الموت بالشلوت .. والضرب بايد المقشه .. وياما في الجراب ياحاوي

أعزائي

الطفل اسلام عمرو بدر ابراهيم 11 سنه

تلميذ بمدرسة سعد عثمان الابتدائية بالاسكندريه

صحي من نومه وزي كل يوم راح مدرسته ماكانش عارف ان ده اخر يوم يروح المدرسه

او بالاحري آخر يوم له في الدنيا

في حصه الرياضيات دخل المدرس هيثم نبيل عبد المجيد 23 سنه

وسال مين ماعملش الواجب وقف خمس تلامذه ماعملوش الواجب وكان اسلام واحد منهم

عادي جدا ووارد ان طفل مايعملش الواجب يتاخر مثلا او كان بيذاكر ماده تانيه

او تعبان وممكن كان بيلعب او بيتفرج علي التليفزيون الدنيا ما اتهدتش

انا طبعا مش بعارض انه التلميذ يتعاقب بس العقاب يكون علي قد الغلط

انما يكون عقاب اللي ماعملش الواجب هو الموت دي بقي حاجه جديده

ضربه المدرس فالولد وقع علي الارض فكمل الضرب برجله في بطنه وكسر قفصه الصدري

( يمكن ايده مش كفايه او كانت بتوجعه فاستعان برجله )

الولد ياحرام مالحقش يوصل المستشفي مات في الطريق

السيد / عمرو بدر ابراهيم والد اسلام اتصلوا بيه وقالوله اسلام تعبان شوي وموجود في مستشفي شرق

الاب اتخض علي ابنه وجري علي المستشفي لقي مدرسين كتير هناك حس ان الموضوع مش حاجه بسيطه

طلب يشوف ابنه المستشفي منعته وقالت انه في العنايه المركزه ولما سمحوله وشاف ابنه لقاه ميت

لكن الدكاتره اكدوله انه عايش .

في دكتور اسمه احمد ابراهيم قاله ان ابنه وصل المستشفي ميت

طلب الاب من الدكتور انه يشهد بكده الدكتور وافق بس لو جاله استدعاء رسمي من النيابه

اتعمل تقرير مبدئي من مستشفي شرق المدينه بالاتي

ان عضله قلب اسلام توقفت وانه في غيبوبه

اللي مش موجود في التقرير ان بظهر اسلام 3 خرابيش و4 كدمات

الاطفال زمايل اسلام

الطفل عبدالوهاب جمعه...... والطفل اسلام طارق

شهدوا بأن الاستاذ هيثم ضرب اسلام بالعصايا وبالشلوت ولما اسلام وقع علي الارض

كمل ضربه برجله لغايه ما مات

الاستاذ هيثم بيشتغل في المدرسه بقاله 3 شهور

يادكتور يسري الجمل ياوزير التعليم

حتتصرف ازاي في المصيبه دي حتسكت وتطلع المدرس مش غلطان

لانه مدرس ومايصحش اننه نطلعه غلطان قدام التلامذه

لزوم هيبه المعلم

ده ممكن لو كان ضربه او سبه انما ده قتله

بصراحه يامعالي الوزير لو كنت مكان معاليك وكنت مبوظه التعليم وكل شوي اشيل سنه سادسه ابتدائي وارجعها تاني زي بالظبط

افتح الشباك والا اسده

وتسرب اسئله الثانويه العامه

وتاخير نزول الكتب في اول العام الدراسي

كنت قدمت استقالتي واسيب المكان لحد غيري يقدر يكمل

يعني من الاخر معاليك بتعمل ايه في الوزاره

دي اسمها وزاره التربيه والتعليم

ولافيها تربيه ولا تعليم زمان كانت المدارس بتساعد البيت في التربيه

وبالتالي البيت بيساعد المدرسه في التعليم

انما حاليا المدرسه بقت هي همزه الوصل بين المدرس والدروس الخصوصيه

في قرار يامعالي الوزير مش عارفه اذا سيادتك سمعت عنه وعارفه والا ده مكانه

في الارشيف او درج مسئول اللي بالطبع مش معاليك او ممكن يكونوا حطوه في باسكت الزباله

القرار رقم 591 لسنه 1998بحظر ايذاء الطالب بدنيا بالضرب علي اي وجه وعلي اي وسيله

رقم معالي وزير التربيه لخدمه المواطنين 27946145

بس اكيد حيردوا عليكم بعد عمر طويل

واذا حصل وحد حن ورق وردعليكم برضه مش حيعمل حاجه لانه اكيد كان قاعد زهقان

وقال اتسلي وارد علي التليفون

والرد حيكون فوتوا علينا بكره وبكره بتاعه الحكومه مش بتيجي

انما بكره بيجي بسرعه وفي الحال للناس الوسطه حاملي الكارت الذهبي

اما المساكين عامه الشعب حاملي كارت الموبايل اللي يادوب بعشره جنيه

او حاملي الكارت الاصفر زي بتوع الكوره دول بره مالهمش مكان

واستكمال المسلسل في مدرسه عذبه توما التابعه لاداره شرق المحله التعليميه

في الغربيه ( شيل الله ياشيخ العرب )

