أعزائي
احنا حاليا في فتره العد التنازلي لانتخابات الرئاسه
والسؤال اللي اي حد بيساله هو
ناوي تنتخب مين ؟
ده لما تقابل حد ممكن يكون السؤال قبل مايسلم عليك
لان الدعايات المكثقفه باين جابت نتيجه عكسيه
وده اللي مخليني لحد دلوقتي مش قادره ولا عارفه ممكن انتخب مين
بصراحه خايفه اني اغلط غلطتي الاولي لما انتخب حزب الحريه والعداله
اللي هو الاخوان في انتخابات المجلس الموقر
كنت بصراحه عجبني ادائهم وتنظمهم في فتره الثورة
كان شباب الاخوان بينظم المرور لان الشرطه كانت هربانه ولبده في الدره
وبيامنونا بالليل واحنا نايمين يعني من الاخر اتخدعت زي ماغيري اتخدع
خايفه انتخب واحد والقيه بعد كده مش قد المسئوليه
وكرسي الرياسه بتاعه مش كرسي تيفال يعني حيلزق فيه
كنت شايفه ان ابو الفتوح احسن الوحشين
بس بعد المناظره اللي كانت بينه وبين عمرو موسي
بجد اتصدمت فيه لا عجبني اجاباته ولا هجومه
الايام اللي فاتت كنت بركب تاكسيات
عايزه اعرف الناس حتنتخب ازاي وايه افكارهم
ولما تبقي عايز تلم معلومات عليك بسواقين التاكسي
وصفه مضمونه دي اجمد من سندوتشات الجبنه الرومي
اللي في كافتيريا كليه اداب عين شمس
طبعا انا عامله اني هبله وعبيطه ومش بفهم في اي حاجه
واول ما اركب اقوله انت حتنتخب مين يا اسطي واسيبه يسمعني
وقبل ما انزل السواق بيوصوني اني انتخب مرشحه السوبرمان
واللي حيعدل المايله
اغلبهم منقسمين بين شفيق ياراجل او الاسم الحركي له شفيق بلوفر
وعمرو موسي
---
بيقولوا عن شفيق ياراجل
انه طيار وراجل عسكري
حارب في 73 وانه هو اللي حيقدر يقود البلد لانه محنك
وحيقدر يظبط البلد ويقضي علي البلطجيه ويعيد الامن
وكمان بيستشهدوا بمطار القاهره
واحد قالي ده المطار بقي ابهه بعد ماكان خرابه
---
اما عمرو موسي
فده دبلوماسي ويعرف يتعامل مع امريكا كويس ويوقفهم عند حدهم
وراجل مخابرات من الدرجه الاولي
مش عارفه الكلام ده جابوه منين
وله اصدقاء في كل العالم ولو حصلت مشكله لا قدرالله لمصر
حيحلوها معاه
سواق منهم قالي اصل عمرو موسي صاحب كاريزما
طبعا استعبطت وسالته يعني ايه كاريزما دي اللي بتقول عليها
قالي يعني راجل ملو هدومه واللي يقف قدامه يخاف منه
رديت عليه وقلتله اه يعني قيمه وسيما
قالي الله ينور
وده حيخلي العالم كله يخاف ويعمله الف حساب
----
غيرهم قالوا الدكتور ابو الفتوح
راجل دكتور وبيفهم وحيعملنا العلاج المجاني
قال يعني كل مشاكلنا بقت طبيه
---
اما اللي قالوا محمد مرسي
رايهم ان الشعب نسي دينه وهو اللي حيفكرنا بالدين اللي نسيناه
---
اما اللي قال حمدين صباحي
شايفين انه يقدر يحكم لان سنه صغيره وعشان بينزل للشعب
في الشوارع يبقي بعد كده حيمشي في الشارع
ونقدر نقوله اللي مزعلنا ويحل مشاكلنا
فاكرين انه ممكن بعد مايبقي رئيس ينزل من غير حراسه ويقعد معاهم غلي القهوه
---
خالد علي
واحد او اتنين اللي اتكلم عليه
وقالوا اصله دم جديد في مصر
ولما سالت يعني ايه دم جديد
قالوا يعني لسه طازه بشوكه
---
وانا في الاشارة وطولت كالعاده
وحده ست بتبيع علب مناديل للعربيات
كانت بتتشاكل مع حد في عربيه قدامي
لما وقفت جنبي قالتلي من غير ما اسالها
بيسالني حنتخب مين قلتله عمرو موسي
قالي ده فلول حتنتخبيه تبقي فلول زيه
قلتله فلول فلول حنتخبه
سالتها طيب حتنتخبيه ليه
قالتلي لانه حيعرف يمسك البلد وينضفها
عاجبك اللي احنا فيه ده ؟
بتقصد عن الانفلات الامني
وعشان يعدل البلد
قلتلها خلاص مدام شايفه كده يبقي عالبركه
----
دي عينه من اللي قابلتهم لمده 10 ايام وسالتهم
ليه قريبه عايشه بقا لها 20 سنه في امريكا وهي منتقبه
كانت بتكلم مامتها قبل الانتخابات اللي كانت من كام يوم في امريكا
وكانت بتقول انها حتنتخب ابوالفتوح او مرسي
عشان دول اسلاميين واحنا عايزين حد اسلامي يمسك البلد
مامتها قعدت تقنعها انها تشوف الاصلح مش شرط انه يكون اسلامي
وبرضه مافيش فايده
فوجئت بان مامتها بتكلمني وبتقولي ان بنتها وحفيدتها انتخبوا
وكلموها بعد ماخلصوا
قلتلها ها وانتخبوا مين ؟
مرسي والا ابو الفتوح
ردت عليه وقالتلي مش حتصدقي الاتنين انتخبوا عمرو موسي
طبعا كانت مفأجاه سالتها ازاي
قالتلي مش قلتيلي انتخب الاصلح لمصر انتخبت
وعلي فكره كل اللي اعرفهم ومقيمين في امريكا
انتخبوا عمرو موسي !
