافع عنه
ولكن مرسي كل اللي قاله  للقاضي
انت باطل وانا رئيسك
وردد 4 مرات
انا الرئيس الشرعي للبلاد
مشاده بين الصحفيين ودفاع المتهمين
دفاع المتهمين  قال مرسي رئيسي
الصجفيين رفعوا صووره الحسيني ابو ضيف
مهزله حقيقيه في القاغه اليوم
سال القاضي مرسي اذا يريد هو الدفاع عن نفسه وكرر السؤال 3 مرات
لكن كان رد مرسي انه الرئيس الشرعي للبلاد
مرسي رفض لبس الترسننج الابيض
اما العريان والبلتاجي  واسعد شيحه
اعطوا ظهورهم لرئيس المحكمه رافعين اشاره رابعه
ومرسي طوال الجلسه رايح جاي في القفص
طلب الدفاع تاجيل الجلسه
فتم تاجيلها ل8 يناير
بجد كانت جلسه غريبه
وللحديث بقيه في 8 يناير
----
نتكلم شوي علي حاجات تانيه !!!!
اسره مرسي ماحضرتش الجلسه لانها مش معترفه بمحاكمته
---
ابن مرسي حاول يسافر امبارح الصبح علي ماليزيا واتمنع
بالليل حاول تاني  وبرضه اتمنع
 بقي معقول والده حيتحاكم بعد ساعات وهو يسافر؟
عرفت النهارده سبب سفره وهو ايه !!
اقولكم  لا اتحايلوا عليه
كمان  اتحايلوا
بس بس خلاص حقول
الاخوان رافعين قضيه في المحكمه الدوليه
وهو مسافر يحضر اول جلسه في ماليزيا
بس خلاص الخبر خلص
--
سمعت برضه ان المحاكمه اتنقلت اكاديميه الشرطه ليه
انتوا عارفين اننا شعب يموت ويفتي في اللي يعرفه واللي مايعرفوش
ناس قالت عشان تامين الاكاديميه اسهل من معهد امناء الشرطه
وناس قالت عشان طره منطقه فيها حركه بيوت وناس
وفي ناس قالوا ان الشرطه لقت 3 مناصات لصواريخ القسام في المعادي
ولو كنت عايزه اعرف حاجات تانيه كان سهل مش بقول اننا نحب نفتي
---
مش قلتلكم ان مصر بقت زي صندوق الدنيا
يالله بقي كفايه كده اقعدوا بالعافيه
واوعوا اوعوا تقلبوا الصفحه
ابقوا معي

18‏/10‏/2013

الفرق بين المصيبه والقضاءوالقدر

أعزائي 
كل عام وانتم جميعا بخير 
وان شاءالله العام الجاي تكونوا علي عرفات 
واللي حج السنه دي نقوله حج مبرور وذنب مغفور 
وحمدالله علي سلامتك  ياحاج بس ياريت ماتكونش نسيت تجيبلنا
السجاده والسبحه والبخور 
والا حتعيش في الطناش !!!!! لا واضح طناش 
---
طبعا عايزين تعرفوا الفرق بين المصيبه والقضاء والقدر 
القضاء والقدر لما تنزل علينا حاجه لا كانت علي البال ولا الخاطر 
زي مثلا والفريق القومي بتاعنا بيلعب يحصل زلزال  مايعرفش يلعب ويتغلب 
او السيول تفضل طول المباره تنزل بلا انقطاع 
ساعتها مايعرفش الفريق المصري يلعب
لانه مش متعود علي اللعب في السيول  وبرضه يتغلب 
ده بقي اسمه قضاء وقدر 
انما المصيبه انه يسافر بالمدربين وادارين الفريق 
والدكاتره المسئولين عن صحه اللاعبين النبي حارسهم وصاينهم
وكمان الحبايب والمقاطيع  وعلي رأسهم
الست آم ترتر وساحبه وراها انشراح 
ومصر تصرف الشيء الفلاني واحنا محتاجين كل قرش 
واخره المتمه نتغلب 1/6
طيب انتوا مش مستعدين بلاها حرقه دم 
خليكم محترمين  وماتبهدلوش اسم مصر 
من اول الماتش كان باين مستوي فريقنا فضيحه 
ماهو طول ما بندخل السياسه في كل حاجه 
حتي الكوره دخلوا فيها السياسه 
ابوتريكه الاخواني نسي انه بيلعب في الفريق القومي 
افتكر بس انه لازم يهين مصرمافرقش بين السلطه والوطن 
نسي انه مصري اكل وشرب ولف ودار وصاع واشتهر وبقي بني ادم  
بفضلها وتحت سماها


دي الصوره اللي شفناها علي شاشه التليفزيون 
شعار رابعه في مدرجات غانا 
الاخوان اللي سافروا يحضروا الماتش كانوا بيشجعوا غانا 
وكانوا قاعدين في مدرجات غانا 
كل اللي حقوله حسبي الله ونعمه الوكيل في كل من يضر مصر
--- 
ده اللي نزلته علي الفيس بوك بعد الماتش وحرقه الدم
===

