18‏/12‏/2010

مقارنه بين الماضي والحاضر

أعزائي
كل عام وانتم جميعا بخير بمناسبه السنه الهجريه الجديده
وادعوا انها تكون سنه سعيده علي مصر وشعبها الغلبان
الصور دي صور من الزمن الجميل اللي ماعشناش فيه
وعلي رأي عبد المنعم مدبولي
زمان زمان  الكل متهني وفرحان
بس حاليا الكل مكتئب وقرفان
تعالوا نعمل مقارنه  ونتحسر اننا ماعشناش في الزمن الجميل
----
التعليم المتميز هو الفرق بين الافراد والشعوب
التعليم زمان في مصر كان قبلة لكل العرب
الجامعات والمدارس المصريه كانت منارة للمنطقه العربيه
بنشوف اجيال قبل ثوره ناصر 52 بتدخل مدارس الحكومه
اما الفشله من التلاميذ واللي مش بيحصلوا علي درجات بيدخلوا يتعلموا في المدارس الخاصة
دلوقتي ياعيني اللي يقول انه في مدرسه حكومه  يبقي مكسوف زي ماتكون سبه او عامل عمله
مدارس الحكومه خريجيها عاطلين
الدروس الخصوصيه بقت عبء علي كل عائله لها ابناء في التعليم
الدروس من الحضانه للجامعة
والشيء المؤسف ان خريجي الجامعات المصريه لا يدرجوا في خانة الكفاءات
 بل في خانه العاطلين  والجالسين في الكفيهات .
----
كان الاقتصاد في الخمسينات والستينات  يعتمد علي القطاع العام
ولذلك الحكومه زمان طردت جميع المستثمرين الاجانب من مصر
اما الحكومه النظيفة يووووه اقصد الرشيده بتفتح الابواب وبتحضن وتتحايل
وتستجدي الاجانب باقامه مشاريع وتقدم اليهم جميع المعونات الممكنه والغير ممكنه
الدين الداخلي موجود موجود ياولدي
بعد ان كان لمصر سندات وودائع في بنوك انجلترا
نتسول القمح من امريكا
بعد ان كانت مصر قديما هي سله غذاء المنطقة
الشباب العاطل في مصر يهاجر هجرة غير شرعية
ويموت في عرض البحرطالبا الرزق
قديما كان الاجانب من ايطاليا وقبرص واليونان وغيرهم
ياتون لمصر للعمل في محلات البقالةوجرسونات المطاعم والكافتيريات
زمان كان يحضر الاجانب لافتتاح بنسيونات لان مصر كانت بلدا امنه.
زي برضه ماشفنا في روايه ميرامار لمحفوظ نوبل
الست الوزيره الهمامه وزيره القوي العاطله تستجدي وتلح وتتحايل
بلاد الخليج لعمل الفتايات المصريات بوظيفه خادمات بعد ان كانت مصر تستجلب
المربيات من انجلترا وسويسرا لتربيه الابناء وتعليمهم
كما شاهدنا في مسلسل الملك فاروق
وبعد ان كانت الطبيبات والمدرسات والممرضات المصريات
يلقوا ترحيبا من بلاد الخليج للعمل معهم .
----
الرشوة والفساد وانعدام القانون
والقانون السائد حاليا هو قانون البقاء للاقوي
والفساد اصبح من اكبر المؤسسات حتي بطاقه التموين
الغير مصرح بها لمن يتقاضي 1000 جنيه شهريا
قال يعني الالف جنيه حيعملوا حاجه في الغلاء اللي شيفينه
اما في الماضي فكان يطبق سياده القانون
---
متوسط عمر من في السلطه فوق 70 عام
واعتقد انهم سيذهبون الي البرلمان والوزرات علي كراسي متحركة
وذلك لان مصر فقدت الشباب
ولذا نجد انفسنا يامصريين في قطار السبنسة
----
حتي الفن الجميل اصبح غير موجود
فنجد الاغاني الهبابيه المعروفه بالشبابيه هي السائدة
الاصوات كلها شبيه ببعضها حتي يتعذر عليك معرفه من يغني
وكذلك في اغاني كثيره يتعذر عليك ان تعرف المغني رجل او سيده
زمان كان الرقص بالنسبه للرجال عيب
حاليا عيب جدا لو الشاب مايعرفش يرقص
ويهز اجدع من احسن رقاصة
----
زمان كان فيه وسائل مواصلات كثيره ورايقه
حاليا الوسائل بقي فيها توك توك
وزمان كان الصغير بيقوم للكبير في وسائل المواصلات
حاليا الشباب يزاحم الكبار للجلوس علي مقعد خالي .
----
المره دي حبتدي بحاليا
اغلب بنات الجامعه وعموما النساء حتي الاطفال محجبات
ياريت اللي فاضي يروح  زياره وحده للجامعه ويشوف المحجبات بالبنطلونات المحزقه
والبدي اللي بيبان كل اللي تحته   ومناظر لا تليق بالحجاب
زمان ماكانش في حجاب  بس الكل كان محترم
بنشوف حفلات ام كلثوم مافيش ولا وحده محجبه بس كلهم محترمات .
----
زمان كان بيسهر يوم الخميس الشباب ومش بيتاخر عن الساعه 12
حاليا السهره تبتدي من الساعه 12 وفي كل ايام الاسبوع
واللي زاد وغطي  ان الصبايا برضه تلاقيهم في كل ايام الاسبوع
وفي وقت متاخر بصحبة الشباب او تجمع صبايا
اللي كتبته كله بعد حديث ممتع والله ممتع من رجال ونساء افاضل 
من اللي عاشوا في الزمن الجميل
بعتذرعلي طول المقال ويارب ماتكونوا ملتوا مني ومنه
طبعا المقارنه مش في صالحنا ولا صالح الزمن اللي عايشنه حاليا
وآه يازمن يازمن آه
واوعوا واوعوا تقلبوا الصفحة
ابقوا معي



























