28‏/11‏/2010

انتخابات مجلس الشعب 2010







أعزائي
كل خمس سنين وانتم بخير  النهارده كانت انتخابات مجلس الشعب
قلت اعمل جوله علي لجان مصرالجديده بصفتي من سكانها 
اول شيء شفته الصبح الساعه 9 ونص صباحا في التليفزيون
عمنا الحاج الكبير لما انتخب هو ومرات عمنا واولاد عمنا في لجنه
مصر الجديده الثانويه النموذجيه للبنات
ودي تعتبر اشيك وانضف لجنه في مصر كلها
اللجنه دي بالذات لما لها من اهميه تلاقوها دايما هادية
نقول الاول عن نظام الانتخابات
المرشحين 508 نصفهم عمال وفلاحين والباقي فئات
منهم 64 سيده ودي كوته المرأة
فتحت ابواب اللجان في الثامنه صباحا
واغلقت في السابعه مساء
222 لجنه انتخابية بيتبعها   144.500 لجنه علي مستوي الجمهورية
تحت اشراف 2286 قاضيا و276 الف موظف من العاملين
بالحكومة  والهيئات والمؤسسات وذلك لتولي رئاسه وعضوية اللجان
لما تدخل اللجنه تلاقي بوستربيوضح كيفيه الادلاء بصوتك
بعد ما تنتخب ستجد صندوقين الاول للمقاعد العادية اما الثاني فهو الخاص بمقاعد المرآة
لجان هاديه جدا ولجان ساخنه جدا
طبعا انا كنت حكتفي باني الف علي لجان مصر الجديده انما جاني تليفون اثناء مروري علي اللجان
قلب كل شيء  بوفاة احد اقاربي وكانت الجنازه من السيده نفسيه
طبعا وصلت قبل صلاة العصر بدقايق لقيت هدوء غريب
بعد صلاه الجنازه علي المرحوم  رحنا ندفنه في مقابر الامام الشافعي
المهم بعد كل ده رجعت اكمل المرور علي الدوائر وكان من حسن حظي اني تهت
اه والله تهت ولقيت نفسي في ازقه وحواري وزحمه رهيبه في الامام الشافعي وتحت كوبري التونسي وزينهم
والمنيل وشارع الهرم 
شفت بصراحه حاجات ماكنتش اعتقد اني ممكن اشوفها
وقابلت ناس غلابه جدا رايحين ينتخبوا  سالت ست هو حضرتك بتنتخبي ليه
قالتلي اصل اللي حنتخبه وعدني انه حيطلب انهم يزودا معاشي
ووحده تانيه سالتها ليه بتنتخبي  قالت عشان بيدوني 100 جنيه
طبعا الكارت الدوار  بقي حاجه عاديه واللي مش عارف ايه هو  حعرفه
تدخل اللجنه ومعاك بطاقه ادهولك بره هما محددين اللي حتنتخبه
بتدخل  وطبيعي انهم يدوك بطاقه عشان تعلم علي اللي انت عايز تنتخبه
بتطبقها وتشيلها وتحط اللي معاك من الاول ولما تخرج تديها للي كان ادالك البطاقه اللي علموا عليها
وتاخد المعلوم  وهو غالبا بيكون 100 جنيه
وحده ست كبيره لقيتها بتبكي سالتها مالك قالتلي اصلي حطيت الفاضيه
وضاعت عليه الفلوس
سالت واحد راجل  مسن هو حضرتك بتنتخب كل مره قالي ايوه
قلتله منتظر ايه من اللي حتنتخبه
قالي هو وعدنا انه يكون معانا ولو لينا طلبات حيحققلنا طلباتنا
لقيت ست  مسنه ومعاها ولد حوالي 10 او 11 سنه مسندها
سالتها حضرتك عندك تذكره انتخابيه قالتلي ايوه سالتها جايه تنتخبي حد تعرفيه
قالتلي ايوه انا بنتخبه كل مره
قلتلها وهو بيساعدكم قالتلي كل مره يوعدنا  طبعا مفهوم الباقي
ناس غلابه وطيبين وبيصدقوا كل حاجه
هما دول اغلب الشعب المصري
اغلب اللي راحوا الانتخابات هما المسنين والغلابه 
انما الشباب بيهتف ويرقص ويهيص
في الازقه والحواري اللي رحتها لقيت الطبل والرقص والميكرفونات
  وده مايمنعش من وجود البلطجيه  والبادي جارد للمرشحين
سالت واحد كان متطوع انه يمشي المرور عشان سياره فولكس باست سوده
كانت عايزه تركن في الزحمه .سالته بعد ماوقفني عشان يخليها تركن
قلتله مين ده اللي وقفتني عشانه قالي ده ابن الدايره
طبعا ضحكت من كلمه الدايره وسالته هما هنا في ابناء كتير للدايره
قالي ايوه طبعا  وسابني وجري عشان ابن الدايره نزل من العربيه
في دائره مدينه نصر الدعايه مكثفه امام شركات البترول
وطبعا كلها لوزير البترول سامح فهمي
كل مندوبي مرشحي الحزب الوطني هادين جدا
انما مندوبي المستقلين والاحزاب  في غايه العصبيه
الشرطه موجوده بكثرة وكمان عربيات الامن المركزي
طبعا رحت انتخب حوالي الساعه 6.10 مساء
دخلت اللجنه  الشرطه وقفتني علي الباب عشان تشوف بطاقتي الانتخابيه قلتلهم انا بنتخب بالبطاقه
قالولي طيب ادخلي بصراحه كانوا في منتهي الادب
دخلت  سالوني انتي لجنه كام قلتلهم لا مش عارفه  لاني فعلا ناسيه
قالتلي وحده ممكن تروحي الكمبيوتر تعرفي لجنه كام  سالت فين هو
شاورتلي علي ممر  دخلت لقيت ناس كتير قاعده
سالتهم فين الكمبيوتر فوجئت ان مافيش كمبيوتر 
وحده اتبرعت وخدت اسمي واتصلت بحد علي الموبايل وقالتله اسمي
اقل من دقيقتين وقالتلي لا مش موجود
قلتلها ازاي قالتلي في كتير مالقوش اسمائهم قلتلها ايه الحل قالتلي مافيش حل
قلتلها يعني اروح  وبلاش انتخب قالتلي ايوه
قلتلها لا انا حنتخب بالرقم القومي قالتلي لا مش حينفع
لقيت مافيش فايده من الصوت الواطي  وبصوت عالي سالت الموجودين
هو احنا لما بنطلع باسبور مش بيطلبوا منا الرقم القومي
ولما بنصرف شيك في البنك برضه بيطلبوا الرقم القومي
ولما بننزل في اوتيل بيطلبوا الرقم القومي
ولما يطلب مني اثبات شخصيتي بيكون برضه عن طريق الرقم القومي
وفي خانه في استماره الرقم القومي بتخيرنا ننتخب في مكان اقامتنا والا في مكان ما اتولدنا
 وده علي اعتبار ان مش كلنا مواليد القاهرة
ماحدش رد زي ما اكون بحكي مع حالي 
طلعت الموبايل وقلتلهم خلاص انا حطلب بوليس النجده يجي يعملي محضر
اثبات حاله انكم مش عايزني انتخب او بالاحري بتسلبوا مني حقي الانتخابي
لقيت الكل قام وجريوا ندهولي رئيس اللجنه
جالي وقالي ايه اللي مزعلك  قولتله مش حعيد تاني  هما حكولك
قالي خلاص هاتي الرقم القومي وراح معايا بنفسه اللجنه وانتخبت والحمدلله
ماهو انا دايما ارازيهم في الانتخابات
واقولكم اوعوا تقلبوا الصفحة
وللحديث بقيه بعد الاعاده
ابقوا معي