اليوم كان ماشي زي الفل من اوله !!!! كنا منتظرين ماتش مصر وغانا وكلنا امل وتفائل فوجئنا باللي قلب دماغنا ورفعلنا الضغط  قال ايه اللي بيعلق علي الماتش كان بيشكر في شريف اكرامي وبيقول هو اللي حامي العرين اي عرين يقصد نفسي اعرف هو عمل ايه الا انه جون مصفه يخرب بيت كده نتغلب 1/6 , والا الاهبل اللي دخل الجون فينا !!!! وياريت الجون اللي جبناه كان بمجهودنا ده كان من ضربه جزاء ياحوستي يا امه يامرارررر طافح
والا اللي مربي دقنه المدعو ابو تريكه وهايم في الخيال هو كان نازل يبوظ الماتش والا ايه الحدوته بالظبط مالعبش بمليم ليه مارحش قعد في صفوف المتفرجين اكرمله ,, بينتقم من السيسي في مصر وقال وحياه رابعه واعتصامها لا ابوظ الماتش واخلي رقبتك يا مصر قد السمسمه . السؤال بقي اللي محيرني الا وهو ؟؟؟؟؟ لما هما مش مستعدين او مستغنيين ليه راحوا وكلفوا مصر الشيء الفلاني ؟ والا رايحين يلعبوا لصالح غانا ؟..


--- 
الشيء الغريب التاني اللي سمعنه عنه وقريناه 
في السويس  حي فيصل في مسجد حمزه بن عبدالمطلب 
كان فيه صلاتين للعيد 
ايوه صلاتين 
الاخوان صلوا فيه ثبتوا  ميكروفانتهم  وواحد منهم خطب خطبه العيد 
لانهم مش معترفين بخطيب متعين من الاوقاف 
بقي في صلاتين وخطبتين  وخطيبين ومجموعتين من المصلين  
طبعا لا حد فيهم سمع ولا حد فيهم فهم 
المسجد مش عاجبهم الخطيب اللي فيه 
يروحوا بالف سلامه يصلوا في مكان تاني 
انما يفسدوا صلاه ويعلنوا موقف سياسي 
كتير قلنا ان المساجد مش منابر سياسه 
المساجد للصلاه وعباده ربنا 
---
الحجاج اتفاجئوا  في مني بحاج من استراليا مصري الاصل 
بيخطب خطبه سياسيه بيهاجم الحكومه المصريه وبيسب فيها 
وبيطالب بعوده مرسي
الشرطه السعوديه نهرته ومنعته لان الحج ومنطقه المشاعر المقدسه 
مش حتتحول لمنبر سياسي
وجنسيته الاستراليه مش حتمنع السلطات السعوديه من مسائلته 
شوفوا الصوره دي 
وشوفوا تعليق مدمن  ده تعليقاته كلها غريبه زيه 
ماهو مدمن ممكن يقول ايه غير هلوسه 

بما  انه ماقدرش ياخد صوره شعار رابعه هو اتصرف 
ياسلام  ماهي الحاجه آم الاختراع 
---
ياعيني عليكي يامصر حتلاقيها منين والا منين 
بقول كفايه نكد النهارده ماهو انتوا دايما موجوع قلبكم معايا 
واوعوا اوعوا تقلبوا الصفحه 
ابقوا معي

27‏/9‏/2013

زمن الفاصوليا

أعزائي
 وحشتوني وحشتوني وحشتوني 
دي اغنيه قديمه لورده الجزائريه 
العنوان اللي كاتباه ده حقيقه في مصر 
لاننا بقينا في زمن الفاصوليا فعلا
مرات لما نحب نسب حد نقول شوفوا ابن الفاصوليا عمل ايه 
او مثلا عملتها يا ابن الفاصوليا 
وفي قول آخر ده ابن فاصوليا 


اصل عقبال املتكم جميعا كيلو الفاصوليا بقي  ب 13 جنيه 
والشعب المصري اغلبه مالوش حديث غير الفاصوليا
لانه عاشق للفاصوليا 


