12‏/3‏/2012

حنفي كلمته نزلت الارض

أعزائي
كنت ساكته وبسمع وبشوف برامج التوك شو 
اللي كانوا بيرغوا كتير علي قضيه التمويل الاجنبي 
بيقولوا ان ده انتهاك للسياده الوطنيه 
انا بقول دي صفقه مش اكتر 
بس الظاهر الحبل فرط من ايديهم وماعرفوش يلموه 
امبارح قعدت اتفرج علي جلسه مجلس الشعب 
والله كانت مسخرة بكل المقايس 
النواب بيتخانقوا مع الكتاتني 
علي فكره اختي لما بنجيب سيره المجلس بتقول 
مجلس كنتاكي  ومش بتغير الاسم ابدا 
نرجع للمجلس الموقر  
النواب كانوا معترضين علي ان الجنزوري بعت اعتذار عن الحضور 
نائب قال هو بيستهتر بالمجلس في الجلسات المهمه 
زي ماكان نظيف بيعمل 
نظام الكتاتني كل اللي يتكلم ويطول عن دقيقتين 
يقفلوا المايك عليه وبرضه النواب يكملوا بصوت عالي
دقيقتين بصراحه مش كفايه عشان ابداء رأي 
وكلمته الشهيره اجلس اجلس لكل نائب لو اعترض
بصراحه بحس انهم مش نواب  انما تلاميذ مدرسه ابتدائي وهو المدرس
امبارح طرد واحد  .فعلا حسيت انه مدرس وواحد من التلاميذ
 عمل دوشه فحرمه من استكمال الحصه 
خلينا في القضيه 
وزير العدل المستشار عادل عبدالحميد 
قال انه لا يتدخل في شئون القضاء
ومهمته تنفيذيه 
وزيرعلي ماتفرج والا ايه ؟
---
بعده كان وزير الطيران 
مهندس حسين مسعود وده كان من النظام السابق 
كان بيشغل  منصب رئيس مجلس اداره الشركه القابضه 
لمصرللطيران 
قال ان الطياره اخدت  تصريح دخول وهبوط من برج المراقبه 
وانها جايه لمهمه حكوميه والطياره مدنيه وليست عسكرية 
ومملوكه للخارجية الامريكية 
وكان الكروه مكون من 2 طيارين و2 مضيفين 
وتسع 32 راكب 
ولما سالوا الكابتن  عن الركاب 
قال انه جه ينقل مجموعه لا يعلم عددها  ولا جنسيتها 
الوزير قال انه نقل افراد لاحكوميين ولا رسميين 
وعشان هي مش في مهمه حكوميه وحتنقل افراد 
الزموهم بالغرامه اللي هي من 10000 جنيه ل 50000 جنيه 
وطبقت عليهم اقصي غرامه 50000 جنيه 
افتكر ان ده مبلغ تافه جدا عند امريكا 
وغادر الركاب الي  مطارلارناكا في قبرص  
والكروه باتوا علي الطياره ولم يسمح لهم بالدخول 
ووزاره الطيران مش الجهه المعنيه بسفرهم او منعهم 
---- 
اما الوزيره فايزه ابو النجا 
وزيره التخطيط والتعاون الدولي 
حديثها كان ممل وطويل واول حاجه قالتها 
انها بتتشرف بادارتها الوزارة 
هي برضه من ايام المخلوع الله ياخده 
لدرجه ان الكتاتني قالها ما معناه انجزي  
كانت بتقول تاريخ قديم وممل ومعاد
وكل اللي فيها ان الوزاره بتاخد معونه 
كبروها وصغروها وكلام فارغ وخلاص 
---
اما الوزيره نجوي خليل 
وزيره التامينات والشئون الاجتماعيه 
اللي رفضت انها تطلع تتكلم علي المنصه 
وقالت انا حتكلم من مكاني هنا وسط احبابي 
كان جنبها الوزراء  مش حتحب الاعضاء طبعا 
هنأت وشكرت المجلس 
وقالت انه مجلس الانتخابات الحرة 
وان الحكومه ادت ماعليها وجميع من اختيروا للوزاره 
كان ادائهم متميز وبيتبنوا كل وجهات النظر 
والجمعيات اخدوا توصيات منهم جمعيه السنه المحمدية 
وان التاريخ سيكتب الكثير عنهم 
ومنتظرين هذا التاريخ  
وانها باحثه للجمعيات الاهليه
بالله عليكم ده كلام وزيره مسئوله 
---
انا شايفه ان الوزراء جايين يستهينوا بالنواب 
وكل واحد بيقول انا وماليش دعوه بحد تاني نسيوا ان المسئوليه متضامنه 
وطبعا لا بيستجيبوا للنواب ولا حيستجيبوا 
اولا الطياره نزلت قبل الحكم يبقي الحكم معروف مقدما 
نقول بقي كانت صفقه بالنسبه للدوله 
وصفعه بالنسبه للشعب وكانت علي القفا 
طيب المحكمه ممكن تستدعيهم  ؟ولو ممكن ياتري حيجوا ؟
عاملين زي المثل القديم اللي بيقول 
ابني علي كتفي بدل ما اروح ادور عليه 
الحكومه لم تجاوب بس حارت ودارت واي كلام وخلاص 
القضاء اهتز قدامنا دي مافيهاش كلام 
المستشار محمد شكري رئيس محكمه جنايات القاهرة 
ليه اتنحي عن نظرالقضيه ؟
طبعا الاجابه معروفه مش عايزه ذكاء 
والمستشار مجدي عبدالباري  الرئيس بمحكمه استئناف القاهره 
سمح للمتهمين بالسفر كانت التعليمات من مين ؟
اذا كانت من المستشار عبدالمعز ابراهيم رئيس محكمه استئناف القاهرة 
يبقي برضه نفس السؤال التعليمات جاتله من مين ؟
اي جهه سياديه  املت تعليماتها عليه ؟
قريت حاجه  عن الصفقه او الصفعه 
وهي اقرب للواقع الا وهي 
موافقه امريكا علي تصدير وتوفير قطع غيار للاسلحة 
المملوكه للقوات المسلحة .. امريكا كانت بتماطل 
وكمان تصدر  لنا اسلحه  حديثه امريكيه الصنع 
تتعلق بالسلاح الجوي 
ومساعده امريكا لنحصل علي قروض ميسرة 
من صندوق النقد الدولي بمقدار 3.4 مليار دولار 
وتضغط علي السعوديه والامارات لتوفير المعونات 
دي صفعه الشعب المصري اللي نزلت علي قفاه 
كان لازم اسال محامي عشان اعرف ايه عقوبه اللي حصل 
سالت محامي صديق من زمان وموجود علي الفيس بوك 
اسمه نادر العسال 
قالي ان اداره مكان بدون ترخيص جنحه 
العقوبه فيها غرامه او الحبس 6 شهور 
وغلق المكان 
اللي طبعا مالوش ترخيص 
ومافيش ماده في القانون تدين 
ممكن بس يتحبسوا احتياطي وده اللي حصل 
وبكده تبقي القضيه كلها فشنك واحنا برضه اخدنا علي قفانا 
بس السؤال ليه تشويه القضاء المصري قدام العالم بالصوره البشعه دي ؟
ده بيصب في مصلحه مين ؟
لما عرفت ان الاجانب سافروا بعد الضجه اللي حصلت 
افتكرت عبدالفتاح القصري في فيلم ابن حميدو 
لما بيصمم علي حاجه ويقول كلمتي ماتنزلش الارض ابدا
مراته  القويه تقوله حنفي 
يرد ويقول المره دي تنزل 
نفسي قبل ما اموت  اشوف 
 حكومه لا تقبل وصايه المجلس العسكري
عايزين نعرف مين الجهه السياديه 
ياتري هو في غير المجلس العسكري ؟
واوعوا اوعوا تقلبوا الصفحة 
ابقوا معي 
















