أي كلام

أعزائي 

متاخره عليكم بس الدنيا بقي لونها زي مابيقولوا فحلقي

مافيش حد مطمن ولا حد مرتاح كلنا قلقانين 

حمله تمرد علي اشدها في كل شوارع الجمهوريه 

30 يونيه خلاص قريب جدا 

بس الحقيقه انا قلقانه مش عارفه حيحصل ايه ربنا يجيب الخير ويرفع الغمه وينصر الامه 

----

عمكم الحاج كان بيخطب امبارح  قال ايه عشان ميه النيل 

وعمل بوليكه كبيره  المشجعين قابلوه بالتصقيف وصوره 

عاملين سيناريو لفيلم هابط 

مش بدل ما كان يعمل البوليكه دي كان راح يعزي في 

النقيب محمد ابو شقره 

اللي نشوه في سينا  ده بجمله الظباط اللي اتقتلوا 

امبارح والدته قطعت قلوبنا وهي  بتشيع جنازته 

خلي مرسي ووزير الداخليه ينبسطوا

طبعا الصوره بشعه بس لازم الكل يعرف بيتعمل فينا ايه 

---

وعم الحاج بعد عملته السوده في اثيوبيا عامل مؤتمر عن النيل 

وبيقول ندافع عنه بدمائنا علي اعتبار ان هو والاخوان عندهم دم 

وفيلم ارضنا العطشانه نرويها بدمانا 

فاكر انه محمود المليجي 

حسبي الله ونعمه الوكيل في كل اللي ظلموا مصر والمصريين 

وقال اننا حنصبر علي المصريين 

وصبرنا مالوش حدود 

هو مش مصري والا الاخوان دول ليهم جنسيه اخوانيه ؟

---

الصوره دي لانجازات الحاج ابو شيماء 

شفتوا ده اعجاز مش انجاز

والمضحك انه يعمل اجتماع مع عاهات مصر وكل واحد يدبر حاجه  فاكر حاله 

الكابتن كولومبووالمؤتمر مذاع علي التليفزيون وهما بيدبروا خطط عبيطه 

واذ فجاتن اكتشفوا انهم علي الهوا  باين حد فيهم جاله زكام من الهوا 

عشان كده اكتشفوا . والا فاكرين انهم في الكاميرا الخفيه 

طيب الكاميرات الموجوده كانت بتصور ايه ؟

العته له ناسه برضه 

---

مسلسل قطع الكهربا والنور شغااااااال 

يوميا اكتر من مره 

من كام يوم قطع النور عندنا في البيت من الساعه 2.45لغايه 8.45

6 ساعات عادي والجو درجه حرارته 43 

وماله ما الشعب يفطس ولا يهمهم خلي الدنيا تفضه والزحمه تخف 

---

الست آم قرقر 

النايبه السايقه في مجلس الشعب الاخواني 

كل شوي تطلعلنا بكلام غريب جدا مالوش اي اساس  

مره قالت ان احتياجاتنا متوفرمنها 70%

وده في زمن قياسي من حكم الحاج في  في اقل من سنه 

وامبارح بعد ماخطب الخطبه العصماء قالت النهارده

 أم ايمن : خطابات الرئيس مرسي دائماً تبعث على الأمل والسرور ، واليوم فاجئني بشدته ، أكاد أُجزم أن الأعداء باتوا في جحورهم يرتعدون من لهجته ، نعم إنه القائد ، الفارس ، المغوار .. أرأيتم كيف يضحي من أجل مصر ؟ حفظك الله لنا !

شفتوا ازاي  بس ياتري هي بتسمع الكلام اللي 

الشعب مش بيسمعه فين؟

---

في لفه علي الخضار والفاكهه دي الاسعار 

طبعا الغلا بقي بشع ومصر بقت العيشه فيها غاليه 

ويرضي مين  اللي احنا فيه 

ده الغني بيشتكي يبقي الفقير يروح يموت والا ايه ؟

الملوخيه 4 جنيه 

البيضه لما تشتريها لوحدها مش كرتونه تمنها 

1 جنيه 

عنب 12 جنيه 

برقوق 20 جنيه 

التفاح المصري الصدمان العدمان  5 جنيه 

التفاح اللي يتاكل 18 جنيه 

المشمش 10 جنيه 

البطيخ الكيلو 3 جنيه كان ب5 جنيه 

وممكن تقول انه خيار مش بطيخ 

الخيار 4 جنيه 

الطماطم4 جنيه 

الليمون 6 جنيه 

الفراخ البيضه 16جنيه للكيلو

الفراخ الحمرا 18 جنيه للكيلو 

الفراخ البلدي المخلطه 20 جنيه للكيلو

البلدي البيور 25 جنيه للكيلو

البوفتيك 120 جنيه الكيلو

اللحمه الكندوز الكيلو 75 جنيه 

الهوت دوج في السوبر ماركت الباكته فيها 5 صوابع 

20 جنيه 

كرتونه الميه المعدنيه 40 جنيه 

وتفضل تدور عليها 

البلح بتاع رمضان 20جنيه 

طبعا عارفين ان الكهربا غليت 

والبشره الساره ان الغاز الطبيعي  

ارتفع سعره من 10 قروش ل50 قرش ده للمتر

مش حقولكم علي اسعار المكسرات بعدين يغمن عليكم 

شفتوا بقي الهنا اللي احنا فيه 

---

 من كام يوم حصلي حاجه ونزلتها علي الفيس بوك 

 