اصيب 15 تلميذ وتلميذه باصابات وكدمات مختلفه نتيجه تعدي

الاستاذ محمد عبدالفضيل

المدرس المتعاقد مع المدرسه

تعدي عليهم عشان عملوا دوشه في الفصل

التعدي كان بايد المقشه .... ايوه والله قريتوا صح عنيكم مش مزغلله بايد المقشه

الاطفال تم نقلهم للمستشفي العام بالمحله

وتم عمل محضر بالواقعه رقم 30602 جنح المحله

واخلت النيابه سبيله بضمان محل اقامته

لسه ماتقلقوش ولا تستعجلوا

مدرس كسر ايد تلميذه واكتفوا بخصم 3 ايام من مرتبه

ونقلوه لمنطقه تعليميه آخري ويمكن دي كانت فاتحه خير عليه

لان ممكن المنطقه الجديده يكون فيها الدروس الخصوصيه اكتر

والمدرسين لما الاطفال بيطلبوا يروحوا الحمام بيرفضوا طيب الاطفال يعملوا ايه

الاهالي تلبسهم بامبرز والا ياخدوا البوتي معاهم في المدرسه

يامعالي وزير التربيه هو ماينفعش معاليك تصدر قرار وزاري بتوجيه اللوم والعقاب لاي مدرس

يخرج عن الاطار المتعارف عليه

والا حضرتك بتحافظ علي قول الشاعر

قم للمعلم وافيه التبجيلا كاد المعلم ان يكون رسولا

ده كان زمان لما كان في معلم بيعلم حقيقي ومش فتوه

الاهالي بيودوا ولادهم المدارس وبيكونوا مطمئنيهم عليهم انما حاليا مين حيطمن علي ابنه والا بنته

لازم الامهات يروحوا مع اولادهم المدرسه ويقضوا معاهم اليوم الدراسي

خوفا من بطش المدرسين

بس الاول لازم يتدربوا علي الكراتيه او التايكوندو لعل وعسي المدرس يضرب حد من ولادهم

فيعرفوا يردوا الضرب بالضرب

والبقاء للاقوي

يامعالي وزير العدل المستشار ممدوح مرعي

عايزين محاكمه عاجله وعادله في القضيه

وعايزين ادانه لوزاره التربيه والتعليم لموافتها علي عقوبه الضرب بتركها كل مدرس يعمل في الاطفال

زي ماهو عايز

ويارب يارب يارب بعد الكشف الطبي اذا كان فيه كشف طبي علي الاستاذ هيثم الفتوه القوه اسم الله عليه

مايطلعش مختل عقليا وياخد براءه

واخيرا بنهيب بجمعيه حقوق الانسان ونرجو تدخلها وتورينا قبل مانموت حتحافظ علي حقوقنا ازاي وامته

بس برضه احنا غلطانين لازم ندور علي حقوقنا ونتمسك بيها لان مش معقول حيضيفو حقوقنا

علي بطاقه التموين

مش بيقولوا مايضعش حق وراه مطالب

خبر اتكعبلت فيه اثناء رحله البحث عن موضوع اسلام وحدور علي المعلومات وانشرها

اسرائيل سحبت 400 مليار دولار قبل وقوع البورصات العالميه بيوم واحد

زي ما يوم 11 سبتمبر 6000 يهودي ماراحوش شغلهم في مركز التجاره العالمي

وللحديث بقيه ... ابقوا معنا واوعوا تغيروا المحطه

تعليق دكتور صلاح خليل عن حرق قش الرز

أعزائي

كتب الدكتور صلاح خليل تعليق عن موضوع حرق قش الرز

التعليق به معلومه ممتازه وياريت ننفذها

بس مين يقرا ومين يسمع

ماهو ماينفعش ان مصر تبقي نظيفه

طيب لو بقت نظيفه ازاي نمرض ونموت ويخلصوا منا ويرتاحوا ويخفوا الحمل من عليهم

حنقول ايه الا لك الله يامصر

تعالوا نقرا التعليق سوا

طالعتنا الأستاذة ليلي بحسها الصحفي المرهف يوم 17 أكتوبر بموضوع عن حرق قش الأرز

والسحابة السوداء و لقد نجحت الصورة التي استخدمتها في مدونتها الرائعة في انزال الرعب والخوف

في قلبي من هذه السحابة السوداء

هل تعلمون أن هناك دولا في هذا العالم تقوم بتوليد الطاقة الكهربية من جميع أنواع الفضلات والقمامة

الناتجة عن الاستخدام الآدمي، هذا الي جانب توفر تكنولوجيات لاستخدام فضلات الأراضي الزراعية أيضا

(مثل قش الأرز وغيره من النباتات حيث تنقل هذه الفضلات وتحرق

وتستخدم الطاقة الحرارية الناتجة من هذه العملية في توليد الطاقة الكهربية أو الحرارية لتدفئة البيوت

،ومثال لهذه الدول الدانمرك ، حيث يتم تدوير جميع أنواع الفضلات ، في دورة مغلقة،

ولا تجد في هذه البلاد أي أثر للقمامة علي سطح الأرض، فقد حققوا لأننفسهم بلدا نظيفا ،

بل وزادو علي ذلك ان استخدموا الفضلات – جميع الفضلات-لتوليد الطاقة الكهربية .

لماذا لا نستعين بخبرات هذه البلاد المتقدمة في اصلاح حال مصرنا العزيزة ؟؟؟؟؟

مرة أخري –تبرع زهرة البنفسج في استخدام الصورة لاحداث الأثر المطلوب عند القاريء

دكتور صلاح خليل

ليه يابنفسج بتبهج وانت زهر حزين

أعزائي

افتكرت صالح عبدالحي لما غني للبنفسج وقال

ليه يابنفسج بتبهج وانت زهر حزين

ياتري البنفسج حزين والا احنا اللي خلناه يبقي حزين

تعالوا نعرف حاجه عن زهر البنفسج

شجيرات البنفسج تكون كالاعشاب صغيره .. وهي شجيرات زينه اوراقها علي شكل قلب

يمكن ده اللي خلاني احبها لان اي شيء علي شكل قلب بكون ضعيفه قدامه

أزهاره سيقانها طويله وتكون الوانها صفراء او بنفسجيه ويجب قطفها في الصباح الباكر

لآن رائحتها أقوي في الصباح

ولكنها كأي شيء حلو في حياتنا لا تعيش طويلا بعد القطف لان أعناقها تذبل بسرعة

ويراعي وضعها في الماء بسرعة

تحتوي عائله البنفسج علي أكثر من 300 صنف وموزعه بين المناطق المعتدله والاستوائيه

استعمل الاثنيون هذه الزهرة لتعديل الغضب ... وجلب النوم والراحه ...وتقوية القلب

وأذا وضع اكليل من البنفسج علي الرأس يعالج الصداع والدوخه

كما استعمل الفرنسيون البنفسج في الطبخ

أكبر كميه بنفسج تزرع في اوربا في ( nice )

