15‏/12‏/2008

المستشفيات الاستثماريه


أعزائي
قادنا سوء الحظ بعد انتهاء اجازه العيد الي التعامل مع مستشفي اسثماري
زي مابيقولوا مستشفي بس الحقيقه هي مش مستشفي
المستشفي من اهم مستشفيات مصر الجديده
وكان التعامل معاهم لاحد افراد اسرتي
المهم مش حطول عليكم حدخل في الموضوع علي طول
وصلنا المستشفي حوالي الساعه 10 مساء يوم الجمعه الموافق 12/12
بصراحه الاستقبال كان سريع جدا كرسي متحرك بسرعه جدا
وقف قدام العربيه واخدوا الحاله
وعملولها رسم قلب بسرعه البرق
وقالولنا روحوا ادفعوا رسم القلب وقبلها كان في تسجيل البيانات
بعدها اشاعه علي الصدر
والدكتور قال ان في شوي التهاب علي الرئه
مش التهاب رئوي
وده يلزمه دخول المستشفي طبعا كل حاجه اتعملت ادفعت في ساعتها
بيخافوا المرضي تهرب وماتدفعش والا ايه مش عارفه
كتبولها دخول الحاله هي ماكانتش عايزه تدخل قالت اروح مش عايزه
الدكتور طلب من ابنها انه يكتب اقرار انها خارجه علي مسئوليته
ساعتها خفنا قلنا يمكن الحاله خطيره اقنعناها انها تستنه في المستشفي
طبعا حولونا علي الحسابات عشان ندفع مقدم كان 3000 جنيه
دفعناهم واحنا شاكرين مهللين
طلعت غرفه بعدها جت دكتوره صغيره قالتلها سلامتك ياحاجه
انشاءالله حتبقي كويسه
عملولها جلسه ( نبولايزر )
ودي ممكن تتعمل في البيت ناس كتير بيعملوها في البيت
وحقنه ( انتي بايوتك )
وخلاص علي كده
انا كنت المرافقه لها فضلت استنه يجيبولي غطاء ومخده
لغايه الساعه اتنين ونص صباحا قلت مافيش فايده
لازم اطلب رنيت الجرس ماحدش عبرني خرجت قلتلهم انا مرافقه للمريضه
قالولي عارفين قلتلهم طيب فين الغطاء والمخده
جابولي ملايه وبطانيه خفيفه جدا ومخده
وكانوا متضررين جدا والاستياء واضح لاني قلقتهم
الصبح عملولها جلسه تانيه وحقنه
بعدها جابولها الفطار
اول مره القي مستشفي تقدم للمرضي بليله وبارده كمان
ومافيش فطار مرافق
برضه طلعت وقلتلهم هو المرافق صايم قالولي حاضر حنجيب الفطار للمرافق
فضلت من الساعه 9 صباحا ل12 الظهر بطلب دكتور يفهمني الحاله
وكمان قلتلهم انها بتاخد دواء غده علي الريق اديهولها والا اعمل ايه
قالوا الدكاتره مشغولين في المناظير
قلتلهم هي المستشفي مافيهاش الا قسم المناظير
بصراحه اشتغلتهم في الجنان
شوي ورحت تاني قالوا الدكتور مشغول
سالتهم مشغول علي الكمبيوتر
قالوا مش عارفين
قلتلهم اكيد بيلعب جيم ولما يخلص حيجي
كل شوي اخرج القي هيئه التمريض قاعده تحكي حكاوي القهاوي
طلبت رقم مدير المستشفي لانه مش بيرد قالولي حاضر حنكلمه
كانوا بيوزعوني الساعه 12 جه دكتور صغير الظاهر المستشفي بتشجع شباب الخريجين
سالني هي مالها حاسه بايه قلتله انا مش المريضه
تقدر تسالها هي مش في غيبوبه وبتسمع وبتعرف تتكلم
سالها مالك قالتله الحاله قالها طيب قلتله احنا طلبنا استشاري صدر
