31‏/1‏/2012

هنا شيكاغو ( القاهره سابقا )

أعزائي
لقيت ان ده العنوان المناسب لما يحدث في مصر الان
بجد بقينا ولا شيكاغو في السطو المسلح والقتل
---
اليوم الثلاثاء وفي وضح النهار
اقتحمت مجموعه من 5 ملثمين مكتب بريد حلوان
واستولوا علي 150 الف جنيه
بعد ان اشهروا الاسلحه الناريه في وجوه الماره والعاملين بالمكتب
واستقلوا سيارتهم ولاذوا بالفرار
ياصلاة النبي
---
تعرض بنك HSBC
المعروف ببنك الهس بس
بالتجمع الخامس
صباح امس الاثنين لسطو من مجهولين اثناء تواجد عملاء البنك
وقد فوجئوا بهجوم ملثمين ومعهم اسلحه اليه
وطلبوا من العملاء والموظفين النوم علي الارض
كويس ان ماطلبوش منهم النوم في العسل
حتي يستطيعوا الاستيلاء علي الاموال الموجوده بالبنك
مش كتير 6 مليون
كانوا 4 يستقلون سياره شيروكي بلوحات مضروبه
واعلنت حاله الطواريء في البنوك الموجوده بالتجمع الخامس
وتم صرف العملاء والاغلاق
حتي لا يتم السطو علي اي بنك  موجود بنفس المنطقه
طيب بعدها مش حيفتحوا والا حيفضلوا خايفين وقافلين
الاغلاق مش حل
---
تعرضت يوم الاحد الماضي شركه صرافه بشرم الشيخ في السوق التجاري
لسطو مسلح بواسطه 4 ملثمين واسلحه اليه
وقد اقتحم اثنان منهم الشركه والاتنان الاخرين وقفوا ناضورجيه
وبعد السرقه واثناء خروجهم اعترض طريقهم العاملين بالسوق
فاطلقوا الاعيره الناريه بطريقه عشوائيه وتمكنوا من الهرب
وقد اسفر عن ذلك مصرع سائح فرنسي
واصابه الماني
واثنين من العاملين بالصرافه
وخدوا بس 2 مليون
ودي تاني سرقه لنفس الصرافه
باين ان شركه الصرافه مستهدفه
انا كنت مسافره اقضي كام يوم في شرم يوم الاثنين
بس خفت ياروح مابعدك روح
قلت بلاها استجمام  يجيب اجلي  بعدين اسيبكم لمين
مين يقرف فيكم  غيري صعبتوا عليه فبطلت سفر
---
سياره تابعه لشركه امانكو لنقل الاموال
قام 3 مسلحين بايقافها باطلاق النار عليها امس الاثنين
واستولوا علي 3 مليون و250 الف جنيه
وفروا هاربين
امانكو صحيح اسم علي مسمي
---
خلصنا من السطو المسلح تعالوا للقتل
اتنين مسجلين خطر وقفوا توك توك 
في قريه ( هريه رزنه ) مركز الزقازيق
طلبوا من السائق توصلهم لمكان متطرف
السائق رفض خاف ليسرقوا التوك توك
اتشاكلوا معاه فاستغاث بشاب
ولما اتدخل لفض الخلاف واحد من المسجلين ضربه بالنار
اتوفي في الحال
رجال ونساء وشباب واطفال القريه
اتلموا ومسكوا المسجلين وربطوهم في عمودين نور
وقطعوهم بالاسلحه البيضاء
كل ده كان في قريه الزعيم احمد عرابي
ياتري لو هو عايش كان حيعمل ايه ؟
حيرضي ان قانون الغابه يحكمنا ؟
---
خلاف عادي علي اولويه المرور في شارع جامعه الدول العربيه
بيحصل كتير جدا في كل الشوارع
الخلاف بين سياره ملاكي وميكروباص
سواق الميكروباص نزل وضرب سواق الملاكي بعصايه حديد
رد عليه سواق الملاكي بطلق ناري جاب اجله
ماهو كل واحد حسب علامه
فقام اهالي بولاق الدكرور بقطع شارع جامعه الدول
احتجاجا علي مقتل سواق الميكروباص
وقاموا بتكسير الكراسي الموجوده بالشارع
لايقاف السيارات وشل حركه المرور
وده خلي اصحاب المحلات التجاريه بالمنطقه تقفل محلتها
وفي مداخله تلفزيونيه اليوم مع شقيق القتيل
قال ان الشرطه جت بعد فتره وان الرجاله والشباب مامسكوش القاتل
كانوا بيتفرجوا علي اللي بيحصل
وان اللي مسكه هما الستات اللي قاعدين بيعملوا شاي في الشارع
بيقصد اللي عاملين اشغال طريق
بجد ستات جدعان  مش بيقولوا مايجيبها الا ستاتها
وقال شقيقه كمان ان الشرطه لما وصلت
ما اخدتش القاتل في البوكس اخدته في تاكسي
بيقصد ان الشرطه هربته
بس القاتل اتعرض علي النيابه النهارده الصبح
شفتوا بقي بقينا عايشين في شيكاغو
بكده حنبطل نشوف افلام الاكشن
الحقيقه بقت موجوده نشوفها وبلاش الافلام
---
فين بقي الامن والامان ؟
قانون الغابه هو اللي بيحكم
تصدقوا اني خايفه اروح اقبض بالكارت زي كل شهر
اخدلي رصاصه او مطوه
لامتي حنفضل كده ؟
ليه الاسبوع ده بالذات كترت السرقه والقتل ؟
بصراحه كل يوم بيمر بحس بالخوف اكتر من اليوم اللي قبله
مش انا  بس ده اغلب الناس بيحسوا نفس الاحساس
ربنا يسترها
---
اخر حاجه حقولها يوم انتخاب رئيس مجلس الشعب
كان يوم كوميدي حقيقي مشاكل كتير
لما طلبوا ان كل مرشح لمنصب الرئيس يتكلم 3 دقايق يعرف نفسه
والاغلبيه رفضت قالوا ان ده مش دستوري
وفي الاخر وافقوا رغم عدم دستوريته
وكان من منطلق الديمقراطيه
حسيت ان الاقليه في المجلس بتدبح القطه للاخوان
وبتقولهم نحن هنا حنعمل اللي عايزينه
----
ادعوا معايا ان ربنا يرفع مقته وغضبه عنا
ويرجعلنا مصر بلد الامن والامان
بسرعه قولوا امين
واوعوا اوعوا تقلبوا الصفحه
ابقوا معي






