1‏/10‏/2012

خليك اسبور ياحبوب

أعزائي 
مش عارفه كتير منكم بعتولي ايمالات وتعليقات في الفيس بوك
لانهم مش عارفين يعلقوا في المدونه 
انا نفسي مش عارفه في ايه حاولت اعيد الاعدادات 
بس بقي الحال علي ماهو عليه
اصل بيني وبينكم انا مش ضليعه في الكمبيوتر
يادوب بعرف امشي حالي وده بعد ما بوظت  3 اجهزه 
نتيجه جهلي بالتكنولوبيا الحديثه 
بيني وبينكم انا بفهم في الكمبيوتر بالظبط زي ماحضرتكم بتفهموا في اللغه اليابانيه 
من ضمن التعليقات اللي وصلتني علي المقال السابق 
من دكتور جيهان بدوي قالت 
فعلا ياليلي البنات استرجلوا او بيعملوا كده لسببين من ناحيه تخوف الشاب اللي معاها 
توريله انها قويه وتقدر تدافع عنه  وفي الحاله دي يعملها الف حساب 
ومن الناحيه التانيه  تتمنظر علي خلق الله 
او ممكن يكون الظابط عجبها قالت يمكن الطريقه دي تلفت نظره 
اصل ياليلي يا عزيزتي  البنات دلوقتي مش حنقدر نعرف بيفكروا ازاي 
 ده كان تعليق دكتور جيهان 
----------------  
اما دكتور حسام قالي 
ليلي بحب مقالاتك بحس انك قاعده قدامي بتحكي 
بقرا مقالك اكتر من مره 
حسيت بالرغم من سخريتك في الكتابه انك حزينه 
مقالاتك السياسيه بتعبر عن مدي حزنك علي مصر 
كل جمله بتفتكري انها سخريه لها الف معني سياسي 
اكتبي بنفس الطريقه 
ده كان دكتور حسام طبيب نفسي 
----
اكتر قرائي دكاتره ايه رايكم لو نشرت مقالاتي في دارالحكمه 
ده اكيد حيكون اسهلهم من المدونه 
بشكر كل اللي علق واللي ماعرفش يعلق واللي ماعلقش 
بشكر كل من قرا حرف كتبته 
بجد من غيركم مش حعرف اكتب 
ربنا يديم الود اللي بينا 
---
قرائي الاعزاء 
ممكن التعليق علي الايمال للي مش عارف يعلق في المدونه 
lilactulipe_2004@yahoo.com
---
المقال اللي فات لما نزل وكنت بحكي مع اهلي عليه 
فكروني بحادثه كانت السنه اللي فاتت واستغربوا بشده اني مانزلتش مقال عليها 
هي فعلا كانت تستحق  بس ممكن عشان كنت بكتب سياسه
ما انتبهتش اني انزلها 
تعالوا احكيلكم 
الواقعه حصلت في مدرسه من اشهر مدارس اللغات في مصر
مدرسه انترناشيونال 
فيها امريكان واي جي وابيتور  يعني كل حاجه فيها 
  