اما الفاصوليا البيضه ماتختلفش عن الخضرا كتير 
نص كيلو الفاصوليا البيضه ب10 جنيه 
بس ممكن يكفي عيله كبيره وده نظرا لاننا بننقعها فبتنفش
الحكومه الرشيده بتاعتنا بقياده جدوالببلاوي
ماهو ربنا دايما رازقنا بحكومه مسنين 
صرفت لموظفين الحكومه وقطاع الاعمال وبالمره المعاشات 
 علاوة غلاء معيشه  كبيره خالص حوش حوش 
5% ياااه كبيره فعلا 
طيب تعالوا نحسبها وحده وحده 
 الموظف اللي راتبه 2000 جنيه لا قلت 200 ولا 300
العلاوه 100 جنيه 
حيجيب كيلو فاصوليا ب13 جنيه
نص كيلو لحمه ب45 جنيه 
اذا حياكلها بالرز  او بالعيش  
وكمان في سمن او زيت  وطماطم او صلصه 
واذا نفسه هفته علي طبق سلطه  يبقي كل عام وانتم بخير 
طارت العلاوه في طبخه الفاصوليا 
علي فكره حقولكم حاجه بسيطه خالص كيلو التوم  المصري 
بقي ب20 جنيه التوم الصيني الشبكه ب10 جنيه 
مش حقولكم علي الاسعار المولعه  بلاش اخض اللي عايشين بره 
وناوين ينزلوا مصر في اجازه الكريسماس
جدو الببلاوي مش عارف  يسعر الخضار والفاكهه 
انا بقول يثبتوا الاسعار وبلاها العلاوه العره اللي بيدوها للموظفين 
واسمهم  بيدوا غلاء معيشه 
طيب ده حال اللي بياخد الفين طيب اللي مش بيتحصل حتي علي ربعهم 
يموت والا يولع في حاله ؟
بنسمع بقالنا اسبوعين ان في تسعيره 
فعلا في بس مين اللي ماشي عليها
يعني النهارده في التسعيره كيلو الملوخيه من جنيه لجنيه ونص 
انما بتتباع فعلا من 5 ل 5.5 جنيه 
ههههههه اصل البياعين بيخافوا من الحكومه  
والله بقي هم يبكي وهم يضحك 
-----
دي الحكومه الرشيده بقياده جدو الببلاوي
لا عارفه تحور ولا تدور 
السيد وزير التموين دكتور محمد ابوشادي 
كان وائل الابراشي مستضيفه في التوك توك
يووووه بقصد في التوك شو 
كان الحديث علي بطاقات التموين 
قال ايه ياحضرات    
اللهم ما اجعله خير  قال ممكن المواطن يصرف الحصه التموينيه من السوبر ماركت 
ويروح ولا اجدعها عميل ويتامر ويتشمر  بالبطاقه الزكيه  حيصرفوهاله 
الكلام ده بنسمعه بقالنا 3 سنين  بس طالما بيقولوه بالليل 
بيكون زي حدوته قبل النوم اللي الطفل بينام في نصها
او  زي الكلام المدهون بزبده بيطلع عليه النهار يسيح  
بيقول ان اللي ليه 6 كيلو رز  ممكن ياخدها من السوبر ماركت بس 
ياخدها 3 كيلو بجوده اعلي  وده بقي ينطبق علي كل المواد التموينيه 
سلامات ياجوده كله واحد بس الفرق التغليف 
ماهي الحكومه بتستحمرنا  
وهما ال6 كيلو بيكفوا  عشان ال3 حيكفوا 
والا هي سرقه علني وعليكم السلام
قعدت قدام التي في 3 ساعات بحاول اتصل بالبرنامج 
عشان اسال الوزير سؤال بس  الخط كان مشغول 
سؤالي كان بسيط جدا الا وهو ؟
العرسان الجداد اللي طلعوا من بطاقات العيله راحوا
 يعملوا بطاقات ليهم  بعد ما ياخدوا الاستمارات 
وياولداه يفضلوا رايحين جايين  سنه يسالوا عن البطاقه التموينيه الخاصه بيهم 
كل مره يتقال لهم بعد شهر او شهرين وفي الاخر يقوللهم 
انتوا ماتستحقوش بطاقه تموينيه 

السبب ان دخل الزوج 1000 جنيه 
قال يعني ال1000 جنيه بقت مرتب محترم 
انا مش حقول بس ياحوستي حقول كمان
ويادوستي وياخرابي وفوقيهم ليله فحلقي

مش اللي عنده مليون بيتقال عليه مليونير 
اللي عنده 1000 لازم يتقال عليه 
الفونير 
بجد بجد حكومه خنيقه  هي في وادي والشعب المطحون في وادي
 انا بقول لو كانت الحكومه هي حكومه  


السيد المحترم ناجي عطا الله يمكن كانت عملت حاجه 
او حست بمعاناه الشعب  اللي بيفتروا عليه ويقرصوا عليه
ناقص يقولولنا اربطوا الحزام وشدوه علي اخرجه 
لغايه ماتموتوا وتريحونا منكم 
ماهو شعارهم اياكش الشعب يولع
-----
كل عام وانتم بخير وينعاد عليكم 
قربنا علي عيد الاضحي المبارك 
بفكركم بصيام ال9 ايام الاولي من شهر ذي الحجه 
غره ذي الحجه حتوافق يوم الاحد 6 اكتوبر 
ان كان لينا عمر وكنا من اهل الدنيا 
كل عام وانتم جميعا بخير مره تانيه لان يوم الاحد 6 اكتوبر 
عبور الجيش المصري خط بارليف
بقياده المايسترو رجل الحرب والسلام
الرئيس انور السادات 
وكفايه عليكم كده النهارده وجعتوا قلبي 
واوعوا اوعوا تقلبوا الصفحه 
ابقوا معي