ده يخليني اطرح سؤال مهم
هل له شعبيه جامده هناك ؟
والا الدعايه هي اللي عملت كده ؟
والا في تدخل من امريكا ؟
----
شايفه ان راجل الشارع البسيط حيران مش عارف ينتخب مين
الدعايه الانتخابيه جامده بالاضافه للاعلام والمناظرات
واغلب الشعب المصري ان لم يكن اكثرهم
عاطفيين بيحكموا بقلبهم
يعني ممكن يختاروا غلط
ناهيكم عن الاميين دول حيقوللهم انتخب رمز كذا حينفذ
ممكن التنفيذ ده يبقي تنفيذ عاطفي بمعني انه صدق اي كلام وخلاص
او يكون بعد ازازتين الزيت وكيلو السكر وباكو الشاي
او علي الاكثر بطانييه
ربنا يستر
---
بفكر انتخب الراقصه والممثله هياتم اللي اشاعوا انها حتترشح
او انتخب المطرب الشعبي سعد الصغير
خلينا نفرفش شويتين هي ترقص وهو يغني ونعيش بقي معاهم
وبكده ابقي ابطلت صوتي وضمنت انه مش حيتزور
ربنا يوفقنا جميعا في الاختيار السليم
وللحديث بقيه بعد ما اروح الانتخابات واكتبلكم علي اللي شفته
واوعوا اوعوا تقلبوا الصفحه
ابقوا معي
هناك تعليق واحد:
السلام عليكم ليلى العزيزة
أنت عارفة إني دايما أقول على أسلوبك في الكتابة إنه بيعجبني لأنه عملي وأسلوب إيقاعه سريع يعني بوضوح مش ممل ،، بالإضافة إلى أنه يمتزج بخفة روح وحس فكاهي ..
نخش في الموضوع ونبدأ المعركة هههههههه
شوفي ياستي
أنا احترت في الاختيار زي كل المصريين ،، وكنت باختار بين ثلاثة مرسي وأبو الفتوح وحمدين .. المهم سمعتهم كلهم وبتركيز شديد واقتنعت من وجهة نظري بمشروع الإخوان ،، واقتنعت أكثر بمرسي كرجل واعي وفاهم وعنده سرعة تلبية للأسئلة المفاجئة ورد فعل جيد ،،بالإضافة إلى عفة لسان فلم يهاجم أي مرشح أبدأ ،، وكان كل تركيزه في توضيح برنامجه فقط ،، هذا مارأيته أنا وليس بالضرورة أن يرى غيري مثلي فالرؤى والآراء تختلف وعلينا احترام ذلك ...
وأنا لم أشعر لحظة أن الإخوان خدعوني ولم أندم أبدأ على اختياري لهم في انتخابات البرلمان ،، لكني أحزن عندما يتراجع أي حد عن تأييده لهم انسياقا وراء حملة الإعلام المسعورة ،، وكلنا نعرف الإعلاميين على الساحة حاليا ،، وكلنا اتهمناهم بالنفاق بعد الثورة ،، يبقى لما يهاجموا الإخوان الآن أربعة وعشرين ساعة ليل ونهار وعلى كل البرامج يبقى مش لازم أسلمهم عقلي أبدا وهم الكاذبون والمنافقون تأكيدا ...
وكلام حضرتك إن مرسي قال إنه جاي يفكرنا بديننا ،، فأقول لك إن من نقل لك هذا الكلام غير دقيق ،، لأني تابعت كل حملاته الانتخابية في كل المحافظات ،، لم يتكلم الرجل في موضوع الدين إطلاقا ،، وكل كلامه كان عن مشروع النهضة وبرنامجه الانتخابي ....
أما موضوع سواقين التاكسي وبياعة المناديل ،، قال لي صديق في مصر كان بيعمل عمرة هنا الأسبوع الماضي وهو له أقارب في أمن الدولة ،، أنهم بيجندوا كل الباعة الجائلين وسائقي التاكسي للترويج لشفيق بالذات ،، ورجال الحزب الوطني على الجانب الآخر بيروجوا لعمرو موسى ،، يبقى مش لازم ننخدع بالكلام الفاضي ده ...
من الآخر كده
فرص أبو الفتوح كبيرة في دخول الإعادة ،، لكن السؤال من اللي هايعيد معاه
أنا خلاص انتخبت مرسي من يومين ..
ورربما لن ينجح ،، لكن يبقى أنني لم أسمع لكلام الإعلام أبدا ،، بل على العكس إن هجوم الإعلام الفاسد أصلا والمنافق دائما على الإخوان يعني أنهم على الطريق الصحيح ..
تحياتي لك ليلى العزيزة .. وبالتوفيق لمصر ..
حكيم عقول
إرسال تعليق