هناك 8 تعليقات:

حمـــــــــــــــــــــة يقول...

الماضي مر حسب ظروفه "بداية مرحلة"
الحاضر يتعثر "تخمة من التجارب"
المستقبل سيعيد عقارب الساعة الى ما قبل الماضي ........... و هكذا تلطم الأمواج صخور اليابسة فاسحة المجال للرياح ي توزيعا جديدا ........ و يا عالم تنبت فصيلة ()

غير معرف يقول...

لولا
مقال وافي لكل الامور الحاليه
يابنتي شويه شويه بلاش تاخدي كل حاجه علي اعصابك والله بشفق عليكي . زمان غير دلوقتي ولكل زمان ظروفه واحتياجاته . نسيتي الصينيات الموجودين زمان كان فيه الدلاله حاليا في الصينيات اللي تقولك ده لوبو بتقصد روب وتفضلي تفاصلي معاها وتاخدي اللي عايزاه باقل من نص التمن اللي قالت عليه .
ارحمي نفسك شوي .
كل الحب للولا الغاليه
دكتور مهندس احمد الجمال

غير معرف يقول...

مقال جميل وهادئ مثل موجة حانية على شاطئ مخملي . يعجبني ايقاعك في الكتابة
واياً كان لكل زمان سلبياته وايجابياته . ولكن في المجمل نعيش الأسوء في عصرنا الحاضر ...
لا تحرمينا جميل ابداعتك
دمتي بود
The Volturi

غير معرف يقول...

** ابداعك

غير معرف يقول...

السلام عليكم وكل عام وأنتم بخير وسعادة ويرحم زمان وليالي زمان الناس كانوا فريقين فريق متهني وفريق فرحان ومزاج رايق لاضغط ولاسكر ولاوجع قلب وأم كلثوم وعبد الوهاب وفريد وشركاهم يشدون بأعذب الألحان وطه حسين والعقاد والحكيم ومحفوظ يخطون أحسن القصص وشوقي وحافظ وناجي ورامي يبهروننا بالسحر الحلال والضظوي وصالح سليم ورأفت وعصام بهيج يخرجون صرخات الإعجاب من الصدور وشوارع القاهرة كانت ساحرة ويوميا تغسل بالماء والصابون كل ليلةتفتكري ياليلى هانم هل تجوز المقارنة أصلا بين ماكان والهباب الكائن الآن زمان قالوا لقد أسمعت إذ ناديت حيا ولكن لاحياة لمن تنادي ويمكن أن نقول ايضا الآن لاحياة لمن ينادي كله ميت وطبعا الضرب في الميت أصلا حرام ياليلى والله والله سعد قالها من زماااااااااااان مافيش فايدة .
تحياتي
حكيم عقول

غير معرف يقول...

http://farm1.static.flickr.com/198/24http://farm1.static.flickr.com/198/2468098519_27b51ec039.jpg68098519_27b51ec039.jpg

غير معرف يقول...

يا برنسيسه ايه دا كله بجد انا متفق مع الدكتور المهندس احمد الجمال لانى ابتديت اخاف عليكى من حمل هموم الوطن وللأسف مفيش حل او يمكن الحل بعيد المنال ويمكن مستحيل فى ظل هاذا الفساد والنهب ولاكن اهديكى غنوه مد حت صالح رفضك يا زمانى يا اوانى
بالرغم من انى عشت فتره من الماضى وجمال رونقه ولاكن لو بطلنا نحلم نموت
هشام ابو عيش

غير معرف يقول...

ليلي هانم
يرحم زمان وليالي زمان
الله يرحم الزمن الجميل اللي كان الكل بيحب بعضه ومصلحه الجماعه بتغطي علي مصلحه الفرد . حاليا انا وبس واللي يموت يموت
فعلا اه يازمن يازمن اه
كل الود لليلي هانم
دكتور محمد عمر