31‏/8‏/2013

ناس هايصه وغيرها لايصه

أعزائي 
شفتوا ازاي انا المره دي ما اتاخرتش عليكم 
بس بجد بقي بلاها سياسه وتعالوا احكيلكم علي الويك اند اللي قضيته 
يوم الخميس سافرت مع عيلتي وقلنا نقضي الويك اند في العجمي 
الطريق كان زحمه جدا تحس ان مصر كلها طالعه علي اسكندريه 
الطريق من بيتنا في مصرالجديده لاول طريق مصر اسكندريه الصحراوي 
اخدناه في ساعتين ونص من الزحمه المهوله اللي كانت في الطريق 
حتي قلت طيب لما كل سكان القاهره طالعين علي اسكندريه 
 مين بقي اللي حيفجر القاهره ؟!!!!!
ماكناش لقين مكان في ماستر نقف فيه اخدنا القهوه واحنا في العربيه وكملنا 
مهما اقولكم مش حتتصورا كم الزحمه
المهم اخيرا وصلنا العجمي بعد ما الاولاد الصغيرين فرفروا من الطريق 
والملل والزهق 
وصلنا بعد 7 ساعات  
ال7 ساعات دول الوقت اللي بيودينا من اوربا لنيويورك 
يعني عيرنا المحيط بس في الطريق الصحراوي 
ده بقي اختراع ياكوتش 
===
يوم الجمعه رحنا البيتش  قلنا نروح شاطيء ( ميكا  ) نشوف في ايه 
ده من الشواطيء الخاصه زي براديس 
رحنا للاسف الدي جي لوحده 
مافيش سريخ ابن يومين في البيتش 
الناس كانوا خايفين من المظاهرات 
البيتش ده زي ماقلتلكم هو خاص وفيه ممبر شيب
واللي بيديره المحروس ابن فارس السينما المصريه
احمد  افندي مظهر 
عشان كده بتلاقي كل الفنانين هناك 
===
قلنا خلاص نرجع علي براديس بيتش
رحنا لقينا زحمه جامده بس الحلو اللي فيه 
ان كل رواده كل عيله عارفه السكشن بتاعها بتروح تقعد فيه 
دخلنا واستقبلوني استقبال الفاتحين 
وزعلوا جدا ان رجلي مكسوره
كان لازم يجيبولي كرسي عالي 
لان كراسي البحر ارتفاعها عن الارض حوالي 30 سم 
جابولي عقبال املتكم شزلونج  
البيتش ماتحسش فيه انك في مصر 
يعني لا سياسه ولا كلام فيها ولا في المظاهرات 
كلا يغني علي ليلاه او  بالاحري كلا مشغول بالمزه تبعه 
البوم عمرو دياب الجديد  هو اللي كنا سمعينه 
يعيدوا ويزيدوا فيه لزوم حفظه 
وانا ياساده ياكرام مش بطيق هذا العمرو الدياب 
وعارفه ان في كتير من قرائي حياخد مني جنب بس دي الحقيقه 
المهم البحر طبعا مليان بكل انواع المصيفين اطفال وكبار 
شباب و مزز بالهبل 
ومايوهات حته  وحده ويكيني وهو ده الغالب 
وشورتات وكلام كبير اوي اوي اوي  
في كمان مسابقات للركت
واسعار الدخول لغير المشتركين 
من 200 جنيه ل250 جنيه للفرد




ناس ولا  علي بالها 
===
هوجن اللي بيجبلنا العصير والشاي والقهوه والنسكافيه 
كالعاده جالنا جري وزعل جدا عشان رجلي 
هو اسمه احمد بس رواد الشاطيء سموه هوجن لانه بادي بلت 
طول وعرض وارتفاع 
قال حجبلكم فراوله قلتله طيب مش تقول عندك ايه 
رد وقال الفراوله حلوه النهارده فريش 
طبعا ماحدش يجرأ يخالفه بعدين يثبتنا اكتاف 
لما فضي ولقاني لوحدي عشان كلهم كانوا في البحر 
جه يطق حنك معايا  
اول مره اعرف انه صعيدي من  قريه كوم بدار مركز المنشأه سوهاج
القريه اللي اتصور فيها فيلم البريء للراحل احمد زكي
وهو فخور بكده 
سالته اذا كان عاجبه السيسي والا هو مع مدعين الشرعيه 
قالي وهو بيضحك السيسي 
انا صعيدي وبحب مصر 
قلتله طيب لما تشوف احمد مايوه ابعتهولي 
قالي ده كان لسه هنا وبصينا لقينا احمد مايوه جاي علينا 
===
احمد مايو ده اللي بيبيع مايوهات احدث صيحه علي البيتش
وكمان شورتات  وباديهات وبنطلونات برمودا رجالي وحريمي 
ويصراحه ذوقه حلو 
فرجني علي كل اللي معاه  سالته عامل ايه السنه دي 
قالي الحمدلله ولو انها مش زي كل سنه بس انا هنا كاهاوي 
هو له محل في اسكندريه بيبيع مستورد
بس كل حاجه معاه قطعه وحده 
لانه مش بيستورد ده اللي بيسافروا ويشتروا بضايع 
يجوا يبعوهاله ويصراحه هو مش طماع 
وكمان مضيفين ومضيفات الطيران هو زبونهم 
سالته ايه اخبار السيسي معاك 
قالي  زي الفل  الحمدلله
قالولي ان الموسم ممتد لغايه اخر اكتوبر 
عشان يقدروا يعوضوا السنه  لان رمضان خلي كتير مايصيفوش 
===
اما سوق العجمي المحلات عارضه بضايع كتير 
انما القوه الشرائيه في الحضيض 
دخلنا نجيب سليبارات للبيت وللبحر 
( بقصد الشباشب)
بعدين حد يفهمني غلط لقرب الاسماء من بعضها 
صاحب المحل قالي ماتخدي اتنين قلتله حاضر بس ليه 
قال احنا طول السنه مش بنشتغل الا للمصيف 
واللي بنكسبه منه بيغطي مصروفنا في شهور الشتاء
انما السنه دي الحال مش كويس مافيش مصيفين زي كل سنه 
عشان رمضان وكمان نتيجه الثانويه العامه والتنسيق 
والمظاهرات والركود اللي في البلد 
يجد حالهم يصعب علي الكافر 
ربنا يعينهم في الشهرين الجايين 
===
نرجع للي بيصيفوا ولا علي بالهم  تحس انك مش في مصر 
كل واحد بيستمتع بالطريقه اللي تريحه 
اه نسيت اقولكم اكتر واحد بيكسب في البيتش 
هو اللي بيبيع الجندوفلي 
كل الشماسي طالبين جندوفلي 
===
بالليل رحنا نادي القوات المسلحه  عشان الاولاد يلعبوا في الملاهي 
برضه زحمه ماتحسش بالقلق المسيطر علي اي مكان في مصر 
الناس كلها مستمتعه بالمصيف  
===
معليش بقي مش قادره ابطل الادمان اللي انا فيه 
حته صغنونه سياسه 