قال حيجي بس امتي مش عارف
وسابنا ومشي بعد ربع ساعه لقينا وحده من التمريض جايبه كيس كبير
فيه ادويه ومحاليل وسرنجات وكمان جونتيات
زي اللي بيستعملوهم في الولاده
والله كيس جونيات حتي وحده من قرايبنا كانت موجوده
سالت الممرضه دول لايه هي جايه تولد
سالت الممرضه مين كتب الادويه
قالت الدكتور اللي جه قلتلها بس انا طالبه اخصائي
والدكتور ده يكتب كل الادويه دي ليه
مافيش جواب سابت الادويه ومشيت
ولا حد سال علينا ولا حد عبرنا لغايه الساعه 2 الظهر
عرفت القي مدير المستشفي عن طريق الرقم الداخلي لمدير العيادات
كلمته قلتله ممكن حضرتك تتفضل عندنا قالي اؤمري
قلتله ان مافيش دكتور عدي علينا الا الدكتور الصغير
رد عليه وقالي ده رئيس قسم مش قلتلكم بيشجعوا الجيل الصاعد
قلتله ان هيئه التمريض مش بيردوا وعاملين حكاوي القهاوي وبيطقوا حنك
قالي هما بيدوكم العلاج ومش مطلوب منهم غير تنفيذ تعليمات الدكتور
قلتله احنا مش بنلاقي الدكتور اصلا
قالي اضربي الجرس وبعد خمس دقايق يكون عندك الدكتور
قلتله اني قعدت اطلبه 3 ساعات لغايه ماجه
قالي حنشوف كل ده بعدين ثم انكم دخلتوا الفجر
يعني اللي دخل الفجر مالوش حق يتكلم
قلتله يادكتور احنا كنا في الغرفه الساعه حداشر
وسالته سؤال ساذج جدا
هو الفجر عندكم بيجي الساعه حداشر
قالي الاستشاري جاي قلتله لو ماجاش حنخرج
بعد 10 دقايق بعتلي دكتوره صغيره برضه
سالت بتاخد علاج ايه قلتلها هو الاستشاري مش جاي
قالتلي هو حيتاخر بس احنا حنجيبلكم واحد تاني بعد شوي حيطلعلكم
سالتها عن اسمه واسم اللي كان حيجي
قالتي وطلع الاتنين باطنه وقلب
قلتلها احنا طالبين استشاري صدر
ردت رد هي فاكره انه مقنع الا وهو
الدكاتره بتفهم في كل حاجه
قلتلها معليش بقي اصل انا فهمي ضعيف
لان اهلي خرجوني من المدرسه بعد الاعداديه
اللي يطلب استشاري صدر ماينفعش يجيبوله استشاري باطنه
اللي عرفته ايام ما كنت بتعلم في المدرسه ان دي تخصصات
وقالتلي انتوا جايين الفجر ليه زعلانه كده
قلتلها احنا جايين الساعه حداشر
ردت كنتوا في الغرفه الساعه اتناشر
قلتلها يعني افهم من كلامك انك وكل العاملين في المستشفي
بتقولوا للناس الساعه اتناشر ودقيقه صباح الخير
قالتلي نشوف الحاجه وبعدين نتخانق
طبعا وهي خارجه ماعبرتنيش
قولتلها يادكتور انا مش بتخانق انا بطلب حقي زي ما انتوا بتاخدوه حقكم
بعدها جه الاستشاري برضه باطنه
جه وهو زي مايكون الله نزل من السماء
دخل قالها سلامتك مالك
وحده من اللي موجودين قالتله امبارح لقينا وشها وشفايفها بقوا بيض
وعندها كرشه نفس
قالها البياض ده ممكن يكون نور من عند ربنا
والله والله والله ده اللي حصل وده كلام الاستشاري
وكمل وقال يمكن حد خضها ابقي هاتيلها شيوخ والحاجات دي
المهم طلب سماعه يسمع خبط علي السماعه لقاها بايظه
