26‏/3‏/2012

ع العصفورية

أعزائي

مش عارفه ايه اللي بيحصل في مصر 
الشعب اتجنن والا اتهبل والا ايه الحكايه 
ياساده ياكرام  العصفوريه بلغه اهل الشام 
هي مستشفي المجانين او السرايا الصفرا 
وليه صفرا مش عارفه ؟
حمي الترشيح لرئاسة الجمهوريه بلغت اشدها عند الشعب المصري 
تعالوا كده نشوف نوعيه المرشحين لقياده مصر 
او بالاحري الكنانه او في قول آخر المحروسة 


الست هويدا ارمله  رشحت نفسها للرياسه 
والله والله سمعتها بوداني وشفتها بعنيه وكانت بتقول 
انها حتهتم بالعشوئيات والثروة الداجنه 
وشعارها كتكوت لكل مواطن 
يعني كل مواطن مصري حيمتلك كتكوت وبعدين يبيض 
ويفقص ومع مرور الايام حيملك المواطن مشروع يعيش منه 
لا وكمان ايه اكل الكتكوت حيكون ببلاش حتصرفه الحكومه 
طيب هو مش ممكن الكتكوت ده يبقي ديك مش فرخه ؟
يبقي ساعتها ايه العمل ؟
وكمان الفرخه حتبيض لوحدها بالاشعال الذاتي والا بالريموت كنترول 
مش عايزه ديك ؟
ولو الكتكوت مات  يبقي المشروع اتفركش 
ياريت  نطلب كلنا طلب جماعي ونقولها 
ياست هويدا خليهم كتكوتين لكل مواطن 
----


ده مرشح تاني راح يقدم ورق الترشيح بالشبشب 
مع ملاحظه اننا في الشتاء 
كان لبس شراب وشبشب كانت تبقي مبلوعه 
---


جاله مبارك في المنام وقاله اترشح يا احمد 
صحي من النوم راح يترشح 
---



اقولكم ده حيعمل ايه 
بس والنبي بلاش ضحك 
حيأسس حزب للمافيا والحشاشين 
يالله خلي البلد تحشش وتخرب اكتر 

ده بقي راح يتقدم علي موتوسيكل 
طالما بيقود الموتوسيكل يبقي حيعرف يقود مصر وشعبها 
علي رأي حكيم عقول صديقي ومصحح لغتي العربيه 
كتبلي علي الفيس بوك 
ان قياده مصر اسهل من قيادة الموتوسيكل 
لان قياده مصر مش محتاجه رخصه 
والله كلام معقول ياحكيم 
---

شوفتوا رئيسكم القادم
علاء سعد ممكن يكون بديل علاء مبارك 
بس مدينا منظر محترم 
---

ده بقي جاله سيدنا محمد عليه الصلاة والسلام في المنام 
وقاله اترشح  مستقل 
راح مترشح مستقل 
---

جامع لكل حاجه عسكري ومدني واسلامي 
لاول مره في تاريخ مصر 
كان ناقص يكتب تاجر وترزي 
---

دي الست بثينه كامل 
مذيعه التليفزيون المصري 
راحت تقدم ورق الترشيح بالزي البلدي وعبايه المعلمه اطاطا 
---

عم القادر الفاجر 
سمعته في برنامج تبع التوك شو 
بيقول ان هو الاقوي 
بس في ملاحظه بسيطه بعد اذن  عم سيف رئيسنا القادم 
في مثل بيتقال في مصر وهو 
جوز الاتنين ياقادر يافاجر 
تفتكروا متجوز اربعه ؟
---

ده بقي اللي حيغير اسماء كل المصريين ليكون 
عبد ........
واسماءالله الحسني حتساعنا كلنا 
وانا بحجز اسمي من دلوقتي عشان مانتشاكلش بعد كده 
انا حيبقي اسمي القادم 
عبد الشكور 
الحجزباولويه الطلبات 
---
ابو تريكه لاعب الاهلي والمنتخب