انا بطالب الفريق اول السيسي 
باسقاط الجنسيه المصريه لغير المصريين 
اسوا باي بلد عربي  يعني لو قعدت في الخليج مليون سنه 
مش حتاخد جنسيتهم  حتي لو اولادك اتولدوا هناك 
غير اي بلد اوربي او بلاد المهجر
هو لو معاليك والدتك اردنيه  او خليجيه او لبنانيه 
بتاخد جنسيه ولدتك  !!!!! 
لا طبعا  
يبقي ليه ماتكونش المعامله بالمثل 
ونبطل بقي ندي الجنسيه المصريه لكل من هب ودب 
لزيد وعبيد ونطاط الحيط 
الجنسيه المصريه دي شرف لاننا ابناء مصر
ولان ابونا مصري يبقي الطبيعي نتبع جنسيه الاب 
احنا اولاد مصر شربنا من نيلها واكلنا من خيرها 
 صح الكلام يا جماعه الخير
كفايه كده النهارده اقعدوا بالعافيه 
واوعوا اوعوا تقلبوا الصفحه 
ابقوا معي 




25‏/8‏/2013

سلامتك يا آم الدنيا

أعزائي
الدنيا بقت كلها ملخبطه ومصر حبيبتي بتعاني 
حد كان ممكن يفكر ان مصر تبقي كده ؟
من الاعتصامات وحرب الشوارع واللي ذاد وغطي الارهاب
مصر كانت بلد الامن والامان 
عن نفسي انا حيرانه مابقتش عارفه ليه كل ده 
الاخوان بعد 80 سنه مسكوا الحكم  بس ياخساره 
بس عشان الطمع ماقدروش يكملوا\

قالوا ان الجيش عمل انقلاب علي الرئيس الشرعي 
وحلفائهم هما اللي عايزين يصدقوا انه انقلاب مش ثوره شعبيه 



طبعا شفنا المد ابح اللي حصلت بعد مافضوا مولد رابعه والنهضه 
الجيش والشرطه كان ناقص يبوسوا ايدهم عشان يفضوا الاعتصام 
خلاص بالحسني ماطلعوش يبقي يستحملوا 
طبعا انا ضد اراقه اي نقطه دم 
بس ايه العمل ؟
---
اهالينا اللي عايشين بره مصر وماعندهمش كيبول عربي 
يعني مش بيشوفوا اللي حصل دي مجموعه لينكات عشان يعرفوا الحقيقه 
ويعرفوا ايه اللي بيحصل في مصر 
 http://www.youtube.com/watch?v=a-zPjBlyl5s
ده لينك مذبحه كرداسه 
وحشيه متناهيه  
---
http://www.youtube.com/watch?v=NKBbwkFC7K4
مذبحه اسوان 
---
 http://www.youtube.com/watch?v=HZiZutjh2cY
 مذبحه جنود الامن المركزي 
---
http://www.youtube.com/watch?v=GeDgS2sBbhU
 الجنازه العسكريه لجنود الامن المركزي 
---
شفتوا كم الوحشيه
حاجه توجع القلب 
---
http://www.youtube.com/watch?v=TkwAuZ7l6tE
ده لينك قتل شقيق الفنانه لقاء سويدان 
واقف في البلكونه اتنش رصاصه جابت اجله 
---
متهيالي كفايه كده  عارفه اني وجعت قلبكم 
---
النهارده في الجرايد منزلين خطه العدوان علي مصر
اجتماع مخابرات امريكا واسرائيل وبريطانيا وفرنسا والمانيا 
عشان تركيع مصر 
مقاطعه اقتصاديه - عرقله الاستثمار - اطلاق حمله التاثير علي سمعتها 
الاداريه والماليه 
مراهنات عالميه علي الجنيه 
بالذمه ده كلام يدخل العقل كل المخابرات دي تجتمع ويتسرب محضر الاجتماع 
دي حرب نفسيه علينا عشان نقلق ونرجع في كلامنا 
 زي ماقريت ان السادات الله يرحمه قبل حرب اكتوبر 73
سرب خبر ان ظباط الجيش فتحولهم العمره وحيروحوا عمره في رمضان 
ربنا معانا ومش ممكن يتخلي عن مصر 
مصر المزكوره في القرأن  
{ ٱدْخُلُواْ مِصْرَ إِن شَآءَ ٱللَّهُ آمِنِينَ }
---
اسمحولي اعمل اهداء لكل  قرائي المصريين اللي عايشين بره مصر
وبخص الاهداء لقارئي اللي عايش في استراليا 
مستر جمالي 
لاني عارفه هو قد ايه بيحب مصر 
بس ياريت من غير بكاء يستمتع باوبريت تسلم الايادي 
 http://www.youtube.com/watch?v=VBjyZizxQb0
واخر حاجه حقولها
مصر يا اجمل معني يابيتنا الحلو اللي مجمعنا 
واوعوا اوعوا تقلبوا الصفحه 
ابقوا معي  



