28‏/3‏/2010

عجبت لك يازمن

اعزائي
النهارة الاحد الموافق 28 مارس 2010 الساعه حداشر الا خمسه صباحا
في وسط ميدان التحرير كان واقف ظابط مرور برتبه عميد بيمضغ لبانه
والله شفته واستغربت للمنظر دورت علي كاميرات
قلت يمكن اعلان عن نوع لبان جديد بس مالقيتش اي كاميرات
---
دكتور جودت الملط رئيس الجهاز المركزي للمحاسبات
دارت مناقشه بينه وبين عبدالقوي تحت قبه البرلمان
قال فيها ان نسبة الفقر23% بعد ماكانت 19%
وقال ان 77%من الفقراء يقيمون في الارياف
وقال احصائيه بس اوعوا يغمن عليكم
20% يملكون 80% من الثروةالقومية
وال5% الآشد ثراء تملك 50% من ثروة البلاد
وأفقر 80% من الناس لايملكون الا 20% من ثروات البلاد
---
جودت الملط كان تاعب حاله وبيتكلم في مجلس الشعب
وعبدالقوي كان بيلعب في موبيله بس المره دي مش بوكر لا سوليتير
وبعد ماجودت الملط اتكلم يجي ساعه ونص علي الموزانه
رد عبدالقوي وقال ماينفعش نقارن التفاح الا بالتفاح
والبرتقال الا بالبرتقال
اعتقد اننا حزمه فجل بخمسين قرش حنقارن بايه ياحسره قلبي
---
شيخ الازهر الجديد الدكتور احمد الطيب
قال انه منتظر مبارك عشان يقدم استقالته من لجنه السياسات بالحزب الوطني
وقال في تصريح سابق اذا تعارض وجودي في لجنه السياسات
مع مشيخه الآزهر حقدم استقالتي من السياسات
السؤال
هي الاستقاله محتاجه لرجوع مبارك ؟
علي فكرة انا بحترم الدكتور احمد الطيب جدا
بس حبيت اسال سؤال مش لاقيه اجابته
---
سمحت حكومتنا الرشيده لوزارةالتجارة والصناعة
بأتخاذ أجراءات تبوير 58 فدانا من أجود الاراضي الزراعية
الواقعة بحوض الحجازي التابع لجمعية قرية سرسق
للاصلاح الزراعي بمركز طلخا
في الطريق بين المنصورة وجمصه
اهم شيء ان التبوير
لاقامة مول تجاري لتنشيط التجارة الداخلية
---
أمتي حتنتهي احتجاجات عمال النيل للاقطان والنوبارية
وطنطا للكتان وامونيستو
اعتقد انها مش حتنتهي لان وزارة الاستثمار وقعت عقود مع مستثمرين جدد
سواء مصريين او عرب بس السؤال هنا
هل يوجد بالعقود بند فصل العمال ونقلهم وتسريحهم ؟
وماشاءالله علي الست وزيرة القوي العاملة
تركت كل شيء العمال يتسرحوا يترفدوا يتنقلوا
يروحوا في ستين داهيه
واهتمت بالسفر حول العالم
ونسيت انها كانت وحده منهم واشتغلت وكان عمرها 14 سنه
حسب ماقالت في برنامج تليفزيوني ايام توليها الوزارة
ونسيت ان بفضل العمال كانت ممثله لهم في النقابات العماليه
وهما برضوا اللي وصلوها لمجلس الشوري وبعدهل الوزارة
ياست الوزيره افتكري اللي فات
وبيقولوا من فات قديمه تاه
وعيشوا بقي عيشه اهليكم
---
مصر طالبت الامم المتحدة بالسماح لها
بالاتجار في تماسيح النيل
ويارب ادعوا معايا وقولوا عقبال مايصطادوا
حيتان الساحل الشمالي
---
أغنيه شعبولا الجديده بمناسبه عوده مبارك
مبروك شفاك ياريس وسلامة حضرتك
ده حتي وانت غايب ماحدش برضه سد
مبروك ياريس علي الحفيدة فريدة
بنت الاستاذ جمال
واييييه
اوعوا تقلبوا الصفحه
ابقوا معي

هناك 3 تعليقات:

غير معرف يقول...

ليلي هانم
كان لاوم تصوري العميد اللي واقف في ميدان التحرير
من ده كتير . بتشوفي كمان بيبعتوا اولادهم للمدارس وزوجاتهم للشغل وللسوق بالبوكس
كل الود لليلي هانم
دكتور محمد عمر

غير معرف يقول...

ليلي هانم
عادي جدا عميدالمرور
ماخفي كان اعظم
اولادهم وزوجاتهم بيستعملوا البوكس الميري في الذهاب للمدارس وشراء الخضار من السوق
شكرا لجراتك المعهوده
كل الود لليلي هانم
دكتور محمد عمر

غير معرف يقول...

تحياتي أختي الكريمة ليلى لكن يبدو حضرتك ماتعرفيش إن البعض بيعتبر اللبانه الآن من مظاهر الوجاهة الاجتماعية والله يرحم أبويا كان لما يشوف رجل بيمضغ لبانة في الشارع يقول عليه مايع وطبعا لأن كل شيء في مصر أصبح مايع يبقى طبيعي رجل الشرطة يمضغ اللبانة في مجتمع مايع أما أحمد الطيب فهو رجل طيب وكفى ، لكن تقرير جودت الملط فواضح من اسمه( الملط) إنه بيعري كل عورات الطبقية المصرية الجديدة التي لامثيل لها في العالم.
ليلى وجعتِ قلبي وأنا قلبي أصلا بيوجعني ممكن أسمع شعبولا شويه إييييييييييييييييييييه
تحياتي
عادل صقر