29‏/1‏/2009

بصراحه مش لاقيه عنوان مناسب

أعزائي
يوم الاثنين وانا راجعه البيت سمعت في راديو العربيه اغنيه
انا في الغالب بيكون الراديو مفتوح او السي دي
بس مش بكون منتبهه لكلمات الاغاني ممكن لاني سمعتها كتير
او اكون بفكر في شيء .او معايا حد بحكي وياه
مش عارفه ايه خلاني انتبه لكلمات الاغنيه
كانت لمحرم فؤاد واسمها انا عايز صبيه
من يومها لغايه دلوقتي وانا بفكر في كلماتها
بتلح عليه او بالاحري بتطاردني مش عشان عجباني
لا عشان فرساني بجد مفروسه من كلماتها جدا
السبب ايه مش عارفه بس تعالوا نعرف بتقول ايه
وتفسيري للكلمات دي ايه
بتبتدي بانه بيقول
ان خيروني في بنات العم اخد الكبيره اللي تشيل الهم
وان خيروني في بنات الخاله اخد اللي فيهم عارفه طبعي وحالي
معني كده انه عايز يتجوز اي وحده وخلاص مش مهم
وحده تشيل همه
مش مهم الحب ولا الاعجاب ولا التقارب الذهني
اي وحده فيهم ترضي والسلام
وبيقول انا عايز صبيه يكون جولبها عليه ترسملي ع الطاقيه جلب ويمامه ودار
ده كمان بيتشرط عليها . طيب اذا كانت بليده في الرسم مش حيوافق يتجوزها
وتبقي خسرت فتي الشاشه الاول
وكمان تمسح دمعه بكايا ورموشها تكون غطايا
وان طال الليل معايا كلمتها تكون نهار
كده الطلبات كترت هو بيطلب منها
تمسح دمعته واكيد تغسل هدمته وكمان تطبخ لقمته وتنظف فرشته
ورموشها تكون غطاه علي اعتبار انه بدل مايتلحف السماء يتلحف برموشها
لان الغطاء مش موجود عندهم
مش عشان بيحبها لا سمح الله
ولو طال الليل معاه لازم تنهيه وتخليه نهار . ياعيني
كمان يبقلنا بيت صغير وقمر اخضر ينور وولد دايما يدور عن حاجه يهشها
البيت الصغير ده ممكن بس الغريب اني طول عمري عارفه وبشوف زي ماحضرتكم بتشوفوا
ان القمر ابيض ومنور انما قمره هو اخضر
يمكن زمان كان في الوان او ممكن يكون اخضر عشان لسه ما استواش
ولما يستوي يقلب ابيض .جايز
والولد ايه اللي يهشه ؟
ولسه بيقول وهي تدخل وتطلع تتكلم قلبي يسمع اتكلم هي تسمع وتحب عشها لو حتي مافيش فطار
تتكلم وقلبه يسمع وهو ياحرام اتجوزها عشان رضيت بيه
طيب تحب عشها حنقول تحب ماتحبش ليه
بس ليه مافيش فطار عشان هي قريبته مش حيفطرها
والا الظروف تمنع الفطار اللي هو اهم وجبه في اليوم
لسه ماتقلقوش
اجي في المغربيه تجري م الدار عليه تاخدني من ايديه ونتعشي سوا
يجي اهلا وسهلا نور البيت بس تجري ليه مش البيت صغير يبقي لمايفتح الباب حتشوفه
مش كفايه انها ممكن تكون بتشتغل وبتنزل من غير فطار وبتجري ورا الاتوبيس او الميكروباص
عشان تلحق ترجع تطبخ وتنضف . يعني هي اللي عايزه حد ياخدها من ايديها ويشكرها
مش كفايه انها متجوزه واحد بيتشرط وتلاقيها بتقول المثل بتاع زمان بسمعه من جدتي
قاعده الخزانه ولا جوازه الندامه
اخر الاغنيه
نتكلم في اللي فات وفي اليوم اللي ات ينيمنا السكات ويصحينا الهوي ولينا الف جار
ايه اللي فات اذا كنت متجوزها عشان هي الوحيده اللي رضيت بيك
اي زكريات بينكم زكريات الطفوله لانها وحده من اتنين بنت خالتك او بنت عمك
اليوم اللي ات هو نفسه اليوم اللي فات واليوم اللي انتوا فيه
وينيمكم السكات لان مافيش كلام بتناموا
ويصحيكم الهوي ابقي بس وصيها تقفل الشباك كويس
وكلنا لينا جيران مش انت بس
معليش انا عارفهاستعابي الاغنيه كان مافيهوش رومانسيه مش قادره مفروسه بجد والله من كلماتها
استحملوا الخزعبلات بتاعتي النهارده
واوعوا اوعوا تغيروا المحطه

هناك تعليقان (2):

chipsy_2008 يقول...

الفنان الكبير محرم فؤاد ضمن كوكبه من أهم فنانى زمن الفن الجميل وهو يعتبر من الفنانين الشاملين غنائا وتمثيلا وتلحينا وأغانيه الجميله ستبقى أجيالا وأجيال000

غير معرف يقول...

ما اجمل كلمات هذه الاغنيه من يستشعر هذه الكلمات البسيطه الرقيقه سوف يعرف معنها الاصيل فحبذا لو كل النساء بها هذه الصفات التى فى الاغنيه اننى ادعيكم لسماع الاغنيه لتعشيوا معى حلاوه معانيها
فعلاً الاغانى القديمه لها شجن ومعانى
رحم الله المطرب/ محرم فنان