18‏/11‏/2010

لعبه الكراسي الموسيقه

أعزائي
كل عام وانتم جميعا بخير بمناسبه عيد الاضحي المبارك
والسنه الجايه ان شاءالله نكون جميعا صحبه علي عرفات
بصراحه اشتقتلكم جدا وانا عارفه اني وحشه خالص خالص لاني بتأخر عليكم
بس والله الظروف والجو الغير مستقر  وحرق قش الرز كل دي عوامل مساعده
للحساسيه  الصدريه . شفاكم الله وعافاكم
طبعا مستغربين من شعار الحزب الوطني بس قلت افكركم بيه
طالما اني حكتب عن الحزب ولو اني مش عضوه فيه
ولا في اي حزب تاني الا حزب وداد قلبي
طبعا اتفاجئت زيكم من ترشيحات الحزب الوطني اللي كانت مفأجاه
وليه رشحوا اكتر من عضو في كل دايره وفي دايره منهم رشحوا  فيها
ست قدام 4 رجاله  والله دي حقيقه
طب الشرع بيقول ان الراجل له 4 ستات انما الست مالهاش الا راجل واحد
هي دي الحاجه زهرة والا ايه
معليش بقي اصل القافيه حبكت معايا
والسؤال هو حيضحوا بمين لصالح مين والتضحيه دي لزوم عيد الاضحي
يبقي لازم نضحي باكتر من مرشح لكل دايرة
عشان المرشح اللي عليه العين ومظبط اموره هو اللي حينجح في الانتخابات
اكيد النتيجه في الكونترول قالت ان كل الوزراءالحاليين نجحوا نجاح ساحق
وحينالوا شرف التواجد في المجلس الموقر او ( سيد قراره )
بس برضه في دواير مقفوله من 32 سنه زي دايرة الباجور
كانت مقفوله للمرحوم كمال الشاذلي
بس اكيد الحزب حيرشح حد تاني واعتقد ان التاني ده ممكن يكون ابنه
دي مجرد تخمينات بس الايام الجايه حتورينا الكتير
عارفين الانتخابات دي شكلها زي الكراسي الموسيقيه
بس المرشح اللي عليه العين والنيه بيفضل واقف
جنب الكرسي والباقي بيلف علي الموسيقي
واول مايشار للمرشح ان الموسيقي حتقف يقعد علي الكرسي وبكده ضمن الدايره
وباقي المرشحين في الباي باي وسعيهم مشكور
في حاجه تانيه شغلتني جدا  وفكرت فيها كتير لغايه مالقيت تفسير انا اقنعت حالي بيه
عاملين شعارين للحزب الهلال والجمل طب مين حياخد الهلال ومين حياخد الجمل ؟
الهلال اكيد اللي حينجح وحيعلا زي الهلال في السما
اما رمز الجمل ده بقي للي حيشيل الهم ويقعد يفكر ياتري ياهل تري
ناجح والا لا حنول الشرف والا لا
وفي الاخر يطلع من المولد ويقعد علي دكة الاحتياطي لمده 5 سنوات
ياعالم حيحصل فيهم ايه ؟
تفكير جاني من ايام فجأة وهو لو انا رشحت حالي حيكون ايه شعاري
هما شعارين فكرت فيهم الاول الجردل ماتضحكوش مش بقلد عادل امام  في الجردل والكنكه
بس لقيته رمز مناسب ليه  لاني مش حفهم حاجه واكيد حبقي زي الجردل ويجي اي حد يدلقني
والشعار التاني برضه مناسب جدا جدا  برضه اوعوا تضحكوا
هو شعار الحمار لاني اكيد في مساله الانتخابات حشبه الحمار في عدم الفهم
والله يسهل علي عبيده
معليش انا طالعه من دور مرض جامد وممكن يكون مقالي هلوسه برلمانيه
استحملوني زي كل مره امركم لله انا برضه اخف من الانتخابات والترشيحات
وللحديث بقيه بعد النتيجه
بس اوعوا اوعوا تفكروا تقلبوا الصفحه
ابقوا معي



هناك 5 تعليقات:

غير معرف يقول...

لولا الغاليه
يابنتي انتي تاخدي رمز حمامه السلام مش الجردل والا الحمار اعوذ بالله . بس برضه انصحك انك اوعي تفكري ترشحي نفسك في الانتخابات الجايه لان النتيجه انك حتقعدي علي كرسي الاحتياطي . كل الحب للولا الغاليه
دكتور مهندس احمد الجمال

غير معرف يقول...

ليلي هانم
اولا كل عام وانتي بخير
ثانيا حمدالله علي سلامتك بس مش معقول التاخير ده كله سببه المرض
مقال علي رأي الاسكندرانيه دمه شربات . وزي ماقلتي لسه حنسمع ونشوف كتير . ومنتظرين تحليلك الكوميدي بعد الانتخابات . من فضلك بلاش غياب كتير
كل الود لليلي هانم
دكتور محمد عمر

غير معرف يقول...

أولا تحياتي وكل عام وعيدك سعيد وثانيا ألف سلامة وربنا ينعم عليك دايما بالصحة وثالثا موضوع الانتخابات يجب أن يناقش من أصل اختيارنا لكلمة انتخاب التي تعني في مفهومنا اللغوي اختيار الأصلح وتعني في مفهوم اللي مايتسموش اختيار الأجهل والأنفع لهم ومش مهم الشعب ده إذا كان في شعب له اعتبار عندهم ورابعا مافيش حد هاينتخب أو هايختار حد والكل عارف إن الأمر مجرد ديكور لتزيين الصورة وخامسا مافيش فايدة لا في الحكومة ولا في الشعب بل على العكس أنا شايف إنه زي ماقالت لي ستي زمان ماجمع إلا ماوفق وكل فولة مسوسة لها كيال أعور وشعب مصر فول مسوس وحكومته مش بس عورة دي حكومة عامية كمان وسادسا ده أول ذنب أرتكبه بعد الحج مباشرة ومش ندمان عليه بالعربي مش خسارة فيهم .تحياتي
حكيم عقول

ماجد الجلاد يقول...

كل سنة وانتى طيبة والف سلامه عليكى

الغريب فى موضوع الرموز ده ان كل دورة انتخابية بشعر ان الحزب الوطنى بيتريق على المنافسين..الحزب طبعا واخد الهلال والجمل والنجمة والحاجات الأبهه
وسايب للمنافسين رموز اخر مسخرة زى مثلاً
المكنسة وصنبور المياه و (الونش) وميدالية المفاتيح والزرافة والسخان والثلاجة وكمان الموزه؟!!
تخيلي مرشح محترم لابس الحتة اللى على الحبل واخر الاجه يتصور وجمبه موزه!!!
بصراحة احنا شعب لطيف
i love Egypt

sayd333 يقول...

اختى الفاضله لينا
عيد سعيد , وكل سنه وانتى طيبه
وعوده حميده باذن الله
بالنسبه للانتخابات لا اراكى تصلحين لها وهذا بسبب الدافع الاساسى خلف من يسعى اليها وهو حب السلطة و المال وهما صفتان لا ينتميان لكى .
تحياتى