6‏/4‏/2011

تفكير بصوت عاااالي

أعزائي
الصوره دي موجوده في ميدان التحرير 
نسيت اقولكم وحشتوني بس لاقيه حالي مش مظبطه 
تقدروا تقولوا متلخبطه قلقانه  مش عارفه بكره حيحصل ايه 
خايفه علي مصر جدا ومش عارفه اعمل ايه 
 مكتئبه  ليه بس اللي شايفاه ان كتير  بيعانوا نفس حالتي 
مش حاسه بطعم اي حاجه  الايام بعتقد انها بقت شبه بعض 
يعني لا في جديد ولا القديم مرتاحينله 
اعتبروا ان مقالي دي  تنفيس عن معاناتي 
بستعجب جدا علي سياسه المجلس العسكري ماشي بسرعه النملة 
ليه مش بيحاكموا الفساد بسرعه ؟ ليه مبارك وعيلته حاسين ان لسه لهم سلطه ؟
 ياتري المجلس العسكري محرج من مبارك ؟
يعني طنطاوي مكسوف منه علي اعتبار انه كان القائد فيما مضي؟
وهل الجيش عامل حساب لمبارك  وبيتباطئ؟
بدعي ان تكون مخاوفي في غير محلها 
-----
بعد 23 عاما عاد الدكتور كمال الهلباوي الاخواني الشهير 
بعد المنفي الاختياري 
انا مش من الاخوان بس كان نفسي احضر لقاءه بافراد عائلته 
سابهم من 23 سنه اطفال ورجع لقاهم اباء وامهات 
علي اي حال حمدالله علي سلامته 
-----
خروج عبود الزمر من السجن واستقباله استقبال الابطال
عايزه اعرف سبب واحد للاستقبال الحافل من الاعلام 
ده مش بطل ده قاتل 
ممكن كنا نوافق علي استقبال الاعلام له تحت مسمي واحد فقط 
انه قضي مدة العقوبه وبرضه فضل سجين 
انما استقبال الفاتحين ماتركبش مع القتله 
-----
المطرب النوبي محمد منير في حديث له في المصري اليوم 
سيكشف الحقائق مستقبلا 
وذلك تقديرا لظروف مصر 
زي ما الفرنسويين بيقولوا 
شابوه لمحمد منير 
-----
الاستفتاء علي مواد الدستور المرقع 
في كتير راحوا قالوا نعم وكتير برضه قالوا لا 
بس لا دول عارفين قالوا نعم ليه ولا دوكهم فاهمين  قالوا لا ليه 
كل اللي عنده رقم قومي راح الاستفتاء 
من باب الديمقراطيه 
وانا في الاستفتاء طبعا كان لازم اسال واعرف ايه الاخبار 
واللي كتبته كان نتيجه اللي الناس قالوه 
ست طيبه لابسه جلابيه سوده وطرحه سالتها اول مره تجي قالت ايوه 
قلتلها جايه ليه ؟ ردت عندي رقم قومي 
سالتها حتقولي ايه نعم والا لا 
قالت حسالهم جوه واللي حيقولولي عليه حعمله 
قلتلها انتي عايزه تقولي ايه ؟
قالتلي مش عارفه حعرف لما اخلص الطابور 
 راجل كبير فوق 80 سنه 
انتخب وقعد منتظر سالته اول مره تنتخب ؟
قالي لا بس ماكنتش بجي هو صوتي كان فايدته ايه 
قلتله حضرتك انتخبت منتظر ايه ؟
رد عليه رد عجبني جدا 
قالي اولا انا مبسوط من المنظر اللي شايفه 
وكمان منتظر احفادي واقفين في الطابور 
دعتله بالصحه ومشيت 
-----
عمكم الحاج مبااااااارك 
حاصل علي نجمه الشرف العسكرية 3 مرات 
المكافأة كانت عام1959 10 جنيهات شهريا 
رفعها عم الحاااج مبااااارك 
عام 1985-  200 جنيها شهريا
عام 1997 - 1000 جنييها شهريا 