وانا راجعه لقيت ميكروباص زنق عليه وحكلي الرفرف اليمين ,, ولما شاورت للسواق بما معناه انت مش شايف لقيته شوحلي ونزل من الميكروباص وبيقولي يالله غوري وشتمني بامي شتيمه ابيحه بما معناه ان امي ست مش كويسه وكمان قالي عامله نفسها هانم وهي ...كلمه برضه ابيحه , لقيت حالي مش عارفه اعمل ايه الناس اتلمت رحت نازله من العربيه والناس اللي واقفه كانوا عايزين يحجزوا بيني وبين سواق الميكروباص قلتلهم انا بس عايزه اعرف هو قال ايه ما سمعتش كويس والحمدلله اني كنت لايسه سليبر رحت قلعاه ورقعته بيه علي وشه في وسط كل اللي واقفين بمافيهم السواق نفسه ورجعت علي عربيتي وانا بقول اصل لو كان في شرطه في البلد ماكناش اخدنا حقنا بابدينا , راجل كبير لقيته بيقولي تسلم ايدك يابنتي ,, ومشيت في حمايه العربيات اللي وقفت تشوف ايه اللي حصل .بجد برضه في لسه شهامه من الناس اللي بيعرفوا الاصول , ندمت اني ماكنتش لابسه كعب كنت فتحت دماغه وارتحت ..

وده نتيجه ان البلطجي يقدر يقاضي رجل الشرطه 

ورجل الشرطه مش حينفع يقاضي حد 

ده قانون عمكم الحاج 

---

نداء للصبايا اللي نازلين يوم 30/6
ﻟﻜﻰ ﺗﺤﻤﻰ ﻧﻔﺴﻚ ﻣﻦ ﺍﻯ ﺍﺧﻮﺍﻧﻰ ﻣﻌﻔﻦ ﺍﻭ ﺗﺤﺮﺵ ﻋﺴﻜﺮﻯ ﺯﺑﺎﻟﺔ ﺍﻋﻤﻠﻰ ﺍﻻ‌ﺗﻰ
1-ﻟﺘﺮ ﻣﺎﺀ ﺍﻭ ﺧﻞ
2-ﺧﻤﺲ ﻣﻼ‌ﻋﻖ ﻓﻠﻔﻞ ﺍﺳﻮﺩ ﻧﺎﻋﻢ (ﺍﻭ ﺣﺴﺐ ﻣﺎﺗﺤﺒﻰ ﻣﻦ ﺯﻳﺎﺩﺓ ﻓﻰ ﺍﻟﻜﻤﻴﺔ)
3-ﺧﻤﺲ ﻣﻼ‌ﻋﻖ ﺷﻄﺔ ﺳﻮﺩﺍﻧﻰ
4- ﺧﻤﺲ ﻣﻼ‌ﻋﻖ ﻣﺴﻄﺮﺩﺓ
ﺗﺨﻠﻂ ﺍﻟﻤﻜﻮﻧﺎﺕ ﻣﻊ ﺑﻌﻀﻬﺎ ﺍﻟﺒﻌﺾ ﻭﺗﻮﺿﻊ ﻓﻰ ﺑﺨﺎﺥ ﻭﺗﻜﻮﻥ ﻓﻰ ﻣﺘﻨﺎﻭﻝ ﻳﺪﻙ
ﻭﺍﻯ ﺧﺮﻭﻑ ﺍﻭ ﻋﺴﻜﺮﻯ ﻳﻘﺮﺑﻠﻚ ﺭﺷﻰ ﻓﻰ ﻋﻨﻴﻪ ﻋﻠﻄﻮﻝ ﻫﺘﺴﺒﺐ ﺍﻟﻌﻤﻰ ﻟﻤﺪﺓ ﺧﻤﺲ ﺩﻗﺎﺋﻖ
ﻭﺳﺎﻋﺘﻬﺎ ﺍﻟﺮﺟﺎﻟﻪ ﺍﻟﻲ ﺣﻮﺍﻟﻴﻜﻲ ﻛﻠﻬﻢ ﻫﻴﻘﻮﻣﻮﺍ ﻣﻌﺎﻩ ﺑﺎﻟﻮﺍﺟﺐ
ﺍﻧﺰﻟﻲ ﻭﻣﺘﺨﺎﻓﻴﺶ ﻛﻞ ﺍﻟﻲ ﺣﻮﺍﻟﻴﻜﻲ ﺍﺧﻮﺍﺗﻚ ﻭﻣﺤﺪﺵ ﻫﻴﺴﻤﺢ ﻟﺤﺪ ﻳﻀﺎﻳﻘﻚ يوم 30 يونيه 

 ماتخافوش كلنا حننزل 

---

انا عارفه ان المقال ممل ومش مترابط بس دي حاله كل المصريين 

واوعوا اوعوا تقلبوا الصفحه 

ابقوا معي