احد الاحزاب الموجوده حاليا دعت ابوتريكه للمشاركه في وضع الدستور 
واعتذر ابو تريكه تفتكروا حيدعوا مين شيكابالا 
والا  بركات وممكن جدو او خالو  او عمو 
علي فكره جدو ده لاعب كوره 
ومحمد زيدان لا ليه مش حيفهم في وضع الدستور لانه محترف بره مصر ؟
هو اساتذه القانون الدستوري في جميع كليات الحقوق 
علي مستوي الجمهوريه 
مش حيعرفوا لا يحوروا ولا يدورو في التشريع 
بس ابو تريكه حيسدد في الجون علي طول 
وحيحضر جلسات وضع الدستور  بفانله الراعي الرسمي 
لوضع الدستور  ياتري ممكن يكون موبنيل والا اتصالات وممكن فودافون 
انا بقترح يكون شيبسي لان الاطفال كلها بتحبه 
طالما انهم دعوا ابوتريكه يبقي لازم قياده من قيادات التراس 
عشان يبقي واحد من الملعب وواحد من المدرج 
ولازم يجيبوله شويه كور يمضيها عشان خاطر عيون المعجبات 
اللي حيترسوا لابو تريكه 
وعلي هذا القياس  باهيب بالحزب انه يدعو 
 الست فيفي عبده مندوبه الراقصات لوضع الدستور 
وعفاف شعيب مندوبه عن الممثلات 
وممكن شعبولا عن المطربين الشعبيين 
وبعد كل بند يقول 
واهههههه 
وحماده هلال عن المطربين الشبان علي اعتبار غني لثوره 
25 يناير واحيا حفل للاخوان في اسكندريه 
-----
والله صعبانه عليه بلدي  واللي بيحصل فيها 
ضحكوا العالم علينا 
انا كمان عايزاكم تضحكوا النكته دي ضحكتني 
اضحكوا اضحكوا قبل ما الضحك يغلي 
ونستمتع بالسيء لان الاسوا قادم
واوعوا اوعوا تقلبوا الصفحة 
ابقوا معي 

هناك تعليقان (2):

haneen nidal يقول...

حسبنا الله و نعم الوكيل الله يلطف :(

غير معرف يقول...

أسعد الله أوقاتك ليلي

الحقيقة أنا في يوم ميلادي فكرت أرشح نفسي ( الترشيح بمعنى التنقية ماتفهمنيش غلط ) والواحد لما يرشح نفسه أهو برضه جسمه هاينضف من البلاوي اللي فيه ،، وأول حاجة عاوز أنضف منها الإعلام المصري ،، نفسي على الله ولا يكتر عليه ،، أفتح عيوني مالقيش تليفزيون ولا توك شو ( اللي بقى شو من غير توك )

مش عاوز أسمع اسم عمرو أديب ولا عمرو الليثي ولا عمرو حمزاوي ولاعمرو موسى( كرهوني في اسم عمرو ) مش عاوز أشوف لميس الحديدي ولا فريدة الشوباشي ولا منى الشاذلي ولا هالة سرحان ( بالذات الأخيرة دي صدرها شكله يقرف وشفايفها محشوة تبن ) ...

مش عاوز أسمع خطب أي حد اسمه أبو لا أبو الفتوح ولا أبو إسماعيل ولا أبو جلمبو حتى ..

نفسي أفتح عيوني على بتاع الفول وهو ببنادي فوووووووووول بليلللللللة ..

نفسي أصحى الصبح أسمع ياولاد ياولاد تعالوا تعالوا وصوت أبلة فضيلة ..
وبعدها أروح أسمع إيناس جوهر في الشرق الأوسط وهي بتقول ( غمض عينيك وامشي بخفة ودلع ... ) ...
نفسي أدلع في فقرك يامصر ،، بس ماشوفش الوجوه العكرة اللي بتطلع في التوك شو دي تاني أبدا ...
ياترى ممكن يكون في مرشح للرئاسة يحقق لي الطلب البسيط ده ...

حكيم عقول