4‏/5‏/2012

جمعه البطيخ

أعزائي 
حزينه جدا علي مصر واللي بيحصلها 
كل يوم جمعه مليونيه جديده 
بيوقفوا حال البلد وبيمزقوا مصر 
كنت في حديث مع قريبتي اللي عايشه في دبي 
اللي شاركتني في مقالين بعد الثوره 
ومسميه نفسها اللهو الخفي 
اكيد قرائي القدام حيفتكروها 
هي مهمومه جدا وحزينه علي مصر 
الحديث كان بينا واحنا بنشوف اللي بيحصل في العباسيه 
 وبنشوف جمعه الزحف 
او مليونيه الزحف 
اللهو الخفي صححت الاسم وقالت دي
جمعه الويل والعذاب والتكسير والحريق 
مش فاهمين اي زحف بيقصدوه  اعتقد كفايه بقي مليونيات
النهارده كل بيت في مصر او بالاحري كل مصري حزين علي 
اللي حصل في العباسيه 
كان ليه  هما فاكرين ان العسكر دول فرد واحد 
حيقتحموا وزاره الدفاع ويخلعوه ويسلم السلطه 
والشعب بكده اخدالسلطه 
احنا لا كنا ولا حنكون مع الحكم العسكري
لو الجيش سلم السلطه  حيسلمها ل مين ؟
سلطه من الشعب برضه الشعب حيعمل مليونيه ويعارض 
ويقول فلان مش عايزينه لا عايزين علان وبلاش ترتان 
الشعب المصري باين ادمن المليونيات 
نرجع تاني لو الجيش سلم السلطه 
ومافيش شرطه في البلد 
النتيجه ان البلطجيه حيطلعوا بيوتنا يسرقونا ويقتلونا 
ويستبيحوا حرماتنا في الشوارع 
ده يرضي مين ؟
خلاص كلها شهرين والرئيس الجديد يمسك البلد 
نستحمل العسكر وعلي رأي جدتي لما بتقول
نص العمي ولا العمي كله 
المليونيات الاولي ايام الثوره كانت  ماشيه في خط سير سليم 
انما حاليا مش عارفين نسميها ايه 
تعرفوا ياساده ياكرام اسعار البلطجيه اللي في المليونيات كام ؟
ماهو البلطجيه لهم سعر خدوا عندكم 
راشق الحجاره 200 جنيه في اليوم 
حامل المولوتوف 2000 جنيه في اليوم 
حامل الالي 3000 جنيه في اليوم 
بفكر بما اني بعرف انشن كويس  اني اخدلي مليونيتين تلاته 
كل جمعه 3000 جنيه  يابلاش 
بس حموت مين  المصري اخويا 
وبرضه العسكر مصريين زينا بالظبط 
اللي حصل النهارده في العباسيه كان مسخره بجد 
والجيش مالقاش طريقه الا العين الحمرا 
ونزل الصاعقه والطيارات والدبابات  
البلطجيه جريوا واستخبوا زي الفيران في الجحور 
وبعدها قفلوا ميدان العباسيه وكان في حظر تجوال من 11 مساء ل7 صباحا 
في الميدان 
قريبتي فكرتني  بجورج كولوني 
اللي اعتقل في امريكا هو ووالده 
لانه نزل عن الخط الاحمر وقرب من خط الخطر  
ناس فاهمه ايه معني التظاهر وايه معني سلميه 
ياريت احنا كمان نفهم معني سلميه 
---
ليه مافكروش يعملوا مليونيات بس تفيد البلد وممكن نسميها جمعه كذا 
زي ايه يا ساده ياكرام 
--
جمعه العلاج 
------
ينزل الاطباء للتحرير  ويقدموا العلاج للفقرا بلا مقابل  
والساده الصيادله اللي يقدر منهم  يصرف ادويه حيبقي خير وبركه
وحيعرفوا ينظموها مش بينظموا المليونيات 
--
جمعه التعليم 
-----
ينزل المدرسين ويشرحوا الدروس الصعبه لتلاميذ المدارس بالمجان
وكمان غير المدرسين يشاركوا فيها 
ممكن يتقسموا مجموعات قبل الجمعه ويزوروا مدارس اللغات 
يسالوا الاداره اذا في دسكات  قديمه  او مكسره مستغنين عنها 
ياخدوها ويصلحوها ويوزعوها علي مدارس الحكومه 
وممكن يشارك القادرين بانهم يشتروا ترابيزات وكراسي للمدارس الفقيره 