هناك 5 تعليقات:

غير معرف يقول...

ليلي هانم
اولا حاجه البقاءلله
ثانيا مقال ممتاز واحسن مافيه انك لم تتنازلي عن حقك ياريت الناس كلها في مصر يتمسكوا بحقوقهم كنا فعلا حنبقي غير كده خالص .
كل الود لليلي هانم
دكتور محمد عمر

غير معرف يقول...

استاذتى الفاضله المحترمه \ البقاء لله اولا فى قريبك \ والبقاء لله ثانيا فى اى امل للتغيير بكل اسف انتخبات هاذا العام لا تختلف كثيرا عن مثيلاتها تقريبا فى تشابه كتير بينى وبينك فى موضوع الادلاء بصوتى لاكنى طبعا غير مسجل فى مصر الجديده مسجل فى مدرسه التربيه الحديثه بالمنصوره واجمل شى انها قريبه جدا لمنزلى ولاكنى تعمدت اعمل فيها تايه وذهبت لبعض الجان لكى استقصى الحقائق التى كنت اعلمها مسبقا ولاكن من باب ليطمئن قلبى وصدقت توقعاتى شراء للاصوات وبلطجه وارهاب عسكرى وحتى اتفادى عدم الادلاء بصوتى احضرت معى بطاقتى الأنتخابيه التى استخرجتها وعمرى 19 عام ومليئه بالتأشيرات ورقم القيد وبالرغم من ذالك لم افلح فى الادلاء بصوتى الا عندما ذهبت للكمبيوتر الخاص بمرشح الحزب الوطنى فى دائرتى وطلبت منه مساعده فى البحث عن اسمى فاذا به يسئلنى انت معانا ولا مع الاعداء فقلت له انا مع دكوهم ضد دلولاهم وذهبت للجنه الحاديه عشر صباحا وتبين ان سبب دخولى هوا تأشيره وضعها نائب الحزب الوطنى على بطاقتى لتسهيل السماح لى بالمرور وفتحت لى جميع الابواب ودخلت وانتخبت طبعادكوهم مش دولاهم \\\ الان فقط اقول وبصدق ليتنا تجمعنا خلف البرادعى وقاطعنا الأنتخا بات بما انهم لم يستجيبو للمطالب السبعه \\\ اسمع الان فى سى ان ان ان مصطفى بكرى فشل ونجح مرشح الحزب - والبارحه حمدين صباحى اعلن انسحابه - وبعده بساعه تقريبا ايمن نور فى الخامسه مساء -- ايه التخبط داا انسحبتو بعدما اعطيتم شرعيه للأنتخبات والله حاجه تكسف مبروك لابن الدايره الفوز المنقطع النظير
هشــــام ابو عيـــش