شفتوا بقي انها مش زهر حزين

ويارب يديم الود بينا

رحيل

أعزائي

لانكم بتحبوا هموم دي قصيده تانيه

انا شخصيا عجبتني جدا

وياريت اعرف رأيكم فيها

هموم سمحلي بالنشر

بشكرك وبقولك انت حقيقي بتمتعنا بكل كتاباتك

ويارب ياهموم يديم الود بينا

تَـعِبَ الحِصـانُ حَبيبتي نَـفِدَ الرَصَـيد

فلترحـلي من خاطري ومن القصــيد

كم كان تحذيري وكم لـم تَسـمعي

فتذوقي ما قد جنيتِ تبصَري وتلوعي

ضـاق الطريقُ تبدلت لـُغة الـحـوار

ما عُـدتُ أُغري بالأمان وبالجـــوار

ما عــُـدتُ صوتـاً للطمـوحِ و للأمــل

لم يبق ممــا تَعــرفين سوى الرجُـــل

يحـنو .. يخـــاف ..

رجُلٌ يثـُور ويحتوي

يقـســــُو .. يـــذوب ..

رجُـل ٌ يغـارُ.. ويـكــتوي

ما عُدتُ أصلُحُ أن أكون لكِ الأمان

ما عُـدتُ سَــبّاقـاً و قد خَسِـر الرهان

زمنٌ تَـغَـير ..

لا وعُودَ .. ولا عُهودَ .. ولا شرف !

ذاك المُحـاربُ في كياني

قد تَـبدَلَ واختلَـف !

أصبحتُ شيئـاً في الفراغِ أو العدم ..

بك لا يليق !

لا صــِدقَ لا إخــــلاصَ عِـندي لا رحيـــق

ما عَاد لي صبرٌ ولا حـلمٌ ولا ذكرى تدوم

ما عاد فارسُـك المُـظـفرُ كـوكباً وســط النـجوم

ما عاد شـاعِـرُكِ المُـفَـضَلُ سـيداً خِصبُ الخيـال

وتجردت كل القصائدِ ..

لا تجارَبَ .. لا بُحورَ .. ولا جَمال

لا شـيء عندي يستحقُ لـِـكَي أهب

لا زهرةً ..لا نـــظرةً ..لا قلبَ صافٍ لا ذهب

لا تُستحب اليـوم دَاري للزيـــارةِ والبقـاء !!

والوقتُ لا يمضي معي .. لا تُنفقي عُمُراً هباء

رُدي إليَّ وديعتي .. والبـاقياتِ من الشباب

رُدي فقد أزِف الرحيلُ .. لا تراجُعَ لا إياب

رُدي إليَ حبيبتي .. ما قد وهبتُكِ من غرام

رُدي إليَ وداعتي .. وخُـــــذي ضلا لــَك كي أنام

إني إمام العاشقين و قد مضى زمنُ الإمامة

حان الرحيلُ فسارعي من قلبي تَصحَـبُك السلامة

يوسف المنيلاوي

ياتري زمانا حيكون احسن من زمانكم

كان ياما كان

كان فيه عصفور

قلبه صغير

ريشه قصير

حلمه يرفرف بره السور

كان انسان

من طين من نور

كان بيدور ع اللي يخضر قلب الناس القاسي البور

كان ياما كان قلب الحدوته رق وحن

ع البنوته في زمن اتجن

زمن الناس في قلوبها وحوش

زمن الناب والغاب ووشوش

تحزن غش وتضحك زور

كان ياما كان احلام بضفاير قلب وبس

ذنبها ايه لو قلبها طاير حب وحس

بنوته في حدوته تنام

وبتجري وراها الايام

هي وكل بنات الحور

قضيه السياسه والسلطه والمال والفن

أعزائي

انتهت منذ ربع ساعه الجلسه الاولي لمحاكمه هشام طلعت مصطفي ومحسن السكري

الساعه الان حسب توقيت القاهره الثانيه عشر والربع

بدات الجلسه في التاسعه صباحا وكانت القاعه والشوارع المؤديه لمحكمه جنوب القاهره بباب الخلق مكتظه

بالماره والعاديين ومن ذهب لمشاهده المحاكمه ومندوبين الصحف ووكلات الانباء ورجال الاعمال

وموظفي مجموعه طلعت مصطفي واقاربه

قبل بدا الجلسه حضر الي المحكمه كلا من هشام طلعت مصطفي ومحسن السكري كلا منهم بحراسه مشدده

