أعزائي
في زكري العباره وزكري موقعه البغل الشهيرة
موقعه لا كانت علي البال ولا الخاطر
نقدر نقول انها مجزره مش موقعه
فاقت الخيال قالوا ان مصر حتتحرق يوم 25 يناير
انما عدي اليوم علي خير وبعده كام يوم
بس كانوا مخططين ومرتبين زي مابيقولوا
لبدولنا في الدره
مين بيخرب البلد ؟
مين بيشعل الحرائق؟
مين بيدخل السلاح لمصر من سيناء وليبيا ؟
مين بيقتل شبابنا ؟
مابقاش فيه ظابط ولا رابط
ولا قيود ولا فرامل
الحكومه والعسكري وقبلهم النظام السابق
كله بيدوس بنزين
مافيش فرامل بس هي مش بايظه
هي مرفوعه من الخدمة
والشعار الجديد
اقتلني شكرا
مجتمع الغابه هو المسيطر علي مصر
ماحدث ليس شغب ملاعب بل بلطجة دولة !
واعتداء مقررا ومكررا من مسلحين مجهولين
ايه ذنب الامهات اللي اولادهم راحوا فرحانين يشجعوا ناديهم
رجعلهم في نعوش ملفوفه بالعلم
ايه ذنب 74 عيله تشرب كاس الفراق المر علي اولادهم ؟
مين اللي دخل عربيتين فيهم بلطجيه بيقولوا عليهم مشجعين
قبل ماتبتدي المباراة ب5 دقايق؟
وضابط قالهم مش بتضربونا اشربوا بقي ؟
يعني ده تخليص حق ؟
اللي قال كده ماصعبوش عليه بلاش الشباب ما فكرش كام ام حتفقد ابنها ؟
مافكرش ان ممكن اخوه او ابنه او قريبه ممكن يكون فيهم
مين قفل بوابات خروج مشجعي النادي الاهلي بالجنازير ؟
اصغر شهيد ياحسرة قلبي عليه كتب علي الفيس بوك قبل الماتش
لفوني بعلم مصر واتبرعوا بقرنيتي لمصابي الثورة
بور سعيد طلعت في مظاهرة سلميه وكان هتافهم
بورسعيد ياحرة الخاين يطلع بره
اهالي بورسعيد مسكوا واحد من البلطجيه
اسمه محمد مسعد
الاهالي ماسلمهوش للشرطه اتحفظوا عليه في مخزن من مخازن المحلات
وصرح باسماء 9 من المشاركين في قتل شبابنا
صوروه وهو بيرمي الشباب من اعلي المدرجات
مش فاهمه ايه قلوبهم اتحجرت ؟
سلموه للجنة تقصي الحقائق التابعه لمجلس الشعب
ورجع انكر كل اللي اعترف بيه
الشرطه ممكن تقول انه مختل عقليا
او يقولوا ماس كهربائي هو اللي ادي لاطفاء النور في الملعب
مين المسئول عن اطفاء النور في ملعب به الالاف ؟
الحكومه ومجلس المشيرباشا مش عايزين يتحركوا
متفرجين قلبهم مش واجعهم علي الشباب
شهود العيان قالوا ان مافيش تفتيش عند دخولهم الملعب
وطبعا مشجعين المصري الدائمين في بورسعيد
عارفين بعض او وجوهم مالوفه لبعضهم
قالوا ان في اشكال غريبه لابسين فانله نادي المصري
وحاطين غطاء راس عشان يكونوا معروفين
ماحدش يقربلهم هما دول اللي حيقتلوا ويحرقوا ويخربوا الدنيا
كانوا بيرموا صواريخ جديده بيقولوا ان تمن الواحد بيوصل
من 100 ل200 جنيه
بتوصل لنص الملعب يعني مش شماريخ عاديه
وطبعا ده بجانب السنج والسلاح الابيض
ازاي دخلوا من غير تفتيش ؟
اي شاب مهما كانت ميزانيته تفتكروا يقدر يجيب حتي صاروخ واحد ب 100 جنيه ؟
الدوله مسئوليتها حمايه الشعب
حاليا الدوله مسئوليتها قتل الشعب
وقال ايه اتحفظوا علي غرقة التحكم وكاميرات استاد بورسعيد
ياراجل وليه ماكانش فيه تفتيش وحمايه من الاول
وتحفظوا بعد خراب مالطه ماهو المثل بيقول