في القسم الابتدائي كانت الحادثه 
المدرسين يدخلوا الكلاس يلاقوا كل الكلاس بياكلوا بيتزا 
تاني يوم يلاقوا نفس الكلاس بياكلوا سندوتشات فراخ بانيه 
طبعا الطلبات من كافتيريا المدرسه اللي متاجره من المدرسه 
تعرفوا بكام  حقول بس بليز من غير ماتتخضوا 
اوعي حد يغمن عليه ويقولوا ليلي السبب
هاتوا كولونيا تفوقكم 
والا اقولكم احسن حاجه للاغماء هو البصل 
مليون جنيه ايوه 1000000 جنيه 
عشان بس لو ماعرفتوش تقروا الحروف اقروا الارقام 
ماعلينا  فضلوا المدرسين ملاحظين كده كذا يوم 
سالوا البنات هو في ايه كلكم بتاكلو زي بعض يوميا 
عرفوا ان في تلميذه معاهم هي اللي بتعزمهم كل يوم 
تخيلوا كلاس فيه مش اقل من 20 تلميذه كل يوم يختاروا حاجه موحده 
ووحده اللي تدفع الفاتوره 
البنت اللي بتدفع كان موبيلها بلاك بري 
كانت بتبعت   BBM
وتقول اذا في حد محتاج فلوس يجيلي
طبعا اطفال وكبار كانوا بيروحوا ياخده منها فلوس 
المدرسين راحوا الاداره وحكوا اللي بيحصل
بما ان اداره المدرسه كانت حازمه وماعندهاش لا تدلع ولا تطبطب 
سالت الكافتيريا مين اللي بيدفع الطلبات اللي بتروح للكلاس 
قالوا ان فلانه ادتنا 10000 ايوه عشر الاف جنيه
وقالت ده للطلبات  اللي حنطلبها في الكلاس
استدعت ولي أمر التلميذه
وكانت مامتها  ,, طبعا الست فوجئت باللي حصل 
وكان لازم تعرف البنت بتجيب الفلوس منين 
عرفت انها بتسرق الذهب منها والشغاله تبيعوا ويتقاسموا 
وبما ان الام منفصله عن الاب وشغلها واخد كل وقتها 
لا حست بالذهب اللي اتسرق ولا اصلا في دماغها  ان عندها طفله محتاجه لوجودها
ده بيورينا ان في ستات كتير بيخلفوا ويرموا ولادهم مش في بالهم 
في الوقت اللي فيه غيرهم حيموتوا علي ضفر عيل ومش لقينه
البنت لما مالقتش اهتمام من البيت بيها دورت عليه بره 
ممكن تكون الشغاله هي اللي سبب الكارثه 
قالتلها هاتي حاجه نبيعها وانتي النص وانا النص 
وتصرفي الفلوس في المدرسه 
لاني مش مقتنعه ان دي تكون فكره البنت  
دي طفله في ابتدائي تفكرها حتي لو اجرامي ما يوصلش لكده
ممكن تسرق قلم برايه توكه شعر من زميلتها 
ده مؤشر خطير يضاف للي بيحصل 
الاب والام مسافرين وسايبن الاولاد عند جدتهم 
جدتهم ست كبيره ولا من جيلهم ولا بتعرف تتفاهم معاهم 
او سيبنهم مع الشغاله المقيمه 
كل اللي بيعملوه انهم يبعتولهم فلوس 
وفلوس كتير ومرات بتكون  النتيجه الولد يشم او يتعاطي مخدرات 
والبنت يضحك عليها شاب صايع بحجه الجواز بعد التخرج
ودكاتره امراض النساء اللي مالهمش ضمير علي قفه مين يشيل 
----
او الاب مسافر يلم الفلوس وسايب الام تحوشله وتفكر وتدبر
وكل الحمل عليها 
مش بنكر ان في يتقدر علي التربيه وتدبق وتحوش وممكن كمان تكون موظفه 
انما كام وحده  
بجد لازم وقفه من الاهل عشان يراجعوا حسابتهم من تاني 
يعني المحتاج يشتغل ولما ربنا يسهله يرجع لبيته واولاده ومراته 
انما في يقولوا هل من مزيد خلاص اخر سنه وراجع 
ولما تجي اخر سنه نمدها سنه كمان ويفضل يمد الي مالا نهايه 
بجد بيصعب عليه جدا الابناء المحرومين من الرعايه 
لا اب ينصح ولا ام توجه والحكايه كلها سداح مداح 
كمان في اباء وامهات عايشين مع اولادهم بس كانهم مش موجودين 
مكبرين الجمجمه علي الاخر ,, المهم الشكل لاالاجتماعي 
الاولاد في مدارس لغات او جامعات خاصه  
وممكن العربيه بالسواق للاولاد الصغيرين 
الكبار لهم عربيات خاصه
وكفي الله المؤمنين شر القتال 
يعني حيعملوا ايه اكتر من كده 
مره وانا في النادي سمعت بنت صغيره حوالي 15 سنه 
بتحكي لصاحبتها وبتقول 
من يومين لما رحت مع صحبي الديسكو تعرفوا شفت مين ؟
قالولها مين ؟
قالت شفت مامي دخلت الديسكو مع صاحبها 
والله ده حصل شفتوا الانهيار الاجتماعي 
اه خليك اسبور ياحبوب
كمان بشوف بنات 14و 15 سنه لوقت متاخر في الشارع او في كافيه 
بستغرب دول اهلهم فين سايبنهم مع شباب لوقت متاخر
لما بيروحوا مش بيسالوهم كنتوا فين  ؟ اتاخرتوا ليه  ؟
ناهيكم عن لبسهم حاجات غريبه  اقل وصف ليها انها مقرفه 
ومنظر كمان بيستفذني  البنات اللي بيشيشوا 
خلاص اصل الكيف حبك 
يابت يامفعوصه ياللي لسه زي مابيقلوا ماطلعتيش من البيضه 
بتشيشي   باماره ايه انك عرفتي تخرجي من البيت لوحدك 
نهار اسود هي الدنيا حصل فيها ايه 
واحنا صغيرين امي الله يرحمها كانت بتسالنا 
ها ودتوا مصروفك فين  نقول  علي طول صرفنا في ايه 
وكانت تقولنا اللي حيحوش جزء من مصروفه حتدينه قده  بتحفذنا اننا نحوش
الاهل مش بيسالوا عن اي حاجه يودوا المدارس والدروس  الخصوصيه 
واذا في تمرين في النادي ويوم الاجازه يروحوا النادي او يخرجوا مع اصحابهم 
حيعملوا ايه بقي حيقطعوا روحهم 
معليش بقي انا اصلي زي ما اصحابي بيقولولي اني متخلفه
ومقفله ومش ماشيه علي الموضه
مش مودرن يعني 
بس انا سعيده بحالي ومحافظتي علي القيم والاصول اللي اتعلمتها 
يغور زمن العولمه 
خلينا زي ما احنا  ,, عارفه الفضفضه  تبعي النهارده مش حتعجب كتير من قرائي 
خلاص حرجع تاني في المقال الجاي للسياسه 
بجد والله وحشتني السياسه ووجع القلب 
وا وعوا اوعوا تقلبوا الصفحه 
ابقوا معي





هناك تعليق واحد:

Unknown يقول...

طيب انا بقى مش دكتور ولا حتى محصل تمرجى واقولك العيب فين يا ناصحه العيب مش فى الفعل نفسه ولا الفاعل ولكن العيب فى منظومه تربويه كامله تبدا من القمه للقاعده فقمة الهرم القياده والقياده منغمسه فى ملذاتها وشهوات بطانتها وننزل الى مادون البطانه الجزء الاوسط من الهرم المنفذ لامر القمه راى القمه منغمسه فجاراهم وناتى للقاعده وهى الاكثريه تاهت ما بين ما تحب وما تريد ومن اهم ما تاه منهم الحياء والامانه والصدق وكل خلق طيب حتى الشهامه والرجوله ونكرات الذات وما ادراك ما قيمة ما تاه انها حياة جيل سقط بين براثن الممنوع المتاح والمرغوب المتوفر وبعد لست دكتةرا ولا حكيما فى القصر العينى ولكنى ساظل جحا والجدع يقول غير كده ابطحه بشومه