 

هناك تعليقان (2):

غير معرف يقول...

أسعد الله أوقاتك ليلى ...
أنا طبعا شفت جزء كبير من جلسة مجلس الشعب ولي عدة ملاحظات تخالف رأيك شوية ( شوية بس مش كتير ) أولا أنا مش مع النواب اللي بيهاجموا الوزراء عمال على بطال وبدون وعي وبدون فهم،، وأنا متأكد إن بعضهم بيصرخ بس علشان التليفزيون بيصور وقرايبه هايشوفوه ويمكن يصقفوا له كمان في حارتهم في البلد ،، وأنا مش معاهم لأني في صف الوزراء لالا أبدا ،، لكن لأني عارف إن الوزراء دول أول ناس اتضربوا علىقفاهم يعني قبلنا كلنا وكل واحد فيهم بيتكلم وعينه مكسورة من لسعة القفا ،، ومش معقول هايقول أنا كنت طرطور وإن كل حاجة حصلت كانت بتعليمات واضحة وصريحة من المشير ،، يعني مش معقول نهاجم الناس الغلابة الكبارة ،دول برضه مننا وعلينا،، وقفاهم قفانا ،، والملاحظة التانية أنا معاك إن الكتاتني عامل زي الأستاذ مع تلاميذه ،، وبصراحة معاه حق لأن السادة الأعضاء مش مؤدبين من الآخر ،، ومايعرفوش يعني إيه أدب الحوار وثقافة الاختلاف ،، وكمان عندهم جهل حيسي ( حيسي يعني مركب ومالوش علاج ) ولا واحد فيهم عارف الفرق بين الاستجواب من طلب الإحاطة ولاأي قوانين لمجلس الشعب ، علشان كده أنا مع الكتاتني في تأديبهم وتهذيبهم ،، ويمكن لوكنت مكانه كنت استدعيت أولياء أمورهم ( ستاتهم طبعا ) ،، المهم كل سنة وأنت طيبة ،، ويارب مقالك اللي جاي يكون عنوانه ( مبروك عودة الروح يامصر ) ...
تحياتي .. المدينة المنورة..
حكيم عقول

عماد عمر الجمال يقول...

ما حدث فى هذا الموضوع مطبوخ من اساسه والهدف الاساسى منه هو توصيل رساله قويه لنواب الخيبه القويه تقول لهم فيها: امريكا انا هنا كنت وما زلت وسأكون هكذا وبإختصار شديد وطبعا تم التمرير عن طريق النظام الغارق لأذنيه بالتبعيه والدوران فى الفلك الأمريكى سواء برضاه او بدون فقد سبق السيف العزل واصبحنا مثل سمكه إذا خرجت من بحر التبعيه تموت اما نواب الخيبه فسريعا ما سيقتنعون انهم اعضاء مجلس نواب يفصل للجكومه ما تريد بقيادة الترزى المتألق الكتاتنى والناس ملهيه فى إنتخابات الرئاسه التى غطى صخبها على الدستور تماما والشعب الذى تحول من الكوره للسياسه يجلس مشدوها وهو يشاهد نوابه وهم يلهثون ليلتقطو انفاسهم إاستعدادا للصياح فى ازمه جديده يفتعلها له النظام وفلوله ولا أراكم الله مكروها فى ثورة لديكم