عام 1999 - 2000 جنيها شهريا 
عام 2004 - 4000جنيها شهريا
عام 2005 - 6000 جنيها شهريا
عام 2008 - 10 الاف جنيها شهريا 
عام 2009  - 15 الف جنيها شهريا 
عام 2010 - 20 الف جنيها شهريا 
نضربهم في 3 يبقي المجموع 60 الف 
غير المعاش العسكري والمدني 
وماعاش اللي يزعل عم الحااااج 
وده بقي التطور الطبيعي للحاجه الساقعه 
-----
مصر بقت قهوه المعاشات 
وده للوزراء والمسئولين كبار السن 
بكره تبقي نهايه الخدمه  كرسي الرئاسه 
-----
اختفاء 145 قطعه أثرية من مخزن الجامعة الامريكية 
تعود الي العصر الاسلامي 
وقال الخواجه زاهي  ان السرقه تمت بين 15 و17 مارس 
وعمار ياخواجه 
ربنا يزهزه عصرك وينصرك علي مين يعاديك هاي هيئ 
ويجعله عامر بحسك 
-----
وزير في احدي وزارات دكتور شرف بيخاف انه يمضي اي ورقه 
وده لان نظيره السابق الهارب حاليا  ماكانش حد يفكر 
انه ممكن يكون فرد في منظومة الفساد
ويا دكتور شرف  ممكن تشيله وتجيب غيره برضه بيفهم 
في ابعاد التجاره الداخليه والخارجيه
-----
مستعجبه جدا من دكتور يحيي الجمل 81 سنه 
ربنا يديله الصحه 
نائب رئيس الوزراء في حكومتي 
ش و ش 
شفيق وشرف 
كان له خطاب سابق عام 2008  قال بالحرف 
انا ياسيادة الرئيس بلغت  من العمر  ما ادرك معه جيدا انني لا اصلح لاي منصب 
ياخساره قبل نفس المنصب مرتين 
للشهرة بريق 
-----
زينه ابنه عفت السادات  عضو مجلس الشعب السابق 
وهي في طريقها لمدرستها   اختطفت اجبروا السائق تغير المسار 
طب ماكانش معاه موبايل يستغيث ولا هي معاه موبايل تستغيث 
وطالب المختطفين  ب 5 مليون جنيه فديه 
دبروا المبلغ  وتمت السيطرة  علي الموقف  وعادت زينه 
وال 5 مليون جنيه  الا40 الف  تصرف فيها احد الخاطفين 
وقبض علي المختطفين جميعا  بمساعده الشرطه 
انا مش مع نظريه المؤامره 
بس حاسه انها قصه مفبركه تورينا ان الشرطه في خدمه الشعب 
او تقربنا تاني للشرطه 
------
حزب الاخوان بينادي بالاتي 
دولة مدنية- نظام برلماني 
حزف بند حظر ترشيح القبطي والمرآة للرئاسة
ومن حق غير المسلمين الاحتكام لشرائعهم في امورهم الخاصة 
سؤال عبيط حساله 
لو طلب مسيحي الانضمام للحزب علي اعتبار اننا اخوه في الوطن  ياتري حيعملوا ايه ؟
-----
المتحولون  في الاعلام كتير وطبعا كلكم عارفينهم 
الاعلاميه لميس الحديدي 
حرم الاعلامي عمرو اديب 
حاليا بتتكلم عن الثورة ومش عاجبها الفساد اللي كنا عايشينه 
بس نسيت انها كانت متزعمه حمله عمها الحاااج مبااااارك 
عام 2005 للرئاسه 
واقترحت عليه انه مايلبسش كرافته 
عشان يبقي قريب من الشعب 
قال يعني الكرافته هي اللي بتقرب وبتبعد وعجبي 
------
متهيالي النهارده مقالي طويل ومليتوا مني ومنه 
بس انا كنت بفكر بصوت عالي 
اعزروني واستحملوني 
واوعوا اوعوا تقلبوا الصفحه 
ابقوا معي