تحت رئاسه اللواء عبدالواحد سوده مدير اداره تامين المحاكم

دخل الي القفص محسن منير علي حمدي السكري مواليد القاهره 1969

وبعده هشام طلعت مصطفي مواليد المنوفيه 1959

وكانت المره الاولي لوجودهم بمكان واحد منذ مقتل سوزان تميم

كان بينهم عازل في قفص الاتهام

حضر محسن السكري يرتدي ملابس السجن البيضاء

وكذلك هشام بس كانت ماركه (لاكوست ) وكانت واضحه جدا

هيئه المحكمه مكونه من المستشار المحمدي قنصوه

مشهود له بالكفاءه والعداله وقد حكم في قضيتي السويركي والمبيدات المسرطنه

وعضويه المستشار محمد جاد عبدالباسط

والمستشار عبدالعال ابراهيم سلامه

وبحضور المستشار خالد رستم المحامي العام بالمكتب الفني للنائب العام

قاعه المحكمه هي قاعه السادات الذي تم محاكمته بها سنه 1948

بدات الجلسه باثبات المحامين وهم

فريد الديب وطاقمه عن هشام طلعت مصطفي

انيس وعاطف المناوي عن محسن السكري

روجيه خوري محامي لبناني عن زوج سوزان عادل معتوق

ومحامي امرائي واخر بريطاني عن رياض الغراوي وهو زوج سوزان تميم ايضا

ومحامي عن سوزان تميم بصفته كان محاميها ووكلته في قضايا اخري

وطلعت السادات الذي طالب باسترداد اموال سوزان تميم لصالح الشعب المصري

وقدم للمحكمه لسته باسماء من تملكوا فيلات وقصور هديه من هشام طلعت مصطفي

وسمير الششتاوي موكل من قبل عبدالستار تميم والد سوزان الذي منع من دخول مصر

ويقال انه منع لقضيه جلب هيروين واخرون يؤكدون دخوله بعد القضيه 8 مرات للقاهره

ونبيه الوحش يطلب ان توزع تركتها علي محدودي الدخل

ممثل النيابه قام بقراءه قرار الاتهام

وكانت اول مواجهه بين هشام ومحسن ونفوا الاثنان جريمه التحريض والقتل

وانتهت الجلسه الساخنه جدا لكثره عدد المحامين وطلباتهم الكثيره

بتاجيل القضيه الي يوم 15 نوفمبر مع استمرار حبس المتهمين

وغادر المتهمين قاعه المحمكه بحراسه مشدده عائدين الي سجنهم

كانت جلسه اجرائيه

ما قمت بالتحري عنه ومعرفته اليوم في ردهات المحكمه

القضيه بها 14 ثغره قانونيه لنفي التهمه نهائيا

وغياب الدافع الجنائي وراء ارتكاب الجريمه وعدم اعتراف هشام واصراره علي التلفيق من رجال اعمال

22 عضو بمجلس الشعب قدموا طلبات احاطه لوزير الداخليه والنائب العام

ورئيس مجلس الشعب بالالتماس للافراج عن هشام افراج صحي

لمرضه بالقلب واللسكر والضغط وان القضيه ملفقه من جهات اجنيه هدفها تدمير الاقتصاد المصري

وللحديث بقيه يوم 15 نوفمبر

السحابه السوده

أعزائي

خلاص اتخنقنا حنموت كل سنه في شهري اكتوبر ونوفمبر

نفس المعاناه من السحابه السوده ودخانها الكثيف والهباب والغبار

وطبعا ده بمناسبه حرق قش الرز

وزير البيئه الله يستره ويعمر بيته ويخليه للحكومه

منع زراعه الرز في الجيزه والقليوبيه والشرقيه

واباح زراعتها في جمهوريه المنوفيه العظمه

وكمان بيصرح وبيقول ان السحابه مدتها السنه دي 20 ساعه

وده بالمقارنه عام 1999 السحابه غطت القاهره 100 ساعه

شفتوا الجهود البيئيه انجاز واعجاز في وقت واحد زي مابنشوف في اعلانات الشامبو 1x2

تسلملنا ياحكومتنا

التغير اللي حصل كمان بقوا يحرقوا قش الرز بالليل مش بالنهار

والناس نايمه عشان لو ماتوا من الاختناق مايحسوش

المزارعين بيحرقوا اكتر من 4 طن قش رز في اقل وقت ممكن

عشان ينضفوا الارض لزراعتها

والهواء بيتلوث بنسبه 40 %

زهير صلاح الممثل الاقليمي لمنظمه الصحه العالميه في مصر بيقول

حرق قش الرز بيمثل خطرا صحيا ويلحق بخسائر الاقتصاد المصري

واستمرار زياده التلوث مرتبط في كل التجارب العالميه بزياده امراض الجهاز التنفسي

اللي بينتج عنه ضيق التنفس والتهابات العيون والكحه وحساسيه الصدر

وكبار السن والاطفال اكثر عرضه لامراض الجهاز التنفسي .

دكتور احمد جبر استاذ قسم الانتاج الحيواني بجامعه المنصوره له رأي وهو

ان ممكن الاستفاده من قش الرز كعلف للماشيه او سماد طبيعي

او في صناعه الورق بس مافيش مكابس تكفي .

طيب ما الحكومه توفر المكابس وتدعوا رجال الاعمال وكبارات البلد للمشاركه في شراء مكابس