سرقوا الصندوق يا معلم لكن مفاتحه معايا
لما مش قادرين يآمنوا الماتش بلاها ماتش
طيب ازاي قدروا يامنوا انتخابات مجلس الشعب
ومجلس الصوره . قصدي مجلس الشوري
منعوا سمير زاهر رئيس اتحاد الكورة
واللواء احمد عبدالله محافظ بورسعيد اللي اصبح سابق
وكمان اللواء عصام سمك مدير الامن اللي برضه بقي سابق
من السفر طيب ماهما منعوا مبارك واولاده والوزاء وكل النظام السابق
خير حصل ايه معاهم الا انهم بيمثلوا مسرحيه بايخه وملينا منها
احنا عايزين المحصله النهائيه
تعالوا بقي علي الخطف
سائحتين امريكانيتين وفوق البيعه المرشد
اتخطفوا وبعد المفاوضات رجعوا
الخاطفين كانت مطالبهم الافراج علي مرتكبي سرقه شركه الصرافه
في شرم الشيخ
طيب مين المختطفين ؟
او حتي مين اللي عملوا التفاوض ؟
ماحدش يعرف
اصل الشعب المصري مش من حقه يعرف اي حاجه
الشعب المصري يا ساده ياكرام عامل زي الزوجه آخر من يعلم
امبارح برضه كان في هجوم علي قسم المرج وهرب من القسم 51 محتجز
اكيد فيهم بلطجيه ومسجلين خطر وحراميه ومظلومين
وعلي كل لون يابتسته
بيقولوا قبضوا علي 50 متهم بس في اي احداث مش عارفين
15 يوم حبس منهم 2 راحوا علي الاحداث
يعني اطفال
مصيبه والله حتي الاطفال بيستخدموهم في البلطجه والحرق والقتل
ربنا يلطف بينا
مذيع في القناه الاولي اصيب بطلق في عينه
وبيتعالج في ستشفي العيون بالدقي
ده لا بيه ولا عليه بينقل الاحداث
بس البلطجه مش بتفرق بين واحد والتاني
حريق في حديقه في شارع نوبار بالقاهره
امتد للمنزل رقم 8 الدور الاول وحرقه
تخيلوا تبقوا قاعدين امنين في بيتكم ممكن امان فين اكتر من البيت
وتلاقوا حريقه جتلكم من الشارع
تخيلوا كده ايه حيكون شعوركم ؟
وفي عربيه امن مركزي وقفت قدام محل جروبي في وسط البلد
السواق سابها وطلع يجري كان فيها حوالي 20 عسبكري بالالي
ماشاء الله ماشاءالله العساكربقي معاهم الي
يكونش العمده الالي واحنا ما اخدناش بالنا
المهم سابوهم عشان الثوار يموتوهم ويقولوا ان الثوار موتوا العساكر
ويتهموا الثوار بحيازه سلاح الي
بس الثوار طلعوا جدعان جابوا عربيتين اسعاف ونقلوا العساكر
لمديريه امن القاهره وكمان العربيه اللي كانوا فيها
وهتفوا والعساكرطالعه تركب عربيات الاسعاف
الثوار هما اللي حموكم
هو ده شعب مصر
مش قانون الطواريء لغوه الرساله اللي عايزنها نعرفها
هي استحملوا اللي حيحصل فيكم
حرقوا كمان مبني الضرائب وكانوا عايزين يوصلوا
لمبني وزارة الداخليه يحرقوها
مجلس الشعب بصراحه عجبني بس ياريت يفضل كده
ومايتنقلش لجدول الاعمال قبل مانعرف حصل ايه في كارثه بورسعيد
وياريت يوقف المظاهرات خلي الفلول يورونا حيعملوا ايه
الايام الجايه اكيد فيها جديد بس ياريت نتنقل للاحسن
تعبنا تعبنا تعبنا
مجلس الشعب يدعو المصريين للحذر
بس الحذر مش بيمنع القدر
الحكومه والعسكري لما بيقولوا نهيب بالشرفاء
بحس انها كلمه السر
يعني دي للبلطجيه واللصوص والحراميه
بيقولوهم انتشروا
يارب احمي مصر والمصريين
واوعوا اوعوا تقلبوا الصفحه
ابقوا معي