اعزروني في اللفظ اللي حقوله هو الاستشاري قال كده
قال للدكتور والممرض اللي كانوا معاه
مافيش اوسخ من السماعه دي تجيبهالي
بعتذر تاني علي اللفظ
انا رديت وقلتله اصل البطاريات خلصت
المهم بالظبط حط السماعه 3 مرات علي صدرها
لا شاف ضهرها ولا اي حاجه المفروض يكشف علي ضهرها
شاف الاشعه وقال بسيطه
المريضه اول مادخل قالتله عايزه اروح رد باستهزاء اه تروحي حاضر
مرتين طلبت ومرتين الاستهزاء
قال فين اخر تحليل
اخدواعينه قبل مايدخل الدكتور
انا قلتله احنا عايزين نخرج من فضلك اكتبلنا خروج
قلتهاله مرتين ورا بعض يمكن سمعه تقيل والا حاجه
ورد ابنها وقاله ايوه احنا مش مرتاحين هنا وعايزين نخرج
قال طيب اشوف نتيجه العينه وتخرجوا
قلتله طيب يادكتور حضرتك حتروح والا منتظر قالي حروح ويبلغوني في التليفون
قلتله في حد ممكن يكتب خروج بدلك قالي ايوه
المهم مشي ولما قريبتنا سالته اسمك ايه
قالها اسمه وطلع برضه باطنه
يعني مافيش فايده ده العلاج الاجباري
بعد كده تعبنا لغايه ماالهيئه الموقره تبع التمريض
تبعت الفايل للحسابات
ولما لقوا الحاحنا وكمان قلتهم اني حنزل علي الكمبيوتر
مقاله زفت علي سوء المعامله
بعتوا اخدوا الادويه اللي كتبها الدكتور بتاع الجيل الصاعد
وكتبولنا دوين نجيبهم من بره المستشفي
واخدنا الفاتوره اللي كانت جميله جدا ومليانه جدا جدا
بس بصراحه ابنها قال الحمدلله عايزين نطلع من هنا وخلاص
المهم خرجنا من المستشفي علي خير
بصوا بقي
الحاله ماكانتش تستوجب انها تفضل في المستشفي
وماكانتش برضه تستوجب التحاليل والاشعات ورسم القلب
يعني كل ده عشان الفاتوره تعلي وتعلي
بيمارسوا علي المرضي اساليب تخوفهم
يعني احنا بصراحه خفنا واترعبنا لما الدكتور قال لابنها
اكتبلي انها خارجه علي مسئوليتك
هنا بقي فين الرقابه علي المستشفيات
فين وزير الصحه قاعد في مكتبه مش داري باي حاجه
فين وكلاء وزاره الصحه
هما قاعدين في مكاتبهم والا بيشتوا في اسوان والاقصر
ويصيفوا في مارينا
ويبعتوا الفنانين تتعالج في الخارج
اصلهم ياحرام مايقدروش يتعالجوا علي نفقتهم
فريد شوقي واحمد زكي وغيرهم وغيرهم
والله حرام الناس الغلابه بتموت مش بتلاقي علاج
لان مايملكوش تمن العلاج
واللي مش محتاج يسافر علي نفقه الدوله
مش بيقولوا يابخت من كان النقيب خاله
دول بقي الحكومه خالهم وعمهم ووزير الصحه ابوهم وامهم
دكتور هاني سرور تفتكروا حيعملوله ايه ولا اي حاجه
واللي وافقوا في بنك الدم علي اكياس الدم الفاسده
برضه ولا اي حاجه كلهم براءه
والشعب الغلبان هو الجاني الاول يبقي نحبس الشعب ونخلص
وبالاخص الناس الغلابه الشقايه اللي الامراض كلها بيعانوا منها
يروحوا لمين ومين يسمع ومين يفهم
لامتي حنفضل مستحملين الفساد
وعمار يامصر وسلملي علي الترومااااااااي
وابقوا معي واوعوا تغيروا المحطه