وانقاذ الغلابه اللي لو حصلهم حاجه مش حيقدروا يتعالجوا

هما حيلاقوها منين والا منين ياكلوا ولادهم والا يتعالجوا ويعالجوهم

حرااااااااااااااااااااااااااااااااااااام

بتاتي الرياح الشماليه ( غربيه وشرقيه ) وهي غالبا موجوده علي مدار السنه

بالملوثات من شمال القاهره وفيها الدخان الصادر من حرق قش الرز

والله والله والله ربنا خلق الهواء حق لكل الناس وببلاش كمان

بنلاقي المزيج من عوادم السيارت والمصانع وحرق القمامه وقش الرز

والحكومه وسكوتها وهي قاعده تتفرج طيب مش الهواء ده برضه بيتنفسوه مع الشعب

والا هما عندهم فلتر لتنقيه هواء التنفس حطينه طول السنه علي مناخيرهم

الامم المتحده بتقول ان السحابه السوده بتكبد مصر 6 مليار دولار سنويا

اضرار تلحق بالبيئه والصحه العامه

وكمان التلوث بيؤثر علي اثارنا بدرجه كبيره

والاثار مصدر رئيسي للدخل

يبقي ياعيني عليكي يامصرحتعملي ايه في كل البلاوي اللي عندك

اما تقرير دكتور عصام الحناوي في دراسته عن تلوث هواء المحروسه الملقبه بام الدنيا

تقع في ثلاث نقاط

1 - المنشات الصناعيه بالقاهره عددها 126 منها 15 صناعه كبيره

2 - وسائل النقل العامه والخاصه تقدر بحوالي 2 مليون سياره

بخلاف سيارت الشرطه والقوات المسلحه

3 - الحرق المكشوف للقمامه القاهره بها حوالي 155 طن قمامه يوميا

%46 مواد عضويه بقايا خضروات وطعام

%2 ورق 4% زجاج 4% مواد معدنيه 5% بلاستيك

%3كهنه و 185 مواد أخري

وبعد فرزها يتم حرقها في 4 مقالب معروفه بالقاهره

اما سبب السحابه بيكون نتيجه الانعكاس الحراري لان اشعه الشمس

بتقوم بتسخين الهواء بالقرب من سطح الارض وبصعود الهواء حاملا الملوثات

وتاتي الرياح لتقذف به باعتباره منطقه مفتوحه

كان في وزيره للبيئه اسمها الدكتوره ناديه مكرم عبيد

اصدرت تعليمات بمنع حرق قش الرز وتغريم المزارعين غرامات كبيره

واعطاء حوافز للمرشدين

ومع هذه الاجراءات تم توزيع الاتهامات بين مسئولي البيئه والزراعه

وبزياده حده الخلاف نجح وزير الزراع يوسف والي وكان يشغل منصب

نائب رئيس الوزراء بالاطاحه بوزيره البيئه في اول تعديل وزاري

الحقيقه دكتوره ناديه مالهاش حق ازاي تتجرا وتصدر قرارات بمنع حرق قش الرز وتحافظ علي صحه الشعب الغلبان

اللي اصبح مالوش تمن كل شيء في مصر بيرتفع تمنه ماعدا البني ادم المصري

ده بيرخص وممكن لما يموت يقولوا كلب وراح ومالوش ديه

وخلف الدكتوره ناديه في الوزاره دكتور ممدوح رياض

وكان مساعد وزير الزراعه

ولما اشتد الهجوم علي وزاره البيئه من قبل الصحافه

قام الوزير بتسفير الصحفيين العاملين في حقل البيئه لامريكا

لمشاهده المزارعين الامريكان وهم يقومون بحرق قش الرز الامريكاني

وبالمره يتصورا معاهم ويفرحوا بانهم رايحين امريكا بلد الشيكا بيكا علي راي محمد فؤاد المطرب

ورجعوا يكتبوا ان امريكا بجلاله قدرها بتحرق قش الرز

وكانت مهمه الوزير الدفاع عن حرق قش الرز وتبرئه المزارعين وتبرئه نفسه

وبالمره وده الاهم تبرئه وزير الزراعه

وبعده جاء ماجد جورج ونفس المشكله لازالت قائمه

والحكايه مالهاش نهايه والدوران في الحلقه المفرغه

يعني اوعوا واياكم يكون عندكم لاسمح الله امل في تغير شيء

وزي مابيقول القاضي في المحكمه

حكمت المحكمه باستمرار الوضع علي ماهو عليه والمتضرر يلجا للقضاء

طيب شعب مصر كله متضرر بس حيعمل ايه مسلم امره لله

وعمار يامصر وسلملي علي البدنجان

ويارب يديم الود بينا

أحلم بالتغير

أعزائي

دكتور باسم من اصدقائي بعتلي انشره مقاله وبيقول انها الجزء الاول

والله باين عليه يابيحب يا بيشاور قلبه انه يحب

لان الحب مش بينفع معاه اننا نشاور عقلنا

وكمان بقولكم اشوفكم علي خير لاني حغيب عليكم شوي

ادعولي ارجع تاني

نشوف باسم كتبلنا ايه

عن التغير

بحلم دائما بحاجة تغيرني ,نفسي في الحقيقة حاجة تغيرني بجد وساعات بسال نفسي انا ليه مبتغيرتش ليه عزيمتي دايما بتوقفني حتقولي انت

عايز تتغير ليه هو انت وحش الجواب لا ابدا بس التغيير شيء مهم حاجات كتير ممكن تكون غير راضي فيها عن نفسك مفيش حد كامل ليه

متحاولش توصل لجزء من الكمال من انك تغير نفسك وتتمرد على الوضع الحالي

مثلا ليه متحاولش تغير انك عايش من غير حب بانك تحب وتخلص من قلبك للشخص اللي بتحبه ليه متحاولش تتمرد على الحياة المملة بانك

تسافر تطلع في البحر تاخد مركب يومين جوة البحر تعيش انت والسما والسمك وصوت المية حواليك وتقابلك مشاكل وتحلها, كتير من

صحابي بل منهم اللي متجوز ومخلف وبيعمل كدة ولو يوم في الشهر .