زهرة البنفسج يقول...

لولا الغاليه
دايما مشاغبه واعتقد انك مش حتبطلي داء الشغب . بس بصراحه زي مابيقولوفي فرنسا شابوه لانك لم تستسلمي وخدتي حقك بدراعك
خليكي كده علي طول زي مابنتوقع منك الايجابيه . كل الحب للولا الغاليه .
دكتور احمد الجمال

Emad يقول...

فى كلمتين انكتبو زمان فى الميثاق عمرى ما نسيتهم بالرغم من انى ابعد ما يكون عن الناصريه والناصريين لعنة الله عليه وعليهم0000 اما الكلمتين فهم: إن حرية رغيف الخبز يجب ان تأتى قبل حرية الكلمه
وبناء عليه فأنى أعتبر ( مجازا ) أى جائع ومعدم وجاهل فى مصاف ناقصى الأهليه الذين لا يؤخذ بشهادتهم فى تحديد شخصية منصب خطير يمس مصير 80 مليون مصرى
ومن ناحية اخرى فأنا ضد تصنيف نواب الشعب عنصريا مثل 50% عمال وفلاحين فقد وضعت هذه النسبه لإنصاف الغالبيه العظمى من المصريين ويالسخرية القدر لقد اصبحو اشد الناس معاناة فى مصر.
اما بخصوص كوتة المرأه (قد تشاركينى فى الرأى بالرغم من انك امرأه) فلا أري فى هذا القرار إلا ترسيخا لعنصرية مجلس نواب الشعب وسريعا سوف نكتشف ان هذا العدد من النساء سوف تكون له زعيمه وإجتماعات جانبيه بحيث يتحول إلى كتله تتحكم فى قرارت المجلس على طريقة معاكم معاكم عليكم عليكم 0000000 الخلاصه: البقيه فى حياتك مرتين الأولى لقريبك رحمة الله عليه والثانيه لمجلس نواب مات قبل ان يولد وعلينا انتظار الفرج خمس سنوات اخري 3omdax

Emad يقول...

فى كلمتين انكتبو زمان فى الميثاق عمرى ما نسيتهم بالرغم من انى ابعد ما يكون عن الناصريه والناصريين لعنة الله عليه وعليهم0000 اما الكلمتين فهم: إن حرية رغيف الخبز يجب ان تأتى قبل حرية الكلمه
وبناء عليه فأنى أعتبر ( مجازا ) أى جائع ومعدم وجاهل فى مصاف ناقصى الأهليه الذين لا يؤخذ بشهادتهم فى تحديد شخصية منصب خطير يمس مصير 80 مليون مصرى
ومن ناحية اخرى فأنا ضد تصنيف نواب الشعب عنصريا مثل 50% عمال وفلاحين فقد وضعت هذه النسبه لإنصاف الغالبيه العظمى من المصريين ويالسخرية القدر لقد اصبحو اشد الناس معاناة فى مصر.
اما بخصوص كوتة المرأه (قد تشاركينى فى الرأى بالرغم من انك امرأه) فلا أري فى هذا القرار إلا ترسيخا لعنصرية مجلس نواب الشعب وسريعا سوف نكتشف ان هذا العدد من النساء سوف تكون له زعيمه وإجتماعات جانبيه بحيث يتحول إلى كتله تتحكم فى قرارت المجلس على طريقة معاكم معاكم عليكم عليكم 0000000 الخلاصه: البقيه فى حياتك مرتين الأولى لقريبك رحمة الله عليه والثانيه لمجلس نواب مات قبل ان يولد وعلينا انتظار الفرج خمس سنوات اخري 3omdax