هناك 4 تعليقات:

غير معرف يقول...

سيدتي الفاضله
كان بودي أن يكون العنوان:بلا للنائب العام..
بصراحه حاجه تكسف..و لسه

تحياتى وتفديري
وادعوا الله ان يجنبنا الثالوث المرعب الفقر والجهل والمرض
خيري نور

غير معرف يقول...

هيـــــا دى مصــــــر يا عبــله
3iesh 7ab alnas w 3iesh

غير معرف يقول...

انشاء مركز للدراسات الأدبية باسم نجيب محفوظ:

أشكر زهرة البنفسج علي ضم صوتها الي صوتي للدعوة الي انشاء مركز للدراسات الأدبية باسم نجيب محفوظ وهذا أقل ما يجب بالنسبة الي أديب في حجم نجيب محفوظ
دكتور صلاح خليل

غير معرف يقول...

استفزني المقال التي نشرته زهرة البنفسج عن المستشفيات اللاستثمارية وكيف يمتهن الانسان المصري عندما يمرض ويذهب الي مستشفي استثماري، ورغم أنه يدفع دم قلبه فانه يعامل معاملة تنطوي علي الكثير من الاهمال، رغم أن مهنة الطب مهنة انسانية وتتطلب الاهتمام بصحة الانسان ورعايته ولكننا في مصر بكل أسف ،وربما للدقة أقول بعض العاملين في المجال الطبي وليس كلهم لايعامل المرضي كما يجب ، فكلمة استثمار أصلا لا يجب أن تقترن بالطب والعلاج، لأن العلاج حق للانسان علي بلده ومن العار أن يتاجر بصحة الانسان ، ولقد أرست دول أوروبا الشمالية( الدول الاسكندنافية)وغيرها من الدول المتحضرة قواعد انسانية عظيمة في معاملة المرضي وعلاجهم، فالعلاج مجاني لجميع المواطنين، وعلي أعلي مستوي، ويتم تدريب العاملين في هذا المجال تدريبا فنيا وطبيا وانسانيا بدرجة تفوق الوصف، والمريض هناك يعامل أحسن معاملة ولا يدفع مليما واحدا في العلاج، ولقد مررت أنا شخصيابأكثرمن بتجربة علاجية في مستشفي الدولة في كوبنهاجن أثناء اقامتي بالدانمرك وحصلت علي عناية صحية علي أعلي مستوي ، فجميع العاملين في المجال الطبي هناك ينعاملون مع المرضي بطريقة انسانية لم أر لها مثيلا، ويؤسفني أن اري ما يحدث في مصر من الاساءة الي المرضي في المستشفيات الحكومية المصرية تصل الي أن يقوم بعض اللأطباء بلاعتداء بالضرب علي المرضي -نعم نعم أنا أعلم ذلك علم اليقين ولكني استدرك لأقول بعض الأطباء وليس كلهم فكم من طبيب قام بضرب امراة في حالة ولادة لأنها تبكي وكم من طبيب يضرب بالشلوت مريضا لأنه لا يريد أن تكشف عورته أمام طلبة وطالبات كليات الطب في المستشفيات التعليمية نعم هناك أطباء وممرضون يعتدون بالضرب علي المرضي في بعض المستشفيات الحكوميةوهذا كلام حقيقي أيها السادة، نحن نحتاج الي حملة كبيرة ضد بعض العاملين بهذه المهنة العظيمة لاعادة الانسانية الي قلوب هؤلاء ، واعادة الكرامة الي المرضي الفقراء، وأتمني أن يقوم الصحفيون بحملات مستترة الي مستشفيات الولادة الجامعية وغيرها ليكشفوا المهازل التي تحدث للمرضي الفقراء، واذا كانت الاستاذة زهرة البنفسج قد كشفت مهازل تحدث في مستشفيات الأغنياء ، فلتذهبوا الي مستشفيات الفقراء لتروا المهازل واهدار الكرامة واهمال الفقراء الذين يحتاجون الي الرعاية الطبية والمعاملة الانسانية من اناس المفروض أنهم ملائكة الرحمة

وأرجو من العزيزة زهرة البنفسج أن تستمر في حملتها ت ضد هذه الفئة من العاملين في هذا المجال الانساني وهو الطب والذين فقدوا انسانيتهم، وربما بالاستعانة بزملائهم من الأطباء الحقيقيين الذين تتوفر فيهم الانسانية والحرفية حتي تسود الرحمة جميع العاملين في هذه الحرفة الانسانية

د.صلاح خليل