ليه مثلا متحاولش تطور لغتك الاجنبية وتتعرف على ناس جداد واصدقاء جداد من بلدان مختلفة وثقافات تانية وياسلام لو تحب بنت منهم

بدل ما انت متعرفش ومبتتجوزش غير من بنت بلدك حاول تشوف ثقافات تانية شوف الناس دول بيحبوا ازاي جرب مثلا

خد قرار انك مش هتاكل غير كل شيء صحي واحلم بان جسمك يكون مانيكان وتلعب رياضة كل يوم وتاكل وتشرب كل الحاجات الصحية

زي الشاي الاخضر اللي هو افضل مضاد للاكسدة وانك تمنع الدهون تماما من اكلك وانك تعمل طبق التبولة وتاكله مع اكل مشوي او

مسلوق هتلاقي نفسك بتلبس هدوم مكنتش تحلم بيها وهتلاقي الناس بتبص عليك وانت ماشي في الشارع.......الله على نظرة البنت وهي

بتتابع ولد اعجبت بشكله في الشارع او العكس احساس بيكون حلو بيقولوا ان اسعد لحظة في حياة البنت وهي بتتعاكس في الشارع بس طبعا

تكون معاكسة مؤدبة مش من اللي بنسمع عنها اليومين دول .

ليه مثلا متحاولش تتمرد على الوضع الحالي والرتابة الحالية واننا عايشين لروحنا بانك تروح ملجأ ايتام زي دار الاورمان مثلا او بنك

الطعام او جمعية رسالة وتكفل يتيم ماديا جوة الملجأ وتلتزم بالولد ده..... وتعيد عليه في العيد ومش هيكلفك اكتر من متين جنيه في الشهر

ومش هيصدعلك دماغك ولا حاجة بالعكس ده انت هتحس ان حياتك ليها قيمة وان ربنا هيباركلك في مالك وصحتك ورزقك وكمان تدخل

الجنة صدقني هتحس من جواك انك انسان طاهر وليك قيمة في الحياة ولو كانت حالتك المادية مش حلوة ممكن تشارك انت واربعة في كفالة

طفل واحد وهيكلفك حوالي اربعين جنيه تقريبا في الشهر

ليه متحاولش اول ما تدخل البيت بدل ما تكون مكشر ومقروف تقبل مراتك ولو قبلة واحدة على خدها او حتى ايدها مش عيب بس الفعل

البسيط ده هيكبرك في نظرها كتير وهيكون تغيير في حياتك وهيريح بالها وبالك وتحس انها فعلا خرجت من بيت ابوها لواحد بيحبها مش

بيستعبدها ويقرفها وياريت عشان خاطري لو تبوسها قبل النوم بوسة يومية تكتبلك السعادة معاها طول عمرك ايه المانع....... اتغير..........

وجرب وخلي بالك مهما زعلتوا من بعض حافظ على العادة ديه ممكن تبوسها وانت زعلان برضه هي هتحسها وهتصالحك صدقني هتفرق

معاك .

اما بالنسبة عن موانع التغيير ده فيه موانع نفسية واسرية نتيجة لانعدام الحب والتفاهم سواء بين الاب والام وبينك او الاخوة او الاسرة او

حتى الزوجة بس اسهل واحدة تقدر تبدء بالتتغير معاها على مستوى الاسرة هي زوجتك ابدء بالتغيير معاها عشان تخلق راحة بال في بيتك

ساعتها الاشكال التانية للتغيير هتيجي بسهولة اما بالنسبة للي متجوزوش زي حالاتي فدول هينالوا مني اهتمام كبير لاني هقرا كتير عن ايه

موانع التغيير ده وهكلمكم فيها وهديكم افكار كتير عن التغيير

الي اللقاء في الجزء التاني

دكتور باسم

مش قلتلكم دي بدايه لقصه حب

وزي مادايما بنهي معاكم واقولكم ربنا يديم الود بينا

ويارب ارجع تاني وابقي معاكم

ادعولي

باي

مسلسل لكل مواطن

أعزائي

رمضان خلص وخلصت معاه هوجه المسلسلات

سمعت من الناس وقريت في الجرايد ان عدد المسلسلات 48 مسلسل

يعني بمعدل كل نص ساعه مسلسل

اللي بيتفرج علي اكتر من مسلسلين بيجيب وقت منين وبيقسم يومه ازاي

الا لو كان مش وراه حاجه تشغله غير المسلسلات

انا كنت بتابع مسلسل واحد وكده رضا هو مسلسل الدالي

لاني شفت الجزء الاول في رمضان اللي فات

وكمان لاني بحب نور الشريف وسوسن بدر

و كنت عايزه اشوف نهايه الرجل الذي لا يقهر الملقب بسعد الدالي

احداث المسلسل اجتماعيه بوليسيه دراميه

يعني علي كل لون يابتسته زي مابيقولوا

سعد الدالي صعد من الصفر ليكون وزير الاسكان وكان ناصري

وله علاقه شخصيه مع الرئيس الراحل انور السادات

ويملك مجموعات شركات مهوله في مصر والخارج

بيتعرض لمحاوله اغتيال بس بينجا منها وبيفقد ابنه الكبير

ولما بيكتشف مين ورا مؤامره الاغتيال يبدا في تصفيه حساباته

ده الملخص

الجزء الاول كان احسن كتير من الجزء التاني

لان التاني كان فيه تطويل ومط كتير مالوش لازمه

وكانت حلقاته 36 حلقه تصوروا

طبعا لو قدروا يمطوها وتبقي 45 حلقه ماكانوش حيتاخروا وده سببه الاتي

الحلقات بيسوقوها للفضائيات العربيه اللي بتبث برامجها في البلاد العربيه

اوربا امريكا واستراليا

بتشتريها من شركه الانتاج بالساعه مش بالحلقه وكل ما كان عدد الساعات كبير

اجرها يبقي اكبر يعني ( حاجه ببلاش كده )

