1‏/12‏/2010

توابع الانتخابات

أعزائي
خلاص الجوله الاولي في الانتخابات خلصت ويوم الاحد وعليكم خير الجوله التانيه
طبعا كلنا عارفين النتيجه من الكونترول ان الحزب الوطني حيحصد اكبر عدد من اعضاء المجلس الموقر
ولسه الجوله التانيه اكيد طلعت في الكونترول وبرضه لصالح سيد قراره
علي اي حال مبروك للحزب  وهارد لك للمرشحين اللي اتنبح صوتهم
والاخر طلعوا قعدوا علي دكه الاحتياطي لمده 5 سنين
في حاجتين عايزه اكلمكم عنهم طبعا عرفتهم قبل الانتخابات بس المقال السابق ماحبتش اكتب عنهم
لاني مش بحب يكون مقالي كبير وتملوا منه خليني خيفه عليكم
كفايه عليكم الانتخابات والحزب الوطني  كان الله في عونا جميعا
اول حاجه اني قريت ان في اربعه من ظباط الشرطه في محافظه الاسماعيليه
تم نقلهم لمده اسبوعين  لمحافظه تانيه والسبب ان في اتنين منهم والدهم مرشح فئات
والتالت  المرشح نفسه يبقي عمه اما الرابع فوالده مرشح عمال
شفتوا بقي نزاهه الانتخابات
قال يعني لما ينقلوهم يبقي مش حيكون ليهم يد في مساعدته
ولا ظبطوا كل شيء قبل يتنقلوا
طيب مش هما برضه ليهم زمايل . لما بتكون اجازه من شغلك
حتي لو حد معرفه بيجي يسال عليك علشان عايز يخلص شغله
اكيد حد من زمايلك بيساعده وبيحل محلك
شفتوا بقي الحكومه بتستعبطنا ازاي  والله اتغظت جدا لما قريت الخبر ده
تعالوا علي الخبر التاني
سمعت وشفت برنامج الطبعه الاولي للاعلامي المحبوب من كتير منكم احمد المسلماني
انا من مشاهدي البرنامج وبحترم جدا مذيع البرنامج
بس من وجه نظري هو اخطأ مش عارفه عن قصد او دون قصد وقال
وطبعا ده بيوجهه لجمهوره من خلال البرنامج
قال اللي رايح ينتخب ولقي حد اداله فلوس عشان ينتخب مرشح معين
ياخد منه الفلوس . بس وهو ورا الستاره بينتخب يراعي ضميره !
فين بقي هنا الضمير اللي بيحكي عنه
دي دعوه صريحه للشعب عشان يبقي نصاب
ازاي ياخد فلوس عشان يادي خدمه مهما كانت  وماننساش انه رضي يعملها ووعد
وبعدين نطلب منه انه يراعي ضميره
هو اصلا اذا مراعي ضميره حيروح ينتخب من غير ماياخد اجر علي صوته
وفي نفس البرنامج يناشد المواطنين ويقولهم
صوتك امانه . والنبي تجي ازاي دي
التليفزيون جهاز اعلامي خطير ولازم يتحروا الدقه في كل مايقدم
بس مين يسمع ومين يعلم الصح
نتيجه الانتخابات احبطتني
مش قلتلكم ان الاكتئاب قادم لا محالا
وبرضوا اوعوا اوعوا تقلبوا الصفحه
ابقوا معي

هناك 5 تعليقات:

bb_ss_5 يقول...

اتحررنا من الاستعمار الانجليزى ووقعنا فى استعمار الحزب الوطنى ,مسكين ياسعب مصر

غير معرف يقول...

لولا الغاليه
هههههههههه والله يابنتي انتي تاعبه نفسك في مشاكل الانتخابات ماهي زي ماقولتي متظبطه . بس الغريب ان الاخوان مالهمش ولا مقعد ودي حاجه تقلق . اما كون ان التليفزيون جهاز اعلامي خطير فانا اوفقك الرأي . بس يابنتي ده برضه حسب مزاجهم . كل انتخابات وانتي طيبه .
كل الحب للولا الغاليه
دكتور احمد الجمال

غير معرف يقول...

صباح الخير استاذتى الفاضله - كل عام هجرى وانتى بخير وسعاده واسرتك الكريمه
بصراحه انا الدكتور نصحنى عشان اعرف انام اخد حبايه ضد السياسه وبالأخص فى موسم الأنتخبات بغد خمس حبيات بس بصراحه وبينى وبينك انا باخد عشرين حبايه مخالف امر الطبيب مش قادر اصدق بجد الى حصل سيبك من الاخوان لانى فعلا متعاطف معاهم ومش هاقدر اتكلم عنهم لاكن واحد زى مصطفى بكرى وحمدين صباحى يحصل فيهم كدا دول خلاص قربو يتجننو من الى اتعمل فيهم وفينا مش عارف تفتكرى نجيب سرورو ولا لا اشعر انهم الان فى الطريق لنفس المستشفى التى اودعو فيها نجيب سرور والتى اتمنى ان ادخلها فى فتره الانتخبات حتى لا ارى واسمع البلطجه والأرهاب الشرطى تحيه لكل ضابط تمن نقله من منصبه لحين فوز مرشحه هى دى النزاهه -اتفق معاكى ان فعلا المسلمانى وقع فىى خطىء وحاول يمسك العصايه من المنتصف بس انا متفق معاكى من باع ضميره مره باعه الف مره
كل التحيه والأحترام لكل الشرفاءومنهم البرادعى الذى ثبت انه بالرغم من بعده عن الوطن كما يزعمون ولاكنه يغوص فى اعماق الوطن والدليل ان الوفد والأخوان انصاعو لنصيحته بعد فوات الأوان

غير معرف يقول...

ليلي هانم
الانتخابات زي ما كتبتي في المقال السابق لعبه الكراسي الموسيقيه اللي عايزينه بيدخل المجلس واللي مش عايزينه بره المجلس ربنا يكون في عونا جميعا . ليلي هانم اسف لتاخير التعليق
كل الود لليلي هانم
دكتور محمد عمر

mohamed يقول...

انا عندي فيديوهات على مدونتي حصريًا ممكن عرضها في المدونة الجميلة دي
http://kenzo2010.blogspot.com/