مهما حدث سأظل احبك

أعزائي

واحد من اصحابي بعتلي اول صوره المكتوب فيها

مدونه زهره البنفسج

بشكره كتير علي ذوقه

احترت اقدمها ازاي بس لقيت ان احسن حاجه اني اكلمكم عن

زهورالبنفسج

لغه الازهار او بالاحري لغه القلوب

بتقول ان لكل نوع من الزهور رمز او لغه

استعملت للتعبير عن المشاعر والاحساس

والورده البنفسجيه بتعني الحب للآخرين

وزهره البنفسج للحب الصامت المتأجج

وزهور البنفسج بتخاطب المرأة الخجول

وفي حوار بيكون بين الورده والانثي

المرأة لما تبعت للرجل زهور البنفسج معناها انها بتقوله

( مهما حدث سأظل احبك )

وعمنا صالح عبد الحي غني للبنفسج

من كلمات بيرم التونسي

والحان رياض السنباطي

بس ياتري كام واحد سمع الاغنيه او بالاحري تمعن في كلماتها

تعالوا نقرا مع بعض ونشوف قال ايه عن البنفسج

ليه يابنفسج بتبهج وانت زهر حزين

والعين تتابعك وطبعك محتشم ورزين

ملفوف وزاهي ياساهي لم يبوح للعين

بكلمه منك كانك سر بين اتنين

حسنك بكونك بلونك تبهج المقهور

واللي يزوره سميره في الظلام مستور

حطوك خميله جميله فوق صدور الغيد

تسمع وتسرق يا أزرق همسه التنهيد

اسمع وقولي مين اللي قال معايا آه

بقولها وحدي لوحدي والاسي هواه

فعلا الله علي اغاني زمان

اغاني جميله حقيقي مش زي اغاني التيك اواي

والاصوات اللي مش بنعرفهم من بعض

كله زي بعضه

بلا طعم ولا لون ولا رائحه

اقولكم ابقوا معي واوعوا اوعوا تفكروا تغيروا المحطه