ويقال ان في جزء تالت يعني معاناه جديده للمشاهدين في رمضان الجاي

المعاناه بتكون لسببين

الاول هو كميه الاعلانات اللي تخليك تنسه تسلسل الاحداث

وماتقدرش تركز تركيز كامل

والاعلانات مش كتيره وبس مدتها طويله يعني ممكن تقوم تعمل شاي او قهوه

وترجع تلاقي الاعلانات شغاله ما انتهتش

والمسلسل بيذاع علي كل الفضائيات وكمان القنوات الارضيه

يعني لو مالحقتش تشوفه علي قناه لانك مش فاضي ممكن تفتح اي وقت وتدور حتلاقيه

واذا جالك تليفون واضطريت ترد ممكن ترجع تغير

المحطه حتلاقي الجزء اللي فاتك علي قناه تانيه

في نفس الوقت يعني مش حيفوتك اي حاجه

ممكن تقول انهم بيطردونا

وممكن لو فتحت الحنفيه تلاقي مسلسل الدالي نازل بدل الميه

المعاناه التانيه ودي الاصعب

انك بتتفرج علي كميه من القصور والفيلات والعربيات

والمكاتب والشركات الموجده في المسلسل بتديلك انطباع ان مصر كلها اغنياء

مافيهاش ناس تحت خط الفقر ولا عشوئيات ولا اولاد شوارع

ولا شباب مش عارف يشتغل وبالتالي مش عارف يتجوز

ولا موظفين شقيانين بيجروا ورا رغيف العيش وفستان او بنطلون يستر ولادهم

و يدبرا ثمن الدروس الخصوصيه منين الا بشغل اضافي اذا اذا اذا لقوه

ولا في اتوبيسات مهكعه مش قادره تمشي والعادم اللي طالع منها بيخنق اللي ماشين في الشارع

ولا ميكروباصات مكسره الناس محشوره فيها حتي اللي بيساعد السواق ويقف وينده

ويقول مثلا مدينه نصر عباس العقاد العاشر بيقف علي الباب

لان في ناس كتير جوه الميكروباص بالظبط زي علب السردين

بصراحه بيستفذوا الناس وبالاحري الغلابه

نرجع لنور الشريف اللي مش بيختلف علي تمثيله اتنين لانه زي مابيقولوا السهل الممتنع

وسوسن بدر اللي بحسها وحده قريبتي بنت خالتي بنت عمي

اجمل مافي المسلسل ان سعد الدالي كان شريكه وصديق عمره رفقي عزيز

من الاسم تعرف علي طول انه مسيحي

الله عليهم قد ايه شفنا الحب والصداقه بينهم

وده بيورينا ان المسلم والمسيحي اخوات واصدقاء عمر

الشيء اللي مش متخيلاه ان في بني ادم عنده الكميه الكبيره اللي شفناها من الاعداء

لانه ناجح مش كل ناجح لازم يربي عدوات مع الناس

وكمان المستفذ كميه الحراسه اللي بتلازمه

ياحرام الناس الغلابه بيتخضوا من المناظر دي

برضه المسلسل خلص ونهايته مفتوحه ولازم ننتظر لرمضان الجاي وعليكم خير

عشان نعرف نهايته ان لم يكن له جزء رابع

كفايه كده اكيد مليتوا مني

ويارب يديم الود بينا

حائرة

أعزائي

شاعرنا يوسف المنيلاوي خص مدونتي المتواضعه بهذه القصيده

انتوا كلكم متعودين علي قصايده السياسيه

بس دي حتكون المره الاولي تقروله قصيده عاطفيه

بشكره جدا علي انه اختصني بهذا الشرف

قراءة في إمرأة ..
----

مُذ عرفتُك .. وأنتِ دوماً حائرة !

دربٌ يودعُكِ وآخر يحتويكِ..

عبثٌ بذاتِ الدائرة

كٌل الدروب مُغبَّراتْ ..

مُتشابهاتْ

وإنْ بَدَتْ للآخرين مُغايرة !!

بطفولةٍ وبراءةٍ

تثبُ المشاعر ثائرة ؟!

والدمعُ في عينيكِ بوحٌ مُستقر

تتماسكينْ .. فلا يَفر

وأراكِ يُسعدُكِ البكاء ..

ويذوب سِترُكِ بالمساء !

تتحولين مع الرُواح ..

تتعاظمين مع الصباح ..

تتألقين مُكابرة ..

تقفين للدنيا

وخلفُك ألف ضعفٍ مُستكين !

تتنمرين ..

وبرغم أنَّك تُدركين

كم أنت حقاً .. حائرة !

تمضي الليالي بارداتْ ..

مُتماثلاتْ

بكِ تحتفي كُل الوسَائد ..

والمرايا

ويستكين الشوقُ بين الهُدْب فيكِ

وينطفئ وسَطْ الحنايا !؟

مَن يدركُ المكنون أو يَرِدُ الخفايا ؟!

مَن يقرأ الفصل الأهمْ !؟

ويعتلي تلك القممْ

ويغوصُ .. يسبحُ في الحممْ ؟!

ويُحركُ الأشواق فيكِ

ويقتلع منك الألمْ ..

ويفُك تلك الدائرة ؟!

كَم أنت حقاً حائرة !

مَن يجعل الأيام عيد ؟

مَن يحتويكِ ويكتوي !؟

مَن يحتسيكِ ويرتوي ..

بوداعتِك ..

وحقيقتِك

ويخُط فوق أنوثتك

بيتُ القصيد ؟!

مَنْ يجعلُ الأيام ..

زهر العُمرُ

عيد ؟

مَنْ لليالي الباردة ؟!

مَنْ للعيون الشاردة ؟!