---
 








 


21‏/7‏/2013

سؤال من اللهو الخفي

أعزائي
رمضاااان كريم 
ينعاد عليكم بالخير 

ده فانوس رمضان الاصلي  ابو شمعه مش الصيني 
تقبل الله منا ومنكم صيامنا وقيامنا 
وجعلنا واياكم من عتقاء الشهر الفضيل 
---
قريبتي اللي مش يتبطل كلام عن مصر 
اللي سمنها اللهو الخفي 
من يومين فجأتني بسؤال ماكنش يخطر علي بالي !!!
السؤال هو 
ياتري ياليلي لو بقيتي رئيس الجمهوريه حتعملي ايه ؟
السؤال صعب  وعايز تفكير قلتلها حرد عليكي بمقال 
قالتلي لا ده حيبقي الرد عليه في اكتر من مقال 
حفكر معاكم بصوت عالي 
----
اولا وبدون تفكير لازم اشوف حلول  لكل اللي بيحصل 
واول شيء اشوف حل في الاخوان 
يعني  اخلص مصر منهم 
مش حموتهم طبعا بس حدور علي حل معاهم 
ايه هو ؟
ده السؤال اللي تعبت في التفكير فيه 
--- 
لازم اغير علم مصر وبفكر ارجع العلم القديم 