هناك 3 تعليقات:

غير معرف يقول...

أظن ياليلى شيكاغو فيها شرطة ،، حرام تظلمي شيكاغو وتشبيهيها بمصر ،، مصر دولة بلا شرطة ،، جهاز الشرطة جهاز غير كفء ،، بيعتمد على أبو حسن العجلاتي وأم أحمد بتاعة الشاي علشان تجيب التحريات للبهوات في مكاتبهم من غير تعب ،، ولما اهتزت صورتهم وضعفت شوكتهم بانوا على حقيقتهم ( والله تنفع أغنية ههههه )،، هنا ليس شيكاغو ،، شيكاغو فيها شرطة بتعمل اللي عليها ،، لكن هنا مصر وكفى

حكيم عقول

وحي الخاطر يقول...

طب يا ليلي ياختي انتي خفتي تروحي شرم طب انا اعمل ايه انا بقيت خايفه اجي مصر
بجد بجد بجد بيعجبني اسلوبك في طرح مشاكلنا
الي الامام دائما
وربنا يستر علي مصر بجد
انا بقيت اعرف اخبارها منك انتي اكتر
بتهوني الاخبار شويه عليا

غير معرف يقول...

استاذتى ياريت تحاولى تفكرينى كم عضو من اعضاء المنتسبين للحزب الوطنى المنحل ؟
وكم ضابط وامين شرطه خرجو من امن الدوله؟ ناهيكى عن حركه الترقيات واحاله تقريبا 700 قياده شرطيه من قبل الوزير السابق
وبالتبعيه كم بلطجى يتبع بعض المنتسبين للحزب الوطنى وكم بلطجى ورجل اعمال تابعين للمحالين للتقاعد من أمن الدوله؟؟
صدقينى انا كنت متوقع اكتر من كدا وكنت متوقع انفجارات فى اماكن سياحيه لا قدر الله وكنت متوقع فتنه طائفيه فى كل مدينه وفى كل قريه كنت متوقع زياده فى اسعار رهيبه كنت متوقع اختفاء سلع تمونييه الشعب فى امس الحاجه اليها ناهيكى عن البنزين والبتجاز الذين تستخدمهم الحكومه والمجلس العسكرى للألهاء الشعب من فتره الى اخرىوالسيطره عليهم.
كم عاطل؟ كم عشؤايه؟؟؟؟ كل ذالك قنابل موقوته وقالها مبارك صراحه اناااا ي الفوضى هاذ المخطط كان معد سلفا حتى يتم ترشيح جمال مبارك لكى يستوعب هاذه القلاقل يعنى خطه ممنهجه ناهيكى عن المنظمات التى جائها تمويل بعد الثوره ياعنى بالفلاحى كدا لما الثور بيقع بتكتر سكاكينه احمدى ربنا ان التور قوى جدا جدا ويقدر يستحمل وهايفضل يستحمل لاكن صدقينى بعد انتخاب رئيس بسنه على الكثير مصر هاتكون حاجه تانيه
هشام ابو عيـش