ومتى يعود لها الضياء ..

والإنتماء

متى يُغادرُكِ الأُفُولْ

وتزدهر شفتاكِ .. تُثمرُ

حول نهديك الحُقُولْ ..؟

وتغتسل بالعطر كُل خمائلك ..

وتستكين ضفائرك

وتستظل بها هضابُك

والسهولْ

وكما يليقُ ..

يزدان ثغرُك بالرحيقْ

وتنامُ فوق زراعُك الغضُ الرقيقْ

قصائدي ..

وتنعمي .. وتأمني ..

وتُثمري .. وتنتمي ..!؟

مَنْ يـنـزعُ الخوف المُقيم

مَنْ يقهرُ الليل البَهيم ..؟!

صُبي مرار الكأس فوق الماضيات

صُبي ..

إن الدقائق مُسرعات

تجردي ..

تجددي ..

تمردي ..

تطهري !

مُدي يقين الحُلم

نحو الآتِ

قد نغتسل بالدمع مِنْ أوجاعنا

لكن دمعاً ما أعاد مَواتِ
-----

استاذي بشكرك وبقولك

يارب يديم الود بينا

ح نروح فين

ح نروح فين؟

كفاية

فرحنا يومين

كفاية

وياما قلنا

ياحبيبي وياما اتهنينا

لايوم غلبنا

م اللي في قلوبنا

ولا دبنا من دمع عينينا

لكن اللي سهر علي طول

احساس كان حارمني النوم

في اللحظه الجميله يقول

راح يخلص ده كله في يوم

ومافيش حكاية من غير نهاية

قول للزمان ارجع يازمان

أعزائي

النهارده حكتب في موضوع بيهم كل حواء كبيره او صغيره

وكمان اعتقد ان ادم حيقراه برضه من باب العلم بالشيء

النهارده حيكون الحديث عن جمال حواء

الجمال لازمله بشره نضره يعني من غير تجاعيد وده بقي أمر سهل جدا

لان التجاعيد يمكن علاجها باكتر من طريقه

الليزر

الكولاجين

البوتوكس

دول الطرق التلاته اللي ممكن يرجعوا نضاره وشباب البشره تاني

الليزر

---

الليزر الخفيف علاج غير جراحي بيستخدم فيه نوع من الليزر الغير عميق

بيطلق علي الطبقه الخارجيه من الجلد وده بيكون بواسطه رش اسبراي من نوع معين لحمايتها وتبريدها

وفي الوقت نفسه بيقوم الليزر المستخدم بتسخين الاوعيه الدمويه في الطبقه الباطنيه للجلد

وده بينشط عمليه انتاج الكولاجين بطريقه طبيعيه

وده بيخفف التجاعيد بنسبه 50% ومرات بيحتاج استخدام نوع من الليزر العميق

بس ده بتكون مدته اطول للنتيجه النهائيه للوجه

الطريقه دي قريبه من عمليات شد الوجه اللي بيستخدم فيها درجه عميقه مركزه من اشعه الليزر

بتوجيها الي عمق الجلد وهي بتقوم بتسخين انسجته وده بيساعد علي التخلص من طبقات الجلد العليا المتجعده

التي تحتاج لازالتها وفي نفس الوقت تنشط عمليه انتاج الكولاجين داخليا

وبعد العمليه بيبان الفرق بس الجلد بيضل ملتهب لمده عده شهور

وبتحتاج لتخدير .

الكولاجين

----

نوع من البروتين بيستخرج من الابقار وده بيكون بروتين طبيعي

بيتم حقنه تحت خطوط التجاعيد فتظهر ناعمه

واسلم طريقه بتكون باستخراج الدهن الخاص بحواء من منطقه المعده او الفخذين

ثم يحقن به في الوجه ودي بتسبب الام فبتتم بالتخدير الموضعي

ويتم التحسن بمعدل 60% وبتختفي التجاعيد لمده سنوات .

وممكن تتم بالاسفنج الناعم

بيجهز عده انابيب اسفنجيه من احجام مختلفه تعد لهذه العمليات

تزرع في مناطق التجاعيد العميقه

وتستخدم في علاج الخطوط المتجعده بين الانف والشفاه ولزياده سمك الشفايف .

ويمكن حدوث التهابات تحتاج للعلاج بالمضادات الحيويه .

البوتوكس

----

هو اختصار لاسم ( يوتولينيوم توكسين ) وهو سم مستخرج من البكتريا

عند حقنه يحدث شللا في عضلات الجبهه ويمنعها من التقلص وبذلك يمحو التجاعيد

وتحتاج هذه الطريقه الي اربع حقن لكي تزول التجاعيد

يمكن استخدام حقنه حول الشفتين في المنطقه المتصله بالانف

واذا تم الحقن خطا ولو لجزء من الملي تكون النتائج مؤسفه

تهدل الجفون او تجمد الجبهه بحيث يصعب تحريكها

اما اذا كان الحقن الخطأ في منطقه الفم فان شكل الابتسامه يتغير تماما

وفي حالات كثيره لا تتحسن كما يجب

وننصح بعدم اجراء هذه العمليات قبل التفكير في النتائج

وتكون علي يد طبيب متخصص واجرائها في اماكن مزوده بجميع الاجهزه الطبيه اللازمه

علي فكره في رجاله كتير بيعملوا العمليات دي مش الستات بس

يعني الكل عايز يقول للزمان ارجع يازمان .

حطيتلكم صوره مي عزالدين لانها جميله ومش بتحتاج لميك اب كتير

لان وشها مافيهوش ديفوهات بتحتاج انها تخبيها

ويارب يديم الود بينا

تهنئه بالعيد السعيد

أعزائي كل عام وانتم سالمين