شايفه  انه انسب علم لمصر 
كفانا سواد  اللون الاخضر حتي بيريح العينين والاعصاب
---
الزراعه
طبعا ححل مشكله اثيوبيا ومنع بناء السد 
الاراضي الصحراويه لازم تتخضر والشباب مافيش احسن منه لتخضرها 
ممكن نرجع قانون فدادين خمسه خمس فدادين 
بس حيكونوا فدادين صحراويه يتملكها الشباب 
ويزرعوا ويحصدوا ويكفوا احتياجيتنا في الاول 
بعدها يجي دور التصدير 
---
الصناعه 
حفتح المصانع اللي اتقفلت 
حشجع اصحاب المصانع ممكن الدوله تساعدهم بشرط 
تشغيل الشباب ,, ومش معني كده اننا حنستغني عن الكبار اصحاب الخبره 
الخبره مطلوبه مع حماس الشباب 
بشرط ان العماله تكون للمصريين 
يعني نمشي بمبدا سياسه التوطين 
 ---
الاقتصاد 
ده بقي المشكله الكبيره 
بس ممكن باراء الخبراء الاقتصاديين حنلاقي حل
ساعتها ممكن نشوف الصين واليابان عملوا ايه ونتعلم منهم
---
السياحه 
بجد حاجه توجع القلب لما تبقي البلد اللي فيها تلت اثار العالم 
بتعاني من السياحه 
حد بذمتكم شاف حتي اعلان سياحي  واحد يوحد ربنا 
يفتح النفس في الخارج 
ده في ناس لغايه دلوقتي واحنا في القرن ال21 
فاكرين اننا لسه بنركب الجمل وفي قمه التخلف 
ليه مانعملش البورصه المصريه للسياحه 
زي بورصه برلين 
ويجوافيها اهل السياحه واصحاب الفنادق من كل مكان في العالم 
يعرضوا اللي جايبنهولنا واحنا نعرض احسن ماعندنا 
ايه حيكون احسن من تلت اثار العالم 
ده كمان حيدخل لمصر دخل مش وحش 
بس بشرط التنظيم مش اي حاجه اقلب واجري 
او بالاحري اعمل اي كلام واهبش اللي فيه النصيب 
وابوك عند اخوك 
نهتم بالاثاراللي ماحدش بيعبرها 
احنا عندنا مرشدين ممتازين الحمدلله 
بس الترجمان اللي بيبهلوا السياح بتوع 
( جيفت بكشيش ياخواجه )
دول لازم يكون في وقفه معاهم 
كتير جدا منهم فاهمين ليه مانساعدهمش ونديهم دورات ونعلمهم اكتر 
اغلبهم مش بيعرفوا لا يقروا ولا يكتبوا حافظين اللي بيقولوه 
ماشي الحال نحفظهم بس بطريقه كويسه 
ويبطلوا يركبوا السايح الجمل ب5 دولار 
ولما يخلص المده وعايز ينزل من الجمل 
يشترطوا عليه ان النزول ب20 دولار 
سرقه علني هما السياح بيعانوا شويه منهم 
الامارات عمرها اقل من 40 سنه وحاليا 
خامس دوله في العالم سياحيا 
---
العشوئيات 
مش حقول نقضي عليها انما في الاول لازم نحسنها 
يعني ندخلهم الصرف الصحي والميه 
ورجال الاعمال اللي بيحبوا يسعدوا اهلا بيهم 
سواء عشان يعملوا عمل خير 
او يتقال عنهم انهم شاركوا في عمل خير 
لزوم الفشخره يعني !! المهم يساعدوا وخلاص 
وبشويش بشويش  حنلاقي العشوئيات بقت احسن من دلوقتي 
---
الضرايب
ماينفعش الضرايب العشوائيه 
وكمان لازم مأمور الضرايب يراعي ربنا 
مايساعدش المتهرب عشان بيطلعلوا منه كام الف 
وكمان مكاتب المحاسبين والمراجعين  يراعوا ضمايرهم
ويقدموا ميزنيات حقيقيه مش مضروبه 
طبعا في كتير من مأموري الضرائب عندهم ضمير 
وكمان اللي بيدفعوا الضرايب لازم يكون عندهم ضمير 
مش يكونوا بيكسب بالملايين ويدفعوا كام الف وعليكم السلام 
---
حعمل قانون جديد
عدم اعطاء الجنسيه المصريه لكل من هب ودب 
يعني وحياه النبي لما وحده مصريه تتجوز واحد مش مصري 
عارفه ان ولادها حيتبعوا جنسيه ابوهم 
ليه بقي تطلب لهم الجنسيه المصريه 
اللي عايزه ولادها يكون جنسيتهم مصريه تتجوز  مصري 
وحطالب بسحب الجنسيه من ملايين الل متجنسين بيها
اشكال حماس والمناظر المهببه اللي اخدوا الجنسيه بدون وجه حق 
كمان حنحط قيود علي فيزات الدخول لمصر 
زي مابيطلع عين أم اللي خلفونا في اي سفاره اجنبيه
 يبقي المعامله بالمثل 
لينا الحق نمنح ونمنع 
---
التاكسيات 
نعمل شركه تابعه للدوله لكل تاكسيات الجمهوريه 
يتوحد العداد يعني مش كل واحد يزوده بمعرفته عند 
كهربائي السيارت 
يبقي في متابعه مستمره
حتي ساعتها مش حيبقي في مشاكل بين الراكب وسواق التاكسي 
لو في مشكله في شركه تابعلها التاكسي والسواق تحل المشكله 
التوك توك يبقي موجود بس برخصه مش عشوائي 
حتي نعرف لو لا قدر الله حصل مصيبه نجيب السواق 
---
المروووووور
المشكله الاساسيه 
لازم نظبط المرور  اول حاجه بلاش نتلكك علي المخالفات 
يعني بلاش نخالف كده وكده عشان ناخد المعلوم 
ونسيب المزز يخالفوا زي ماهما عايزين 
لان لو في قانون رادع كان المرور اتظبط 
والمسئوليه كمان علي اللي بيسوقوا 
لما بيطلعوا يسوقوا في مكان غير مصر 
بيكونوا ملتزمين وخايفين وبيطبقوا القانون بحذافيره 
انما في بلادهم انسي ان في قانون 
