11‏/11‏/2012

نام بدري واصحي بدري

أعزائي
تهنئه لكل اخواتنا واصحابنا وجيرانا الاقباط 
بتنصيب البابا تواضروس الثاني
الف مبروك للجميع
---
---
العريان والبلتاجي والاخوان عموما اللي بيطقوا حنك في برامج التوك شو 
ليه العصبيه الزايده في كلامهم 
ارائهم بقت عصبيه ومتوتره  وغاضبه 
عشان  مش عايزين حد يعارضهم  , وده ينفع ؟
ده حتي المحافظ الهمام السيد سعد الحسيني 
محافظ كفر الشيخ 
اللي اطلق الكلابعلي المعارض
ده بقي عشان ايه ؟
ياتري زي مابيقولوا انهم بيصروا علي تطبيق الشريعه !
والا كل الهيصه دي عشان السلطه ماتضعش منهم ؟

---
مليونيه تطبيق الشريعه دعا لها اكتر من تيار اسلامي 
المشاركين مش كلهم راحوا عشان السبب ده 
يعني مش عشان يطبقوا شرع الله ولا الدستور 
شوفوا ياكرام 
السيدات المنتقبات فرشوا في التحرير وقعدوا 
ياكلوا  ويشربوا 
زي مايكون يوم الجمعه المطبخ في بيوتهم بيتقفل 
جايين رفعين رأيه طاعه الزوج 
اجوازهم قالولهم ينزلوا التحرير 
ردوا وقالوا سمعا وطاعه 
يعني مالهمش اي دعوه باللي بيحصل 
تخرب تعمر هي بتطيع جوزها وخلاص 
وطبعا الطاعه اللي علي حق  حتكون في الانتخابات
الزوج يقول انتخبي فلان من غير تفكير تنتخب فلان 
وهي اصلا  ماتعرفش لا فلان ولا علان ولاترتان 
كمان سواقين  الاتوبيسات اللي كانوا موجودين في المليونيه
كانوا جايبين المشاركين من المحافظات 
يعني زي الرحله المدرسيه 
هما بس بيادوا عملهم 
الهتاف كان 
ياعلماني ياعلماني الاسلاميه حتحكم تاني 
زي مايكون العلماني كافر 
العلماني ممكن يكون مسلم او مسيحي 
يعني عنده دين 
---