 --


جمعه السياحه 
-----

دي ممكن تكون علي النت  البهوات اللي بيعرفوا لغات وبيقعدوا طول اليوم 
يعملوا شات مع الصبايا الحسان والعواجيز المتصابين 
يقرولهم كام مقال  عن كنوز مصر السياحيه 
ويعملوا برضه شات ويشرحوا للاجانب عندنا ايه في مصر 
--
جمعه العمل والانتاج
-----
يروحوا شغلهم يوم الجمعه ويشتغلوا بلا مقابل ويزودا الانتاج يوم 
ويبقي يوم في حب مصر 
--
جمعه اطعام الفقير 
-----
لو كل واحد عمل حله كشري او خدله كام سندوتش فول وطعميه 
وراح التحرير  اكل الفقراء مش حيكون احسن من المليونيات 
اللي مالهاش فايده اقلها يبقي اطعم فقير
والساده مرشحي الرئاسه مش برضه كانوا بيدفعوا تمن التوكيلات 
كانوا اتبرعوا بيها مدام ماتعبوش فيها وكلها تمويلات لمعالي الرؤساء
--
جمعه النظافه 
-----
الشباب ينزل ينضف الشوارع  بدل ما بيطلطع في التحرير والعباسيه 
علي الاقل البلد حتنضف من اكوام الزباله المتلتله 
-- 
وفي حاجات تانيه كتير ممكن يعملوها كل جمعه
والله انا وقريبتي مش بنحلم 
حتي لو بنحلم  املنا ان حلمنا يبقي حقيقه 
وبنهدي الصوره دي لكل مصري 

 

اخر حاجه حقولها النهارده

ان في برنامج في القناه الاولي  اسمه 
من هو الرئيس ؟
بيقدمه  الاعلامي القدير طارق حبيب
سؤال بيساله لكل المرشحين كلا علي حده 
ويجاوبوا 
النهارده كان السؤال عن تطوير التعليم والبحث العلمي 
بيذاع يوميا الساعه 8 مساء بتوقيت القاهره 
ويعاد الساعه الواحده ظهرا بتوقيت القاهره ايضا 
في اليوم التالي 
عارفه ان في كتير النهارده مش حيعجبهم المقال 
حيقولوا ايه الكلام العبيط ده 
بس برضه حقولكم 
واوعوا اوعوا تقلبوا الصفحه 
ابقوا معي 




 
 
 

هناك 5 تعليقات:

فيجو يقول...

انا معاكى فى كل كلمة كتبتيها على قد ما الواحد قرفان من سياسة المجلس العسكرى انما كان منظر شنيع لما الاقى جنود مصر بيترموا بالمولوتوف امال نعمل ايه مع اليهود نهدا شوية وايمانا بربنا يزيد واكيد ربنا هيهدى البلد دى لاحسن حال لانها فعلا المحروسةةةةةةةةةةةة

غير معرف يقول...

لولا واللهو الخفي
عملتوا دويتو مع بعض بس زي مابشوف ان عندكم حق تحلموا وتفصلوا شعب جديد يا بناتي الاعزاء انتوا فاكرين انكم عايشين في المدينه الفاضله الثوره خلت ناس كتير مننا يطمعوا في مصر وكل واحد لسان حاله يقول اشمعني انا ما لو قدرت اغرف واخد اللي اقدر عليه ليه لا ؟
يابناتي المنظر فعلا كان وحش جدا واحنا بنضرب جيشنا انتوا بتسافروا وعارفين ان اللي بيحصل يباثر علي منظرنا مع الاجانب اتبنوا الحمله اللي عايزينها وممكن تكون تحت اسم اقترحه وهو (يوم نحب بعض )وانا معاكم انشروا حملتكم علي الفيس بوك وربنا يوفقكم وبطلي يا لهو ياخفي شغل البطيخ عارف ان اسم المقال ده انتي اللي اقترحتيه معاكم يابناتي علي طول الخط ,
كل الحب ل اللهو الخفي ولولا الغاليه
دكتور مهندس احمد الجمال

غير معرف يقول...

السلام عليكم
بمناسبة إني باحب البطيخ ،، وبقالي كام سنة مش عارف آكل بطيخ زي الناس ،، المحصول كان سيء جدا في السنوات الأخيرة ،، فياريت فعلا نعمل مليونية نسميها جمعة البطيخ ،، أنا أناشد أهل الزراعة ينزلوا في مليونية ويطالبوا بمنتج زراعي خالي من الكيماويات اللي نشرت السرطان وتليف الكبد وضياع الكلى عند كثير من المصريين ،، عاوزين ناكل عود خضار زي الناس ،، أو صباع خيار مايكونش مايع ومليان مية ،، عاوزين خوخ بجد ومشمش بجد ومانجة بجد ،، وطبعا أكيد نفسي في بطيخة بجد زي اللي كان بيشتريها أبويا زمان وشايلها وهو راجع البيت ،، ولما نفتحها نلاقيها ناشفة ومرملة ،، مش فاضية من النص ومليانة مية وبلا طعم ،، نفسي أرجع أكل فيك لقمة حلوة يامصر ،، نفسي أدخل أي مطعم وأنا مطمئن إني مش هانهق بعد الغدا ،، نفسي أشرب كوباية مية نظيفة وأنا مش مرعوب على الكلى ومعدتي ومن غير مايجيني إسهال ،، نفسي ترجعي تاني مصر يامصر ...
ليلى العزيزة
يسقط حكم الظالمين ،، ولتحيا مليونية البطيخ ....
تحياتي عزيزتي
حكيم عقول

ابو روتا يقول...

للاسف فى وقت الصوت العالي تتووه اصوات العاقلين ولايبقى الا المنتفعين من الغوغائية والضوضاء بلا عقل

Übersiedlung Wien يقول...

بالتوووووووووفيق