علي فكره انا وحده من الناس دول يعني بخالف ما انا عارفه ان اخرها 
20 جنيه للامين وامشي 
وهو بيضربلي اعظم سلام صعيدي شحط محط من فوق لتحت 
تعالوا بقي للعساكر الغلابه اللي واقفين في الاشارات 
واللي اغلبهم ياولاداه مايعرفش الالف من كوز الدره 
طيب ازاي حياخدوا نمره المخالف 
دول مجندين الاقاليم
ويا حفيظ علي لبسهم المهلهل
لازم يلبسوا احسن من كده دول عنوان مرور مصر 
وكمان تلاقيه غلبان وواقف حيموت من التعب 
عطشان وجعان وقرفان وزهقان 
ولو حد اتعدي عليه مش معاه ولا حتي عصايه يدافع بيها عن نفسه 
---
الشرطه 
عايزه تظبيط جامد 
ادخل اي قسم شرطه تعمل محضر يالهوي 
تفضل تتنقل من امين لامين  واولويه المحاضر 
للمعارف و المحاسيب 
تلاقي الظابط عنده خدمه ليليه بيسموها 
( مرور سياسي )
نايم في بيته وراكن البوكس في اي شارع جانبي
وسايب القوه اللي هما العساكر يولعوا  ماهو البيه نايم 
ومعاه الجهاز لاي طاريء ساعتها بسلامته يقوم من النوم وينزل 
كمان لازم يكون في تناسق في شكلهم 
مرات تلاقي ظابط مرور كرشه قدامه متر 
منظره بشع ده لو احتاج يطارد حد حيعمل ايه 
ده ياحرااام بيمشي بالعافيه حيجري ازاي ؟
والا حيقول الحق حرامي امسك حرامي وهو واقف مكانه
كان في وزير داخليه من احسن وزرائها 
اسمه احمد رشدي 
سمعت انه كان بينزل ينظم المرور بنفسه 
ويلف علي الاقسام والمديريات 
وعشان كده طلعوه بدري بدري 
التجمع الخامس مش بلاقي فيه ولا اي كمين ولا عسكري واحد يوحد ربنا
هو التجمع ده تابع لجمهوريه كامبوديا ؟
---
البنوك 
ده بقي الامن فيها قصه تانيه
يعني العسكري اللي واقف قدام البنك من غير سلاح 
 ب20 جنيه تعرف منه كل اللي انت عايزه 
ممكن يقولك امتي البنك المركزي بيبعت العربيه المصفحه
اللي فيها الفلوس للبنك 
وكام واحد بيكون راكب فيها 
ولو عايز تعمل مصيبه قدام البنك مع العربيه دي 
ب500 جنيه يبعلك البنك ويجري  وممكن يقول انه راح الحمام
----
البلديه
اللي اسمها المحليات 
لما يطلع في دماغها او بالاحري لما تبقي عايزه تشتغل 
وده كل حين ومين تلاقيها نزلت تشيل التعديات 
بس حتشيل ايه والا ايه 
بتشيلها كام عربيه بيسترزق منها الغلابه 
طيب مانعمل حاجه احسن 
كل محل ممكن ياجر مكان صغير قدامه عشان زباين المحل 
في الامارات وتحديدا في الشارقه 
محل لارين  في شارع جمال عبدالناصر 
 مأجر من البلديه مكان قدامه بيدفع فيه 
اكتر من 100 الف درهم في السنه 
عشان الزبون يقف فيه 
ولو وقف اي حد غير زباينه المرور بيحصل منه غرامه فوريه 
قيمتها كااااام 1000 درهم 
ليه مانعملش كده بدل الصف التاني والتالت 
وبرضه حيكون  دخل كويس  
ونعمل سوق للي بيتعدوا علي الرصيف مكان صغير بايجار معقول 
يكون في مكان قريب مش نحدفهم في اماكن بعيده 
ساعتها نبقي ماعملناش حاجه 
لا حيشوفوا زباين ولا حد حيشوفهم
---
التامين الصحي 
ده بقي فيه امتهان لكرامه المواطن 
بس الغلابه يعملوا ايه
مضطرين يقعدوا بالساعات وده يزوع فيهم والتاني يتأمر عليهم
كل ده عشان شريطين ضغط وممكن مسكن او كام حقنه انسولين 
---
المعاشات 
دي مشكله المشاكل 
الموظف قعد طول عمره يدفع التامينات والاخر ياخد 80% من راتبه كمعاش 
والورثه ياخدوا من 75 ل80 % من المعاش اللي كان بياخده
يعني الدخل بينزل 
والاسعار بترتفع
مش حاطين في اعتبارهم ان اللي بيطلع معاش له مصاريف 
دواء  حتي لو في تامين صحي لانهم مش بيصرفوا كل الادويه 
بحد اقصي 3 ادويه 
كل دواء شريطين يعني 20 قرص
اللي بياخد قرص في اليوم مش بيكفيه 
طيب ازي الحال لو بياخد مرتين او تلاته في اليوم 
العيد جه مش له احفاد عايز يديهم عيديه 
راح يزور حد من اولاده مش حياخدله كيس جوافه مثلا 
عايز يشتري لبس  عايز يجامل قريب او جار 
ولو ورثه وفي اولاد بيتعلموا دي لوحدها كارثه 
انا لو حصل وبقيت رئيس جمهوريه اول حاجه حعملها
حثبت الاسعار وارفع المعاشات 100%
والغي السوق السوده مش في العمله بس 
في كل حاجه ممكن يكون فيها سوق سوده 
كل اللي كتبت عنه عايز اعاده هيكله 
ولسه في حاجات تانيه حكتب عنها بس كفايه كده النهارده 
حسيت انكم ملتوا مني ومن كلامي 
تفتكروا اللي عايزاه ده كتير 
سامعه اللي بيقول انها عايزه تعيش في المدينه الفاضله 
وليه مصر ماتبقاش هي المدينه الفاضله 
اللي ربنا سبحانه وتعالي قال عليها في القرأن الكريم 
ادخلوها امنيين 
نفسي اصلح كل اللي كتبت عنه 
وللحديث بقيه 
واوعوا اوعوا تقلبوا الصفحه 
ابقوا معي