 ---
في ناس مديه العقل اجازه مش بتستخدمه 
فلوس كتير حتتصرف عشان نقفل المواقع الاباحيه 
ومافيش عائد 
لان القنوات بتبث من الاقمار الاجنبيه 
عايزين يمنعوا الشباب انهم يشوفوا الصور العريانه علي النت 
طيب خير وبركه 
بس برضه الشباب حيشوف المجلات القبيحه وتلاقيها مرطرطه في المكتبات 
وبيشتروها في الخباثه 
بلاش الشباب اللي بيسافروا حيجيبوا ليهم ولاصحابهم مجلات اباحه 
وحتبقي تجاره المجلات القبيحه زي تجاره المخدرات
ولا حنحط امين شرطه اسم الله  
جنب كل شاب بيقعد علي النت 
مش بينفع نغير انسان هو مش عايز يتغير 
اهتموا بالشباب افتحوا النوادي باشتراك رياضي 
الشباب كلهم طاقه هي الرياضه الوسيله الوحيده
افتحوا الساحات الشعبيه  خلوا الشباب ينطلق 
اشغلوهم بالرياضه 
وساعتها الرياضه حتبقي شغلهم الشاغل 
ولا حيبقي تحرش ولا قنوات اباحه 
ولا افلام السبكي ولا قناه التت
---
فين رئيس الوزاره هشام قنديل ؟
مش سامعينله صوت 
هو باع الحكومه والا ايه ؟
ياتري درس كل الملفات والا نصها والا حته منها ؟
والا مش واخد باله ولا علي باله 
او ممكن يكون شاري دماغه 
مش حاسين ان في حكومه في مصر 
والا هي حكومه مؤقته  مش دائمه 
زي ما خيرت الشاطر قال !!!!
ربنا يديني طولت العمر واشوف وافرح بحكومه دائمه 
قولواأأأأمين
---
الحكومه جادلت كتير في مواعيد غلق المحلات 
وابقوا قابلوني لو اي قرار اتنفذ 
اللي اغرب من كده ان الحاج ابو شيماء 
بيقرر للشعب انه ينام بدري عشان يصحي بدري 
ويروح يصلي الفجر عشان تعم البركه والرزق 
طيب المسيحيين البركه والرزق مش حيحصلوهم 
اقباط اوربا وامريكا واستراليا واسيا وكل الدنيا
مش بتعم عليهم البركه ولا الرزق عشان مش بيصحوا بدري 
ويصلوا الفجر 
ياعم الحاج ربنا بيرزق لان الرزق عنده هو بس 
ويرزق من يشاء بغير حساب 
اللي بيصلي ربنا بيرزقه واللي مش بيصلي برضه ربنا بيرزقه 
مش فاهمه ياعم الحاج عايز تتدخل بينا وبين ربنا ليه ؟
طيب ليه ما كانش في برنامجك الانتخابي 
النوم بدري والصحيان بدري بالبوروجي 
فشر اي كليه عسكريه 
لصلاه الفجر حاضر 
علي فكره الصلاه مش اجبار بامر رئيس الجمهوريه 
ده ربنا مش بيجبرنا انت جاي تجبرنا 
باماره ايه ؟
وعم الحاج بيخطب كل جمعه بيحسسني انه امام مسجد
ضل طريقه  وبقي رئيس جمهوريه 
وبيزور ماشاءالله كل جمعه مسجد شكل 
هي مصر مافيهاش مشاريع يزورها 
ولافيها مصانع ولا مدارس ولا جامعات ؟
بيخطب كل جمعه ليه ؟
ياريت يخطب بس في المناسبات زي كل رؤساءالجمهوريه 
حتي خلينا ننتظر حيقول ايه 
يحسسنا ان كلامه زي الفاكهه الحلوه اللي بنشتاقلها 
مش زي سندوتش الفول البايت  المقدد في التلاجه بقاله اسبوع 
---
 الخارجيه المصريه استدعت سفير ميانمار  (روهينجا )
عشان تسال وتعرف وتتقصي عن اعمال العنف  والاضطهاد 
اللي استهدفت المسلمين هناك 
مش الاول نشوف الشعب المصري المضطهد 
انبوبه البوتاجاز المواطن المصري بيتشتريها ب80 جنيه 
المواطن المصري بيلاقي لتر البنزين بصعوبه 
الغاز تبع المنازل حيغلي من اول ديسمبر 
الكهربا غليت والفاتوره بتجيلنا عليها 
مصاريف نظافه  اقل حاجه 8 جنيه بالاضافه للكهرباء
ومافيش حد بيلم الزباله 
يقوم المواطن يجيب زبال ويدفعله شهريه 
غير الغلا والكوا اللي عايش فيهم المواطن المصري المضطهد 
الخارجيه شغاله لحسابها والا هي تبع الحكومه 
مافيش قلق علي المواطن المصري  اياكش يولع 
انما القلق علي المواطن المسلم في ميانمار 
ياداهيه سوده  ياتري وياهلتري عاملين ايه هناك قلب الحكومه معاكم 
ياتري وفرتوا للمواطن المصري شارع مرصوف مش متكسر وحالته بالبلا
عدلتوا المرتبات 
ثبتوا الاسعار 
وظفتوا الشباب اللي طول يومه قاعد علي القهاوي 
لما تريحوا المواطن المصري 
ابقوا اقلقوا علي ميانمار 
حكومه خنيقه 
---
بعد الثوره عرفنا بشر زي الزباله 
اللي بنلاقيها في الشوارع والنواصي متكومه 
الزبالين بيجمعوا الزباله من البيوت 
مين بقي حيجمع الزباله البشريه ؟
---
شاديه زمان غنت وقالت 
سينا رجعت تاني لينا ومصر اليوم في عيد 
لو حبت تغني في وقتنا الحالي  ممكن تقول ايه 
ضيعنا سينا من ايدينا ومصر اليوم في ......؟
---
واحده سالتني وقالتلي 
ليه الثوار الحقيقيين قاعدين في مدرجات المتفرجين ؟
رديت وقلت ماهو ده زمانا بينطبق عليه المثل القديم 
القوالب نامت والانصاص قامت 
---
زمان كنا بننتظر ماتشات الاهلي والزمالك عشان نشوفها ونحضرها 
دلوقتي بقينا نتفرج علي ماتشات الاخوان المسلمين والسلفيين 
ربنا يستر علينا وعلي اللي جاي 
استمتعوا بالسيء لان الاسوا قادم لا محاله 
---
واوعوا اوعوا تقلبوا الصفحه 
ابقوا معي




هناك تعليقان (2):

جحاالمصرى المصرى انسان يقول...

ilمن كل فيلم حكايه طيب خلينا فى الجماعه بتوع الشريعه كفاية مضلمهاها خالص مافيش شويه ابيض

mido kenzo يقول...

اّسف أنى بطلع بره الموضوع بس ممكن تبادل نصى مع مدونتي المتواضعه
http://paragoncomputer.blogspot.com/