14‏/9‏/2009

تاريخ كعك العيد




أعزائي
خلاص رمضان بيجري بسرعه
والعيد جاي بعد كام يوم
واكيد كل بيت يا بيستعد لشراء الكعك او عمله
او تم عمله فعلا في اخر عشر ايام في الشهر الكريم
زي مابيقولوا اهل الشام عن رمضان
عشره مرق وعشره خرق وعشره حلق
العشرة الاولي انهم مروا بسرعه
العشره التانيه دي اللي بيشتروا فيها ملابس العيد او بيتم تفصيلها
اما العشره الاخيرة فهي للحلق او بالاحري لعمل كعك العيد
كل عام وانتم بالف خير
بس ياتري فكرتوا في تاريخ الكعك امتي ابتدا وكان ليه
تعالوا نعرف التاريخ مع بعض
عادة عمل كعك العيد بدأت من العصر الفرعوني
وكان تقديمه نوع من انواع القرابين للالهه
وده بنلاقيه ثابت في النقوش علي جدران المعابد
وكانوا بيضعونه داخل القبور مع الموتي
وبيرسموا عليه رسم الشمس اللي بيرمز لاتون
وقد تحول مع مرورالزمن وارتبط بعيد الفطر وكذلك بالافراح
ويري البعض ان الاصول التاريخيه لكعك العيد يعود الي
العصر الاخشيدي924م
وقد أنشاء في العصر الفاطمي جهاز لشئون الكعك
او مؤسسة عامه لانتاجه وتوزيعه علي المحتاجين والفقراء
وقد سميت هذه المؤسسة ( بدار الفطرة )
واستمرت بالعاملين والطباخون حتي العصر الآيوبي
وكذلك أستمر توزيعة صدقة طوال العصور الوسطي
حتي نص عليه في حج الوقف
أي كان يوزع علي حجاج بيت الله
عند ذهابهم لاداء فريضه الحج
ومن الكعك تم صنع (البقسماط )
وهو عبارة عن دوائر مفرغة من الوسط وتجفف بواسطه الخيط
ويخزن لحين قدوم الحج
في مثل لجدتي لامي عند الزواج بيقول
صرلوا بيت وكعكتين وخيط
كما نصت وقفية الآميرة تتر الحجازية علي توزيع الكعك الناعم والخشن
علي المحتاجين والفقراء وتلاميذ الكتاتيب والعلماء
وكان اهتمام الدولة الفاطمية بالكعك يبدأ من شهر رجب
وحتي منتصف رمضان لتوزيعة في العيد
اما المماليك فاعتبروة من أوجه البر والصدقات
وفي وقفيات العصر المملوكي أكثر من أشارة لعمل الكعك وتوزيعة
وفي الدولة الآخشيديه يأمرون بحشو كعك العيد
بدنانير من الذهب ويسمونه ( أفطن له )
ياريت حكومه نظيف الرشيده تفطن للشعب الغلبان
وتوزع عليه حتي قرص من اللي بيطلعوا بيها القرافه
تبقي عملت حاجه تحسب لها
في الثلث الاخير من رمضان يبدا اعداد كعك العيد
والذي صممت له القوالب الخشبيه
اما حاليا فاصبحت القوالب بلاستيكيه
كان قديما يكتب علي القوالب
كل وأشكر مولاك
كل هنيئا
بالشكر تدوم النعم
اما حاليا فالقوالب مزينه بالزهور والنباتات والاشكال الهندسيه
ومش مكتوب عليها اي شكر ولا امتنان للحكومه الرشيدة
ومن انواع الكعك في مصر
كعك بالعجوة .. كعك بالعجمية
كعك ساده .. كعك بالجوز او الفذدق
بالاضافه الي الغريبه والبيتي فور
وانواع متعددة من البسكويت
اما الكعك الشامي فهو متنوع
كعك محشو بالسكر الآبيض .. كعك محشو بالتمر
كعك تنوري وهو المخبوز علي التنور القديم
كعك معروك وهذا الكعك لزوم رمضان
كذلك الكعك المبروم .. كعك بسمسم ..كعك سخانه
كعك الهوا.. كعك بسمنه .. كعك بماء الجبنة
معمول فذدق حلبي وجوز
ومن عاده اهل حلب توزيع الكعك علي الفقراء في المقابر
مثل ما يوزع المصريون الشريك والقرص في المقابر في ايام عيد الفطر
كل سنه وانتم جميعا بخير
وتاكلوا الكعك بصحتين وعافيه
بس اوعوا اوعوا تفكروا تقلبوا الصفحه
ابقوا معي




هناك 9 تعليقات:

غير معرف يقول...

لولا الغاليه
كل سنه وانتي طيبه وعيد سعيد عليكي
حيرتيني معاكي مابقتش عارف اعمل ايه
ساعات بحس انك سوريه جدا بس الساعات الاكتر بحس بمصريتك الجامده
المهم اننا بنقرا مقالات جميله
تحياتي وحبي
دكتور احمد الجمال

غير معرف يقول...

ليلي هانم
كل عام وحضرتك والاسره الكريمه بخير
مقال جميل كالعاده
معلومات كتير مننا مش عارف عنها حاجه .. عجبني المثل الموجود في المقال
وكمان انتقادك للحكومه الرشيده كان دمه خفيف
كل الود
دكتور محمد عمر

غير معرف يقول...

ليلي النقاء.. مازلت مصرا على انك تمتلكين ما لا يملكه الاخرون من ابداعات واخيتارات مواضيع تفوق تفكير الانسان العادى وبسرعه البرق تنقلينا من وادى لوداى اجمل..ليلى تحياتى وتمنياتى لكى بالتوفيق فى الحياة .. كل الحيـــــــــاة..محمود صابر الخطيب

غير معرف يقول...

استاذه ليلي
اول مره ادخل مدونتك سعدت جدا بها
كل مواضيعك شيقه ... مزج المعلومه بالنقد اللاذع ده شيء لا يستطيع عمله الا من كان يملك ادوات مثل ادواتك .. كل عام وانتي بخير
ميرال الخيام

غير معرف يقول...

استاذه ليلي
كل عام وانتي بخير
من المداومين علي الدخول للمدونه لقراه الجديد
معلومات جيده في كل المجالات
بصراحه كان نفسي اعلق من زمان بس الحقيقه ماعرفتش الا النهارده
منتظرين المزيد والي الامام دائما
مهندس ايهاب كامل

غير معرف يقول...

استاذه ليلي
موضوع جميل . ومفيد وفيه المعلومه الجيده والمبسطه . كل المواضيع الموجوده في المدونه مفيده
كل سنه وانتي طيبه
كارولين عوض

مهندس / حسين محمد يقول...

التاريخ عن طريقك ليه شكل تانى بس حتى فى عصور الظلام كانوا فاكرين الشعب بحاجة مش زى الايام دى اللى مش سائلين فالشعب اصلا

غير معرف يقول...

اليوم اول ايام عيد الفطر كل سنه وحضرتك بخير واللأمه الأسلاميه
بصراحه جوعتينى بمقالك وتمنيت الكحك الى امامى اللأن يكون بنفس طعم كحك امى ذمان ايام الطبليه والتقاء الجارات وتجمعهم فى منزلنا لنقش الكحك
دائما مبدعه الله عليكى
هشام ابو عيش

Dr.Emad يقول...

nice blog