أعزائي
يوم 17 نوفمبر كان زي اي يوم عادي
صحيوا التلامذه اللي عندهم مدارس يوم السبت
لاستئناف الدراسه بعد اجازه راس السنه الهجريه
تلامذه صغيرين اطفال اعمارهم بين 4 و12 سنه
رايحين المدرسه زي كل يوم وكلهم امل في بكره
بس بكره ماجاش
ركبوا الباص وعددهم فوق ال60 فرد
تلامذه معهد نور الاسلام الازهري
الباص اخد التلامذه من المندره والمندره قبلي والحواتكه وبني عدي
وعند مزلقان القطار في قريه المندره
التابعه لمركز منفلوط
صدمه القطار رقم 165 اكسبريس اسيوط القاهره
وفي لحظه الاطفال تحولوا لاشلاء ودماء علي مزلقان السكه الحديد
كان ضحيه الحادث وفاه 52 طفل وطفله
في عائلات فقدوا اكتر من طفل
عائله فقدت 4 اطفال وبنت عمهم
وعائله فقدت 3 اطفال
ياحسره قلب امهاتهم عليهم
---
كان لازم وهما بينيموهم الليله اللي قبلها يقولولهم
يالله ناموا بدري عشان تركبوا الباص وتلحقوا مكان كويس في المشرحه قبل الزحمه
طبعا مصر كلها تابعت الحدث الجلل عن طريق الفضائيات
انما قناه تليفزيون مصر يادوب ذاعت بعد 7 ساعات
الفضائيات كانت بتبكي علي الاطفال
وقناه بلدنا بتذيع فيلم لاسماعيل ياسين
ابو الاطفال الاربعه كان متماسك قال لو في جرس تمنه 800 جنيه
موجود في المزلقان ماكانش حصل اللي حصل
---
شفتوا بقي اننا شعب مالوش تمن
طبعا المتهم هو عامل المزلقان لانه سابه مفتوح
ناس قالوا كان قاعد بيشيش
وغيرهم قالوا لا كان نايم
المحصله النهائيه وحده
لو العامل نام اكيد بيشتغل الصبح في مكان تاني
وده عشان مرتبه مش بيكفيه
واذا كان بيشيش ده ممكن عشان ينسه الفقر اللي عايش فيه
وبرضه مش بعفيه من المسئوليه
عمكم الحاج ابو شيماء ماكلفش خاطره واتصل بالمحافظ
اللي اتصل السكرتاريه الخاصه تبع معاليه
اوباما ركب هليوكوبتر عشان يتابع اعصار ساندي
وكان بيبكي لانه عاجز عن انقاذ ضحايا الاعصار
ودي كارثه طبيعيه مالوش دخل لا هو ولا حكومته بيها
عم الحاج يادوب تابع اثناء فترات الراحه اللي كانت
بعد مقابله اردوغان وبعدها امير قطر
بجد احنا شعب عايز الاباده هو حيقطع حاله
حيعمل ايه والا ايه
المرور والا الكهربا والا ارتفاع الاسعار والا الامن
وكمان ذاد عليها حوادث القطارات
هو كفايه عليه يصلي الجمعه ويروح في الموكب اللي بيتكلف قد كده
ويخطب زي امام المسجد عشان نقول عليه الرئيس المؤمن
ياريت الحكومه تصرف علي تامين القطارات احسن ماتصرف علي تامين موكب الحاج
ما انتو بتدعو لغلق المواقع الاباحيه
اغلقوا المزلقانات عشان ارواح الناس
مصر بقت منطقه كوارث نتيجه الاهمال
والتصارع علي الكراسي
عمكم الحاج قال مصر لن تترك غزه وحدها
ياعم بس ركز انت علينا الاول احنا الاهم
شوفوا انتوا الفرق بين الحدثين
احنا اصلنا زي القرع بنمد لبره
المستشفي اللي اتنقل فيها الاطفال لا فيها شاش ولا سرنجات
ولا امبولات بيكربونات الصوديوم ولابوتاسيوم ولا مغنسيوم
مش توفروا الادويه للمواطنين
ده حتي اللي بيحتاجه البيت بيحرم علي الجامع
مش انت اللي قلت قولوا وامرساه
ياريت تفتكر
( وان دابه عثرت بالعراق لسالني الله عليها لما لم تمهد لها الطريق ياعمر )
وقلت كمان انا رئيس كل المصريين بس نسيت تكمل المصريين الاخوان
انما اللي مش اخوان دول مش مننا
لما كنت نائب في البرلمان سنه 2002
بعد حادثه قطار العياط عند قريه ميت القائد
وده كان في 20 فبراير 2002
طالبت في البرلمان باقاله رئيس الوزراء ووزير النقل
ياتري حتعمل ايه حتقيل رئيس الوزراء
والا هذه نقره وتلك نقره
من الاخر كده كلامك وانت نائب غير كلامك وانت رئيس
برضه مش مشكله اكيد حتلاقي واحد غيره بدقن
\وصلنا لحاله يرثي لها
الشباب يطلعوا المظاهرات يرجعوا علي المشرحه
الشباب يروحوا ماتش الكوره يرجعوا علي المشرحه
حاجه توجع القلب
الدكاتره في اضرابات
البلطاجيه ملين البلد بس عارفين ياخدوا حقهم
ظلبط مرتبه مايكفيش يفتح بيت
مهندس مش لاقي شغل
محامي بيشتغل ويطلع عينه عند محامي كبير
يديله ملاليم وعامله زي الكاتب بتاع المحكمه
مدرس طافح الكوته وعشان يفتح بيت يدي دروس
رئيس وزراء مهمل
رئيس جمهوريه مش عارف يدير البلد
اوعوا تفتكروا ان الصوره دي قديمه من ايام مدرسه بحر البقر
لالالالالالا
دي صوره جديده بس للبلد اللي بيحكمها البقر
---
الحاج حيكمل ال4 سنين
بس ياتري الشعب حيقدر يكمل والا ممكن يقع منه كام مليون
في ال4 سنين الجايين
في الاخر شوفوا ده الختام
نقول لاهالي الاطفال البقاءلله
وربنا يصبر قلبهم
وبقول لكل الشعب المصري
البقاءلله في مصر
واوعوا اوعوا تقلبوا الصفحه
ابقوا معي
